Ðɔ nú Ye Ðɔ Emi Yí Wǎn nú Ye

Ong-Li nyí Kúnnuɖetɔ́ Jehovah tɔn ɖé ɖò Bulgarie. É nɔ kplɔ́n Biblu xá nawe e nɔ nyí Zlatka é; asú tɔn ka ɖò Biblu kplɔ́n wɛ ǎ. Ong-Li ɖɔ: “Ee mǐ ɖò xó ɖɔ dó gbɛzán xwédo tɔn jí wɛ é ɔ, un tinmɛ n’i ɖɔ é ɖò taji tawun ɖɔ mǐ ni nɔ ɖɔ nú mɛ e mǐ da é kpo vǐ mǐtɔn lɛ kpo ɖɔ mǐ yí wǎn nú ye. Zlatka kpɔ́n mì wǔblawúbla; é ɖɔ ɖɔ emi kún ɖɔ nú asú emitɔn alǒ vǐ nyɔnu emitɔn xwè tɛnnɛ mɛví ɔ kpɔ́n gbeɖé ɖɔ emi yí wǎn nú ye ó!”

Zlatka tinmɛ ɖɔ, “Un ɖò gbesisɔmɛ bo na wà nǔ ɖebǔ nú ye, amɔ̌, un sixu dó xógbe enɛ lɛ ǎ kpowun.” É ɖɔ gɔ́ na ɖɔ, “Nɔ ce ɖɔ nú mì kpɔ́n ɖɔ emi yí wǎn nú mì ǎ, gǎn’máa ce lɔ ka ɖɔ nú nɔ ce kpɔ́n ɖɔ emi yí wǎn n’i ǎ.” Ong-Li xlɛ́ Zlatka ɖɔ Jehovah ɖɔ dó jǐ ɖɔ emi yí wǎn nú Jezu. (Matie 3:17) É dó wusyɛn lanmɛ nú Zlatka ɖɔ é ni xoɖɛ sɛ́dó Jehovah dó xó enɛ wu, lobo tɛ́n kpɔ́n bá ɖɔ nú asú tɔn kpo vǐ nyɔnu tɔn kpo ɖɔ emi yí wǎn nú ye.

Ong-Li ɖɔ: “Azǎn atɔn gbè tɔn ɔ, Zlatka ɖɔ nú mì kpo awǎjijɛ kpo ɖɔ emi xoɖɛ sɛ́dó Jehovah bo byɔ alɔdó. Ee asú tɔn wá xwégbe é ɔ, é ɖɔ n’i ɖɔ emi kplɔ́n ɖò Biblu mɛ ɖɔ é ɖò taji tawun ɖɔ asì ɖé ni ɖó sísí kpo wanyiyi kpo nú asú tɔn. Enɛ gudo ɔ, é yì agbɔ̌n jí klewun, bo ɖɔ nú asú tɔn ɖɔ emi yí wǎn n’i tawun! Ee vǐ nyɔnu tɔn wá xwégbe é ɔ, é kpl’así kɔ n’i bo ɖɔ n’i ɖɔ emi yí wǎn n’i! Zlatka ɖɔ nú mì ɖɔ: ‘Agbɔ̌n ce jɛ dò lo. Ðò xwè enɛ lɛ bǐ vlamɛ ɔ, un kpéwú bo ɖɔ lee nǔ cí nú mì é ǎ, amɔ̌, Jehovah d’alɔ mì bɔ gudo mɛ ɔ, un kpéwú bo ɖɔ nú xwédo ce kpo nu kpo ɖɔ un yí wǎn n’i.’”

Ong-LI ɖɔ gɔ́ na ɖɔ: “Aklunɔzán gbla ɖokpo gudo ɔ, un xò gò Zlatka sín asú, b’ɛ ɖɔ: ‘Mɛ gegě ɖɔ nú mì ɖɔ Zlatka kún ɖó na kplɔ́n Biblu xá we ó, amɔ̌, é ɖò wɛn ɖɔ Biblu e kplɔ́n wɛ é ɖè é ɖò ɖagbe wà nú xwédo mǐtɔn wɛ tawun. Dìn ɔ, wanyiyi kpo awǎjijɛ kpo tíìn ɖò alɔwliwli mǐtɔn mɛ.’”