Biblu kplɔnkplɔn ɖó lè, amɔ̌, é sixu nɔ ma bɔwǔ hwebǐnu. Hweɖelɛnu ɔ, a sixu nɔ kanbyɔ hwiɖée ɖɔ, emi ka na kpéwú bo kpò ɖò Biblu ɔ kplɔ́n wɛ à jí. Etɛwu é ka nyɔ́ ɖɔ a ni dó gǎn bo kpò ɖ’ewu? Etɛ lɛ ka sixu d’alɔ we bɔ enyi wuvɛ̌ lɛ na bo ɖò finɛ ɔ, a na kpò ɖò kan ɖó d’ewu wɛ?

1. Nɛ̌ Biblu kplɔnkplɔn ka sixu d’alɔ we gbɔn?

“Mawuxó ɔ ɖò gbɛ̀, bo ɖó hlɔnhlɔn.” (Eblée lɛ 4:12) Biblu sixu d’alɔ we, ɖó é ɖè linlin Mawu tɔn lɛ kpo lee nǔ nɔ cí n’i dó wǔ we é kpo xlɛ́. É nɔ d’alɔ mɛ bɔ è nɔ tuùn nǔ, nyɔ́nǔi bo nɔ lɛ́ ɖó nukúnɖiɖó. Taji bǐ ɔ, Biblu nɔ d’alɔ mɛ bɔ è nɔ huzu xɔ́ntɔn Jehovah tɔn. Nú a ɖò Biblu ɔ kplɔ́n wɛ ɔ, tɛn na hlɔnhlɔn e é ɖó é wɛ a ɖè bonu é na hɛn gbɛzán towe kpɔ́n te nɛ.

2. Etɛwu mǐ ka ɖó na tuùn lě dò nǔgbo Biblu tɔn lɛ ɖò taji sɔ é?

Nǔgbo e ɖò Biblu mɛ lɛ é cí dɔkun xɔ akwɛ lɛ ɖɔhun. Enɛ wu wɛ Biblu dó wusyɛn lanmɛ nú mǐ ɖɔ mǐ ni “xɔ nǔgbo, bo ma sà gbeɖé ó.” (Nǔnywɛxó 23:23, nwt) Enyi afɔklɛ́nnú lɛ na bo ɖò finɛ, bonu mǐ hɛn lě dò nǔgbo Biblu tɔn lɛ ɖò taji sɔ é ayi mɛ ɔ, mǐ na wà nǔ e wu mǐ kpé é bǐ bo na kpò ɖò nǔ kplɔ́n wɛ.—Xà Nǔnywɛxó 2:4, 5.

3. Nɛ̌ Jehovah ka sixu d’alɔ we bɔ a na kpò ɖò nǔ kplɔ́n wɛ gbɔn?

Ðó Jehovah wɛ nyí Gbɛɖotɔ́ Nǔbǐwukpétɔ́ towe bo lɛ́ nyí Xɔ́ntɔn towe wutu ɔ, é ba na d’alɔ we nú a ni kplɔ́n nǔ dó wǔ tɔn. É hɛn ɔ, é na bló bɔ a na “ɖó jlǒ bo na nɔ wà nǔ.” (Xà Filipunu lɛ 2:13.) Enɛ wu ɔ, nú é byɔ hweɖelɛnu ɖɔ jlǒ e a ɖó bo na kplɔ́n nǔ, alǒ wà nǔ sɔgbe xá nǔ e a nɔ kplɔ́n lɛ é ni syɛn d’eji ɔ, é sixu d’alɔ we. Enyi a ɖó hudo hlɔnhlɔn tɔn d’eji bo na mɔ tɛn dó ɖu ɖò afɔklɛ́nnú lɛ, alǒ gbeklánxámɛ jí ɔ, é sixu na hlɔnhlɔn enɛ we. Nɔ byɔ Jehovah hwɛhwɛ ɖò ɖɛ mɛ ɖɔ é ni d’alɔ we, bonu a na kpò ɖò Biblu ɔ kplɔ́n wɛ.—1 Tɛsalonikinu lɛ 5:17.

