Xó ɖiɖɔ dó xóɖóxámɛ wu nɔ cí ɖě nú mɛ gegě. É ɖò mɔ̌ có, Biblu ɖɔ xó dó xóɖóxámɛ wu nyi wɛn, b’ɛ ka nyí ɖò ali e wlí yɛ̌yi é nu. Mǐ nɔ ɖu lè nǔ e é ɖɔ é tɔn. Enɛ ka sɔgbe, ɖó Jehovah e nyí Gbɛɖotɔ́ mǐtɔn é gɔ́n wɛ Biblu ɔ gosin. Enɛ wu ɔ, é tuùn nǔ e na wà ɖagbe nú mǐ hugǎn é. É ɖè lee nǔwiwa mǐtɔn lɛ sixu nyɔ́ nukún tɔn mɛ gbɔn é, kpo nǔ e na d’alɔ mǐ bɔ mǐ na ɖu gbɛ̀ víví kaka sɔyi é kpo xlɛ́ mǐ.

1. Linlin tɛ Jehovah ka nɔ ɖó dó xóɖóxámɛ wu?

Xóɖóxámɛ ɔ, nǔnina ɖé wɛ é nyí sín Jehovah gɔ́n. É ba ɖɔ sunnu kpo nyɔnu kpo e wlí alɔ xá yeɖée é ni ɖu vivǐ tɔn. Nǔnina enɛ nɔ zɔ́n bɔ asú kpo asì kpo lɛ nɔ kpéwú bo nɔ jì vǐ, é nɔ lɛ́ zɔ́n bɔ ye nɔ ɖè wanyiyi xlɛ́ yeɖée lɛ ɖò jɔwamɔ linu. Enɛ wu wɛ Xó Mawu tɔn ɖɔ: “Nyɔnu e a da ɖò dɔnkpɛ mɛ ɔ ni nyí awǎɖonú towe.” (Nǔnywɛxó 5:18, 19) Jehovah nɔ ɖó nukún ɖɔ Klisanwun e wlí alɔ lɛ é ni nɔ gbeji nú mɛ e ye da é, mɔ̌ mɛ ɔ, ye na dó afɔ gbě, alǒ ba nyɔnu ɖevo gbeɖé ǎ.—Xà Eblée lɛ 13:4.

2. Etɛ ka nyí agalilɛ?

Biblu ɖɔ nú mǐ ɖɔ: “Agalɛtɔ́ lɛ . . . ɖě na mɔ tɛn ɖò axɔ́suɖuɖu Mawu tɔn mɛ ǎ.” (1 Kɔlɛntinu lɛ 6:9, 10) Xókwín Glɛkigbe tɔn pornéïa wɛ Biblu wlantɔ́ lɛ zán dó dó gesí agalilɛ. Nǔ ɖěɖee ɖò xókwín enɛ mɛ lɛ é wɛ nyí (1) xóɖóxámɛa ɖò mɛ ɖěɖee ma wlí alɔ xá yeɖée ǎ lɛ é tɛntin, (2) sunnu na ɖóxó xá sunnu alǒ nyɔnu na ɖóxó xá nyɔnu, kpo (3) xó ɖiɖó xá kanlin kpo. Nú mǐ “ma nɔ lɛ aga” ǎ ɔ, mǐ nɔ hɛn xomɛ Jehovah tɔn hun b’ɛ nɔ lɛ́ nyí lè nú mǐɖesunɔ.—1 Tɛsalonikinu lɛ 4:3.

BA DÒ NÚ NǓ D’EJI

3. Hɔn nú agalilɛ

Nya gbejinɔtɔ́ e nɔ nyí Jozɛfu é dó gǎn syɛnsyɛn bo nɔ mimɛ̌ jí ɖò walɔ lixo. Xà Bǐbɛ̌mɛ 39:1-12, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:

• Etɛ ka sísɛ́ Jozɛfu b’ɛ hɔn? —Kpɔ́n wemafɔ 9.

