Kpo ɖo “gbɛtɔ́ yɔ̌yɔ́” ɔ sɔ́ dó wɛ ɖo batɛ́mu towe gúdo

1. Étɛ́ ka nyí nǔ tají e nɔ wa nǔ dó mɛ alɔkpa e mǐ nyí é wú é?

ÉNYÍ agaɖanu din wɛ mǐ bló batɛ́mu, alǒ mǐ bló din é ɔ xwe ko jɛ dó wɛ nyí ɔ, mǐ bǐ wɛ nɔ ba ná ɖó jijɔ ɖěɖěe Jehovah yí wǎn ná lɛ́ é. Bó ná dó kpé énɛ́ wú ɔ, mǐ ɖó ná nɔ cɔ́ linlin mǐtɔn lɛ́. Étɛ́wú? Ðó nǔ tají e nɔ wa nǔ dó mɛ alɔkpa e mǐ nyí é wú é wɛ nyí linlin mǐtɔn lɛ́. Ényí mǐ nɔ ɖo tamɛ lin wɛ hwebǐnu dó nǔ e mǐ ná wa dó nyɔ́ ɖo mǐɖée sí é jí ɔ, mǐ ná ɖɔ nǔ masɔgbe lɛ́, bó lɛ́ wa yě. (Efɛ́. 4:17-19) Ðo alɔ ɖěvo mɛ ɔ, ényí mǐ nɔ bɛ́ linlin ɖagbe lɛ́ gɔ́ ayi mǐtɔn ɔ, mǐ ná ɖibla ɖɔ xó, bó lɛ́ wa nǔ hú gǎn ɖo ali ɖé nu b’ɛ ná nyɔ́ Tɔ́ mǐtɔn Jehovah nukúnmɛ.—Ga. 5:16.

2. Nǔkanbyɔ́ tɛ́ lɛ́ jí mǐ ka ná ɖɔ xó dó ɖo xóta élɔ́ mɛ?

² Lěe mǐ ko ɖɔ gbɔn ɖo xóta e wá yi é mɛ é ɔ, mǐ sixú sú ali dó linlin nyanya lɛ́ bǐ mlɛ́mlɛ́ bɔ yě ná gɔn ayi mǐtɔn mɛ byɔ́ ǎ. Amɔ̌, mǐ sixú wá gbeta ɔ kɔn bó ná gɔn nǔ wa sɔgbe xá linlin mɔ̌hun lɛ́. Cóbónú mǐ ná bló batɛ́mu ɔ, é byɔ́ ɖɔ mǐ ní ma sɔ́ nɔ ɖɔ xó, bó lɛ́ wa nǔ ɖěɖěe Jehovah gbɛ́ wǎn ná lɛ́ é ó. Afɔ nukɔntɔn, éé lɛ́ ɖo tají hú gǎn bɔ è sixú ɖe dó ɖe gbɛtɔ́ xóxó ɔ nyi ayǐ é nɛ́. Amɔ̌, bó ná dó nyɔ́ Jehovah nukúnmɛ bǐ mlɛ́mlɛ́ ɔ, mǐ ɖó ná se tónú nú gbeɖiɖe tɔn élɔ́: “Mi sɔ́ ninɔmɛ yɔ̌yɔ́ ɔ dó; ninɔmɛ gbɛtɔ́ yɔ̌yɔ́ [ɔ] tɔn.” (Koló. 3:10) Ðo xóta élɔ́ mɛ ɔ, mǐ ná ná xósin nú nǔkanbyɔ́ élɔ́ lɛ́: Étɛ́ ka nyí “gbɛtɔ́ yɔ̌yɔ́” ɔ? Nɛ̌ mǐ ka sixú sɔ́ gbɛtɔ́ yɔ̌yɔ́ ɔ dó, bɔ é ná nɔ mǐ wú sɔ́yi gbɔn?

ÉTƐ́ KA NYÍ “GBƐTƆ́ YƆ̌YƆ́” Ɔ?