BA DÒ NÚ NǓ D’EJI

4. Nǔ Biblu kplɔnkplɔn towe ni ɖò tɛn nukɔntɔn ɔ mɛ nú we

Hweɖelɛnu ɔ, alɔnu mǐtɔn nɔ ján sɔmɔ̌ bɔ é nɔ cí nú mǐ ɖɔ mǐ kún ɖó hwenu kaka ɖé bo na dó kplɔ́n Biblu ó ɖɔhun. Etɛ ka sixu d’alɔ mǐ? Xà Filipunu lɛ 1:10, nwt, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:

• Etɛ lɛ a ka lin ɖɔ ye nyí “nǔjɔnǔ hugǎn lɛ” ɖò gbɛ̀ mɛ?

• Etɛ lɛ a ka sixu wà dó xlɛ́ ɖɔ Biblu kplɔnkplɔn towe ɖò taji tawun nú we?

1. Enyi a bɛ́ kɔ́ dó alǎ ɖé mɛ, cobo wá jɛ awinnyaglo bɛ́ d’emɛ jí ɔ, awinnyaglo lɛ na mɔ tɛnmɛ ǎ

2. Enyi a bɛ́ awinnyaglo lɛ d’emɛ jɛ nukɔn ɔ, a na mɔ tɛnmɛ bo na bɛ́ kɔ́ sukpɔ́ gɔ́ na. Mɔ̌ ɖokpo ɔ, enyi a sɔ́ “nǔ e nyí nǔjɔnǔ hugǎn lɛ é” ɖó tɛn nukɔntɔn ɔ mɛ ɖò gbɛzán towe mɛ ɔ, a na kpéwú bo na bló ye, bo ka na lɛ́ mɔ táan nú nǔ ɖevo lɛ

Biblu kplɔnkplɔn nɔ sú hudo nǔ gbigbɔ tɔn lɛ tɔn mǐtɔn sín dò, é wɛ nyí hudo e mǐ ɖó bo na tuùn Mawu bo lɛ́ sɛn ɛ é. Xà Matie 5:3, nwt; enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Enyi mǐ sɔ́ Biblu kplɔnkplɔn ɖó tɛn nukɔntɔn ɔ mɛ ɔ, nɛ̌ mǐ ka nɔ ɖu lè tɔn gbɔn?

5. Gbeklánxámɛ lɛ na bo ɖò finɛ hǔn, kpò ɖò kan ɖó dó nǔkplɔnkplɔn ɔ wu wɛ

VIDEO: Kanɖodónǔwu Tɔn Hɛn Lè Wá N’i (5:22)

• Ðò video ɔ mɛ ɔ, nɛ̌ Francesco sín xɔ́ntɔn lɛ kpo xwédo tɔn kpo ka wà nǔ gbɔn hwenu e é ɖɔ nǔ e kplɔ́n wɛ é ɖè lɛ é sín xó nú ye é?

• Lè tɛ kanɖodónǔwu tɔn ka hɛn wá n’i?

Xà 2 Timɔtée 2:24, 25, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:

• Nɛ̌ nǔ ka nɔ cí nú xwédo towe kpo xɔ́ntɔn towe lɛ kpo dó nǔ e kplɔ́n wɛ a ɖè lɛ é wu?

• Sɔgbe kpo wemafɔ enɛ lɛ kpo ɔ, nú mɛɖé tíìn bɔ Biblu kplɔnkplɔn towe ma nyɔ́ nukún tɔn mɛ ǎ ɔ, nɛ̌ a ka ɖó na wà nǔ gbɔn? Etɛwu?

6. Ganjɛ Jehovah wu bonu é na d’alɔ we

VIDEO: Jehovah D’alɔ Mǐ Bɔ Mǐ Bló Huzuhuzu Lɛ (3:56)

• Huzuhuzu tɛ lɛ Jim ka bló bá nyɔ́ Jehovah nukúnmɛ bɔ video ɔ xlɛ́?

• Etɛ ka jiwǔ nú we ɖò kpɔ́ndéwú tɔn mɛ?

