3. Etɛ Jehovah ka nɔ ɖó nukún ɖò xɔ́ntɔn tɔn lɛ sí?

Jehovah yí wǎn nú gbɛtɔ́ lɛ bǐ ɖò kpaa mɛ, “bo ka nɔ zun xɔ́ntɔn xá mɛ e nɔ wà nǔ jlɔjlɔ lɛ.” (Nǔnywɛxó 3:32) Jehovah nɔ ɖó nukún ɖò xɔ́ntɔn tɔn lɛ sí ɖɔ ye ni nɔ tɛ́n kpɔ́n bo nɔ wà nǔ e nɔ nyɔ́ nukún emitɔn mɛ lɛ é, bo nɔ nyi alɔ nú nǔ ɖěɖee emi ma nɔ ba ǎ lɛ é. Mɛɖé lɛ sixu mɔ ɖɔ emi kún sixu zán gbɛ̀ sɔgbe xá nǔgbododó Jehovah tɔn e kúnkplá nǔ ɖagbe kpo nǔ nyanya kpo lɛ é gbeɖé ó. É ɖò mɔ̌ có, nǔblawukúnúmɛtɔ́ wɛ Jehovah nyí. É nɔ yí mɛ ɖebǔ e yí wǎn n’i nǔgbo nǔgbo bo nɔ wà nǔ e wu é kpé é bǐ bo na dó hɛn xomɛ tɔn hun é.—Ðɛhan 147:11; Mɛsɛ́dó 10:34, 35.

Mɛ bǐ wɛ nɔ ba na ɖó xɔ́ntɔn e nɔ ɖɔ nǔgbo lɛ é. Jehovah ɖesu nɔ ba ɖɔ xɔ́ntɔn emitɔn lɛ ni nɔ ɖɔ nǔgbo. Amɔ̌, enɛ nɔ bɔwǔ ǎ, ɖó mɛ gegě wɛ nyí nǔgbomaɖɔtɔ́ ɖò gbɛ̀ ɔ mɛ. Lè tɛ lɛ nǔgbo ɖiɖɔ ɖò nǔ bǐ mɛ ka nɔ hɛn wá?

1. Hwɛjijɔ taji hugǎn tɛ wu mǐ ka ɖó na nɔ ɖɔ nǔgbo?

Enyi mǐ nɔ ɖɔ nǔgbo nú mɛ ɖevo lɛ ɔ, mǐ nɔ xlɛ́ Jehovah ɖɔ mǐ yí wǎn n’i bo lɛ́ ɖó sísí n’i. Dǒ nukúnmɛ kpɔ́n: Jehovah tuùn nǔ e mǐ nɔ lin lɛ é kpo nǔ e mǐ nɔ wà lɛ é kpo bǐ. (Eblée lɛ 4:13) Enyi mǐ ɖɔ nǔgbo ɔ, é nɔ mɔ, bɔ xomɛ nɔ hun i. Xó tɔn ɖɔ: ‘Jehovah gbɛ́ wǎn nú mɛdídá lɛ, bo ka nɔ zun xɔ́ntɔn xá mɛ e nɔ wà nǔ jlɔjlɔ lɛ é.’—Nǔnywɛxó 3:32.

