Mǐ sixú nɔ gbɛ káká sɔ́yi

1. Ðagbe tɛ́ tamɛ linlin dó akpá gbɛ mavɔmavɔ tɔn e Jexóva dó nú mǐ é jí ka nɔ wa nú mǐ?

JEXÓVA dó akpá ɖɔ mɛ e nɔ se tónú nú émí lɛ́ é ná mɔ “gbɛ mavɔmavɔ.” (Hlɔ̌. 6:23) Ényí mǐ nɔ lin tamɛ dó akpá énɛ́ e Jexóva dó nú mǐ é jí ɔ, é ɖo wɛn ɖɔ wǎn e mǐ yí n’i é ná jɛjí. Lin tamɛ dó nǔ élɔ́ jí: Tɔ́ mǐtɔn jǐxwé tɔn ɔ yí wǎn nú mǐ sɔmɔ̌ bɔ nǔ ɖěbǔ sixú ɖe mǐ ɖó vo n’i ǎ.

2. Nɛ̌ akpá gbɛ mavɔmavɔ tɔn e è dó nú mǐ é ka nɔ d’alɔ mǐ gbɔn?

² Gbɛ mavɔmavɔ sín akpá e Mawu dó nú mǐ é nɔ d’alɔ mǐ bɔ mǐ nɔ dɛ, ɖo wǔvɛ́ e mɔ wɛ mǐ ɖe din lɛ́ é nu. Ényí kɛntɔ́ mǐtɔn lɛ́ ná bo tlɛ gblɔ́n kúdán nú mǐ ɔ, mǐ ná jó gbe ǎ. Aniwú? Hwɛjijɔ e wú wɛ é ɖokpó wɛ nyí ɖɔ, mǐ tuun ɖɔ ényí mǐ nɔ gbejí nú Jexóva káká bo kú ɔ, é ná fɔ́n mǐ sín kú, bɔ mǐ ná ɖó nukúnɖíɖó bá nɔ gbɛ káká sɔ́yi. (Jaan 5:28, 29; 1 Kɔ. 15:55-58; Ebl. 2:15) Étɛ́wú mǐ ka sixú kú d’é jí ɖɔ mǐ hɛn ɔ, mǐ ná nɔ gbɛ káká sɔ́yi? Ð’ayi hwɛjijɔ élɔ́ lɛ́ wú.

JEXÓVA TÍIN TƐGBƐ

3. Étɛ́wú mǐ ka sixú kú d’é jí ɖɔ Jexóva kpé wú bo ná bló bɔ mǐ ná nɔ gbɛ káká sɔ́yi? (Ðɛhan 102:13, 25, 28)

³ Mǐ tuun ɖɔ Jexóva kpé wú bo ná bló bɔ mǐ ná nɔ gbɛ káká sɔ́yi, ɖó é wɛ nyí Jɔtɛn gbɛ tɔn, bo ka tíin tɛgbɛ. (Ðɛh. 36:10) Ð’ayi akpáxwé Mawuxówéma ɔ tɔn e xlɛ́ ɖɔ Jexóva ko tíin sín do, bo ka ná lɛ́ tíin tɛgbɛ é ɖé lɛ́ wú. Biblu gbɛ yɔ̌yɔ́ ɔ tɔn ɖɔ ɖo Ðɛhan 90:2 mɛ ɖɔ: “Sín hwenu mavɔmavɔ káká jɛ mavɔmavɔ ɔ, hwi wɛ nyí Mawu.” Nǔ ɖokpó ɔ wɛ Ðɛhan 102gɔ́ ɔ lɔ ɖɔ. (Xa Ðɛhan 102:13, 25, 28.) Gɔ́ ná ɔ, gbeyíɖɔ Xabakúku wlán nǔ élɔ́ dó Tɔ́ mǐtɔn jǐxwé tɔn ɔ wú: ‘Sín xóxóhwenu ɖokpóo ɔ, hwi wɛ nyí Jexóva, hwi wɛ nyí Mawu ce, Mawu mímɛ́ ce, a nɔ kú ǎ.’—Xab. 1:12.