Xà Eblée lɛ 11:6, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:

• Etɛ Jehovah ka na wá wà nú “mɛ e ɖò biba ɛ wɛ lɛ” é, enɛ wɛ nyí mɛ ɖěɖee ɖò tintɛnkpɔn wɛ syɛnsyɛn bo na tuùn i lobo lɛ́ nyɔ́ nukún tɔn mɛ lɛ é?

• Etɛ enɛ ka kplɔ́n we dó lee nǔ nɔ cí nú Jehovah hwenu e é mɔ gǎn ɖěɖee dó wɛ a ɖè bo na kplɔ́n Biblu ɔ lɛ é wu?

ETƐ LƐ A KA KPLƆ́N?

Biblu kplɔnkplɔn nɔ bɔwǔ hwebǐnu ǎ có, é ka sixu d’alɔ we bɔ a na ɖu gbɛ̀ sín vivǐ kaka sɔyi. Kpò ɖò Jehovah wu ganjɛ wɛ, é na d’ajɔ we.

Vɔ̌gbɔnji

• Etɛwu nǔgbo Biblu tɔn lɛ ka xɔ akwɛ nú we?

• Enyi a “mɔ dò nú nǔ e nyí nǔjɔnǔ hugǎn lɛ é” gudo ɔ, etɛ a ka ɖó na wà?

• Etɛwu a ka ɖó na byɔ Jehovah ɖɔ é ni d’alɔ we bonu a na kpò ɖò Biblu ɔ kplɔ́n wɛ?

KÍJÉ

Kpɔ́n wlɛnwín e ko d’alɔ mɛ gegě bɔ ye zán hwenu yetɔn kpo nǔnywɛ kpo é ɛnɛ.

“Lee A Sixu Zán Hwenu Towe kpo Nǔnywɛ kpo Gbɔn É” (Réveillez-vous! février 2014)

Nawe ɖé tíìn bɔ asú tɔn mɔ nukúnnú jɛ gǎn ɖěɖee dó wɛ é ɖè bɔ nǔ tɔn na nyɔ́ Mawu nukúnmɛ é mɛ ǎ. Kpɔ́n lee Jehovah d’alɔ ɛ gbɔn é.

Jehovah Na Hlɔnhlɔn Mǐ Bɔ Mǐ Hɛn Agban Mǐtɔn Lɛ (5:05)

Kpɔ́n lee nya ɖé ɖu kanɖodónǔwu asì tɔn tɔn sín lè gbɔn é.

Un Sɔ́ Nǔgbo ɔ Yì Hwɛ Nukɔn (6:30)

È nɔ dó hwɛ Kúnnuɖetɔ́ Jehovah tɔn lɛ hweɖelɛnu ɖɔ ye nɔ gbà xwédo lɛ. Nǔgbo jɛn ka wɛ à?

“Kúnnuɖetɔ́ Jehovah Tɔn lɛ Nɔ Gbà Xwédo lɛ Wɛ À, Alǒ Ye Nɔ Bló Bɔ Xwédo lɛ Nɔ Lidǒ?” (Xóta Ɛntɛnɛti jí tɔn)

Mǐ mɛ bǐ wɛ ɖó na nɔ wá gbeta lɛ kɔn. Gbeta e kɔn mǐ nɔ wá lɛ é gegě tíìn bo sixu wà ɖagbe alǒ nyanya nú mǐ kpo kancica e mǐ ɖó xá Jehovah é kpo. Ði kpɔ́ndéwú ɔ, é sixu byɔ ɖɔ mǐ ni wá gbeta elɔ lɛ kɔn: Fí e mǐ na nɔ é, lee mǐ na mɔ akwɛ e sín hudo mǐ ɖó é gbɔn é, abǐ mǐ na wlí alɔ alǒ gbɔ. Enyi mǐ wá gbeta ɖagbe lɛ kɔn ɔ, mǐ sixu ɖó gbɛzán e ɖó awǎjijɛ é ɖé bo lɛ́ hɛn xomɛ hun Jehovah.

