Jaan 14:27: “Fífá wɛ un jó dó nú mi”

“Fífá wɛ un jó dó nú mi; fífá ce wɛ un ná mi. Un ná mi lěe gbɛ ɔ nɔ ná mɛ gbɔn é ǎ. Mi ma nú ayi mitɔn gba dó ó, mi ma ɖi xɛsi ó.”—Jaan 14:27, Biblu gbɛ yɔ̌yɔ́ ɔ tɔn.

“Fífá wɛ un jó dó nú mi; fífá ce wɛ un ná mi. Un ná mi lěe gbɛ ɔ nɔ ná mɛ gbɔn ɔ ǎ; ado ma hu mi ó; xɛsi ma ɖi mi ó.”—Jaan 14:27, MAWUXÓWÉMA.

Tínmɛ Jaan 14:27 tɔn

Jezu zán xógbe énɛ́ lɛ́ dó ná gǎnjɛwú mɛsɛ́dó tɔn lɛ́ kpó wǎnyíyí kpó ɖɔ nú yě ɖo wǔvɛ́ lɛ́ mɛ hǔn, ado ní ma nɔ hu yě zɛ xwé wú ó. Kpó alɔdó Mawu tɔn kpó ɔ, yě sixú kpo ɖo fífá ayi mɛ tɔn ɖó wɛ Jezu ɖɔhun.

Fífá alɔkpa tɛ́ Jezu ka jó dó nú mɛsɛ́dó tɔn lɛ́, alǒ ná yě? Jezu ná yě fífá tɔn, énɛ́ wɛ nyí fífá e éɖésúnɔ mɛtún ɔ mɔ é. Fífá énɛ́ sín tínmɛ wɛ nyí ɖɔ gbeklánxámɛ alǒ yadónúmɛ hán ǎ. (Jaan 15:20; 16:33) È wa nǔ agɔ xá Jezu káká bo wá hu i có, é ɖó fífá ɖo taglomɛ, bo lɛ́ ɖó ɖo ayi mɛ. (Luki 23:27, 28, 32-34; 1 Piyɛ́ɛ 2:23) É ɖó fífá ɖo ayi mɛ, ɖó é tuun ɖɔ Tɔ́ émítɔn Jexóvaa yí wǎn nú émí, bɔ nǔ émítɔn nɔ lɛ́ nyɔ́ nukún tɔn mɛ.—Matíe 3:16, 17.

Lěe Jezu ná fífá mɛsɛ́dó tɔn lɛ́ gbɔn é wɛ nyí ɖɔ, é ná gǎnjɛwú yě ɖɔ émí kpó Tɔ́ émítɔn kpó bǐ yí wǎn nú yě, bɔ nǔ yětɔn nɔ lɛ́ nyɔ́ nukún émí mɛ bǐ tɔn mɛ. (Jaan 14:23; 15:9, 10; Hlɔ̌manu lɛ́ 5:1) Fífá énɛ́ e jínjɔ́n nǔ e yě ɖi ɖɔ Jezu nyí Vǐ Mawu tɔn é jí é xo hwihwɛ́ xɛsi yětɔn lɛ́ kpó nǔ e ɖo ayi mɛ ɖu nú yě wɛ lɛ́ é kpó. (Jaan 14:1) Jezu sɔ́ ná ɖo kpɔ́ xá yě cɔɔ lě ǎ có, é d’akpá ɖɔ gbigbɔ mímɛ́ Mawu tɔn ná d’alɔ yě bɔ yě ná ɖó jiɖiɖe kpó fífá ayi mɛ tɔn kpó. (Jaan 14:25-27) Ðó ahwanvú Jezu tɔn lɛ́ tuun ɖɔ nǔ émítɔn nyɔ́ Jexóva nukúnmɛ bɔ é lɛ́ ɖo gǔdo nú émí wútu ɔ, yě sixú ɖí xwi xá ninɔmɛ syɛ́nsyɛ́n lɛ́ kpó akɔ́nkpinkpan kpó.—Eblée lɛ́ 13:6.

Hwenu e Jezu ɖo ayǐkúngban jí é ɔ, mɛ lɛ́ ɖó walɔ bo nɔ byɔ́ fífá nú yěɖée lɛ́, hwenu e yě ɖo gbe dó yěɖée lɛ́ wɛ é. (Matíe 10:12, 13) Amɔ̌, Jezu byɔ́ fífá nú mɛsɛ́dó tɔn lɛ́ kpowun ǎ, é ná fífá yě wɛ. Gɔ́ ná ɔ, fífá e Jezu ná yě é gbɔn vo nú fífá ɖěbǔ e gbɛb ɔ sixú ná yě é. Gbɛ ɔ sixú ná fífá mɛ ɖó bǎ ɖé mɛ, gbɔn xɔ́ntɔn zunzun, dɔkun jijɛ, mɛ nukúnɖéjí nyínyí, alǒ tɛ́n ɖaxó mɛ ninɔ gblamɛ. Amɔ̌, fífá Jezu tɔn nɔ sín ninɔmɛ e mɛ è ɖe é wú ǎ. Fífá ayi mɛ tɔn e nɔ nɔ ayǐ káká sɔ́ yi é ɖé wɛ.

Nǔ e lɛ́ lɛ̌ dó Jaan 14:27 lɛ́ é

Jezu ɖɔ xó énɛ́ lɛ́ nú mɛsɛ́dó tɔn gbejínɔtɔ́ lɛ́ ɖo zǎn e jɛ nukɔn nú kú tɔn é mɛ. Ðo zǎn énɛ́ mɛ ɔ, é ɖɔ nú yě ɖɔ émí ná gosín yě gɔ́n ɖo malínmálín mɛ. (Jaan 13:33, 36) Énɛ́ dɔn mɛsɛ́dó tɔn lɛ́ dó aluwɛ mɛ. (Jaan 16:6) Énɛ́ wú ɔ, Jezu ná hwɛjijɔ e wú ado ma ɖó ná hu yě dó yiyi tɔn wú ǎ é yě, dó ná gǎnjɛwú yě.

Mɔ̌ ɖokpó ɔ, xó e Jezu ɖɔ lɛ́ é sixú dó wǔsyɛ́n lanmɛ nú klisánwun lɛ́ ɖo égbé. Mǐ lɔ sixú ɖó fífá. (2 Tɛsaloníkinu lɛ́ 3:16) Ényí mǐ húzú ahwanvú Jezu tɔn ɔ, mǐ nɔ kplɔ́n ɖɔ é kpó Tɔ́ tɔn Jexóva kpó yí wǎn nú mǐ, bɔ nǔ mǐtɔn nɔ lɛ́ nyɔ́ nukún yětɔn mɛ. (Kolósinu lɛ́ 3:15; 1 Jaan 4:16) Énɛ́ wú ɔ, ado ɖó ná nɔ hu mǐ zɛ xwé wú ǎ. Aniwú? Ðó Mawu ɖo ahwan mǐtɔn mɛ.—Ðɛhan 118:6; Filípunu lɛ́ 4:6, 7; 2 Piyɛ́ɛ 1:2.

Kpɔ́n video kléwún élɔ́ bo ná dó mɔ nǔ tawun tawun e jí wěma Jaan tɔn ɖɔ xó dó lɛ́ é.