È Ko Ðɔ Hwenu E Mǐ Na Kú Dó É Ð’ayǐ Wɛ À?
Xósin e Biblu na é
Eǒ, è ko ɖɔ hwenu e mǐ na kú dó é ɖ’ayǐ ǎ. Biblu yí gbè nú byɔwá sín xó e mɛ lɛ ɖi nǔ na é ǎ, é nyɔ́ wà ɔ, é ɖɔ ɖɔ “nǔmaɖónukún lɛ” wɛ nɔ zɔ́n hwɛhwɛ bɔ è nɔ kú.—Nǔnywɛtɔ́xó 9:11, nwt.
Biblu ɖɔ ɖɔ “hwenu e è na kú dó é ɖè” à cé?
Ganji, Nǔnywɛtɔ́xó 3:2 ɖɔ ɖɔ “hwenu e è na jɔ dó ɔ ɖè, bɔ hwenu e è na kú dó é ɖè. Hwenu e è na dó nǔ dó ɔ ɖè, bɔ hwenu e è na hɔn dó é ɖè.” É ɖò mɔ̌ có, nǔ ɖěɖee lɛlɛ̌ dó wemafɔ enɛ lɛ é xlɛ́ ɖɔ Biblu ɖò xó ɖɔ dó huzuhuzu tɛgbɛ tɔn e kúnkplá gbɛ̀ bo kan mɛ bǐ kpaa é wu wɛ. (Nǔnywɛtɔ́xó 3:1-8) Mawu ɖɔ hwenu e mǐ mɛ ɖokpo ɖokpo na kú dó é ǎ, mɔ̌ jɛn é ma ka lɛ́ ɖɔ ɖɔ hwe lě lě nu jɛn glesi ɖé na dó nǔ dandan ǎ é nɛ. Nǔ ɔ kpowun wɛ nyí ɖɔ, mǐ ɖó na lɔn bo sɔ́ ayi ɖó gbɛmɛ tagba lɛ jí kaka bo wɔn Gbɛɖotɔ́ mǐtɔn ǎ.—Nǔnywɛtɔ́xó 3:11, nwt; 12:1, 13.
È ka sixu bló bɔ jidɔ́ mɛtɔn jɛji à?
Gbɛ̀ ɖó jiɖe ǎ có, enyi mǐ wá gbeta ɖagbe lɛ kɔn ɔ, mǐ sixu dɔ́ji. Biblu ɖɔ: “Nǔ e nǔnywɛtɔ́ nɔ kplɔ́n mɛ ɔ, gbɔjɛtɛn ɖé wɛ é nyí; é nɔ zɔ́n bɔ è nɔ jɛ kú sín mɔ mɛ ǎ.” (Nǔnywɛxó 13:14) Mɔ̌ ɖokpo ɔ, Mɔyizi ɖɔ nú Izlayɛli-ví lɛ ɖɔ nú ye setónú nú gbeɖiɖe Mawu tɔn lɛ ɔ, ye sixu “dɔ́ji.” (Sɛ́nflínmɛ 6:2) Amɔ̌, enyi mǐ nɔ wà nǔ nyanya alǒ xlonɔ sín nǔ lɛ ɔ, mǐ sixu wɛ́n kú kpowun.—Nǔnywɛtɔ́xó 7:17.
Amɔ̌, mǐ na bo nyɔ́nǔi alǒ nɔ ɖó ayi te gbɔn ɖebǔ ɔ, mǐ sixu xógló kú ǎ. (Hlɔmanu lɛ 5:12) È ɖò mɔ̌ có, ninɔmɛ enɛ na wá huzu, ɖó Biblu dó hwenu ɖé sín akpá bɔ “kú sɔ́ na tíìn ǎ.”—Nǔɖexlɛ́mɛ 21:4.