• A ka lin ɖɔ Jozɛfu wá gbeta ɖagbe ɔ kɔn à? Etɛwu?

VIDEO: Hɔn nú Nǔbliblíwiwa (5:06)

Jehovah ba ɖɔ mǐ mɛ bǐ ni hɔn nú nǔbliblíwiwa. Xà 1 Kɔlɛntinu lɛ 6:18, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:

• Ninɔmɛ tɛ lɛ ka sixu sísɛ́ mɛɖé b’ɛ na lɛ̀ aga?

• Nɛ̌ a ka sixu hɔn nú nǔbliblíwiwa gbɔn?

4. A hɛn ɔ, a na ɖu ɖò mɛtɛnkpɔn jí

VIDEO: Ðu Ðò Mɛtɛnkpɔn Jí Gbɔn Biblu Xixa Gblamɛ (3:02)

• Hwenu e nɔví sunnu e ɖò video ɔ mɛ é mɔ ɖɔ linlin emitɔn lɛ kpo nǔwalɔ emitɔn lɛ kpo sixu zɔ́n bɔ emi na gɔn gbeji nɔ nú asì emitɔn é ɔ, etɛ é ka wà?

É tlɛ nɔ vɛwǔ nú Klisanwun gbejinɔtɔ́ lɛ hweɖelɛnu bonu ye na kpò ɖò linlin mímɛ́ lɛ ɖó wɛ. Nɛ̌ a ka sixu nyi alɔ nú tamɛ linlin dó nǔbliblí lɛ jí gbɔn? Xà Filipunu lɛ 4:8, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:

• Nǔ alɔkpa tɛ lɛ jí mǐ ka ɖó na nɔ lin tamɛ dó?

• Nɛ̌ Biblu xixa kpo alɔnu mǐtɔn hinhɛn ján ɖò sinsɛnzɔ́ Jehovah tɔn mɛ kpo ka sixu d’alɔ mǐ, bɔ mǐ na ɖu ɖò mɛtɛnkpɔn e na dɔn mǐ dó hwɛhuhu mɛ lɛ é jí gbɔn?

5. Nǔgbododó Jehovah tɔn lɛ nɔ hɛn lè wá nú mǐ

VIDEO: Ayivɔ Ni Ma Vún Mǐ Ó (9:31)

• Nɛ̌ nyaví ɔ ka wá mɔ éɖée ɖò ninɔmɛ tɛnkpɔn tɔn ɖé mɛ gbɔn?—Kpɔ́n Nǔnywɛxó 7:8, 9.

• Sɔgbe xá Nǔnywɛxó 7:23, 26 ɔ, nǔ e agalilɛ sixu jì lɛ é nɔ syɛn tawun. Nú mǐ nɔ mimɛ̌ jí ɖò walɔ lixo ɔ, tagba tɛ lɛ mǐ ka sixu nyi alɔ na?

• Nú mǐ zán gbɛ̀ mímɛ́ ɔ, nyɔna tɛ lɛ mǐ ka na mɔ ɖò sɔgudo?

Mɛɖé lɛ lin ɖɔ nǔ e Biblu ɖɔ dó xó ɖiɖó xá mɛ e kpo mɛ kpo ɖó mɛ̌ ɖokpo ɔ é wu é nyla tawun. Amɔ̌ Jehovah, ee nyí Mawu wanyiyinɔ ɔ é, ba ɖɔ gbɛtɔ́ lɛ bǐ ni ɖu gbɛ̀ víví kaka sɔyi. Bo na dó jɛxa gbɛ̀ enɛ ɔ, mǐ ɖó na nɔ zán gbɛ̀ sɔgbe xá nǔgbododó tɔn lɛ. Xà 1 Kɔlɛntinu lɛ 6:9-11, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Xó ɖiɖó xá mɛ e kpo mɛ kpo ɖó mɛ̌ ɖokpo ɔ é kɛɖɛ wɛ nyí nǔ e Mawu gbɛ́ wǎn na é à?