2. Ninɔmɛ tɛ lɛ mɛ mɔ̌ mǐ ka na nɔ ɖɔ nǔgbo ɖè ayihɔngbe ayihɔngbe?

Jehovah byɔ mǐ ɖɔ: “Mɛ ɖokpo ɖokpo ni nɔ ɖɔ nǔgbo nú nɔzo tɔn.” (Zakalíi 8:16, 17) Etɛ ka nyí tinmɛ enɛ tɔn? Enyi mǐ ɖò xó ɖɔ nú hɛ̌nnumɔ mǐtɔn lɛ, azɔ̌gbɛ́ mǐtɔn lɛ, nɔví sunnu kpo nɔví nyɔnu kpo mǐtɔn lɛ, alǒ gǎntosɔ́ lɛ wɛ ɔ, mǐ ɖó na ɖó adingban nú ye alǒ blɛ́ ye ǎ. Mɛ e nɔ ɖɔ nǔgbo é nɔ j’ajo dó mɛ ɖevo lɛ alǒ xò ye ɖu ǎ. (Xà Nǔnywɛxó 24:28 kpo Efɛzinu lɛ 4:28 kpo.) Mɛ mɔ̌hun nɔ lɛ́ sú takwɛ e é ɖu lɛ é bǐ. (Hlɔmanu lɛ 13:5-7) Ðò ninɔmɛ enɛ lɛ kpo ɖevo lɛ kpo mɛ ɔ, mǐ na “nɔ zán gbɛ̀ ɖagbe [alǒ, nɔ ɖɔ nǔgbo] ɖò nǔ bǐ mɛ.”—Eblée lɛ 13:18.

3. Lè tɛ lɛ nǔgboɖiɖɔ ka nɔ hɛn wá?

Enyi mɛ ɖevo lɛ tuùn mǐ dó tuùn mɛ e nɔ ɖɔ nǔgbo é ɖé ɔ, ye nɔ ɖeji dó mǐ wu. Mǐ nɔ bló bɔ agun ɔ nɔ cí xwédo wanyiyinɔ ɖé ɖɔhun, lobɔ mɛ e ɖ’emɛ lɛ é nɔ mɔ ɖɔ emi ɖò ayijayǐ mɛ. Mǐ nɔ ɖó ayixa mímɛ́ ɖé. Nǔgboɖiɖɔ mǐtɔn sixu lɛ́ zɔ́n bɔ mɛ e ma ko ɖò agun ɔ mɛ ǎ lɛ é na “ɖó sísí nú nǔkplɔnmɛ e ɖɔ xó dó Mawu Mɛhwlɛngántɔ́ mǐtɔn wu ɔ,” bo na lɛ́ ba na sɛn Jehovah.—Titu 2:10.

BA DÒ NÚ NǓ D’EJI

4. Nǔgboɖiɖɔ nɔ hun xomɛ nú Jehovah

Xà Ðɛhan 44:22 kpo Malacíi 3:16 kpo, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:

• Enyi mǐ ɖi ɖɔ mǐ hɛn ɔ, mǐ na sɔ́ nǔ e nyí nǔgbo é hwlá ɔ, etɛwu a ka lin ɖɔ é kún nyí nǔnywɛnú ó?

• Enyi mǐ ɖɔ nǔgbo hwenu e mɔ̌ wiwa tlɛ vɛwǔ é ɔ, nɛ̌ nǔ ka nɔ cí nú Jehovah bɔ a lin?

5. Nɔ ɖɔ nǔgbo hwebǐnu

VIDEO: Etɛ ka Nɔ Gɔ́ Sò nú Awǎjijɛ?: Ayixa Mímɛ́ ɖé Ðiɖó (2:32)

Xà Eblée lɛ 13:18, enɛ gudo hǔn, mi ɖɔ xó ɖó kpɔ́ dó lee mǐ sixu nɔ ɖɔ nǔgbo ɖò ninɔmɛ elɔ lɛ mɛ gbɔn é wu:

• Ðò xwédo mɛ.

• Ðò azɔ̌mɛ alǒ wemaxɔmɛ.

• Ðò ninɔmɛ ɖevo lɛ mɛ.

6. Nǔgboɖiɖɔ nɔ hɛn lè wá nú mǐ

Nǔgboɖiɖɔ sixu dɔn tagba ɖé lɛ wá. Amɔ̌, enyi hwenu wá ɖò yiyi wɛ ɔ, a na mɔ ɖɔ nǔ ɖagbe hugǎn e a sixu wà é nɛ. Xà Ðɛhan 34:13-17, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Nɛ̌ nǔgboɖiɖɔ ka nɔ bló bɔ gbɛzán mɛtɔn nɔ kpɔ́n te hugǎn gbɔn?

