Sɔhɛnmɛ Gbɔn Gbɛ̀ ɔ Bǐ Mɛ Ðò Jɛmɛji E Gbɔn Gbɛ̀ ɔ Bǐ Mɛ É Ðé Hwenu

Ðò mars 2020, hwenu e Tutoblonunu Gbɛ̀ ɔ Tɔn E Nɔ Kpé Nukún Dó Lanmɛ Na Nɔ Ganji Wu É (OMS) ɖɔ ɖɔ Covid-19 nyí jɛmɛji ɖé é ɔ, mɛ gegě sixu nɔ ma lin ɖɔ azɔnkwín ɔ na kpo ɖò nǔ gbà wɛ gbɔn gbɛ̀ ɔ bǐ mɛ kaka jɛ xwè ɖokpo jɛji gudo. Jɛmɛji ɔ zɔ́n bɔ gbɛtɔ́ livi mɔ̌kpan, kaka jɛ Kúnnuɖetɔ́ Jehovah tɔn lɛ jí sè wuvɛ̌ ɖò agbaza lixo, lee nǔ nɔ cí nú mɛ é linu kpo akwɛzinzan linu kpo. Nɛ̌ Kúnnuɖetɔ́ Jehovah tɔn lɛ ka bló tuto, bo ɖò sɔ̀ hɛn mɛ lɛ wɛ ɖò jɛmɛji elɔ hwenu gbɔn?

Sɔ̀ Hinhɛn Mɛ Ðěɖee Ðò Hudo Mɛ lɛ É

Ðò alixlɛ́mɛ Wěɖegbɛ́ Titoblonunutɔ́ lɛ tɔn Hagbɛ̌ Alixlɛ́mɛtɔ́ ɔ tɔn glɔ́ ɔ, è ɖó Wěɖegbɛ́ Sɔhɛnmɛ tɔn 950 jɛji ayǐ gbɔn gbɛ̀ ɔ bǐ mɛ ɖó Covid-19 ɔ wutu. Ðò ninɔmɛ ɖé lɛ mɛ ɔ, wěɖegbɛ́ ɔ bló tuto bɔ nɔví sunnu kpo nɔví nyɔnu kpo e ɖò xá ɔ mɛ lɛ é na d’alɔ, bɔ ɖò ninɔmɛ ɖevo lɛ mɛ ɔ, Kúnnuɖetɔ́ ɖé lɛ ɖu alɔ e acɛkpikpa lɛ nɔ dó toví lɛ é sín lè. Wěɖegbɛ́ enɛ lɛ nɔ lɛ́ dó gǎn bo nɔ bló tuto nú alɔdidó mɛ e tlɛ ɖò xá ɖevo lɛ mɛ lɛ é.

Ði kpɔ́ndéwú ɔ, lin tamɛ dó ninɔmɛ Paraguay tɔn jí. Xójlawema ɖé ɖɔ ɖɔ ɖó jɛmɛji ɔ wutu ɔ, “toví Paraguay tɔn gegě wɛ ma nɔ mɔ nǔ e na kpé ye bɔ ye na ɖu ǎ é.” Amɔ̌, wěɖegbɛ́ sɔhɛnmɛ tɔn e è ɖó ayǐ ɖò Paraguay lɛ é ko jɛ sáki e mɛ nǔ ɖè bɔ è sixu zán nú aklunɔzán gbla we lɛ é má nú xwédo lɛ jí. Nǔɖuɖu, nǔ ɖěɖee è na zán dó hɛn fí lɛ ɖó mimɛ̌ jí é, kpo nǔ e mɛɖesunɔ na zán dó fɛ́wǔ lɛ é kpo wɛ ɖò sáki enɛ lɛ mɛ, bɔ xwédo e mɛ mɛ ɛnɛ ɖè é ɖé sixu zán b’ɛ na kpé è ganji. Ðɔ̌la Amɛlika tɔn 30 mɔ̌ wɛ è nɔ zán dó sɔnǔ nú sáki ɖokpo ɖokpo.