Cobonu nǔ mǐtɔn na nyɔ́ Mawu nukúnmɛ ɔ, mǐ mɛ bǐ wɛ ɖó na bló huzuhuzu lɛ. Gǎndidó e é na byɔ lɛ é ka na sɔ mɔ̌ ɖò kɔ à? Xà Ðɛhan 19:9, 12, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:

• A ka lin ɖɔ nǔgbododó walɔ ɖagbe tɔn Jehovah tɔn lɛ ɖò jlɛ̌ jí à? Etɛwu?

ETƐ LƐ A KA KPLƆ́N?

Nǔnina ɖé wɛ xóɖóxámɛ nyí sín Jehovah gɔ́n, bonu asú kpo asì kpo ɖé na ɖu vivǐ tɔn.

Vɔ̌gbɔnji

• Nǔ ɖětɛ lɛ mɔ̌ ka ɖò agalilɛ mɛ?

• Etɛ ka na d’alɔ mǐ bɔ mǐ na nyi alɔ nú agalilɛ?

• Nú mǐ nɔ xwedó nǔgbododó walɔ ɖagbe tɔn Jehovah tɔn lɛ ɔ, lè tɛ lɛ mǐ ka na mɔ?

KÍJÉ

Gbéjé nǔ e wu Mawu ba ɖɔ sunnu kpo nyɔnu kpo e jló na nɔ kpɔ́ é ni wlí alɔ é kpɔ́n.

“Etɛ Biblu ka Ðɔ Dó Kpɔ́jijɛ Ma Wlí Alɔ Wu?” (Xóta Ɛntɛnɛti jí tɔn)

Biblu ɖɔ ɖɔ xó ɖiɖó xá mɛ e kpo mɛ kpo ɖó mɛ̌ ɖokpo ɔ é nyla. Tinmɛ enɛ tɔn wɛ nyí ɖɔ mǐ na gbɛ́ wǎn nú mɛ e nɔ wà mɔ̌ lɛ é ǎ. Kpɔ́n nǔ e wu wɛ é.

“Xó Ðiɖó Xá Mɛ E kpo Mɛ kpo Ðó Mɛ̌ Ðokpo ɔ É Nyla Wɛ À?” (Xóta Ɛntɛnɛti jí tɔn)

Kpɔ́n lee sɛ́n Mawu tɔn ɖěɖee kúnkplá xóɖóxámɛ é nɔ nya xɛ ɖò mǐ jí gbɔn é.

“Xóɖóxámɛ Nu Mɛ Tɔn ka Nyí Xóɖóxámɛ Dóo À?” (Xóta Ɛntɛnɛti jí tɔn)

Ðò tan gbɛzán tɔn “Ye Wà Nǔ Xá Mì kpo Yɛ̌yi Kpo” mɛ ɔ, kpɔ́n nǔ e sísɛ́ mɛ e nɔ ɖóxó xá mɛ e kpo é kpo ɖó mɛ̌ ɖokpo ɔ é ɖé, b’ɛ huzu jijɔ bo nyɔ́ Mawu nukúnmɛ é.

“Biblu Nɔ Huzu Gbɛzán Mɛtɔn” (Atɔxwɛ [Gungbe], 1^er juillet 2011)

Ðò aca ɖé lɛ mɛ ɔ, mɛ lɛ nɔ lin ɖɔ nú mɛɖé ma da asú alǒ asì ǎ ɔ, é kún sixu ɖó awǎjijɛ ó. Amɔ̌, mɛ e wlí alɔ lɛ é bǐ wɛ nɔ ɖó awǎjijɛ ǎ, mɔ̌ jɛn mɛ e ɖò tlɛnmɛ lɛ é lɔ bǐ ma ka nɔ ba awǎjijɛ kpò ǎ é nɛ. Nǔgbo ɔ wɛ nyí ɖɔ, Biblu ɖɔ ɖɔ tlɛnmɛninɔ kpo alɔwliwli kpo bǐ wɛ nyí nǔnina sín Jehovah gɔ́n.

