Gbǎví Kpɛví E Nɔ Na Nǔɖuɖu Gbigbɔ Tɔn Mɛ É Ðé

Kúnnuɖetɔ́ Jehovah tɔn lɛ nɔ mɔ nǔɖuɖu gbigbɔ tɔn dó alokan, alǒ tablɛti lɔ jí dìn tawun hú ɖ’ayǐ tɔn. Amɔ̌, ɖò akpá gbɛ̀ ɔ tɔn gegě xwé ɔ, nɔví mǐtɔn lɛ ɖó akwɛ kaka ɖé bo na yì Ɛntɛnɛti jí ǎ. Mɛ ɖevo lɛ ɖò fí e Ɛntɛnɛti ma nɔ w’azɔ̌ ɖè ganji, alǒ ɖebǔ ǎ é.

É ɖò mɔ̌ có, nɔví sunnu kpo nɔví nyɔnu kpo mǐtɔn lɛ gegě hɛn dìn ɔ, ye na nɔ yí wema lɛ kpo video lɛ kpo dó alokan alǒ tablɛti yetɔn lɛ jí, nú ye ma tlɛ ɖó Ɛntɛnɛti ɖebǔ ǎ ɔ nɛ! Nɛ̌ nǔ ka sixu nyí mɔ̌ gbɔn?

JW Box nyí gbǎví kpɛví ɖé, bɔ è nɔ sɔnǔ tɔn nú agun ɖěɖee ɖò xá e mɛ Ɛntɛnɛti ma nɔ w’azɔ̌ ɖè mɔ̌ ǎ lɛ é. Nǔ e nɔ hun Ɛntɛnɛti sín ali nú mɛ é (routeur) ɖé, tuto ɔdinatɛ́ɛ jí tɔn e Azɔ̌xɔsa Ɔdinatɛ́ɛ tɔn e ɖò Betɛli é sɔnǔ na é, wema e ɖò alokan alǒ tablɛti lɔ jí lɛ é kpo video kpo ɖěɖee ɖò jw.org jí lɛ é nɔ ɖò gbǎví kpɛví JW Box lɛ mɛ. Gbǎví ɖokpo nɔ xɔ ɖɔ̌la Amɛlika tɔn 75 mɔ̌ (caki kanɖé mɔ̌).

Ðò Kpléxɔ Axɔ́suɖuto ɔ tɔn mɛ ɔ, nɔví sunnu lɛ kpo nɔví nyɔnu lɛ kpo nɔ tá wifi e ɖò alokan alǒ tablɛti yetɔn lɛ jí é, bo nɔ yí wema lɛ kpo video lɛ kpo sín JW Box jí. Mɛ ɖěɖee tlɛ ɖó alokan alǒ tablɛti xóxó lɛ abǐ ee ma v’axi ǎ lɛ é lɔ sixu cá nǔ yetɔn xá JW Box ɔ. Amɔ̌, enyi agun ɖé ma ɖó Ɛntɛnɛti ǎ ɔ, nɛ̌ wema kpo video kpo yaɖeyaɖe lɛ ka na byɔ JW Box ɔ mɛ gbɔn? Sín hweɖenu jɛ hweɖenu ɔ, alaxɔ nɔ yí nǔ yaɖeyaɖe e tɔ́n ɖò jw.org jí lɛ é dó clé USB ɖé lɛ jí bo nɔ sɛ́dó, bɔ è nɔ sɔ́ dó JW Box ɔ mɛ lobo nɔ yí nǔ ɖěɖee ɖò clé USB ɔ jí lɛ é d’emɛ. Clé USB enɛ lɛ ɖokpo nɔ xɔ ɖɔ̌la Amɛlika tɔn 4 mɔ̌ (caki we mɔ̌).

Nɛ̌ JW Box ka ko d’alɔ nɔví mǐtɔn lɛ gbɔn? Tɔ́ ɖé nɔ nɔ République démocratique du Congo bo nɔ nyí Nathan Adruandra; é tinmɛ ɖɔ: “É ko lín dìn bɔ un nɔ tɛ́n kpɔ́n bo na yí nǔkpinkpɔn-dó-kplɔ́n-nǔ ‘Jehovah È, Hwi Wu Wɛ Un Ðeji Dó’ kpo Mi Flín Asì Lɔti Tɔn kpo. É ka nɔ kpa mì gbeɖé ǎ, bɔ enɛ kú awakanmɛ nú mì. Amɔ̌ dìn ɔ, un sixu yí video enɛ lɛ dó alokan ce jí, ye nɔ d’alɔ mǐ mɛ mɛjitɔ́ lɛ bɔ mǐ nɔ kplɔ́n vǐ mǐtɔn lɛ ganji.”

Nɔví e nɔ d’alɔ agun lɛ ɖò Nigéria bɔ JW Box yetɔn lɛ nɔ bɛ́ azɔ̌ é ɖé ɖɔ: “Nɔví lɛ nɔ kpɔ́n JW Box dó mɔ nǔnina bǔnɔ ɖé sín Jehovah gɔ́n. Xomɛ hun ye tawun ɖɔ, dìn ɔ, ye sixu yí wema kpo video kpo ɖěɖee ɖò Azɔ̌wanúgbá Mɛkplɔnkplɔn tɔn ɔ mɛ lɛ é.”

JW Box 1 700 jɛji wɛ è ko sɛ́dó nɔví mǐtɔn lɛ ɖò Aflika, Océanie kpo Amérique du Sud kpo, bɔ è ka lɛ́ ɖò tuto bló wɛ bo na sɛ́dó agun gegě ɖevo lɛ. Nɛ̌ mǐ ka nɔ mɔ akwɛ e nǔ enɛ lɛ nɔ ɖu é gbɔn? Akwɛ ɖěɖee è nɔ na dó nɔ gudo nú azɔ̌ e mǐ nɔ wà gbɔn gbɛ̀ ɔ bǐ lɛ é wɛ, bɔ gegě nɔ gbɔn donate.jw.org jí. É na cɛ́ nú mi nú alɔ hun dó na nǔ mitɔn.