Nɛ̌ sɔhɛnmɛzɔ́watɔ́ enɛ lɛ nɔ nya xɛ ɖò yeɖée jí bo ma nɔ sɔ́ Covid-19 ɔ ǎ gbɔn? Ye nɔ cyɔn nǔ awɔntínnu, bo nɔ nɔ zɔ nú yeɖée lɛ ganji lee é jɛxa gbɔn é. Ye nɔ lɛ́ mɔ nǔ jɛ wu ɖɔ azɔ̌xwé e ɖò nǔɖuɖu ɔ sà wɛ lɛ é nɔ sɔnǔ nú nǔɖuɖu lɛ ɖò fí e mɛ́ lɛ é, bo nɔ lɛ́ xwedó wlɛnwín xɛ̀ nya ɖò mɛɖée jí tɔn lɛ ganji. Enɛ xlɛ́ ɖɔ ye ɖó na mɔ nǔ jɛ wu ɖɔ mɛ e ɖò sáki sɔhɛnmɛ tɔn lɛ bɛ́ wá wɛ lɛ é dó awu e nɔ nya xɛ ɖò mɛ jí lɛ é, klɔ́ mɔ̌to yetɔn lɛ bo lɛ́ súnsún ye kpo sin e nɔ hu acɛ nú azɔnkwín lɛ é kpo, bɔ è lɛ́ súnsún fí e bɛ́ sáki lɛ ɖó wɛ è ɖè lɛ é kpo sin e nɔ hu acɛ nú azɔnkwín lɛ é kpo. Ðò vivɔnu ɔ, mɛ e ɖò sáki ɔ na zé nú nɔví lɛ wɛ lɛ é nɔ nɔ zɔ dó ye.

Nǔnina lɛ Zinzan Ganji

Kaka jɛ janvier 2021 ɔ, Wěɖegbɛ́ Titoblonunutɔ́ lɛ tɔn yí gbè bɔ è na zán ɖɔ̌la Amɛlika tɔn livi 25 jɛji dó hɛn sɔ mɛ lɛ ɖó Covid-19 wutu. Alaxɔ lɛ kpo wěɖegbɛ́ sɔhɛnmɛ tɔn lɛ kpo nɔ zán nǔnina lɛ ganji, bo nɔ dó gǎn lobo nɔ ɖè axi nǔ e hudo ye bɔ ye ɖò na xɔ wɛ lɛ é tɔn ganji. Ði kpɔ́ndéwú ɖò Chili ɔ, nɔví e ɖò tuto bló wɛ bo na hɛn sɔ mɛ lɛ é jló na xɔ̀ ayikún kilóo 750. Amɔ̌, kwɛ e è nɔ dó xɔ̀ ayikún ɔ na é jɛji donu we ɖò sun ɖokpo kpowun mɛ! Nɔví lɛ wá gbeta ɔ kɔn bo na xɔ ayikún ɔ ɖó kwɛ enɛ jí b’ɛ na bló ganxixo we é ɔ, ayikúnsatɔ́ ɔ ɖɔ nú ye ɖɔ zaanɖé dìn jɛn nǔxɔtɔ́ ɖevo ɖɔ ɖɔ emi kún sɔ́ ba ayikún e emi ko zɔ́n ɖ’ayǐ é ó. Enɛ ɔ, nǔsatɔ́ ɔ sɔ́ sà ayikún ɔ nú nɔví mǐtɔn lɛ axivɛ́nú tɔn ǎ, é nyɔ́ wà ɔ, kwɛ e jí é ɖè ɖò sun e wá yì é mɛ é jí wɛ é sà nú ye ɖó!