1. Lè tɛ lɛ mɔ̌ tlɛnnɔ nyínyí ka nɔ hɛn wá?

Biblu ɖɔ: “Mɛ e da [asì alǒ asú] ɔ, nǔ ɖagbe wɛ é wà; mɛ e ma ka da . . . ǎ ɔ, é wà nǔ ɖagbe hú mɛ ɖě ɔ.” (Xà 1 Kɔlɛntinu lɛ 7:32, 33, 38.) Ali tɛ lɛ nu tlɛnnɔ ɖé ka sixu “wà nǔ ɖagbe hú” ɖè? Klisanwun tlɛnnɔ ɖé da mɛ ɖě, bo ja hudo mɛ enɛ tɔn lɛ wu kpé nukún dó gbé ǎ. Enɛ wu ɔ, ɖò kpaa mɛ ɔ, é nɔ ɖó vivo hugǎn. Ði kpɔ́ndéwú ɔ, é sixu kpéwú bo vlɔ́nkan nú sinsɛnzɔ́ tɔn ɖò ali e dɔn mɛ lɛ é nu, ɖi tɛn sisɛ yì to ɖevo mɛ bá jlá wɛnɖagbe ɔ. Taji bǐ ɔ, é sixu zán hwenu gegě dó sɛkpɔ́ Jehovah d’eji.

2. Lè tɛ lɛ mɔ̌ alɔwliwli ɖò sɛ́n linu ka nɔ hɛn wá?

Tlɛnmɛninɔ ɖɔhun ɔ, alɔwliwli lɔ ɖó lè tɔn lɛ. Biblu ɖɔ ɖɔ “mɛ we . . . nyɔ́ hú . . . mɛ ɖokpo géé.” (Nǔnywɛtɔ́xó 4:9) Xó enɛ nyí nǔgbo, ɖò taji ɔ, ɖò Klisanwun ɖěɖee nɔ xwedó nǔgbododó Biblu tɔn lɛ ɖò alɔwliwli yetɔn mɛ lɛ é gɔ́n. Asú kpo asì kpo ɖěɖee wlí alɔ ɖò sɛ́n linu lɛ é nɔ d’akpá ɖɔ emi na yí wǎn nú emiɖée lɛ, ɖó sísí nú emiɖée lɛ, bo na nɔ lɛ́ wlí yɛ̌yi nú emiɖée lɛ. Enɛ nɔ zɔ́n bɔ ye nɔ mɔ hwɛhwɛ ɖɔ emi ɖò ayijayǐ mɛ hú asú kpo asì kpo e jɛ kpɔ́ kpowun lɛ é. Gɔ́ na ɔ, alɔ e ye wlí é nɔ zɔ́n bɔ vǐ yetɔn lɛ lɔ nɔ nɔ ayijayǐ mɛ hugǎn.

3. Linlin tɛ Jehovah ka nɔ ɖó dó alɔwliwli wu?

Hwenu e Jehovah ɖó alɔwliwli nukɔntɔn ɔ ayǐ é ɔ, é ɖɔ: “Sunnu na jó tɔ́ tɔn kpo nɔ tɔn kpo dó, bo na jɛ kpɔ́ xá asì tɔn.” (Bǐbɛ̌mɛ 2:24) Jehovah ba ɖɔ asú kpo asì kpo ɖé ni yí wǎn nǔ yeɖée, bo nɔ kpɔ́ nú táan nabi e ye na nɔ gbɛ̀ na é bǐ. É yí gbè ɖɔ hwenu e mɛ ɖokpo ɖò ye mɛ d’afɔ gbě, alǒ ba nyɔnu ɖevo é kɛɖɛ jɛn ye sixu gbɛ́ yeɖée. Ðò ninɔmɛ mɔ̌hun mɛ ɔ, Jehovah na acɛ asú alǒ asì xomɛvɔnɔ ɔ bɔ é sixu gbɛ́ mɛ e é da é alǒ gbɔ.a (Matie 19:9) Jehovah yí gbè ɖɔ Klisanwun lɛ ni da asì gegě ǎ.—1 Timɔtée 3:2.