4. Ényí é vɛ́ wǔ nú mǐ bɔ mǐ ná mɔ nǔ jɛ ɖɔ e è ɖɔ Jexóva tíin hwebǐnu é mɛ ɔ, ado ɖó ná hu mǐ wɛ a? Tínmɛ.

⁴ Ðɔ e è ɖɔ ɖɔ Jexóva tíin “káká yi mavɔ” é ka nɔ cí ɖě nú we wɛ a? (Eza. 40:28) Nǔ nɔ cí mɔ̌ nú mɛ gěgé. Elihu ɖɔ dó Mawu wú ɖɔ: “Mɛ ɖěbǔ sixú tuun xwe e é ɖó ɔ ǎ.” (Jɔb. 36:26) Amɔ̌, ɖó mǐ ma mɔ nukúnnú jɛ nǔɖé mɛ ǎ kpowun wútu wɛ mǐ ná ɖɔ ɖɔ nǔ ɔ kún nyí nǔgbó ó ǎ. Ði kpɔ́ndéwú ɔ, mǐ sixú gɔn dǒyidǒslɔ́ lěe wěziza nɔ hɔ́n gbɔn é tɔn tuun bǐ mlɛ́mlɛ́, amɔ̌, énɛ́ wɛ ka xlɛ́ ɖɔ wěziza kún tíin ó a? Cɛ́nnyícɛ́nnyí ɖé lɔ ǎ! Ðo ali ɖokpó ɔ nu ɔ, mǐ mɛ gbɛtɔ́ lɛ́ sixú gɔn nǔ mɔ jɛ lěe Jexóva ko tíin, bo ka ná lɛ́ tíin káká sɔ́yi gbɔn é wú bǐ mlɛ́mlɛ́. Amɔ̌, énɛ́ wɛ xlɛ́ ɖɔ Mawu kún ná tíin káká sɔ́yi ó ǎ. Nǔ e mɛ mǐ sixú mɔ nǔ jɛ é, alǒ nǔ e mɛ mǐ ma sixú mɔ nǔ jɛ ǎ é sixú ɖó dogbó nú Gbɛɖótɔ́ ɔ ǎ. (Hlɔ̌. 11:33-36) É ko tíin cóbɔ nǔ e ɖo gbɛ ɔ mɛ lɛ́ é bǐ, ɖi sun kpó hwe kpó wá tíin. Mǐ kú d’é jí ɖɔ “hlɔ̌nhlɔ́n tɔn wɛ é dó ɖó ayǐkúngban ɔ.” Ɛɛn, é ko tíin cóbó “ɖó jǐnukúnsin.” (Jel. 51:15; Mɛ. 17:24) Hwɛjijɔ ɖěvo tɛ́ wú mǐ ka sixú kú d’é jí ɖɔ mǐ sixú nɔ gbɛ káká sɔ́yi?

È DÁ MǏ BÓNÚ MǏ NÁ NƆ GBƐ KÁKÁ SƆ́YI

5. Nukúnɖíɖó tɛ́ asú kpó asi kpó nukɔntɔn ɔ ka ɖó?

⁵ Nǔɖogbɛ e Jexóva dá ɖó ayǐkúngban jí lɛ́ é ná nɔ wá kú, gbɛtɔ́ lɛ́ jɛ́n ma ná kú ǎ. É hun ali ɔ nú yě bɔ yě ná nɔ gbɛ káká sɔ́yi. Amɔ̌, Jexóva gba akpá nú Adámu ɖɔ: “Amɔ̌, atín e sín sínsɛ́n è nɔ ɖu bo nɔ tuun nǔ ɖagbe kpódó nǔ nyanya kpó ɔ kɛ́ɖɛ́ jɛ́n a ma ná ɖu ǎ, ɖó gbe e gbe a ná ɖu ɔ, a ná kú.” (Bǐb. 2:17) Ényí Adámu kpó Ɛvu kpó ko se tónú nú Jexóva wɛ ɔ, yě ná kú ǎ. É sɔgbe ɖɔ è ní lin ɖɔ é sixú wá su hweɖénu bɔ Jexóva ná ná gbe yě bɔ yě ná ɖu “atín e nɔ ná gbɛ mɛ” é. Énɛ́ sixú ɖo xlɛ́xlɛ́ wɛ ɖɔ, é ko dó zǒgbe jí nú yě ɖɔ yě ná “nɔ gbɛ káká sɔ́yi.”b—Bǐb. 3:22.