Amɔ̌, hwenu e nɔví mǐtɔn lɛ jló na yì sɔ́ ayikún ɔ é ɔ, nǔsatɔ́ ɔ tɛ́n kpɔ́n bá gbɛ́ ɖɔ emi kún na sà nú ye dó akwɛ e jí ye ko ɖɔ gbò dó é o, bo dóhwɛ ye ɖɔ ye nɔ má nǔɖuɖu lee é ma jɛxa gbɔn ǎ é lee tutoblonunu ɖevo lɛ nɔ bló gbɔn é ɖɔhun. Nɔví mǐtɔn lɛ xoɖɛ d’ayi mɛ nú táan klewun ɖé, bɔ enɛ gudo ɔ, nɔví ɖokpo tinmɛ nú nǔsatɔ́ ɔ ɖɔ agun ɖokpo ɖokpo ko ba dò nú nǔ bo tuùn mɛ e ɖò hudo mɛ nǔgbo nǔgbo lɛ é. Nɔví lɛ lɛ́ tinmɛ n’i ɖɔ ɖó aca mɛ e ɖò nǔ ɔ na yí wɛ lɛ é tɔn lɛ gbɔn vovo wutu ɔ, è sɔnǔ nú sáki sɔhɛnmɛ tɔn ɖokpo ɖokpo bɔ nǔ e ɖò ye mɛ lɛ é na sɔgbe xá hudo taji xwédo ɖokpo ɖokpo tɔn. Wǎgbɔ tɔn ɔ, ye na jiɖe nǔsatɔ́ ɔ ɖɔ Kúnnuɖetɔ́ Jehovah tɔn lɛ ɖesu wɛ nɔ sɔ́ jló dó na akwɛ, bo nɔ lɛ w’azɔ̌ dó d’alɔ. Nǔ enɛ e é sè é jiwǔ n’i. É sɔ́ nyí gbè kɛɖɛ wɛ nǔsatɔ́ ɔ yí bo na sa ayikún ɔ nú nɔví mǐtɔn lɛ dó kwɛ enɛ jí ǎ, loɔ, é na ayikún kilóo 400 dó ayikún e ye xɔ ɖò gɔ̌n tɔn hweɖevonu é jí.

“Xlɛ̌ Wanyiyi Adodwé ɔ Tɔn”

Mɛ atɔ́ɔ́n wɛ ɖò Lusu, ee nyí asúkúsi mɛxomɔ e nɔ nɔ Libéria é ɖé sín xwédo mɛ. Ee ye ɖò nǔ ɖu wɛ bo ɖò tɛ́si bló wɛ zǎnzǎn gbè ɖokpo é ɔ, Lusu sín vivǔ sunnu ee ɖó xwè tɛnwe é ɖ’ayi wu ɖɔ nǔɖuɖu ɖě kún sɔ́ kpò ɖò xɔ ɔ mɛ ó. É kanbyɔ ɖɔ “Etɛ mǐ ka na ɖu?” Lusu na ɛ jiɖe ɖɔ emi ko xoɖɛ bo byɔ alɔgɔ́ Jehovah tɔn, bo ɖeji ɖɔ Jehovah na na nǔ e ye na ɖu é ye. Gbè nɛ gbè gbadanu ɔ, mɛxo agun tɔn lɛ ylɔ́ Lusu bo ɖɔ n’i ɖɔ é ni wá yí sɔhɛnmɛ núɖuɖu ɖé lɛ. É ɖɔ: “Vivǔ ce ɖɔ nú mì ɖɔ emi tuùn dìn ɖɔ Jehovah sixu sè ɖɛ lɛ bo na sinkɔn nú ye ɖó é na sinkɔn nú ɖɛ ce wutu.”

Nawe ɖé ɖò République démocratique du Congo bɔ xɔ tɔn ɖò xwédo Kúnnuɖetɔ́ Jehovah tɔn lɛ tɔn ɖé sín akpá. Ee é mɔ bɔ nǔɖitɔ́ hatɔ́ lɛ hɛn nǔɖuɖu wá nú xwédo ɔ gudo é ɔ, é ɖɔ: “Ðò jɛmɛji ɔ gudo ɔ, mǐ na huzu Kúnnuɖetɔ́ Jehovah tɔn ɖó ye kpé nukún dó nɔví yetɔn lɛ wu ɖò hwenu vɛwǔ elɔ mɛ wutu.” Asú tɔn kanbyɔ ɛ ɖɔ: “Mɔ̌likúnti ɖokpo kpowun wutu wɛ a na huzu Kúnnuɖetɔ́ Jehovah tɔn à?” É yí gbè n’i ɖɔ: “É nyí mɔ̌ ǎ, amɔ̌, mɔ̌likúnti enɛ ɔ, xlɛ̌ wanyiyi adodwé ɔ tɔn wɛ.”

Kúnnuɖetɔ́ Jehovah tɔn lɛ kpéwú bo yawǔ d’alɔ nɔví sunnu kpo nɔví nyɔnu kpo mǐtɔn e ɖò hudo mɛ ɖò jɛmɛji elɔ hwenu lɛ é ɖó nǔnina e a hun alɔ dó na lɛ é wutu. É na cɛ́ nú we nú nǔnina e a xwedó wlɛnwín e ɖò donate.jw.org jí lɛ é bo na lɛ é.