BA DÒ NÚ NǓ D’EJI

4. Zǎn nǔnina tlɛnmɛninɔ tɔn towe ganji

Jezu mɔ ɖɔ tlɛnmɛninɔ ɔ, nǔnina ɖé wɛ. (Matie 19:11, 12) Xà Matie 4:23, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Nɛ̌ Jezu ka zán tlɛnmɛninɔ tɔn dó sɛn Tɔ́ tɔn, bo lɛ́ zán dó d’alɔ mɛ ɖevo lɛ gbɔn?

Klisanwun tlɛnnɔ lɛ sixu ɖu tlɛnmɛninɔ yetɔn zínzán sín vivǐ Jezu ɖɔhun. Xò VIDEO ɔ, enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu é jí.

VIDEO: Tlɛnnɔ Gbejinɔtɔ́ Lɛ (3:11)

• Ali e na hɛn nyɔna wá é tɛ lɛ nu Klisanwun lɛ ka sixu zán tlɛnmɛninɔ yetɔn ɖè?

A ka tuùn à?

Biblu ɖɔ ɖɔ é hwe bǐ ɔ, xwè nabi lě jɛn è na ɖó cobo wlí alɔ ǎ. É ɖò mɔ̌ có, é dó wusyɛn lanmɛ nú mɛ ɖɔ, è ni tó “zɛ winnyawinnya xwè wu” hwɛ̌. Táan ɖé wɛ é nɔ nyí bɔ jlǒ xóɖóxámɛ tɔn nɔ syɛn tawun, bo sixu zɔ́n b’ɛ na vɛwǔ nú mɛ winnyawinnya ɖé b’ɛ na wá gbeta e nǔnywɛ kpé lɛ é kɔn.—1 Kɔlɛntinu lɛ 7:36, nwt.

5. Ba mɛ e a na da é kpo nǔnywɛ kpo

Mɛ e a na da é biba nyí gbeta taji hugǎn e kɔn a na wá ɖò gbɛzán towe mɛ lɛ é ɖokpo. Xà Matie 19:4-6, 9, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Etɛwu Klisanwun ɖé ma ka ɖó na zɔn kplakpla jí bo wlí alɔ ǎ?

Biblu sixu d’alɔ we bɔ a na tuùn nǔ ɖěɖee a na kpɔ́n ɖò mɛ e a jló na wlí alɔ xá é gɔ́n é. Nǔ taji bǐ ɔ wɛ nyí ɖɔ, mɛ ɔ ni yí wǎn nú Jehovah.b Xà 1 Kɔlɛntinu lɛ 7:39 kpo 2 Kɔlɛntinu lɛ 6:14 kpo. Enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:

• Etɛwu mǐ ka ɖó na wlí alɔ xá Klisanwun hatɔ́ ɖé kɛɖɛ?

• Nú mǐ wá gbeta ɔ kɔn bá wlí alɔ xá mɛ e ma yí wǎn nú Jehovah ǎ é ɖé ɔ, nɛ̌ nǔ ka na cí nú Jehovah bɔ a lin?

6. Nɔ ɖó linlin ɖokpo ɔ dó alɔwliwli wu Jehovah ɖɔhun

Ðò Izlayɛli hwexónu tɔn ɔ, sunnu ɖé lɛ gbɛ́ asì yetɔn lɛ ɖó hwɛjijɔ cejɛnnabi tɔn lɛ wu. Xà Malacíi 2:13, 14, 16, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Etɛwu Jehovah ka gbɛ́ wǎn nú mɛgbigbɛ́ dó acɛ jí?

Xò VIDEO ɔ, enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu é jí.

