Hlɔ̌manu lɛ́ 6:23: “Ðó axɔ́ e hwɛhuhu nɔ sú mɛ ɔ wɛ nyí kú; amɔ̌ nǔ e Mawu nɔ ná mɛ vɔ̌nu ɔ wɛ nyí gbɛ mavɔmavɔ”

“Axɔ́ e hwɛhuhu nɔ sú mɛ é wɛ nyí kú, amɔ̌, nǔ e Mawu nɔ ná mɛ é wɛ nyí gbɛ mavɔmavɔ gbɔn Klísu Jezu Aklúnɔ mǐtɔn gblamɛ.”—Hlɔ̌manu lɛ́ 6:23, Biblu gbɛ yɔ̌yɔ́ ɔ tɔn.

“Axɔ́ e hwɛhuhu nɔ sú mɛ ɔ wɛ nyí kú; amɔ̌ nǔ e Mawu nɔ ná mɛ vɔ̌nu ɔ wɛ nyí gbɛ mavɔmavɔ e mǐ ɖó ɖo bǔ e mǐ ɖe xá Klísu Jezu Aklúnɔ mǐtɔn mɛ é.”—Hlɔ̌manu lɛ́ 6:23, MAWUXÓWÉMA.

Tínmɛ Hlɔ̌manu lɛ́ 6:23 tɔn

Kpó xó énɛ́ lɛ́ kpó ɔ, mɛsɛ́dó Pɔ́lu tínmɛ ɖɔ gbɛtɔ́ lɛ́ nɔ kú ɖó yě nyí hwɛhutɔ́ wútu. É ɖo mɔ̌ có, Mawu sɔ́ nukúnɖíɖó jí wǔ ɖé ɖó nukɔn nú mɛsɛntɔ́ tɔn gbejínɔtɔ́ lɛ́, énɛ́ wɛ nyí nǔníná gbɛ mavɔmavɔ tɔn.

“Axɔ́ e hwɛhuhu nɔ sú mɛ é wɛ nyí kú.” Gbɛtɔ́ lɛ́ bǐ wɛ è ji kpó blɔ̌ kpó bɔ énɛ́ wú ɔ, yě nɔ ba ná hu hwɛ.a (Ðɛhan 51:7; Nǔnywɛ́tɔ́xó 7:20) Ðó è ji gbɛtɔ́ lɛ́ hwɛhutɔ́ wútu ɔ, yě nɔ kpo bo nɔ kú.—Hlɔ̌manu lɛ́ 5:12.

Bo ná dó tínmɛ linlin énɛ́ ɔ, Pɔ́lu jlɛ́ hwɛhuhu dó axɔ́ e gǎn ɖé nɔ sú é wú. Lěe azɔ̌watɔ́ ɖé nɔ ɖó nukún azɔ̌ e é wa é sín axɔ́ gbɔn é ɔ, mɔ̌ ɖokpó ɔ, gbɛtɔ́ lɛ́ sixú ɖó nukún kú, ɖó ninɔmɛ hwɛhuhu tɔn yětɔn wútu.

É ɖo mɔ̌ có, Pɔ́lu lɛ́ tínmɛ ɖɔ “mɛ e kú é ɔ, è ko tún kan n’i sín hwɛ tɔn lɛ́ sí.” (Hlɔ̌manu lɛ́ 6:7) Ényí mɛɖé kú ɔ, hwɛ e é hu lɛ́ é bǐ nɔ gosín kɔ tɔn. Énɛ́ wú wɛ hwɛjijɔ ɖěbǔ ma sɔ́ ɖe nú è ná lin ɖɔ mɛkúkú ɔ kpo ɖo wǔvɛ́ se wɛ ɖo fí ɖé ɖó nǔ e é wa nyi do wá yi lɛ́ é wútu ǎ. Nǔgbó ɔ, Biblu ɖɔ nyi wɛn ɖɔ mɛkúkú lɛ́ kún sɔ́ sixú lin nǔ alǒ wa nǔ ó, kabǐ nǔ kún sɔ́ sixú cí ɖě nú yě ó.—Nǔnywɛ́tɔ́xó 9:5.