6-7. (a) Nǔ ɖěvo tɛ́ ka xlɛ́ ɖɔ è kún dá gbɛtɔ́ lɛ́ bónú yě ná kú ó? (b) Étɛ́ lɛ́ a ka ba ná wa ɖo gbɛ yɔ̌yɔ́ ɔ mɛ? (Kpɔ́n ɖiɖe lɛ́.)

⁶ Dobanúnǔtɔ́ ɖé lɛ́ ná kúnnuɖenú nǔnywɛ́ xwítíxwítí tɔn e xlɛ́ ɖɔ taglo mǐtɔn kpé wú bo sixú hɛn nǔ hú nǔ e mǐ sixú xo kplé ɖo gbɛhwenu mǐtɔn é bǐ é. Énɛ́ sɔ́ akpakpa mɛ tawun! Ðo 2010 ɔ, xójláwéma ɖokpó tínmɛ ɖɔ taglo mǐtɔn sixú hɛn xó e è ɖɔ ɖo video e ná bló ganxixo lǐvi atɔn mɔ̌ é mɛ é. Xwe 300 jɛjí jɛ́n è sixú bló cóbó kpɔ́n video énɛ́ kpé. Xlɛ́xlɛ́ wɛ énɛ́ sixú ko ɖe ɖɔ taglo mǐtɔn sixú hɛn nǔ hú mɔ̌. Kúnnuɖenú ɖé wɛ énɛ́ nyí bo xlɛ́ ɖɔ Jexóva bló taglo mǐtɔn bɔ é ná hɛn nǔ hú nǔ e mǐ nɔ hɛn ɖo xwe 70 kpowun, alǒ 80 vlamɛ é.—Ðɛh. 90:10.

⁷ Jexóva lɛ́ dá mǐ bɔ mǐ nɔ ba vɛ́návɛ́ná bá nɔ gbɛ. Biblu ɖɔ dó gbɛtɔ́ lɛ́ wú ɖɔ Mawu “sɔ́ mavɔmavɔ dó ayi yětɔn mɛ.” (Nǔt. 3:11, nwt) Nǔ e wú mǐ nɔ mɔ kú dó mɔ kɛntɔ́ é ɖokpó nɛ́. (1 Kɔ. 15:26) Ényí mǐ ɖo azɔn jɛ wɛ syɛ́nsyɛ́n ɔ, mǐ nɔ yí gbe nú lěe mǐ ɖe é kpowun bo nɔ jó xó dó wɛ a? Éǒ. Hwɛhwɛ ɔ, mǐ nɔ ba dotóo, alǒ xɔ atínkɛ́n bo ná dó ɖí xwi xá azɔn ɔ. Mǐ nɔ wa nǔ e ɖo jlɛ̌ jí bɔ mǐ sixú wa lɛ́ é bǐ bónú é ma sín vɛ̌dónúnǔ mǐtɔn wú bónú mǐ kú ó. Ényí mɛ e mǐ yí wǎn ná é ɖé kú ɔ, mǐ nɔ flú, bo nɔ lɛ́ se wǔvɛ́ ɖo lěe nǔ nɔ cí nú mɛ é linu, mɛ ɔ ná bo tlɛ nyí mɛ wínnyáwínnyá, alǒ mɛxó ɔ nɛ́. (Jaan 11:32, 33) É ɖo wɛn ɖɔ Gbɛɖótɔ́ wǎnyíyínɔ mǐtɔn ba ɖɔ mǐ ní nɔ gbɛ káká sɔ́yi. Énɛ́ wɛ zɔ́n bɔ é sɔ́ jlǒ énɛ́ d’ayi mɛ nú mǐ, bo lɛ́ ná mǐ nǔwúkpíkpé tɔn. Amɔ̌, mǐ ɖó hwɛjijɔ ɖěvo e wú mǐ ɖi ɖɔ mǐ sixú nɔ gbɛ káká sɔ́yi lɛ́ é gěgé. Mi nú mǐ ní gbéjé nǔ e Jexóva ko wa wá yi, bo ka lɛ́ ɖo wiwa wɛ din, b’ɛ xlɛ́ ɖɔ linlin e é ɖó sín do é kún ko húzú ó é ɖé lɛ́ kpɔ́n.