1. Nɛ̌ a ka sixu zán Biblu dó wá gbeta ɖagbe lɛ kɔn gbɔn?

Cobonu a na wá gbeta ɖé kɔn hǔn, xoɖɛ bo byɔ alɔdó Jehovah, bo lɛ́ gbéjé Biblu kpɔ́n bá dó tuùn linlin e é nɔ ɖó dó xó ɔ wu é. (Xà Nǔnywɛxó 2:3-6.) Ðò ninɔmɛ ɖé lɛ mɛ ɔ, sɛ́n Jehovah tɔn e ɖò wɛn é ɖé nɔ tíìn. Enyi é wá jɛ mɔ̌ ɔ, gbeta ɖagbe hugǎn e kɔn a sixu wá é wɛ nyí ɖɔ a ni setónú nú sɛn enɛ.

Amɔ̌, enyi sɛ́n ɖebǔ ma ɖò Biblu mɛ bo ɖɔ nǔ e a na wà é nyi wɛn ǎ ɔ ka ló? Jehovah na kpò ɖò ali xlɛ́ we wɛ “ɖò ali e a [ɖó na] mlɛ́ ɔ jí.” (Ezayíi 48:17) Gbɔn nɛ̌ é? Nǔgbododó lɛ sixu xlɛ́ ali we. Nǔgbododó Biblu tɔn lɛ nɔ ɖè linlin Mawu tɔn lɛ kpo lee nǔ nɔ cí n’i é kpo xlɛ́. Hwɛhwɛ ɔ, enyi mǐ xà tan ɖé ɖò Biblu mɛ ɔ, é nɔ kplɔ́n nǔ mǐ dó lee nǔ nɔ cí nú Jehovah dó xó ɖé wu é wu. Enyi mǐ tuùn lee nǔ nɔ cí nú Jehovah é ɔ, enɛ na zɔ́n bɔ mǐ na wá gbeta e na hɛn xomɛ hun i lɛ é kɔn.

2. Etɛ lɛ a ka ɖó na gbéjé kpɔ́n cobo na wá gbeta ɖé kɔn?

Biblu ɖɔ: “Mɛ e ayi tɔn . . . ɖò te ɔ nɔ lin tamɛ cobo nɔ wà nǔ.” (Nǔnywɛxó 14:15) Enɛ xlɛ́ ɖɔ cobonu mǐ na wá gbeta ɖé kɔn ɔ, mǐ ɖó na zán hwenu dó lin tamɛ dó ali e hun nú mǐ lɛ é jí. Ee a na ɖò ali e hun nú we lɛ é ɖokpo ɖokpo gbéjé kpɔ́n wɛ é ɔ, kanbyɔ hwiɖée ɖɔ: ‘Nǔgbododó Biblu tɔn tɛ lɛ ka tɔ́n ɖò fí? Gbeta tɛ ka na zɔ́n bɔ un na ɖó fífá ayi mɛ tɔn? Etɛ lɛ gbeta ce ka na wà dó mɛ ɖevo lɛ wu? Taji bǐ ɔ, é ka na hɛn xomɛ hun Jehovah à?’—Sɛ́nflínmɛ 32:29.

Jehovah ɖó acɛ bo na ɖɔ nǔ e nyí nǔ ɖagbe é kpo nǔ e nyí nǔ nyanya é kpo nú mǐ. Enyi mǐ kplɔ́n bo tuùn sɛ́n tɔn lɛ kpo nǔgbododó tɔn lɛ kpo ganji, lobo kánɖeji bo na xwedó ye hǔn, azɔ̌ kplɔ́n ayixa mǐtɔn wɛ mǐ ɖè nɛ. Ayixa mǐtɔn wɛ nyí nǔ e nɔ ɖɔ nú mǐ ɖɔ nǔɖe nyí nǔ ɖagbe alǒ nǔ nyanya é. (Hlɔmanu lɛ 2:14, 15) Ayixa e è kplɔ́n ganji é ɖé na d’alɔ mǐ bɔ mǐ na wá gbeta ɖagbe lɛ kɔn.