3. Étɛ́ ka nyí “gbɛtɔ́ yɔ̌yɔ́” ɔ? Nɛ̌ mɛɖé ka sixú sɔ́ dó gbɔn? (Galátinu lɛ́ 5:22, 23)

³ Mɛ e sɔ́ “gbɛtɔ́ yɔ̌yɔ́” ɔ dó é nɔ wa nǔ Jehovah ɖɔhun. Mɛ e sɔ́ gbɛtɔ́ yɔ̌yɔ́ ɔ dó é nɔ ɖe jijɔ e gbigbɔ Mawu tɔn nɔ ná mɛ lɛ́ é xlɛ́, nɔ yí gbe bɔ gbigbɔ ɔ nɔ xlɛ́ ali linlin tɔn, lěe nǔ nɔ cí n’i é kpó nǔwiwa tɔn lɛ́ kpó. (Xa Galátinu lɛ́ 5:22, 23.) Ði kpɔ́ndéwú ɔ, é nɔ yí wǎn nú Jehovah kpó togun Tɔn kpó. (Mat. 22:36-39) Mɛ mɔ̌hun ná bó tlɛ ɖo tagba lɛ́ ɖí xwi xá wɛ ɔ, é nɔ kpo ɖo awǎ jɛ wɛ. (Ja. 1:2-4) É nɔ xo fífá kan. (Mat. 5:9) É nɔ ɖó suúlu, bó nɔ lɛ́ nyɔ́ xomɛ hwenu e é ɖo nǔ wa ɖó kpɔ́ xá mɛ ɖěvo lɛ́ wɛ é. (Koló. 3:12, 13) É nɔ yí wǎn nú nǔ ɖagbe, bó nɔ lɛ́ wa ɖagbe. (Luk. 6:35) É nɔ ɖe xlɛ́ gbɔn nǔwiwa tɔn lɛ́ gblamɛ ɖɔ émí ɖó nǔɖiɖi adodwé nú Tɔ́ émítɔn jǐxwé tɔn ɔ. (Ja. 2:18) Ényí è ba nu tɔn ɔ, é nɔ kpo ɖo xomɛ fá wɛ; mɔ̌ jɛ́n è tɛ́n ɛ kpɔ́n ɔ, é nɔ lɛ́ kpo ɖo éɖée jí ɖu ɖe wɛ é nɛ́.—1 Kɔ. 9:25, 27; Ti. 3:2.

4. Bó ná dó sɔ́ gbɛtɔ́ yɔ̌yɔ́ ɔ dó ɔ, étɛ́wú é ka byɔ́ ɖɔ mǐ ní sɔ́ nǔ nú jijɔ e xó è ɖɔ ɖo Galátinu lɛ́ 5:22, 23 mɛ lɛ́ é bǐ, bó lɛ́ sɔ́ nǔ nú éé xó è ɖɔ ɖo akpáxwé Biblu tɔn ɖěvo lɛ́ mɛ lɛ́ é, lobo lɛ́ ɖe yě xlɛ́?

⁴ Bó ná dó sɔ́ gbɛtɔ́ yɔ̌yɔ́ ɔ dó ɔ, mǐ ɖó ná sɔ́ nǔ nú jijɔ e xó è ɖɔ ɖo Galátinu lɛ́ 5:22, 23 mɛ lɛ́ é bǐ, bó lɛ́ sɔ́ nǔ nú éé xó è ɖɔ ɖo akpáxwé Biblu tɔn ɖěvo lɛ́ mɛ lɛ́ é.b Jijɔ énɛ́ lɛ́ cí nǔzínzán ɖěɖěe mǐ nɔ ɖo ɖyɔ̌ɖyɔ́ wɛ sín hweɖénu jɛ hweɖénu lɛ́ é ɖɔhun ǎ. Nǔgbó ɔ, jijɔ énɛ́ lɛ́ gěgé tíin bó nɔ ɖi ɖěvo lɛ́. Ði kpɔ́ndéwú ɔ, ényí a yí wǎn nú nɔzo towe nǔgbó nǔgbó ɔ, a ná wa nǔ xá ɛ kpó suúlu kpó, bó lɛ́ nyɔ́ xomɛ dó wǔ tɔn. Gɔ́ ná ɔ, bó ná dó nyí mɛ ɖagbe nǔgbó nǔgbó ɔ, a ɖó ná nɔ ɖó suúlu, bó lɛ́ ɖu ɖo hwiɖée jí.

NƐ̌ MǏ KA SIXÚ SƆ́ GBƐTƆ́ YƆ̌YƆ́ Ɔ DÓ GBƆN?