LINLIN E JEXÓVA ÐÓ É KO HÚZÚ Ǎ

8. Jiɖe tɛ́ Ezayíi 55:11 ka ná mǐ dó linlin e Jexóva nɔ ɖó dó mǐ wú é wú?

⁸ Adámu kpó Ɛvu kpó wa nǔ nyi do, bɔ énɛ́ zɔ́n bɔ vǐ yětɔn lɛ́ nɔ kú có, linlin e Jexóva ɖó é húzú ǎ. (Xa Ezayíi 55:11.) É kpo ɖo linlin wɛ bo ná bló bɔ gbɛtɔ́ gbejínɔtɔ́ lɛ́ ná nɔ gbɛ káká sɔ́yi. Ényí mǐ gbéjé nǔ ɖěɖěe Jexóva ko ɖɔ, bo lɛ́ wa bónú linlin tɔn énɛ́ ní dó jɛnu é kpɔ́n ɔ, mǐ sixú ɖɔ mɔ̌ kpó jiɖiɖe kpó.

9. Akpá tɛ́ Mawu ka dó? (Daniyɛ́li 12:2, 13)

⁹ Jexóva d’akpá ɖɔ émí ná fɔ́n mɛ e ko kú lɛ́ é sín kú bo ná hun gbɛ mavɔmavɔ sín ali nú yě. (Mɛ. 24:15; Ti. 1:1, 2) Nya gbejínɔtɔ́ Jɔbu kú d’é jí ɖɔ akpakpa ɖo Jexóva sɔ́ wɛ bɔ é ná fɔ́n mɛ e ko kú lɛ́ é sín kú. (Jɔb. 14:14, 15) Gbeyíɖɔ Daniyɛ́li tuun ɖɔ gbɛtɔ́ lɛ́ ɖo nukún ɖó wɛ bɔ è ná fɔ́n yě sín kú, bónú yě ná nɔ gbɛ káká sɔ́yi. (Ðɛh. 37:29; xa Daniyɛ́li 12:2, 13, nwt.) Jwifu e nɔ gbɛ ɖo Jezu hwenu lɛ́ é lɔ tuun ɖɔ Jexóva hɛn ɔ, é ná dó ajɔ “gbɛ mavɔmavɔ” tɔn mɛsɛntɔ́ tɔn gbejínɔtɔ́ lɛ́. (Luk. 10:25; 18:18) Azɔn gěgé wɛ Jezu ɖɔ xó dó akpá énɛ́ wú; Tɔ́ tɔn tlɛ fɔ́n éɖésú sín kú.—Mat. 19:29; 22:31, 32; Luk. 18:30; Jaan 11:25.

10. Étɛ́ fɔ́n e è fɔ́n mɛ sín kú wá yi é ka xlɛ́? (Kpɔ́n ɖiɖe ɔ.)