VIDEO: Alɔwliwli: Kancica Tɛgbɛ Tɔn Ðé (4:30)

• Nú nǔmaɖitɔ́ ɖé wɛ asì towe alǒ asú towe nyí ɔ, etɛ a ka sixu wà bɔ alɔwliwli mitɔn na ɖó awǎjijɛ?

7. Nɔ xwedó nǔgbododó Jehovah tɔn e kúnkplá alɔwliwli lɛ é

VIDEO: Ye Zán Gbɛ̀ Sɔgbe Xá Nǔgbododó Jehovah Tɔn E Kúnkplá Alɔwliwli lɛ É (4:14)

Xà Eblée lɛ 13:4, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:

• A ka lin ɖɔ nǔgbododó Jehovah tɔn e kúnkplá alɔwliwli lɛ é ɖò jlɛ̌ jí à? Etɛwu?

Jehovah nɔ ba ɖɔ Klisanwun lɛ ni nɔ dó alɔwliwli yetɔn kpo alɔtúntún yetɔn kpo wema mɛ ɖò axɔ́suxwé, ɖó ɖò to gegě mɛ ɔ, acɛkpikpa lɛ nɔ byɔ ɖó mɔ̌. Xà Titu 3:1, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Nú a ko wlí alɔ wɛ nyí ɔ, a ka mɔ nǔ jɛ wu ɖɔ ɖò sɛ́n linu ɔ, axɔ́su tuùn ɖɔ hwi wlí alɔ à?

ETƐ LƐ A KA KPLƆ́N?

Nǔnina wɛ tlɛnmɛninɔ kpo alɔwliwli kpo nyí sín Jehovah gɔ́n. Tlɛnnɔ kpo mɛ e wlí alɔ é kpo bǐ hɛn ɔ, ye na ɖó awǎjijɛ bo na lɛ́ ɖu gbɛ̀ e jɛmɛ nú mɛ é sín vivǐ, nú ye zán gbɛ̀ sɔgbe xá jlǒ Jehovah tɔn ɔ nɛ.

Vɔ̌gbɔnji

• Nɛ̌ mɛɖé ka sixu zán tlɛnmɛninɔ tɔn ganji gbɔn?

• Etɛwu Biblu ka ɖɔ ɖɔ è ni wlí alɔ xá Klisanwun hatɔ́ ɖé kɛɖɛ?

• Hwɛjijɔ e jinjɔn Mawuxówema ɔ jí é kɛɖɛ tɛ jí è ka sixu zɔ́n dó bo gbɛ́ mɛ e è da é?

KÍJÉ

Etɛ ka nyí tinmɛ è ni wlí alɔ “ɖò bǔ e [è] ɖè xá Aklunɔ ɔ mɛ” é, alǒ ɖò Aklunɔ mɛ kɛɖɛ tɔn?

“Nǔ E Nǔxatɔ́ lɛ Kanbyɔ lɛ É” (Atɔxwɛ [Gungbe], 1^er juillet 2004)

Kpɔ́n video kpɛví kpɛví atɔn elɔ lɛ e sixu d’alɔ we, bɔ a na wá gbeta ɖagbe lɛ kɔn dó xɔ́ntɔn mɛ ninɔ kpo alɔwliwli kpo wu é.

Nǔsisɔ nú Alɔwliwli (17:05)

Kpɔ́n nǔ e wu nɔví sunnu ɖé mɔ ɖɔ nǔ e Jehovah na emi é, xɔ akwɛ tawun hú nǔ ɖebǔ e emi sɔ́ dó savɔ̌ é.

Un Kpò Ðò Nukún Ðó Wɛ Ðɔ É Na Wá Kplɔ́n Nǔgbo Ɔ (1:56)

Etɛ lɛ mɔ̌ mɛɖé ka ɖó na gbéjé kpɔ́n hwɛ̌, cobá ɖɔ mɛgbigbɛ́ alǒ kínklán xó?

“Ðǒ Sísí nú ‘Nǔ E Mawu Dɔn Cá É’” (Atɔxwɛ, décembre 2018)