A ka flín a?

A ka xa Atɔxwɛ yaɖéyaɖé e tɔ́n wá yi lɛ́ é ganjí a? É nyɔ́, kpɔ́n ɖɔ a ka sixú ná xósin nú nǔkanbyɔ́ élɔ́ lɛ́ a jí:

‘Étɛ́ ayi mɛtɔn sín hǔzúhúzú’ ka nɔ byɔ́? (Hlɔ̌. 12:2)

É byɔ́ nǔ hú nǔ ɖagbe lɛ́ wiwa ɖo gbɛzán mǐtɔn mɛ. É lɛ́ byɔ́ ɖɔ mǐ ní gbéjé mɛ alɔkpa e mǐ nyí ɖo ayi mǐtɔn mɛ é kpɔ́n, bo bló hǔzúhúzú lɛ́, bá dó zán gbɛ sɔgbe xá nǔgbódodó Mawu tɔn lɛ́ lěe mǐ kpé wú gbɔn é bǐ.—w23.01, wex. 8-9.

Nɛ̌ mǐ ka sixú ɖe xlɛ́ ɖɔ mǐ nɔ nɔ jlɛ̌ jí hwenu e mǐ ɖo nǔ ɖěɖěe ɖo jijɛ wɛ ɖo gbɛ ɔ mɛ lɛ́ é kpɔ́n wɛ é gbɔn?

Lěe nǔ ɖěɖěe ɖo jijɛ wɛ lɛ́ é ɖo blǒbló wɛ bɔ ­nǔɖɔɖayǐ ­Biblu tɔn lɛ́ ɖo jijɛnu wɛ gbɔn é tuuntuun nɔ sɔ́ akpakpa mǐ. Amɔ̌, mǐ ɖó ná nɔ ɖɔ nǔ e mǐ lin dó nǔ e ɖo jijɛ wɛ lɛ́ é wú é nú mɛ ɖěvo lɛ́ ǎ, ɖó nǔ wa gbɔn mɔ̌ sixú dɔn kínklán byɔ́ tɛ́ntin mǐtɔn. É nyɔ́ wa ɔ, é ná nyɔ́ ɖɔ mǐ ní nɔ sɔ́ xóɖɔɖókpɔ́ mǐtɔn jínjɔ́n nǔ e ɖo nǔ e tutoblónúnǔ Jexóva tɔn ɖe tɔ́n lɛ́ é mɛ é jí. (1 Kɔ. 1:10)—w23.02, wěx. 16.

Nɛ̌ batɛ́mu Jezu tɔn ka gbɔn vo nú batɛ́mu ahwanvú tɔn lɛ́ tɔn gbɔn?

Ðó è ji Jezu ɖo akɔta ɖeɖóvo Mawu tɔn mɛ wútu ɔ, é sɔ́ byɔ́ ɖɔ é ní sɔ́ éɖée jó nú Jexóva, lěe mǐdɛɛ lɛ́ nɔ bló gbɔn é ǎ. Mɛ maɖóblɔ̌ wɛ Jezu nyí, bɔ hwɛ ɖě ɖo kɔ n’i ǎ. É byɔ́ ɖɔ é ní lɛ́ kɔ sín hwɛ tɔn lɛ́ gúdo ǎ.—w23.03, wěx. 5.

Nɛ̌ mǐ ka sixú d’alɔ mɛ ɖěvo lɛ́ bɔ yě ná nɔ ná xósin ɖo kplé lɛ́ jí gbɔn?

Mǐ sixú nɔ ná xósin e ɖo kléwún lɛ́ é, énɛ́ ɔ, mǐ ná ná tɛn mɛ ɖěvo lɛ́ lɔ bónú yě ní ɖ’alɔ ɖ’é mɛ. Mǐ sixú lɛ́ nyi alɔ nú xó ɖiɖɔ dó nǔ tají gěgé jí. Énɛ́ ɔ, ali ná hun nú mɛ ɖěvo lɛ́ lɔ bɔ yě ná ɖɔ xó.—w23.04, wěx. 23.

Étɛ́ dó gesí wɛ “Ali mímɛ́” e xó è ɖɔ ɖo Ezayíi 35:8 mɛ é ka ɖe?

Nǔ nukɔntɔn e dó gesí wɛ ali ɖaxó nǔjlɛ́dónǔwú tɔn énɛ́ ɖe é wɛ nyí ali e jí Jwifu lɛ́ gbɔn hwenu e yě gosín Babilɔ́nu wá yi jɔtɛn yětɔn é. Bɔ agaɖanu din ka lo? Ðo xwe kanweko mɔ̌kpán e jɛ nukɔn nú 1919 lɛ́ é mɛ ɔ, è wa nǔvɔ́jláɖózɔ́ ɖé, énɛ́ wɛ nyí ɖɔ è tínmɛ Biblu ɔ bo lɛ́ zín; é ka nyí azɔ̌ énɛ́ kɛ́ɖɛ́ wɛ è wa ǎ. Togun Mawu tɔn ɖo zɔnlin zun wɛ gbɔn “Ali mímɛ́” ɔ jí xwe palaɖísi gbigbɔ tɔn ɖé mɛ; palaɖísi énɛ́ ná zɔ́n bɔ mǐ ná mɔ nyɔ̌ná Axɔ́súɖuto ɔ tɔn lɛ́.—w23.05, wěx. 15-19.

Nyɔ̌nu nǔjlɛ́dónǔwú tɔn we tɛ́ lɛ́ wú wɛ Nǔ­nywɛ́­xó wěmata 9gɔ́ ɔ ka ɖe wě xá mǐ dó?