¹⁰ Jexóva wɛ nɔ ná mɛ gbɛ, bo ɖó acɛ e nɔ fɔ́n mɛ sín kú é. Jexóva ná acɛ gbeyíɖɔ Elíi bɔ é fɔ́n vǐ súnnu asúkúsi Salɛpútanu ɔ tɔn. (1 Axɔ́. 17:21-23) Nukɔnmɛ ɔ, kpó alɔdó Jexóva tɔn kpó ɔ, gbeyíɖɔ Elizée fɔ́n nyɔ̌nu Cunɛ́munu ɖé sín vǐ. (2 Axɔ́. 4:18-20, 34-37) Fínfɔ́n sín kú énɛ́ lɛ́ kpó ɖěvo lɛ́ kpó xlɛ́ ɖɔ Jexóva ɖó acɛ e nɔ fɔ́n mɛ sín kú é. Hwenu e Jezu ɖo ayǐkúngban jí é ɔ, é xlɛ́ ɖɔ Tɔ́ émítɔn ná émí acɛ énɛ́. (Jaan 11:23-25, 43, 44) Jǐxwé wɛ Jezu ɖe din, bo ko ɖó “acɛ lɛ́ bǐ ɖo jǐxwé kpó ayǐkúngban jí kpó.” Énɛ́ wú ɔ, é ɖo tɛn e jɛxá é mɛ bo ná bló bɔ akpá e ɖɔ ɖɔ “mɛkúkú lɛ́ ná se gbe tɔn, bo ná fɔ́n” é ná jɛnu.—Mat. 28:18; Jaan 5:25-29.

11. Nɛ̌ gbɛxixɔ ɔ ka hun gbɛ mavɔmavɔ sín ali nú mǐ gbɔn?

¹¹ Étɛ́wú Jexóva ka yí gbe bɔ Vǐ vívɛ́ná tɔn kú wǔvɛ́ kú? Jezu ɖe hwɛjijɔ ɔ xlɛ́ bo ɖɔ: “Mawu yí wǎn nú gbɛ ɔ sɔmɔ̌, bo ná Vǐɖokpónɔ tɔn, bónú mɛ ɖěbǔ e ná ɖe xlɛ́ ɖɔ émí ɖi nǔ n’i é ní ma dɔn ó, loɔ, é ní mɔ gbɛ mavɔmavɔ.” (Jaan 3:16) Sɛ́ e Mawu sɛ́ Vǐ tɔn dó, bɔ é wá sɔ́ gbɛ tɔn jó dó hwɛ mǐtɔn lɛ́ tamɛ é zɔ́n bɔ mǐ sixú nɔ gbɛ káká sɔ́yi. (Mat. 20:28) Mɛsɛ́dó Pɔ́lu sɛ sin xwe nú linlin Mawu tɔn sín akpáxwé tají énɛ́ hwenu e é wlán xó élɔ́ é: “Ðó lěe kú gbɔn gbɛtɔ́ ɖokpó jí wá ɔ, mɔ̌ jɛ́n fínfɔ́n sín kú mɛkúkú lɛ́ tɔn gbɔn gbɛtɔ́ ɖokpó jí wá é nɛ́. Lěe gbɛtɔ́ bǐ nɔ kú ɖó bǔ e yě ɖe xá Adámu ɔ wútu ɔ, mɔ̌ ɖokpó ɔ, mɛ e ɖo bǔ xá Klísu lɛ́ bǐ ɔ, Mawu ná fɔ́n yě sín kú.”—1 Kɔ. 15:21, 22.

12. Nɛ̌ linlin e Jexóva ɖó dó mǐ wú é ka ná jɛnu gbɔn Axɔ́súɖuto ɔ gblamɛ gbɔn?

¹² Jezu kplɔ́n ahwanvú tɔn lɛ́ ɖɔ yě ní nɔ xo ɖɛ ɖɔ Axɔ́súɖuto Mawu tɔn ní wá, bónú jlǒ Mawu tɔn ní nyí wiwa ɖo ayǐkúngban jí. (Mat. 6:9, 10) Gbɛ ninɔ káká sɔ́yi ɖo ayǐkúngban jí nyí linlin e Mawu ɖó nú gbɛtɔ́ lɛ́ é sín akpáxwé ɖokpó. Bo ná dó kpé énɛ́ wú ɔ, Jexóva sɔ́ Vǐ súnnu tɔn bɔ é nyí Axɔ́sú nú Axɔ́súɖuto Mɛsíya ɔ tɔn. Mawu xo mɛ 144000 kplé sín ayǐkúngban jí, bɔ yě ná w’azɔ̌ xá Jezu bónú linlin Mawu tɔn ní dó jɛnu.—Nǔɖe. 5:9, 10.