5. Étɛ́ ka nyí tínmɛ è ní ɖó “linlin Klísu tɔn” tɔn? Étɛ́wú mǐ ka ɖó ná kplɔ́n nǔ dó gbɛzán Jezu tɔn wú? (1 Kɔlɛ́ntinu lɛ́ 2:16)

⁵ Xa 1 Kɔlɛ́ntinu lɛ́ 2:16. Bó ná dó sɔ́ gbɛtɔ́ yɔ̌yɔ́ ɔ dó ɔ, mǐ ɖó ná tuun “linlin Klísu tɔn.” Ðo xógbe ɖěvo mɛ ɔ, mǐ ɖó ná kplɔ́n lěe Jezu nɔ lin nǔ gbɔn é, lobo wa nǔ éɖɔhun. Jezu ɖe nǔ e gbigbɔ Mawu tɔn nɔ ná mɛ lɛ́ é xlɛ́ bɔ nǔ bǐ vɔ ɖ’é wú. Lěe nǔkpɛ́n e ma zɛ ǎ é nɔ mɔ nǔ lɛ́ pɛ́pɛ́pɛ́ gbɔn é ɔ, mɔ̌ wɛ Jezu ɖe jijɔ Jehovah tɔn lɛ́ xlɛ́ pɛ́pɛ́pɛ́ gbɔn é nɛ́. (Ebl. 1:3) Bǎ e mɛ mǐ lin nǔ Jezu ɖɔhun yi ɖó é ɔ, bǎ énɛ́ mɛ wɛ mǐ ná wa nǔ éɖɔhun, bó lɛ́ zán gbɛ éɖɔhun yi ɖó.—Filí. 2:5.

6. Ényí mǐ ɖo tíntɛ́nkpɔ́n wɛ bó ná sɔ́ gbɛtɔ́ yɔ̌yɔ́ ɔ dó ɔ, étɛ́ lɛ́ mǐ ka ɖó ná hɛn dó ayi mɛ?

⁶ Mǐ ka sixú xwedó kpɔ́ndéwú Jezu tɔn dóó a? Mǐ sixú lin nǔ gbɔn lě: ‘Jezu ɔ mɛ maɖóblɔ̌ wɛ. Mǐ ná cí éɖɔhun pɛ́pɛ́pɛ́ gbeɖé ǎ!’ Ényí nǔ nɔ cí mɔ̌ nú we hǔn, flín nǔgbó élɔ́ lɛ́. Nukɔntɔn, è dá we bónú a ná cí Jehovah kpó Jezu kpó ɖɔhun. Énɛ́ wútu ɔ, a sixú wá gbeta ɔ kɔn bó ná xwedó kpɔ́ndéwú yětɔn, b’ɛ ka sixú kpa we; é hwe bǐ ɔ, ɖó bǎ ɖé mɛ. (Bǐb. 1:26) Wegɔ́, gbigbɔ mímɛ́ Mawu tɔn wɛ nyí hlɔ̌nhlɔ́n aditi e ɖo wɛ̌kɛ́ ɔ mɛ é. Kpó alɔdó tɔn kpó ɔ, a sixú wa nǔ ɖěɖěe a ma sixú wa hwiɖóɖó gbeɖé ǎ lɛ́ é. Atɔngɔ́, Jehovah nɔ ɖó nukún ɖɔ hwi ní ɖe jijɔ e gbigbɔ mímɛ́ nɔ ná mɛ lɛ́ é xlɛ́ bónú nǔ bǐ ní vɔ ɖ’é wú din ǎ. Nǔgbó ɔ, xwe 1 000 wɛ Tɔ́ wǎnyíyínɔ mǐtɔn ɖe ɖó vo nú mɛ ɖěɖěe ɖó nukúnɖíɖó ayǐkúngban jí tɔn lɛ́ é, bónú yě ná dó húzú mɛ maɖóblɔ̌. (Nǔɖe. 20:1-3) Nǔ e ɖó nukún wɛ Jehovah ɖe ɖo mǐ sí din é wɛ nyí ɖɔ mǐ ní wa nǔ e wú mǐ kpé é bǐ, bó lɛ́ ɖeji dó wǔ tɔn ɖɔ é ná d’alɔ mǐ.

7. Étɛ́ mǐ ka ná gbéjé kpɔ́n din?

