Jezu na alixlɛ́mɛ titewungbe ɖé lɛ mɛsɛ́dó tɔn lɛ dó lee ye na wà wɛnɖagbejijlazɔ́ ɔ gbɔn é wu hwenu e ye ɖido webɔ webɔ é. É ka nɔte ɖó finɛ ǎ. É gb’akpá nú ye kpo xomɛnyínyɔ́ kpo dó gbeklanxamɛtɔ́ lɛ wu bo ɖɔ: “Eɖíe, un sɛ́ mi dó, bɔ mi na cí lɛngbɔ̌ ɖò hla lɛ tɛntin ɖɔhun è . . . Mi cɔ́ miɖée dó gbɛtɔ́ lɛ wu, ɖó ye na wá dɔn mi yì hwɛ nukɔn, bo na wá ɖɔhwɛ xá mi, lobo na ɖó bǎ nú mi ɖò kplɔ́ngbasá yetɔn lɛ. Ye na wá kplá mi yì tokpɔngán lɛ kpodo axɔsu lɛ kpo nukɔn ɖó nyɛ wutu.”​—Matie 10:16-18.

Alixlɛ́mɛ, akpágbánúmɛ, kpo wusyɛn dó lanmɛ nú mɛ kpo titewungbe ɖé wɛ xó enɛ lɛ nyí nú mɛsɛ́dó 12 Jezu tɔn lɛ à cé? Amɔ̌, a sixu ko mɔ ɖɔ xó enɛ lɛ lɛ́vɔ ɖó tinmɛ nú mɛ ɖěɖee na wá ɖ’alɔ ɖò wɛnɖagbejijlazɔ́ ɔ mɛ ɖò kú kpo fínfɔ́n sín kú Jezu tɔn kpo gudo lɛ é. Enɛ tɔ́n ɖò xó e é ɖɔ bo ɖɔ “mɛ bǐ na gbɛ́ wǎn nú” ahwanvu emitɔn lɛ é mɛ, hǔn é nyí mɛ e mɛsɛ́dó lɛ xwè wɛn ɔ jla gbé lɛ é kɛɖɛ wɛ ǎ nɛ. Gɔ́ nú enɛ ɔ, mǐ xà ɖò fí ɖé bonu è kplá mɛsɛ́dó lɛ hɛn yì tokpɔngán lɛ kpo axɔsu lɛ kpo nukɔn ɖò táan klewun enɛ e ye jla wɛn ɔ na ɖò Galilée é mɛ ǎ. Mɔ̌ jɛn mǐ ma ka lɛ́ xà bonu hagbɛ̌ xwédo tɔn yetɔn lɛ jó ye bɔ è hu ye ǎ é nɛ.

É ɖò wɛn ɖɔ sɔgudo wɛ ɖò ayi mɛ nú Jezu bɔ é dó ɖɔ xó enɛ lɛ nú mɛsɛ́dó lɛ. Jezu ɖɔ ɖɔ ahwanvu emitɔn lɛ kún na fó wɛnɖagbejijlazɔ́ ɔ “cobɔ [emi] Gbɛtɔ́ví ɔ na wá [ó].” Lin tamɛ kpɔ́n dó xó enɛ jí. Jezu ɖò ɖiɖexlɛ́ wɛ ɖɔ ahwanvu emitɔn lɛ kún na fó Axɔsuɖuto Mawu Tɔn sín wɛnɖagbejijlazɔ́ ɔ cobonu Axɔsu Jezu Klisu e è sɔ́ sù é na wá ɖi hwɛɖɔtɔ́ Mawu tɔn ɖɔhun ó.