È Xlɛ́ Kpléɖókpɔ́ Ðaxó ɔ Gbɔn Telée Jí, Bo Lɛ́ Xò Ðò Hladio

Kpléɖókpɔ́ ɖaxó 2020 tɔn nyí kpléɖókpɔ́ manawɔn ɖé. É wɛ nyí kpléɖókpɔ́ mǐtɔn nukɔntɔn e è yí dó kan jí gbɔn gbɛ̀ ɔ bǐ mɛ bo sɔ́ ɖó Ɛntɛnɛti jí é! É ɖò mɔ̌ có, ɖò Malawi kpo Mozambique kpo ɔ, gegě nɔví sunnu kpo nɔví nyɔnu kpo mǐtɔn lɛ tɔn zán Ɛntɛnɛti cobo kpɔ́n kpléɖókpɔ́ ɔ ǎ. Nɛ̌ nǔ ka nyí mɔ̌ gbɔn?

Wěɖegbɛ́ Titoblonunutɔ́ lɛ tɔn kpo wěɖegbɛ́ Mɛkplɔnkplɔn tɔn kpo Hagbɛ̌ Alixlɛ́mɛtɔ́ ɔ tɔn yí gbè bɔ è na xlɛ́ kpléɖókpɔ́ ɔ gbɔn televiziɔn jí bo lɛ́ xò ɖò hladio ɖò Malawi kpo Mozambique kpo kɛɖɛ. Etɛwu é ka ɖò dandan ɖɔ è ni wà mɔ̌? Malawi nyí fí e Ɛntɛnɛti v’axi ɖè hugǎn ɖò gbɛ̀ ɔ mɛ lɛ é ɖokpo, enɛ wu ɔ, Kúnnuɖetɔ́ kpɛɖé jɛn nɔ yì Ɛntɛnɛti jí. William Chumbi e ɖò Wěɖegbɛ́ Alaxɔ tɔn Malawi tɔn mɛ é tinmɛ ɖɔ: “Hladio kpo televiziɔn kpo kɛɖɛ jɛn nyí ali ɖěɖee nu nɔví sunnu lɛ kpo nɔví nyɔnu lɛ kpo na mɔ nǔɖuɖu gbigbɔ tɔn enɛ ɖè lɛ é.” Luka Sibeko lɔ ɖò Wěɖegbɛ́ Alaxɔ Malawi tɔn mɛ. É ɖɔ gɔ́ na ɖɔ: “Enyi mǐ ma kpɔ́n kpléɖókpɔ́ ɔ gbɔn telée jí bo lɛ́ ɖótó ɖò hladio ǎ ɔ, nɔví e ɖò alaxɔ mǐtɔn sín acɛ mɛ lɛ é kpɛɖé kpowun jɛn na sixu ɖu lè kpléɖókpɔ́ ɔ tɔn.” Ðò Mozambique ɖesu ɔ, nú è tlɛ jó Ɛntɛnɛti xó ɔ dó ɔ, nɔví kpɛɖé jɛn sixu kpéwú bo xɔ alokan, tablɛti alǒ nǔ mɔ̌hun ɖagbe e jí ye na kpɔ́n kpléɖókpɔ́ ɔ ɖè é.

È Bló Tuto Lɛ

Ðó jɛmɛji COVID-19 wutu ɔ, televiziɔnxwé kpo hladioxwé kpo ɖé lɛ ko nɔ xlɛ́ alǒ nɔ xò kplé agun tɔn mǐtɔn lɛ ɖ’ayǐ.a Nɔví mǐtɔn lɛ ylɔ́ xwé enɛ lɛ, bo byɔ ganmɛ ye d’eji bonu ye na xlɛ́ kpléɖókpɔ́ ɔ alǒ xò.

Ðò Malawi ɔ, tagba ɖé kpannukɔn nɔví mǐtɔn lɛ. Hwɛhwɛ ɔ, televiziɔnxwé alǒ hladioxwé lɛ nɔ ɖɔ ɖɔ axisinɔ lɛ kún sixu mɔ ganmɛ hú ganxixo ɖokpo ó. Ado nɔ hu televiziɔnxwé alǒ hladioxwé lɛ ɖɔ tuto gaga enɛ kún na dɔn tóɖómɛtɔ́ lɛ ó. Amɔ̌, nɔví mǐtɔn lɛ tinmɛ ɖɔ azɔ̌ mǐtɔn nɔ d’alɔ mɛ lɛ. È tlɛ glɔ́n mɛ dó xɔ mɛ có, mǐ nɔ má wɛnɖagbe kɔfánúmɛ tɔn e ɖò Biblu mɛ é xá gbɛtɔ́ lɛ; enɛ sixu d’alɔ ye bɔ ye na nyí toví ɖagbe lɛ bo lɛ́ ɖó xwédo awǎjijɛ tɔn ɖé. Ee televiziɔnxwé kpo hladioxwé kpo lɛ sè mɔ̌ é ɔ, ye yí gbè nú ganmɛ é nɔví lɛ byɔ d’eji é.

Ðò Malawi ɔ, televiziɔnxwé ɖokpo kpo hladioxwé ɖokpo kpo wɛ xlɛ́ kpléɖókpɔ́ ɔ alǒ xò; ye mɛ we lɛ bǐ wɛ flá tò ɔ bǐ jí bɔ gbɛtɔ́ livi mɔ̌kpan sixu kpɔ́n alǒ ɖótó. Ðò Mozambique ɔ, televiziɔnxwé ɖokpo kpo hladioxwé 85 kpo wɛ xlɛ́ kpléɖókpɔ́ ɔ alǒ xò.