13. Étɛ́ wa wɛ Jexóva ka ɖe din? Étɛ́ a ka ɖó ná wa?

¹³ Jexóva ɖo “mɛ wɔ̌búwɔ́bú ɖé” xo kplé wɛ din bónú yě ná nyí Axɔ́súɖuto tɔn sín toví lɛ́. (Nǔɖe. 7:9, 10; Ja. 2:8) Wǎngbɛ́númɛ kpó ahwan kpó klán mɛ gěgé ɖo gbɛ ɔ mɛ égbé có, mɛ e ɖo mɛ wɔ̌búwɔ́bú ɔ mɛ lɛ́ é ɖo nǔ e wú yě kpé é bǐ wa wɛ bo ná hɔn ɖɔ nú wǎngbɛ́númɛ sín wuntun ɖěbǔ e ɖo ayi yětɔn mɛ é bǐ mlɛ́mlɛ́. Ðo nǔjlɛ́dónǔwú linu ɔ, yě ko ɖo hwǐ yětɔn lɛ́ sɔ́ dó tun alǐn ná wɛ. (Micée 4:3) Yě nɔ ɖ’alɔ ɖo ahwan e gbɛtɔ́ lɛ́ nɔ fun bo nɔ hu mɛ vantankánnyá é mɛ ǎ. É nyɔ́ wa ɔ, yě nɔ d’alɔ mɛ e ɖo “gbɛ jɔ gbɛ ɔ” ba wɛ lɛ́ é gbɔn nǔ kplɔ́nkplɔ́n yě dó Mawu nǔgbó ɔ kpó linlin tɔn lɛ́ kpó wú gblamɛ. (1 Tim. 6:19) Mɛ e ɖo xwédo yětɔn mɛ lɛ́ é sixú nɔ fɔ́n gǔ dó yě jí, alǒ yě sixú nɔ mɔ akwɛ́yózo ɖó yě ɖo gǔdo nú Axɔ́súɖuto Mawu tɔn wútu. Amɔ̌, Jexóva nɔ ná nǔ e hudó yě lɛ́ é yě. (Mat. 6:25, 30-33; Luk. 18:29, 30) Nǔgbó énɛ́ lɛ́ nɔ ná gǎnjɛwú mǐ ɖɔ Axɔ́súɖuto Mawu tɔn tíin nǔgbó, bo ná kpo ɖo blǒbló wɛ bɔ linlin Jexóva tɔn ná jɛnu.

SƆGÚDO ÐAAÐAGBE ÐÉ ÐO TE KPƆ́N MǏ

14-15. Nɛ̌ akpá e Jexóva dó bo ná sú kú sín kún dó bǐ mlɛ́mlɛ́ é ka ná jɛnu gbɔn?

¹⁴ Jezu ko nyí Axɔ́sú nú Axɔ́súɖuto Mawu tɔn din ɖo jǐxwé, bo ná bló bɔ nǔɖɔɖayǐ Jexóva tɔn lɛ́ bǐ ná jɛnu. (2 Kɔ. 1:20) Sín 1914 wɛ Jezu ko ɖó acɛ dó kɛntɔ́ tɔn lɛ́ jí. (Ðɛh. 110:1, 2) É kpó mɛ e ná kp’acɛ xá ɛ lɛ́ é kpó ná ɖu ɖo gbɛ nyanya élɔ́ jí, bo ná sú mɛ nyanya lɛ́ bǐ sín kún dó ɖo malínmálín mɛ.—Nǔɖe. 6:2.

