Zaanɖé dìn ɔ, Jehovah na zán Axɔ́suɖuto tɔn dó ɖeɖɛ tagba mǐtɔn lɛ bǐ. Wɛn ɖagbe tawun wɛ nyí wɛn enɛ bɔ mɛ lɛ bǐ ɖó na sè. Jezu ba ɖɔ ahwanvu emitɔn lɛ ni má wɛn enɛ xá mɛ bǐ! (Matie 28:19, 20) Nɛ̌ Kúnnuɖetɔ́ Jehovah tɔn lɛ ka nɔ wà nǔ sɔgbe xá gbeɖiɖe Jezu tɔn enɛ gbɔn?

1. Nɛ̌ Matie 24:14 ka ɖò jijɛnu wɛ ɖò égbé gbɔn?

Jezu ɖɔ ɖ’ayǐ ɖɔ: “È na jlá axɔ́suɖuɖu Mawu tɔn sín Wɛnɖagbe gbɔn gbɛ̀ ɔ bǐ mɛ.” (Matie 24:14) Azɔ̌ taji enɛ wiwa nɔ víví nú Kúnnuɖetɔ́ Jehovah tɔn lɛ. Mǐ nɔ jlá wɛnɖagbe ɔ gbɔn gbɛ̀ ɔ bǐ mɛ dó gbè 1 000 jɛji mɛ. Azɔ̌ kpligidi enɛ nɔ byɔ gǎndidó tawun kpo tuto kpo. È sixu wà alɔdó Jehovah tɔn mɛvo ǎ.

2. Gǎn tɛ lɛ mǐ ka nɔ dó bo na dó jlá wɛn ɔ mɛ lɛ?

Mǐ nɔ jlá wɛn ɔ ɖò fí ɖebǔ e mǐ sixu mɔ mɛ lɛ ɖè é. Klisanwun xwè kanweko nukɔntɔn ɔ tɔn lɛ ɖɔhun ɔ, mǐ nɔ jlá wɛnɖagbe ɔ gbɔn “xwé lɛ gbè.” (Mɛsɛ́dó 5:42) Wlɛnwín ɖagbe enɛ zɔ́n bɔ mǐ nɔ kpéwú bo nɔ mɔ gbɛtɔ́ livi mɔ̌kpan ɖò xwè ɖokpo ɖokpo mɛ. Ðó mɛ lɛ ma nɔ nɔ xwégbe hwebǐnu ǎ wutu ɔ, mǐ nɔ lɛ́ jlá wɛn ɔ ɖò fí e ɖò agbawungba lɛ é gegě. Mǐ nɔ ba ali e na hun nú mǐ lɛ é hwebǐnu, bo na dó ɖɔ xó nú mɛ ɖevo lɛ dó Jehovah kpo linlin tɔn lɛ kpo wu.

3. Mɛ ɖětɛ lɛ è ka sɔ́ wɛnɖagbejijlazɔ́ ɔ d’así na?

Klisanwun nǔgbo lɛ bǐ wɛ ɖó na má wɛnɖagbe ɔ xá mɛ ɖevo lɛ. Mǐ nɔ ylɔ́ azɔ̌ mǐtɔn ɖɔ nǔjɔnǔ. Mǐ nɔ jlá wɛn ɔ lee mǐ kpéwú gbɔn é, ɖó mǐ tuùn ɖɔ é sixu hwlɛn gbɛ̀ mɛ lɛ tɔn gán. (Xà 1 Timɔtée 4:16.) È nɔ sú azɔ̌ enɛ xɔ́ mǐ ǎ, ɖó Biblu ɖɔ: “Lee un na acɛ mi vɔ̌nu ɔ, mi lɔmɔ̌ mi bo wà nǔ lɛ bǐ vɔ̌nu.” (Matie 10:7, 8) Mɛ lɛ bǐ wɛ nɔ yí wɛn mǐtɔn ǎ. Amɔ̌, mǐ nɔ kpò ɖ’ewu, ɖó wɛnɖagbejijlazɔ́ ɔ, akpáxwé Mawusinsɛn mǐtɔn tɔn ɖé wɛ bo nɔ lɛ́ hɛn xomɛ Jehovah tɔn hun.