BA DÒ NÚ NǓ D’EJI

3. Biblu ni nɔ xlɛ́ ali we

VIDEO: Nǔgbododó Biblu Tɔn lɛ Ni Xlɛ́ Ali We (5:54)

• Etɛ ka nyí mɛɖesúsíninɔ?

• Etɛwu Jehovah ka na mǐ mɛɖesúsíninɔ?

• Etɛ lɛ é ka na mǐ bo na dó d’alɔ mǐ bonu mǐ na nɔ wá gbeta ɖagbe lɛ kɔn?

Bo na dó mɔ nǔgbododó Biblu tɔn ɖé sín kpɔ́ndéwú hǔn, xà Efɛzinu lɛ 5:15, 16. Enɛ gudo hǔn, mi ɖɔ xó ɖó kpɔ́ dó lee a sixu “hwlɛndó hwenu lɛ, bo wà nǔ” ɖò ali elɔ lɛ nu gbɔn é jí:

• Biblu xixa ɖò gbesisɔmɛ.

• Tintɛnkpɔn bo na huzu asú ɖagbe, asì ɖagbe, mɛjitɔ́ ɖagbe, alǒ vǐ ɖagbe ɖé.

• Kplé agun tɔn lɛ yiyi.

4. Kplɔ́n ayixa towe bo na dó sixu nɔ wá gbeta ɖagbe lɛ kɔn

VIDEO: “Mi Ðó Ayixa Mímɛ́” (5:13)

• Ðò video ɔ mɛ ɔ, afɔ tɛ lɛ nɔví nyɔnu ɔ ka ɖè bo kplɔ́n ayixa tɔn, lobo lɛ́ wá gbeta e nyɔ́ Jehovah nukúnmɛ é ɖé kɔn?

Etɛwu mǐ ma ka ɖó na nɔ kan gbeta e kɔn mǐɖesunɔ ɖó na wá lɛ é byɔ mɛ ɖevo lɛ ǎ? Xà Eblée lɛ 5:14, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:

• É sixu bɔwǔ ɖɔ mǐ ni kan gbeta e kɔn mǐ na wá lɛ é byɔ mɛ ɖevo lɛ có, etɛ mǐɖesunɔ ka ɖó na tɛ́n kpɔ́n bo tuùn?

• Etɛ lɛ ka ɖè bo sixu d’alɔ we bɔ a na kplɔ́n ayixa towe, bo na nɔ wá gbeta ɖagbe lɛ kɔn?

5. Ðǒ sísí nú ayixa mɛ ɖevo lɛ Tɔn

Gbeta vovo kɔn wɛ mɛ ɖokpo ɖokpo nɔ wá. Nɛ̌ mǐ ka sixu ɖó sísí nú ayixa mɛ ɖevo lɛ tɔn gbɔn? Lin tamɛ dó ninɔmɛ we elɔ lɛ wu:

Ninɔmɛ 1: Nɔví nyɔnu e yí wǎn nú nǔ sísá dó nukúnmɛ é ɖé sɛ̀ tɛn yì agun ɖé mɛ. Nɔví nyɔnu e ɖò agun enɛ mɛ lɛ é gegě tíìn, bɔ enyi ye mɔ bonu mɛ ɖevo lɛ sá nǔ dó nukúnmɛ ɔ, é nɔ ɖó akpɔ nú ye.

Xà Hlɔmanu lɛ 15:1 kpo 1 Kɔlɛntinu lɛ 10:23, 24 kpo, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:

• Sɔgbe xá wemafɔ enɛ lɛ ɔ, gbeta tɛ kɔn nɔví nyɔnu enɛ ka sixu wá? Enyi a ɖò kpɔ́ xá mɛɖé bɔ ayixa tɔn ma yí gbè n’i bonu é na wà nǔ e ayixa hwɛ tɔn yí gbè nú we bɔ a nɔ wà lɛ é ǎ ɔ, etɛ a ka na wà?

