Tínmɛ e ɖo do é

a É nɔ vɛ́ wǔ tawun ɖɔ è ní mɔ mɛ e nɔ wa nǔ jlɔ́jlɔ́ lɛ́ é ɖo gbɛ nyanya élɔ́ mɛ. É ɖo mɔ̌ có, gbɛtɔ́ lǐvi mɔ̌kpán nɔ wa nǔ jlɔ́jlɔ́ ɖo égbé. É ɖo wɛn ɖɔ hwi lɔ ɖo yě mɛ. A nɔ wa nǔ gbɔn mɔ̌, ɖó a yí wǎn nú Jexóva, bɔ Jexóva ka yí wǎn nú nǔjlɔ́jlɔ́wiwa. Nɛ̌ mǐ ka sixú yí wǎn nú nǔjlɔ́jlɔ́wiwa hú gǎn gbɔn? Ðo xóta élɔ́ mɛ ɔ, mǐ ná ɖɔ xó dó nǔ e nǔjlɔ́jlɔ́wiwa nyí é kpó lěe mǐ nɔ ɖu le wǎn e mǐ yí nú nǔjlɔ́jlɔ́wiwa é tɔn gbɔn é kpó jí. Mǐ ná lɛ́ ɖɔ xó dó afɔ ɖěɖěe mǐ sixú ɖe dó ná hlɔ̌nhlɔ́n wǎn e mǐ yí nú jijɔ énɛ́ é jí.