⁷ Ali tawun tɛ́ nu mǐ ka sixú xwedó kpɔ́ndéwú Jezu tɔn ɖe? Mǐ ná gbéjé jijɔ e gbigbɔ mímɛ́ Mawu tɔn nɔ bló bɔ è nɔ ɖó lɛ́ é ɛnɛ kpɔ́n ɖo kléwún mɛ. Ðo ninɔmɛ ɖokpó ɖokpó mɛ ɔ, mǐ ná kpɔ́n nǔ e lěe Jezu ɖe jijɔ énɛ́ lɛ́ xlɛ́ gbɔn é sixú kplɔ́n mǐ é. Ée mǐ ná ɖo mɔ̌ wa wɛ é ɔ, mǐ ná gbéjé nǔkanbyɔ́ ɖěɖěe sixú d’alɔ mǐ bɔ mǐ ná kpé wú bó sɔ́ gbɛtɔ́ yɔ̌yɔ́ ɔ dó hú gǎn é ɖé lɛ́ kpɔ́n.

8. Nɛ̌ Jezu ka ɖe wǎnyíyí xlɛ́ gbɔn?

⁸ Jezu ɖe lěe é yí wǎn nú Jehovah gbɔn é xlɛ́ gbɔn vɔ̌ e é sá dó Tɔ́ tɔn kpó mǐ kpó sín takúnmɛ lɛ́ é gblamɛ. (Jaan 14:31; 15:13) Jezu ɖe lě do é yí wǎn nú gbɛtɔ́ lɛ́ tawun sɔ é xlɛ́ gbɔn lěe é zán gbɛ tɔn gbɔn ɖo ayǐkúngban jí é gblamɛ. Gbe bǐ gbe wɛ Jezu nɔ ɖe wǎnyíyí kpó wǔvɛ́sexámɛ kpó xlɛ́, é ná bó tlɛ nyí hwenu e mɛɖé lɛ́ klán gbe xá ɛ é ɔ nɛ́. Ali tají e nu é ɖe wǎn e é yí nú gbɛtɔ́ lɛ́ é xlɛ́ ɖe é wɛ nyí gbɔn nǔ kplɔ́nkplɔ́n yě dó Axɔ́súɖuto Mawu tɔn wú gblamɛ. (Luk. 4:43, 44) Jezu lɛ́ ɖe wǎnyíyí mɛɖée sísɔ́ dó sá vɔ̌ tɔn xlɛ́ Mawu kpó gbɛtɔ́ lɛ́ kpó, gbɔn gbe e é yí bɔ hwɛhutɔ́ lɛ́ dó ya n’i, bó lɛ́ hu i é gblamɛ. Mɔ̌ e é wa é hun ali gbɛ mavɔmavɔ tɔn nú mǐ bǐ.

9. Nɛ̌ mǐ ka sixú ɖe wǎnyíyí xlɛ́ Jezu ɖɔhun gbɔn?

⁹ Mǐ nɔ zé mǐɖée jó nú Jehovah, bó nɔ bló batɛ́mu, ɖó mǐ yí wǎn nú Tɔ́ mǐtɔn jǐxwé tɔn ɔ wútu. Énɛ́ wú ɔ, Jezu ɖɔhun ɔ, mǐ ɖó ná nɔ ɖe wǎnyíyí xlɛ́ Jehovah gbɔn lěe mǐ nɔ wa nǔ xá mɛ ɖěvo lɛ́ gbɔn é gblamɛ. Mɛsɛ́dó Jaan wlán ɖɔ: “Mɛ e ma yí wǎn nú nɔví tɔn e mɔ wɛ é ɖe ɔ ǎ ɔ, nɛ̌ é ka ná sixú yí wǎn nú Mawu e mɔ wɛ é ma ɖe ǎ é gbɔn?” (1 Jaan 4:20) Mǐ sixú kan nǔ élɔ́ lɛ́ byɔ́ mǐɖée: ‘Un ka nɔ ɖe wǎnyíyí adodwé xlɛ́ mɛ ɖěvo lɛ́ a? Un ka nɔ se wǔvɛ́ xá mɛ ɖěvo lɛ́, é ná bó tlɛ nyí hwenu e yě ma nyɔ́ xomɛ dó wǔ ye ǎ é a? Wǎnyíyí ka nɔ sísɛ́ mì bɔ un nɔ zán hwenu kpó nǔɖókan ce lɛ́ kpó bó ná dó d’alɔ mɛ ɖěvo lɛ́ bónú yě ná kplɔ́n nǔ dó Jehovah wú a? Un ka nɔ ɖo gbesisɔmɛ bá wa mɔ̌, é ná bó tlɛ nyí hwenu e mɛ gěgé ma tuun gǎn e dó wɛ un ɖe é nú mì ǎ é, alǒ hwenu e mɛ gěgé klán gbe xá mì é a? Un ka sixú lɛ́ ba ali ɖěvo e nu un sixú lɛ́ zán hwenu hú gǎn ɖo azɔ̌ nǔ kplɔ́nkplɔ́n mɛ lɛ́ bónú yě ná húzú ahwanvú tɔn ɔ mɛ ɖe lɛ́ é a?’—Efɛ́. 5:15, 16.