Ðò tò we lɛ bǐ mɛ ɔ, ɖɔ̌la 28 227b wɛ è zán dó xlɛ́ kpléɖókpɔ́ ɔ gbɔn televiziɔn jí, bo zán ɖibla yì ɖɔ̌la 20 000 dó xò ɖò hladio jí. Hladio lɛ sín akwɛ gbɔn vovo bɛ́sín ɖɔ̌la 15 jí nú hladioxwé kpɛví ɖé jɛ ɖɔ̌la 2 777 nú hladioxwé e flá tò ɔ bǐ jí é ɖé.

Nɔví mǐtɔn lɛ w’azɔ̌ syɛnsyɛn dó zán nǔnina lɛ ganji. Ði kpɔ́ndéwú ɔ, ɖò Malawi ɔ, ye ɖɔ xá mɛ lɛ bɔ ye ɖè akwɛ lɛ kpò, bɔ ɖò kpɔnwun ɛnɛ jí ɔ, ye ɖè ɖɔ̌la ayizɛ́n kpò. Enɛ zɔ́n bɔ lè e è ɖu é bǐ kplékplé yì ɖɔ̌la 1 711. Ðò Mozambique ɔ, televiziɔnxwé kpo hladioxwé kpo ɖé lɛ sɔ́ jlǒ dó ɖè akwɛ yetɔn lɛ dó dò, ɖó nǔgbo e mǐ nɔ ɖɔ, bo nɔ lɛ́ yawǔ sú axɔ́ mǐtɔn lɛ dó ganmɛ é wu.

Nǔsumɛnukúnmɛ Ðiɖexlɛ́

É sù nɔví mǐtɔn lɛ nukún mɛ tawun ɖɔ ye kpéwú bo kpɔ́n kpléɖókpɔ́ ɔ alǒ sè ɖò xá yetɔn lɛ mɛ. Patrick e nyí mɛxo agun tɔn ɖé ɖò Malawi é ɖɔ: “Mǐ dókú nú nɔví e ɖò Hagbɛ̌ Alixlɛ́mɛtɔ́ ɔ mɛ lɛ é nú nǔ e ye wà nú mǐ ɖò jɛmɛji ɔ hwenu lɛ é bǐ.” Isaac e gosin Malawi é lɔ ɖɔ: “Mǐ ɖó tablɛti, alokan alǒ nǔ mɔ̌hun ɖevo ǎ, enɛ wu ɔ, é sù nukún mǐtɔn mɛ tawun ɖɔ tutoblonunu Jehovah tɔn bló tito bɔ mǐ ɖótó kpléɖókpɔ́ ɔ blebu gbɔn hladio jí. Nǔ e mɛ tito enɛ tɔ́n kɔ dó é wɛ nyí ɖɔ, nyi kpo xwédo ce kpo blebu ɖu lè kpléɖókpɔ́ ɔ tɔn. Enɛ xlɛ́ mǐ nyi wɛn ɖɔ Jehovah yí wǎn nú togun tɔn.”

Kpléɖókpɔ́ ɖaxó 2020 tɔn wɛ nyí kpléɖókpɔ́ ɖaxó nukɔntɔn ɔ nú wɛnjlatɔ́ ɖé ɖò Mozambique. É ɖɔ: “Tito e è bló bɔ mǐ kpɔ́n kpléɖókpɔ́ ɔ ɖò telée é flín mì ɖɔ Jehovah wɛ nyí Mawu Nǔbǐwukpétɔ́ ɔ. Jɛmɛji ɔ glɔ́n ali n’i bonu é gɔn nǔɖuɖu gbigbɔ tɔn na mǐ ǎ, é lɛ́ na mǐ tlɔlɔ ɖò xɔgblo ce mɛ. Un mɔ wanyiyi e ɖò togun Jehovah tɔn mɛ é sín xlɛ̌ nyi wɛn. Un kúdeji ɖɔ sinsɛn nǔgbo ɔ ɖíe.”

Mɛxo agun tɔn e nɔ nyí Wyson é ɖɔ: “Un jló na dókú nú deví gbejinɔtɔ́ ɔ, ɖó ali e nu é kpé nukún mǐ wu ɖè ɖò jɛmɛji ɔ hwenu é wu. Tito enɛ e è bló bɔ mǐ sè kpléɖókpɔ́ ɔ ɖò hladio, alǒ kpɔ́n ɖò telée é d’alɔ mǐ mɛ e ɖò xwi ɖí xá akwɛyózó wɛ ɖò akpáxwé gbɛ̀ ɔ tɔn elɔ e jiya tawun lɛ é gegě, bɔ mǐ mɔ tuto ɔ, bo lɛ́ ɖu lè tɔn.”

Nú kpléɖókpɔ́ ɖaxó 2021 tɔn ɔ, wěɖegbɛ́ Titoblonunutɔ́ lɛ tɔn kpo wěɖegbɛ́ Mɛkplɔnkplɔn tɔn kpo lɛ́ yí gbè bɔ è na xlɛ́ kpléɖókpɔ́ ɔ gbɔn televiziɔn jí, bo lɛ́ xò ɖò hladio nú tò cyancyan ɖé lɛ kɛɖɛ. Nɛ̌ mǐ ka nɔ mɔ akwɛ dó xlɛ́ kpléɖókpɔ́ ɔ alǒ xò ɖò ali enɛ nu gbɔn? Akwɛ ɖěɖee è nɔ na dó nɔ gudo nú azɔ̌ e mǐ nɔ wà gbɔn gbɛ̀ ɔ bǐ mɛ lɛ é wɛ nɔ nyí tɔn. Wlɛnwín ɖěɖee ɖò donate.jw.org jí lɛ é wɛ è zán dó na akwɛ enɛ lɛ gegě. É na cɛ nú mi nú alɔhundónanǔmɛ mitɔn.