“Amɔ̌, nǔ e Mawu nɔ ná mɛ é wɛ nyí gbɛ mavɔmavɔ gbɔn Klísu Jezu . . . gblamɛ.” “Axɔ́” e Mawu nɔ sú mɛ é gbɔn vo nú ée hwɛhuhu nɔ sú mɛ é; gbɛ mavɔmavɔ wɛ Mawu nɔ ná mɛ. È sixú lɛ́ tínmɛ xókwín dodó e è tínmɛ dó “nǔníná” é dó “nǔníná e è ma jɛxá ǎ é” alǒ “nǔníná xɔ akwɛ́.” É nɔ dó gesí nǔ e mɛɖé ma jɛxá ǎ bɔ è ná ɛ é. Gbɛtɔ́ hwɛhutɔ́ ɖěbǔ jɛxá hwlɛngán kpó gbɛ mavɔmavɔ kpó ǎ. (Ðɛhan 49:8, 9) É ɖo mɔ̌ có, Mawu nɔ ná gbɛ mavɔmavɔ e akwɛ́ ma sixú xɔ ǎ é mɛ ɖěɖěe nɔ ɖi nǔ nú Jezu lɛ́ é vɔ̌nu.—Jaan 3:16; Hlɔ̌manu lɛ́ 5:15, 18.

Nǔ e lɛ́ lɛ̌ dó Hlɔ̌manu lɛ́ 6:23 lɛ́ é

Xwe 56 H.M tɔn mɔ̌ wɛ Pɔ́lu wlán wěma élɔ́ sɛ́dó klisánwun e ɖo Hlɔ̌ma lɛ́ é. É cí ɖɔ mɛɖé lɛ́ ɖo klisánwun énɛ́ lɛ́ mɛ hwenɛ́nu bo ɖó linlin masɔgbe lɛ́ dó nǔbláwǔkúnúmɛ Mawu tɔn wú ɖɔhun. Tamɛ-núkplɔ́nmɛ Glɛ̌kinu lɛ́ tɔn wa nǔ dó yě wú bɔ yě sixú ko lin ɖɔ lě do émí hu hwɛ sɔ é ɔ, mɔ̌ do wɛ Mawu ná sɔ́ hwɛ kɛ émí sɔ. (Hlɔ̌manu lɛ́ 6:1) Mɛ ɖěvo lɛ́ sixú ko nɔ ɖɔ ɖɔ è kún sixú dɔn tó nú émí ó, ɖó émí kún sɔ́ ɖo Mɔyízisɛ́n ɔ glɔ́ ó wútu. (Hlɔ̌manu lɛ́ 6:15) Pɔ́lu tɛ ɖɛ̌ jí ɖo wěma tɔn mɛ ɖɔ ényí klisánwun lɛ́ jó yěɖée dó bɔ hwɛhuhu kpa acɛ ɖo gbɛzán yětɔn mɛ ɔ, yě kún ná sixú ɖu nǔbláwǔkúnúmɛ Mawu tɔn sín le ó.—Hlɔ̌manu lɛ́ 6:12-14, 16.

Xó Pɔ́lu tɔn lɛ́ ná gǎnjɛwú mawusɛntɔ́ lɛ́ égbé ɖɔ è ji yě hwɛhutɔ́ có, nukúnɖíɖó kpo ɖo te. Ényí yě se tónú nú nǔgbódodó walɔ ɖagbe tɔn Mawu tɔn lɛ́, bo ma jó yěɖée dó nú jlǒ nyanya yětɔn lɛ́ ǎ ɔ, Mawu d’akpá ɖɔ émí ná ná yě gbɛ mavɔmavɔ.—Hlɔ̌manu lɛ́ 6:22.

Kpɔ́n video kléwún élɔ́ bo ná dó mɔ nǔ tawun tawun e jí wěma Hlɔ̌manu lɛ́ tɔn ɖɔ xó dó lɛ́ é.