BA DÒ NÚ NǓ D’EJI

4. Mǐ nɔ w’azɔ̌ syɛnsyɛn bá jlá wɛn ɔ mɛ bǐ

Wɛnɖagbe ɔ Jijla “Kaka Yì Jɛ Fí E Gbɛ̀ ɔ Kponu Ðó É (7:33)

• Etɛ ka jiwǔ nú we ɖò gǎn e Kúnnuɖetɔ́ Jehovah tɔn lɛ nɔ dó dó jlá wɛn ɔ lɛ é mɛ?

Xà Matie 22:39 kpo Hlɔmanu lɛ 10:13-15 kpo, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:

• Nɛ̌ sinsɛnzɔ́ mǐtɔn ka nɔ xlɛ́ ɖɔ mǐ yí wǎn nú nɔzo mǐtɔn lɛ gbɔn?

• Linlin tɛ Jehovah ka nɔ ɖó dó mɛ ɖěɖee nɔ jlá wɛnɖagbe ɔ lɛ é wu?​—Kpɔ́n wemafɔ 15.

5. Azɔ̌watɔ́gbɛ́ Mawu tɔn lɛ wɛ mǐ nyí

Nǔ e jɛ kpɔ́n lɛ é gegě xlɛ́ ɖɔ Jehovah ɖò ali xlɛ́ mǐ wɛ ɖò azɔ̌ ɔ kɔn. Ði kpɔ́ndéwú ɔ, ɖò Nouvelle-Zélande ɔ, nɔví sunnu ɖé nɔ nyí Paul, bo mɔ nawe ɖé ɖò hwelɛkɔ gbè ɖokpo, hwenu e é ɖò wɛn ɔ jlá wɛ sín xwé ɖé gbè jɛ xwé ɖé gbè é. Gbè enɛ gbè zǎnzǎn ɔ, nawe ɔ ko xoɖɛ sɛ́dó Mawu, bo zán nyikɔ Mawu tɔn Jehovah ɔ, lobo byɔ ɛ ɖɔ mɛɖé ni wá ba emi kpɔ́n. Paul ɖɔ: “Ganxixo atɔn gudo ɔ, un wá xɔ tɔn lihɛnnu.”

Xà 1 Kɔlɛntinu lɛ 3:9, nwt, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Nɛ̌ nǔ e jɛ kpɔ́n lɛ é, ɖi Nouvelle-Zélande tɔn enɛ ka nɔ xlɛ́ ɖɔ Jehovah ɖò ali xlɛ́ mǐ wɛ ɖò wɛnɖagbejijlazɔ́ ɔ kɔn gbɔn?

Xà Mɛsɛ́dó 1:8, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Etɛwu mǐ ka ɖó hudo alɔdó Jehovah tɔn tɔn bo na dó wà sinsɛnzɔ́ mǐtɔn?

A ka tuùn à?

Ðò aklunɔzán gbla ɖokpo ɖokpo mɛ ɖò kplé aklunɔzán gblamɛ tɛntin tɔn mǐtɔn jí ɔ, è nɔ kplɔ́n lee mǐ na nɔ jlá wɛnɖagbe ɔ gbɔn é mǐ. Enyi a ko wá kplé enɛ lɛ ɖě jí kpɔ́n hǔn, etɛ a ka lin dó azɔ̌kplɔnmɛ enɛ wu?

6. Mǐ nɔ setónú nú gbè e Mawu ɖè ɖɔ è ni jlá wɛn ɔ é

Ðò xwè kanweko nukɔntɔn ɔ mɛ ɔ, gbeklánxámɛtɔ́ lɛ tɛ́n kpɔ́n bo na ɖó wɛnɖagbejijlazɔ́ e wà wɛ ahwanvu Jezu tɔn lɛ ɖè é te. Klisanwun bǐbɛ̌mɛ tɔn lɛ “sɔ́ [wɛnɖagbe ɔ] jinjɔn ayǐ, bɔ é lidǒ” dó jɛ ahwan acɛ e ye ɖó bo na jlá wɛn ɔ é jí. (Filipunu lɛ 1:7) Kúnnuɖetɔ́ Jehovah tɔn lɛ lɔ nɔ wà nǔ ɖokpo ɔ égbé.a

Hunjijɛ Dó Wɛnɖagbe ɔ Jí Ðò Hwɛ Nukɔn (2:28)

Xà Mɛsɛ́dó 5:27-42, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Etɛwu mǐ ma ka na ɖó wɛnɖagbejijlazɔ́ ɔ te ǎ?—Kpɔ́n wemafɔ 29, 38 kpo 39 kpo.