10. Nɛ̌ Jezu ka nyí fífákanxotɔ́ gbɔn?

¹⁰ Fífá kan wɛ Jezu nɔ xo. Ényí mɛ lɛ́ wa nǔ agɔ xá ɛ ɔ, é nɔ sɔ́ nyanya dó sú nyanya xɔ́ ǎ. É nyɔ́ wa ɔ, é nɔ wa nǔ hú mɔ̌. É nɔ ɖe afɔ nukɔntɔn ɔ bó nɔ xo fífá kan, bó nɔ lɛ́ dó wǔsyɛ́n lanmɛ nú mɛ ɖěvo lɛ́ ɖɔ yě ní dó hwɛ gbɔ. Ði kpɔ́ndéwú ɔ, é kplɔ́n mɛ lɛ́ ɖɔ yě ɖó ná nɔ xo fífá kan xá nɔví yětɔn lɛ́, ényí yě ba ɖɔ Jehovah ní yí gbe nú sɛn e sɛn ɛ wɛ yě ɖe é ɔ nɛ́. (Mat. 5:9, 23, 24) Gɔ́ ná ɔ, azɔn gěgé wɛ é d’alɔ mɛsɛ́dó tɔn lɛ́ bónú yě ná gɔn nǔ dɔn dó mɛ e ná nyí nǔɖaxó ɖo tɛ́ntin yětɔn é wú.—Luk. 9:46-48; 22:24-27.

11. Nɛ̌ mǐ ka sixú nyí fífákanxotɔ́ gbɔn?

¹¹ Bó ná dó nyí fífákanxotɔ́ ɔ, mǐ ɖó ná wa nǔ hú alɔ nyinyi nú tagba lɛ́ dindɔn nyi ayǐ kpowun. Mǐ ɖó ná nɔ ɖe afɔ nukɔntɔn ɔ bó xo fífá kan xá mɛ ɖěvo lɛ́, bó lɛ́ dó wǔsyɛ́n lanmɛ nú nɔví súnnu kpó nɔví nyɔ̌nu kpó mǐtɔn lɛ́, bɔ yě ná nɔ ɖe ɖɛ gbemanɔkpɔ́ yětɔn lɛ́. (Filí. 4:2, 3; Ja. 3:17, 18) Mǐ sixú kan nǔ élɔ́ lɛ́ byɔ́ mǐɖée: ‘Un ka nɔ ɖo gbesisɔmɛ bá xo fífá kan xá mɛ ɖěvo lɛ́ a? Ényí nɔví súnnu alǒ nɔví nyɔ̌nu ɖé dó xomɛsin xomɛ nú mì ɔ, un ka nɔ hɛn ɛ dó xomɛ wɛ a? Un nɔ ɖó nukún ɖɔ mɛ wegɔ́ ɔ ní ɖe afɔ nukɔntɔn ɔ bó xo fífá kan wɛ a, alǒ nyi wɛ nɔ ɖe afɔ nukɔntɔn ɔ, é ná bó tlɛ nyí ɖɔ é cí ɖɔ é wɛ dɔn tagba ɔ nyi ayǐ ɔ nɛ́? Ényí é byɔ́ ɖó mɔ̌ ɔ, un ka nɔ dó wǔsyɛ́n lanmɛ nú mɛ e tɛ́ntin gbemanɔkpɔ́ ɖe lɛ́ é ɖɔ yě ní dó hwɛ gbɔ a?’