Ninɔmɛ 2: Nɔví sunnu ɖé tuùn ɖɔ Biblu kún gbɛ́ ahan syɛnsyɛn nunu ó, amɔ̌, é wá gbeta ɔ kɔn ɖɔ emi kún na nɔ nu ó. È ylɔ́ ɛ wá nǔwiwa mɛkplékpɔ́mɛ tɔn ɖé domɛ, bɔ ɖò finɛ ɔ, é mɔ nɔví gegě bɔ ye ɖò ahan syɛnsyɛn nu wɛ.

Xà Nǔnywɛtɔ́xó 7:16 kpo Hlɔmanu lɛ 14:1, 10 kpo, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:

• Sɔgbe xá wemafɔ enɛ lɛ ɔ, gbeta tɛ kɔn nɔví sunnu enɛ ka sixu wá? Enyi a mɔ mɛɖé bɔ é ɖò nǔ e ayixa towe ma yí gbè na ǎ é ɖé wà wɛ ɔ, etɛ a ka na wà?

Afɔ tɛ lɛ è ka nɔ ɖè, b’ɛ nɔ zɔ́n bɔ è nɔ wá gbeta ɖagbe lɛ kɔn?

1. Byɔ̌ Jehovah ɖɔ é ni d’alɔ we bonu a na wá gbeta nǔ e a na wà é tɔn kɔn.—Jaki 1:5.

2. Ba dò nú nǔ ɖò Biblu kpo wema jinjɔn Biblu jí lɛ kpo mɛ, bá dó mɔ nǔgbododó e ɖɔ xó dó ninɔmɛ ɔ jí lɛ é. A sixu lɛ́ ɖɔ xó xá Klisanwun e ko mɔ nǔ kpɔ́n lɛ é.

3. Lin tamɛ dó nǔ e gbeta e kɔn a na wá é na wà nú ayixa towe kpo ayixa mɛ ɖevo lɛ tɔn kpo é jí.

ETƐ LƐ A KA KPLƆ́N?

Enyi mǐ ba dò nú lee nǔ cí nú Jehovah dó ninɔmɛ ɖé wu é, bɔ enɛ gudo ɔ, mǐ lin tamɛ kpɔ́n ɖɔ nǔwiwa mǐtɔn lɛ na d’alɔ mɛ ɖevo lɛ alǒ wà nǔ dó ye wu wɛ à jí ɔ, mǐ na wá gbeta ɖagbe lɛ kɔ.

Vɔ̌gbɔnji

• Nɛ̌ a ka sixu wá gbeta e na nyɔ́ Jehovah nukúnmɛ lɛ é kɔn gbɔn?

• Nɛ̌ a ka sixu kplɔ́n ayixa towe gbɔn?

• Nɛ̌ a ka sixu ɖó sísí nú ayixa mɛ ɖevo lɛ tɔn gbɔn?

KÍJÉ

Nɛ̌ a ka sixu wá gbeta ɖěɖee na hɛn kancica e ɖò hwi kpo Mawu kpo tɛntin é lidǒ lɛ é kɔn gbɔn?

“Wǎ Gbeta E Nɔ Wlí Yɛ̌yi nú Mawu lɛ É Kɔn” (Atɔxwɛ [Gungbe], 15 avril 2011)

Kplɔ́n nǔ dó lee Jehovah nɔ ɖè wě xá mǐ gbɔn é wu d’eji.

Jehovah Nɔ Xlɛ́ Ali Togun Tɔn (9:50)

Kplɔ́n nǔ dó nǔ ɖěɖee d’alɔ nya ɖé bɔ é wá gbeta e vɛwǔ é ɖé kɔn gbɔn é wu.

Jehovah Na Ganjɛwu Nǔ Ðagbe lɛ Bǐ Tɔn (5:46)

Kplɔ́n nǔ dó lee a sixu hɛn xomɛ hun Jehovah hwenu e é ma na sɛ́n e ɖò wɛn é ɖé dó ninɔmɛ ɖé wu ǎ gbɔn é wu d’eji.

“A ka Ðó Hudo Sɛ́n Biblu Tɔn ɖé Tɔn Hwebǐnu Wɛ À?” (Atɔxwɛ [Gungbe], 1^er décembre 2003)