1. Asú kpo asì kpo e nɔ ɖɔ nǔgbo lɛ é nɔ hɛn alɔwliwli yetɔn lidǒ

2. Enyi azɔ̌watɔ́ ɖé nɔ ɖɔ nǔgbo ɔ, gǎn tɔn nɔ ɖeji dó wǔtu tɔn

3. Toví ɖěɖee nɔ ɖɔ nǔgbo lɛ é nɔ ɖó nyikɔ ɖagbe ɖò gǎntosɔ́ lɛ nukɔn

ETƐ LƐ A KA KPLƆ́N?

Jehovah jló ɖɔ xɔ́ntɔn emitɔn lɛ ni nɔ ɖɔ nǔgbo ɖò nǔ e ye nɔ ɖɔ lɛ é kpo nǔ e ye nɔ wà lɛ é kpo bǐ mɛ.

Vɔ̌gbɔnji

• Ðɔ ninɔmɛ e mɛ mǐ na nɔ ɖɔ nǔgbo ɖè é ɖé lɛ

• Enyi mǐ ɖi ɖɔ mǐ hɛn ɔ, mǐ na sɔ́ nǔ e nyí nǔgbo é hwlá ɔ, etɛwu é ma ka nyí nǔnywɛnú ǎ?

• Etɛwu a ka jló na nɔ ɖɔ nǔgbo hwebǐnu?

KÍJÉ

Nɛ̌ mɛjitɔ́ lɛ ka sixu kplɔ́n vǐ yetɔn lɛ bɔ ye na nɔ ɖɔ nǔgbo gbɔn?

Nɔ Ðɔ Nǔgbo (1:44)

Lè tɛ lɛ akpá mǐtɔn lɛ ɖiɖe ka nɔ hɛn wá nú mǐ?

Nɔ Ðè Akpá Towe lɛ Bá Mɔ Nyɔna (9:09)

Kpɔ́n ɖɔ enyi è na bo tlɛ nɔ zán takwɛ lɛ nyi dò ɔ, mǐ ka ɖó na sú ye à jí.

“A ka Ðó Na Sú Takwɛ lɛ Wɛ À?” (Atɔxwɛ [Flansegbe], 1^er septembre 2011)

Etɛ ka sísɛ́ nya e ma nɔ ɖɔ nǔgbo ɖ’ayǐ ǎ é ɖé bɔ é huzu gbɛzán tɔn lobo jɛ gbɛ̀ jlɔjlɔ zán jí?

“Un Mɔ Ðɔ Jehovah Nɔ Kú Nǔblawu nú Mɛ Bo Nɔ Lɛ́ Sɔ́ Hwɛ Kɛ Mɛ” (Atɔxwɛ [Flansegbe], 1^er mai 2015)

2. Etɛwu lee mǐ nɔ cyan xɔ́ntɔn mǐtɔn lɛ gbɔn é ka nɔ nyí nǔ taji nú Jehovah?

Jehovah nɔ xwè sɔ dó cyan xɔ́ntɔn tɔn lɛ. É “nɔ zun xɔ́ntɔn xá mɛ e nɔ wà nǔ jlɔjlɔ lɛ” é. (Nǔnywɛxó 3:32) Nú mǐ cyan xɔ́ntɔn ɖěɖee ma yí wǎn nú Jehovah ǎ lɛ é ɔ, nɛ̌ nǔ ka na cí n’i? É na kú wǔ n’i tawun! (Xà Jaki 4:4.) Ðò alɔ ɖevo mɛ ɔ, nú mǐ nyi alɔ nú gbɛ̌ nyanya lɛ, bo sɛkpɔ́ Jehovah kpo mɛ e yí wǎn n’i lɛ é kpo ɔ, é na hun xomɛ n’i tawun, bɔ é na sɔ́ mǐ dó ɖó xɔ́ntɔn tɔn lɛ.—Ðɛhan 15:1-4.