12. Nɛ̌ Jezu ka ɖe xomɛnyínyɔ́ xlɛ́ gbɔn?

¹² Jezu nɔ nyɔ́ xomɛ. (Mat. 11:28-30) É ná bó tlɛ nyí ɖo ninɔmɛ vɛ́ wǔ lɛ́ mɛ ɔ, é nɔ ɖe xomɛnyínyɔ́ xlɛ́ gbɔn jlɛ̌ jí e é nɔ nɔ é gblamɛ. Ði kpɔ́ndéwú ɔ, hwenu e nyɔ̌nu Fenisíinu ɖé byɔ́ ɛ ɖɔ é ní gbɔ azɔn nú vǐ émítɔn é ɔ, é to gbɛ́ nǔbyɔ́byɔ́ nǎwe ɔ tɔn hwɛ̌; amɔ̌, hwenu e nǎwe ɔ ɖe nǔɖiɖi ɖaxó xlɛ́ é ɔ, é wa nǔ kpó xomɛnyínyɔ́ kpó, bó gbɔ azɔn nú vǐ tɔn. (Mat. 15:22-28) Jezu nyí xomɛnyɔ́tɔ́ có, é ka nɔ gɔn wě ɖe xá mɛ ǎ. Hweɖélɛ́nu ɔ, é nɔ gbɛ́ nǔ nú mɛ ɖěɖěe é yí wǎn ná lɛ́ é, dó ɖe xomɛnyínyɔ́ xlɛ́ yě. Ði kpɔ́ndéwú ɔ, hwenu e Piyɛ́ɛ tɛ́n kpɔ́n bó ná dó kpo awakanmɛ nú Jezu bónú é ma wa jlǒ Jehovah tɔn ó é ɔ, é gbɛ́ nǔ n’i ɖo mɛsɛ́dó ɖě lɛ́ bǐ nukɔn. (Mak. 8:32, 33) É bló mɔ̌ dó ɖe Piyɛ́ɛ kpo wɛ ǎ, loɔ, nǔ wɛ é kplɔ́n ɛ, bó lɛ́ ɖo akpá gba nú mɛsɛ́dó ɖě lɛ́ e kpo é wɛ ɖɔ yě ɖó ná nɔ nɔ gǔdo nú émí, bó kún ka ná nɔ glɔ́n ali nú émí bónú émí ná gɔn jlǒ Mawu tɔn wa ó. É ɖo wɛn ɖɔ xomɛ ná ko sin Piyɛ́ɛ kpɛɖé, amɔ̌, é ɖu le nǔgbɛ́númɛ ɔ tɔn.

13. Nɛ̌ mǐ ka sixú nɔ ɖe xomɛnyínyɔ́ jɔ xomɛnyínyɔ́ xlɛ́ gbɔn?

¹³ Bó ná dó ɖe xomɛnyínyɔ́ jɔ xomɛnyínyɔ́ xlɛ́ mɛ ɖěɖěe a yí wǎn ná lɛ́ é ɔ, hweɖélɛ́nu ɔ, é sixú nɔ byɔ́ ɖɔ a ní ɖe wě xá yě. A ɖo mɔ̌ wa wɛ hǔn, nɔ xwedó kpɔ́ndéwú Jezu tɔn, bó nɔ zé wěɖexámɛ towe jínjɔ́n nǔgbódodó e ɖo Xó Mawu tɔn mɛ lɛ́ é jí. Nɔ nyɔ́ xomɛ. Kú d’é jí ɖɔ yě ba ná wa nǔ ɖagbe, bó ɖeji ɖɔ mɛ ɖěɖěe yí wǎn nú Jehovah, bó lɛ́ yí wǎn nú we lɛ́ é ná yí wě e a ɖe xá yě kpó wǎnyíyí kpó lɛ́ é ganjí. Nɔ kan nǔ élɔ́ lɛ́ byɔ́ hwiɖée: ‘Ényí un mɔ mɛ e un yí wǎn ná é ɖé ɖo nǔ e ma sɔgbe ǎ é wa wɛ ɔ, un ka nɔ kpan akɔ́n, bó nɔ kɛ nu d’é wú n’i a? Ényí é byɔ́ ɖɔ má ɖe wě xá mɛ ɔ, un ka nɔ ɖɔ xó kpó xomɛnyínyɔ́ kpó a, alǒ un nɔ dó gbe vɛ́ sin? Étɛ́ ka nɔ sísɛ́ mì bɔ un nɔ ɖe wě xá mɛ? Mɛ ɔ dó xomɛsin xomɛ nú mì, alǒ un ba ná d’alɔ ɛ wú wɛ un ɖo wě ɖe xá ɛ wɛ a?’