¹⁵ Ðo Axɔ́súɖuɖu xwe afatɔ́n tɔn Jezu tɔn hwenu ɔ, è ná fɔ́n mɛ e kú lɛ́ é sín kú bɔ gbɛtɔ́ tónúsetɔ́ lɛ́ ná húzú mɛ maɖóblɔ̌. Ðo mɛtɛ́nkpɔ́n gǔdo gúdo tɔn ɔ gúdo ɔ, mɛ e Jexóva mɔ dó mɔ hwɛjijɔnɔ lɛ́ é ɔ, ‘ayǐkúngban ɔ ná nyí yětɔn, bɔ yě ná nɔ jí káká sɔ́yi.’ (Ðɛh. 37:10, 11, 29) Xomɛ hun mǐ ɖɔ è ná sú “kɛntɔ́ gǔdo tɔn” e nyí ‘kú é sín kún dó.’—1 Kɔ. 15:26.

16. Étɛ́ ka nyí nǔ tají e ɖó ná sísɛ́ mǐ bɔ mǐ ná nɔ sɛn Jexóva é?

¹⁶ Lěe mǐ ko mɔ gbɔn é ɔ, nukúnɖíɖó e mǐ ɖó bo ná nɔ gbɛ káká sɔ́yi é ɔ, Xó Mawu tɔn jí wɛ é jínjɔ́n. Nukúnɖíɖó énɛ́ sixú d’alɔ mǐ bɔ mǐ ná kpo ɖo gbejí ɖo azǎn gǔdo gúdo tɔn élɔ́ lɛ́ e vɛ́ wǔ tawun é mɛ. Amɔ̌, bónú nǔ mǐtɔn ná nyɔ́ Jexóva nukúnmɛ ɔ, ba e ba wɛ mǐ ɖe bo ná nɔ gbɛ é kɛ́ɖɛ́ wɛ ná sɔ́ akpakpa mǐ ǎ. É nyɔ́ wa ɔ, hwɛjijɔ tají e wú mǐ ná kpo ɖo gbejí nú Jexóva kpó Jezu kpó é wɛ nyí wǎn ɖaxó e mǐ yí nú yě é. (2 Kɔ. 5:14, 15) Wǎnyíyí énɛ́ nɔ sísɛ́ mǐ bɔ mǐ nɔ wa nǔ yěɖɔhun, bo nɔ ɖɔ xó nú mɛ ɖěvo lɛ́ dó nukúnɖíɖó mǐtɔn wú. (Hlɔ̌. 10:13-15) Ée mǐ ná ɖo kplɔ́nkplɔ́n wɛ, bo ma sɔ́ ná nyí cejɛ́nnábínɔ ǎ lobo ná nɔ hun alɔ dó ná nǔ mɛ é ɔ, mǐ ná nyí mɛ alɔkpa e Jexóva ba é, bo ná nyí xɔ́ntɔn tɔn lɛ́ káká sɔ́yi.—Ebl. 13:16.

17. Azɔ̌ tɛ́ mǐ mɛ ɖokpó ɖokpó ka ɖó ná wa? (Matíe 7:13, 14)

¹⁷ Mǐ ka ná nɔ mɛ e ná mɔ gbɛ mavɔmavɔ lɛ́ é mɛ a? Jexóva hun ali mɔ̌hun nú mǐ. Hwe ɔ nu ɖíe bɔ mǐ ná wá gbeta ɔ kɔn, bo ná nɔ ali e nɔ kplá mɛ yi gbɛ mɛ é jí. (Xa Matíe 7:13, 14.) Nɛ̌ gbɛ ka ná cí hwenu e mǐ ná nɔ gbɛ káká sɔ́yi é? Mǐ ná ba xósin nǔkanbyɔ́ énɛ́ tɔn ɖo xóta e bɔ d’é wú é mɛ.