Wěma Nǔnywɛ́xó tɔn ɖɔ xó dó “nyɔ̌nu tagbanɔ” ɖé wú, bɔ mɛylɔ́ylɔ́ tɔn nɔ kplá mɛ yi “kú”; é lɛ́ ɖɔ xó dó nyɔ̌nu e nɔ te nú ‘nǔnywɛ́ jɔ nǔnywɛ́’ é wú, bɔ mɛylɔ́ylɔ́ éyɛ́ tɔn nɔ kplá mɛ gbɔn “nukúnnúmɔjɛnǔmɛ sín ali” jí, bo nɔ zɔ́n bɔ è nɔ mɔ gbɛ. (Nǔx. 9:1, 6, 13, 18)—w23.06, wěx. 22-24.

Nɛ̌ mɛɖéesɔ́hwe kpó jlɛ̌jíninɔ kpó Mawu tɔn ka jɛ wě ɖo lěe é wa nǔ xá Lɔti gbɔn é mɛ gbɔn?

Jexóva ɖe wě xá Lɔti ɖɔ é ní hɔn sín Sodɔ́mu bo yi sókan mɛ. Ée Lɔti sa vo nú Mawu ɖɔ émí ná yi hɔn hwlá cí Sowáa é ɔ, Mawu yí gbe n’i.—w23.07, wěx. 21.

Ényí asú ɖé nɔ kpɔ́n fɔtóo nǔblíblíwiwa tɔn ɔ, étɛ́ asi tɔn ka sixú wa?

Asi ɔ ɖó ná flín ɖɔ é kún nyí hwɛ émítɔn ó. É ɖó ná sɔ́ ayi ɖó vɛ̌ e é vɛ́ xá Mawu é jí, bo nɔ lin tamɛ dó tan nyɔ̌nu ɖěɖěe xó Biblu ɖɔ, bɔ ayi yětɔn gba dó lobɔ Mawu dó gbɔ nú yě lɛ́ é tɔn jí. É sixú d’alɔ asú tɔn bɔ é ná nɔ nyi alɔ nú ninɔmɛ ɖěɖěe sixú tɛ́n ɛ kpɔ́n lɛ́ é.—w23.08, wěx. 14-17.

Ényí è mɔ xó ɖɔ dó nǔ e mǐ ɖi nǔ ná lɛ́ é wú ɔ, nɛ̌ nǔnywɛ́ ka sixú d’alɔ mǐ bɔ mǐ ná nɔ fá xomɛ gbɔn?

Mǐ sixú mɔ nǔ e è kanbyɔ́ mǐ dó nǔ e mǐ ɖi nǔ ná lɛ́ é wú é, alǒ xó e è mɔ ɖɔ dó yě wú é dó mɔ ɖɔ ali ɖé wɛ hun nú mǐ bɔ mǐ ná tuun nǔ e mɛɖé lin é, abǐ nǔ e nɔ ɖu ayi mɛ n’i é. Mɔ̌ mɛ ɔ, mǐ nɔ ɖo gbesisɔmɛ hú gǎn bo ná ná xósin mɛ kpó gbe fífá kpó.—w23.09, wěx. 17.

Étɛ́ lěe Mali mɔ hlɔ̌nhlɔ́n gbɔn é ka sixú kplɔ́n mǐ?

Ée Mali se ɖɔ émí ná wá nyí nɔ Mɛsíya ɔ tɔn é ɔ, é ɖu le wǔsyɛ́n e mɛ ɖěvo lɛ́ dó lanmɛ n’i é tɔn. Gabliyɛ́li kpó Elizabɛ́ti kpó ɖɔ wǔsyɛ́n dó lanmɛ nú mɛ sín xó e ɖo Biblu mɛ lɛ́ é nú Mali. Mǐ lɔmɔ̌ sixú mɔ hlɔ̌nhlɔ́n gbɔn wǔsyɛ́n e nǔɖitɔ́ hǎtɔ́ mǐtɔn lɛ́ nɔ dó lanmɛ nú mǐ lɛ́ é gblamɛ.—w23.10, wěx. 15.

Nɛ̌ Jexóva ka nɔ ná sin nú ɖɛ mǐtɔn lɛ́ gbɔn?

É dó akpá ɖɔ émí ná nɔ ɖótó ɖɛ mǐtɔn lɛ́, bo ná nɔ kpɔ́n lěe yě cá kan xá linlin émítɔn gbɔn é. (Jel. 29:12) É sixú ná sin nú ɖɛ ɖokpó ɔ lɛ́ ɖo ali vovo nu, amɔ̌, é ná kpé nukún mǐ wú hwebǐnu.—w23.11, wěx. 21-22.

Hlɔ̌manu lɛ́ 5:2 ɖɔ “nukúnɖíɖó” xó, aniwú è ka lɛ́ ɖɔ xó d’é wú ɖo wěmafɔ 4gɔ́ ɔ mɛ?

Ényí mɛɖé se wɛn ɖagbe ɔ ɔ, é sixú ɖó nukún ɖɔ émí ná ɖu gbɛ sín vǐví ɖo palaɖísi mɛ ɖo ayǐkúngban jí. Amɔ̌, ényí mɛ ɔ ɖo wǔvɛ́ lɛ́ mɔ wɛ, ɖo didɛ ɖo yě nu wɛ, bo nɔ lɛ́ mɔ ɖɔ nǔ émítɔn nyɔ́ Mawu nukúnmɛ ɔ, nukúnɖíɖó tɔn ná ɖibla syɛ́n d’é jí, bɔ é ná lɛ́ sɔ́ dó ɖó étɔn hú gǎn.—w23.12, wěx. 12-13.