14. Nɛ̌ Jezu ka ɖe ɖagbewiwa xlɛ́ gbɔn?

¹⁴ Jezu tuun nǔ e nyí nǔ ɖagbe é, bó nɔ lɛ́ wa. Jezu yí wǎn nú Tɔ́ tɔn, énɛ́ wú ɔ, hwebǐnu wɛ é nɔ wa nǔ e nyí nǔ ɖagbe é kpó linlin ɖagbe kpó. Hwebǐnu wɛ mɛ e nyí mɛ ɖagbe é nɔ ba ali ɖěɖěe nu é ná d’alɔ mɛ ɖěvo lɛ́, bó wa ɖagbe nú yě ɖe lɛ́ é. É ko kpé kpowun ɖɔ è ní tuun nǔ ɖagbe e è ná wa é ǎ, mǐ ɖó ná wa nǔ ɖagbe kpó linlin ɖagbe kpó. Mɛɖé sixú kanbyɔ́ ɖɔ: ‘È ka sixú wa nǔ ɖagbe kpó linlin masɔgbe kpó a?’ Ɛɛn wɛ nyí xósin ɔ. Ði kpɔ́ndéwú ɔ, Jezu ɖɔ xó dó mɛ ɖěɖěe ná nǔ wamamɔnɔ lɛ́, bó ka bló ɖo ali ɖé nu bɔ mɛ ɖěvo lɛ́ mɔ nǔ jɛ nǔ e yě wa é wú lɛ́ é wú. Nǔ ɖagbe wɛ nyí énɛ́ bɔ yě wa có, xomɛ hun Jehovah dó yě wú ǎ.—Mat. 6:1-4.

15. Nɛ̌ mǐ ka sixú wa nǔ ɖagbe kpó ayi bǐ kpó gbɔn?

¹⁵ Ényí cejɛ́nnábí ma nɔ sísɛ́ mǐ bónú mǐ nɔ wa nǔ e nyɔ́ é ǎ hǔn, nǔ ɖagbe wa wɛ mǐ ɖe kpó ayi bǐ kpó nɛ́. Énɛ́ wú ɔ, mǐ sixú nɔ kanbyɔ́ mǐɖée ɖɔ: ‘Un ka tuun nǔ e nyɔ́ bɔ è ná wa é kpowun wɛ a, alǒ un nɔ lɛ́ bló nǔgbó nǔgbó? Étɛ́ ka nɔ sísɛ́ mì bɔ un nɔ wa nǔ ɖagbe?’

NƐ̌ MǏ KA SIXÚ NYA XƐ ÐO MƐ YƆ̌YƆ́ E MǏ SƆ́ DÓ É JÍ GBƆN?

16. Étɛ́ mǐ ka ɖó ná nɔ wa gbe bǐ gbe? Étɛ́wú?

¹⁶ Mǐ ɖó ná nɔ lin ɖɔ mǐ bló batɛ́mu hǔn, mǐ ko sɔ́ gbɛtɔ́ yɔ̌yɔ́ ɔ dó bɔ xó fó, b’ɛ kún sɔ́ byɔ́ ɖɔ mǐ ní ɖo azɔ̌ wa ɖ’é wú wɛ ó ǎ. Gbɛtɔ́ yɔ̌yɔ́ ɔ cí “awu yɔ̌yɔ́” e è ɖó ná wlíbo ná é ɖɔhun. Lěe mǐ sixú wa mɔ̌ gbɔn é ɖokpó wɛ nyí ɖɔ mǐ ná nɔ ba ali ɖěɖěe nu mǐ ná nɔ ɖe jijɔ e gbigbɔ mímɛ́ Mawu tɔn nɔ ná mɛ lɛ́ é xlɛ́ ɖe lɛ́ é gbe bǐ gbe. Étɛ́wú? Ðó Jehovah ɔ, Mawu e yí wǎn nú azɔ̌ é wɛ n’i, bɔ gbigbɔ tɔn nyí hlɔ̌nhlɔ́n e é nɔ dó wa azɔ̌ ná é. (Bǐb. 1:2) Énɛ́ wú ɔ, jijɔ e gbigbɔ mímɛ́ nɔ ná mɛ lɛ́ é bǐ sixú sísɛ́ mǐ bɔ mǐ ná wa nǔ; mɔ̌ wɛ é ka ɖó ná nyí. Ði kpɔ́ndéwú ɔ, ahwanvú Jaki wlán ɖɔ: “Nǔɖiɖi e ma nɔ ɖe éɖée xlɛ́ gbɔn nǔwiwa lɛ́ mɛ ǎ ɔ nyí nǔ kúkú.” (Ja. 2:26) È sixú ɖɔ nǔ ɖokpó ɔ nú jijɔ ɖěvo e gbigbɔ mímɛ́ Mawu tɔn nɔ ná mɛ lɛ́ é bǐ. Ényí mǐ ɖe jijɔ énɛ́ lɛ́ xlɛ́ hweɖébǔnu hǔn, xlɛ́xlɛ́ wɛ mǐ ɖe ɖɔ gbigbɔ mímɛ́ Mawu tɔn ɖo alɔ dó mǐ wɛ nɛ́.

