Kayifu tɛnkpɔn bɔ Hwɛɖɔxɔsa Ðaxó Jwifu lɛ Tɔn ɔ ɖè wě bo na hu Jezu. Nikodɛmu, ee nyí ɖokpo ɖò hwɛɖɔtɔ́ enɛ lɛ mɛ bo ka nyí xɔ́ntɔn Jezu tɔn é, ɖɔ gbě tɔn enɛ e ye bla é n’i wɛ à? Ðebǔ wɛ é na bo nyí gbɔn ɔ, Jezu gosin xá enɛ e sɛkpɔ Jeluzalɛmu é mɛ, bonu è ma hu i cobonu azǎn e Mawu ɖó é na kpé ó.

Jezu xò gló gbě tɔn e Hwɛɖɔxɔsa Ðaxó Jwifu lɛ Tɔn bla bo na hu i é, lobo yì toxo e nɔ nyí Eflayimu é mɛ, ɖò totaligbé-zǎnzǎnhweji mɔ̌ nú Jeluzalɛmu. É hɔn nú kɛntɔ́ tɔn lɛ bo cí finɛ, é kpo ahwanvu tɔn lɛ kpo. (Jaan 11:54) É ɖò mɔ̌ có, Dindinwayixwe xwè 33 H.M. tɔn ɖò sisɛya wɛ, enɛ wu ɔ, é lín cobonu Jezu lɛ́vɔ jɛ ali ǎ. É tunta totaligbé bo gbɔn Samalíi kaka yì Galilée; azɔn gudo tɔn e é yì xá enɛ mɛ jɛ nukɔn nú kú tɔn é nɛ.