ETƐ LƐ A KA KPLƆ́N?

Jezu ɖegbe nú ahwanvu tɔn lɛ ɖɔ ye ni jlá wɛnɖagbe ɔ akɔta lɛ bǐ. Jehovah ɖò alɔ dó togun tɔn wɛ ɖò azɔ̌ enɛ kɔn.

Vɔ̌gbɔnji

• Nɛ̌ jlá wɛnɖagbe ɔ gbɔn wɛ è ka ɖè gbɔn gbɛ̀ ɔ bǐ mɛ?

• Nɛ̌ sinsɛnzɔ́ mǐtɔn ka nɔ xlɛ́ ɖɔ mǐ yí wǎn nú nɔzo mǐtɔn lɛ gbɔn?

• A ka lin ɖɔ wɛnɖagbejijlazɔ́ ɔ sixu hɛn awǎjijɛ wá nú mǐ à? Etɛwu?

KÍJÉ

Kpɔ́n lee Kúnnuɖetɔ́ Jehovah tɔn lɛ nɔ jlá wɛn ɔ mɛ lɛ ɖò toxo ɖaxó lɛ mɛ gbɔn é.

Kúnnuɖiɖe Agbawungba Tɔn Bǔnɔ Ðò Toxo Ðaxó lɛ Mɛ: Paris (5:11)

Etɛ Kúnnuɖetɔ́ Jehovah tɔn lɛ ka nɔ wà dó d’alɔ mɛ e ɖò bibɛtɛn ba wɛ lɛ é?

Kɔ Fífá nú Mɛ E Ðò Bibɛtɛn Ba Wɛ lɛ É Ðò Gbigbɔ Lixo (5:59)

Mɛɖé tinmɛ nǔ e wu gbɛzán tɔn zinzán dó wɛnɖagbejijlazɔ́ ɔ takúnmɛ nɔ hɛn awǎjijɛ wá n’i é. Ðǒtó è.

É Hun Xomɛ nú Mì Ðɔ Un Wá Gbeta ɔ Kɔn Bo Ðò Azɔ̌ Elɔ Wà Wɛ (6:29)

Kplɔ́n nǔ dó ɖuɖeji e mǐ ɖó ɖò hwɛ nukɔn b’ɛ zɔ́n bɔ wɛnɖagbejijlazɔ́ ɔ yì nukɔn é taji ɖé lɛ wu.

“Wɛnjlatɔ́ Axɔ́suɖuto ɔ Tɔn lɛ Nɔ Jɛ Ahwan Yeɖée Jí Ðò Hwɛ Nukɔn” (Axɔ́suɖuto Mawu Tɔn Ðò Acɛ Kpa Wɛ!, wemata 13)

Jezu kplɔ́n mɛ ɖɔ Klisanwun lɛ ɖó na bló baptɛm. (Xà Matie 28:19, 20.) Amɔ̌, etɛ ka nɔ nyí baptɛm? Etɛ lɛ mɛɖé ka ɖó na wà bo na dó kpé nǔ enɛ wu?

1. Etɛ ka nɔ nyí baptɛm?

Xókwín Glɛkigbe tɔn e mɛ è ɖè xókwín “baptɛm” ɔ sín é sín tinmɛ wɛ nyí è “nylɔ́” dó sin mɛ. Hwenu e è bló baptɛm nú Jezu é ɔ, è nylɔ́ ɛ dó Judɛ́ɛn Tɔ̀ ɔ mɛ, bɔ enɛ gudo ɔ, é ‘tɔ́n sín tɔ̀ ɔ mɛ.’ (Maki 1:9, 10) Mɔ̌ ɖokpo ɔ, enyi è jló na bló baptɛm nú Klisanwun nǔgbo lɛ ɔ, è nɔ nylɔ́ ye dó sin mɛ bǐ mlɛ́mlɛ́.