17. Ényí mǐ ma kpé wú bó ɖe jijɔ e gbigbɔ mímɛ́ nɔ ná mɛ lɛ́ é xlɛ́ ǎ ɔ, nɛ̌ mǐ ka ɖó ná wa nǔ gbɔn?

¹⁷ Klisánwun e tlɛ ko bló batɛ́mu bɔ xwe ko jɛ dó lɛ́ é nɔ gɔn jijɔ e gbigbɔ mímɛ́ nɔ ná mɛ lɛ́ é ɖe xlɛ́ hweɖélɛ́nu. Amɔ̌, nǔ tají ɔ wɛ nyí ɖɔ è ní ma jó gbe ó. Ð’ayi nǔjlɛ́dónǔwú élɔ́ wú. Ényí awu e a yí wǎn ná é ɖé vún ɔ, a ná sɔ́ nyi gbě azɔn ɖokpó wɛ a? Éǒ! Ényí é nyɔ́ bló ɔ, a ná ɖibla xwe sɔ hú gǎn, bó tɔ vǔnvún kpa ɔ. A tɔ gúdo ɔ, a ná ɖibla wa dɛ̌dɛ̌ xá hú gǎn. Mɔ̌ ɖokpó ɔ, ényí a ma kpé wú bó nyɔ́ xomɛ, ɖó suúlu, alǒ wa nǔ xá mɛɖé kpó wǎnyíyí kpó ɖo ninɔmɛ ɖé mɛ ǎ hǔn, ma nú awakanmɛ kú we ó. Kɛnklɛ́n dídó kpó ayi bǐ kpó sixú zɔ́n bɔ kancícá ɖagbe e ɖo hwi kpó mɛ ɔ kpó tɛ́ntin é ná kpo ɖo te. Dǒ gǎn, bó nyi alɔ nú nǔ ɖokpó ɔ lɛ́ wiwa nyi do hweɖévonu.

18. Étɛ́ jí mǐ ka sixú kú dó?

¹⁸ Kpɔ́ndéwú e Jezu zé ɖ’ayǐ nú mǐ é nɔ su nukún mǐtɔn mɛ tawun! Lě do mǐ nɔ xwedó linlin tɔn lɛ́ sɔ é ɔ, mɔ̌ do wɛ é nɔ bɔ wǔ nú mǐ bɔ mǐ nɔ wa nǔ éɖɔhun sɔ. Lě do mǐ nɔ wa nǔ Jezu ɖɔhun sɔ é, mɔ̌ do wɛ mǐ ná kpé wú bó sɔ́ gbɛtɔ́ yɔ̌yɔ́ ɔ dó sɔ. Ðo xóta élɔ́ mɛ ɔ, nǔ e gbigbɔ mímɛ́ Mawu tɔn nɔ ná mɛ lɛ́ é ɛnɛ kpowun jí jɛ́n mǐ ɖɔ xó dó. É ná nyɔ́ tawun ɖɔ a ní zán hwenu bó ba do nú nǔ dó jijɔ ɖěvo e kpo bɔ gbigbɔ mímɛ́ Mawu tɔn nɔ ná mɛ lɛ́ é jí, lobo lin tamɛ dó lěe a ɖo yě ɖe xlɛ́ wɛ ganjí gbɔn é jí. È slɛ́ xóta ɖé lɛ́ dó Anademẹwe Dodinnanu Tọn Na Kunnudetọ Jehovah Tọn Lẹ mɛ, bɔ yě ɖɔ xó dó xóta mɔ̌hun jí. Kpɔ́n xótala “Gbẹzan Klistiani tọn,” énɛ́ gúdo hǔn, kpɔ́n “Sinsẹ́n Gbigbọ tọn.” A sixú kú d’é jí ɖɔ ényí a bló éé nyí towe é ɔ, Jehovah ná d’alɔ we bɔ a ná sɔ́ gbɛtɔ́ yɔ̌yɔ́ ɔ dó, bó ná lɛ́ kpo ɖo mɔ̌ wa wɛ.