2. Etɛ baptɛm ka nɔ ɖexlɛ́?

Enyi mɛɖé bló baptɛm ɔ, é nɔ ɖexlɛ́ ɖɔ emi ko zé emiɖée jó nú Jehovah Mawu. Nɛ̌ mɛɖé ka nɔ zé éɖée jó nú Mawu gbɔn? Jɛ nukɔn nú baptɛm ɔ, ɖò ɖɛ nǔglɔ tɔn ɖé mɛ ɔ, mɛ ɔ nɔ ɖɔ nú Jehovah ɖɔ emi jló na sɛn ɛ kaka sɔyi. É nɔ dó akpá ɖɔ Jehovah kɛɖɛ wɛ emi na sɛn, bɔ nǔ taji hugǎn e emi na wà ɖò gbɛzán emitɔn mɛ é wɛ nyí nǔ e Mawu ba é. É nɔ wá gbeta ɔ kɔn bo na “jó tito éɖesunɔ tɔn lɛ dó, . . . bo xwedó” nǔkplɔnmɛ Jezu tɔn lɛ kpo kpɔ́ndéwú tɔn kpo. (Matie 16:24) Zě e é zé éɖée jó nú Mawu é kpo baptɛm e é bló é kpo na hun ali n’i bɔ é na ɖó kancica syɛnsyɛn ɖé xá Jehovah kpo Mawu sɛntɔ́ hatɔ́ tɔn lɛ kpo.

3. Etɛ lɛ mɛɖé ka ɖó na wà cobo na bló baptɛm?

Cobonu a na bló baptɛm ɔ, é ɖò taji ɖɔ a ni kplɔ́n nǔ dó Jehovah wu, bo lɛ́ tɛ́n kpɔ́n bo ɖó nǔɖiɖi ɖaxó n’i. (Xà Eblée lɛ 11:6.) Enyi nǔ e a tuùn dó Jehovah wu é kpo nǔɖiɖi towe kpo ɖò jijɛji wɛ ɔ, wǎn e a yí n’i é lɔ na ɖò jijɛji wɛ. Lobɔ xó tɔn jijla kpo nǔgbododó tɔn lɛ xwixwedó kpo na nɔ jló we. (2 Timɔtée 4:2; 1 Jaan 5:3) Enyi mɛɖé nɔ zán gbɛ̀ “lee Aklunɔ jló gbɔn é, bo . . . nɔ wà nǔ e [nɔ] nyɔ́ nukún tɔn mɛ ɔ hwebǐnu” ɔ, é sixu wá gbeta ɔ kɔn bo na zé éɖée jó nú Mawu lobo bló baptɛm.—Kolosinu lɛ 1:9, 10.a

BA DÒ NÚ NǓ D’EJI

4. Baptɛm Jezu tɔn sixu kplɔ́n nǔ mǐ

Xà Matie 3:13-17 bá kplɔ́n nǔ dó baptɛm Jezu tɔn wu d’eji. Enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:

• Jezu kpò ɖò vǔ hwenu e é bló baptɛm é wɛ à?

• Nɛ̌ è ka bló baptɛm n’i gbɔn? È kɔn sin dó ta n’i kpowun wɛ à?

Jezu bɛ́ azɔ̌ bǔnɔ e Mawu zɔ́n ɛ ɖɔ é ni wà ɖò ayikúngban jí é ɖò baptɛm tɔn gudo. Xà Luki 3:21-23 kpo Jaan 6:38 kpo, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Ee Jezu bló baptɛm gudo é ɔ, azɔ̌ tɛ é ka sɔ́ ɖó tɛn nukɔntɔn ɔ mɛ ɖò gbɛzán tɔn mɛ?

5. Baptɛm nyí nǔ e wu a sixu kpé é ɖé

Hwiɖée zízé jó nú Mawu kpo baptɛm biblo kpo sixu hu ado nú we ɖò bǐbɛ̌mɛ. É ɖò mɔ̌ có, nú a kpò ɖò nǔ kplɔ́n dó Jehovah wu wɛ bo ɖò tuùntuùn i wɛ ganji ɔ, jì na ɖè we hugǎn bɔ a na wá gbeta taji enɛ kɔn. Nú a na mɔ mɛ e wà mɔ̌ é ɖé lɛ sín kpɔ́ndéwú hǔn, xò VIDEO ɔ.

VIDEO: Nǔsisɔ nú Kancica ɖé Xá Jehovah (1:11)

Xà Jaan 17:3 kpo Jaki 1:5 kpo, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Etɛ lɛ ka sixu d’alɔ mɛɖé b’ɛ na ɖò gbesisɔmɛ nú baptɛm?

1. Mǐ nɔ zé mǐɖée jó nú Jehovah gbɔn ɖiɖɔ n’i ɖɔ mǐ jló na sɛn ɛ kaka sɔyi gblamɛ

2. Ðò baptɛm mǐtɔn hwenu ɔ, mǐ nɔ ɖexlɛ́ nǔkpɔntɔ́ lɛ ɖɔ mǐ ko zé mǐɖée jó nú Mawu

6. Nú mǐ bló baptɛm ɔ, mǐ nɔ byɔ xwédo Jehovah tɔn mɛ

Nú mǐ bló baptɛm ɔ, mǐ nɔ byɔ xwedó e ɖò bǔ gbɔn gbɛ̀ ɔ bǐ mɛ é ɖé mɛ. Mǐ gosin fí vovo lɛ bo lɛ́ ɖó aca vovo lɛ có, mǐ bǐ wɛ nɔ ɖi nǔ nú nǔ ɖokpo ɔ lɛ, bo nɔ lɛ́ zán gbɛ̀ sɔgbe xá nǔgbododó walɔ ɖagbe tɔn ɖokpo ɔ lɛ. Xà Nǔnywɛxó 3:32 kpo 1 Piyɛ́ɛ 2:17 kpo, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Nɛ̌ baptɛm ka nɔ kúnkplá kancica e mɛɖé ɖó xá Jehovah kpo Jehovah sɛntɔ́ ɖevo lɛ kpo é gbɔn?

ETƐ LƐ A KA KPLƆ́N?

Jezu kplɔ́n mɛ ɖɔ Klisanwun lɛ ɖó na bló baptɛm. Cobonu mɛɖé na jɛxa bo na bló baptɛm ɔ, é ɖó na sɔnǔ nú nǔɖiɖi ɖaxó nú Jehovah, nɔ zán gbɛ̀ sɔgbe xá nǔgbododó tɔn lɛ, lobo lɛ́ zé éɖée jó n’i.

Vɔ̌gbɔnji

• Etɛ ka nɔ nyí baptɛm? Etɛwu é ka ɖò taji?

• Etɛ baptɛm ka nɔ ɖexlɛ́?

• Afɔ tɛ lɛ è ka nɔ ɖè cobo nɔ zé mɛɖée jó nú Mawu lobo nɔ bló baptɛm?

KÍJÉ

Kplɔ́n nǔ e baptɛm nyí é kpo nǔ e é ma nyí ǎ é kpo.

“Etɛ ka Nɔ Nyí Baptɛm?” (Xóta Ɛntɛnɛti jí tɔn)

Lɛ̌ vɔ́ nǔ ɖěɖee mɛɖé ɖó na wà cobo na bló baptɛm lɛ é jí gbɔn.

“Wǎn Yí nú Jehovah Nɔ Sísɛ́ Mɛ Bɔ È Nɔ Bló Baptɛm” (Atɔxwɛ mars 2020)

Gbeta e kɔn dawe ɖé wá bo bló baptɛm é sín lee nǔ nɔ cí nú mɛ é wu kpowun ǎ. Xà lee nǔ nyí mɔ̌ gbɔn é.

“Ye Ba Ðɔ Nyiɖesunɔ Ni Mɔ Ðɔ Nǔgbo ɔ Wɛ” (Atɔxwɛ [Gungbe] 1^er avril 2013)

Kpɔ́n nǔ e wu baptɛm nyí nǔ e gbé é jɛxa ɖɔ è na nya é ɖé é kpo lee a sixu sɔnǔ na gbɔn é kpo.

“Un ka Ðó Na Bló Baptɛm Wɛ À?” (Les jeunes s’interrogent. Réponses pratiques, Akpáxwé 2gɔ́, wemata 37)