Nɛ̌ Xwédo Towe ka Sixu Ðó Awǎjijɛ Gbɔn?: Akpáxwé 1

Mɛ e wlí alɔ yɔyɔ̌ lɛ é nɔ ɖó nukún ɖɔ awǎjijɛ e emi ɖó ɖò alɔwliwlizán emitɔn gbè é na nɔ ayǐ kaka sɔyi. É ka hɛn ɔ, é na nɔ ayǐ. Klisanwun ɖěɖee ko wlí alɔ sín hwenu línlín ɖíe, bo dó gǎn syɛnsyɛn lobo xwedó wěɖexámɛ Biblu tɔn lɛ é tuùn ɖɔ nǔ hɛn ɔ, é na nyí mɔ̌ ganji.

1. Wě tɛ Biblu ka ɖè xá asú lɛ?

Jehovah sɔ́ asú bɔ é na nyí ta nú xwédo ɔ. (Xà Efɛzinu lɛ 5:23.) Jehovah ba ɖò así tɔn ɖɔ é ni nɔ wá gbeta ɖěɖee na hɛn lè wá nú xwédo ɔ lɛ é kɔn. Biblu ɖè wě elɔ xá asú lɛ: “Mi [nɔ] yí wǎn nú asì mitɔn lɛ.” (Efɛzinu lɛ 5:25) Etɛ ka nyí tinmɛ enɛ tɔn? Asú wanyiyinɔ ɖé nɔ wà nǔ xá asì tɔn kpo xomɛnyínyɔ́ kpo, é na bo tlɛ nyí ɖò xwégbe alǒ ɖò agbawungba ɔ nɛ. É nɔ nya xɛ ɖò jǐ tɔn sín nǔ e na wà nǔ dó wǔ tɔn lɛ é sí, bo nɔ wà nǔ e wu é kpé é bǐ dó kpé nukún wǔ tɔn ɖò agbaza kpo lee nǔ nɔ cí nú mɛ é kpo lixo. (1 Timɔtée 5:8) Taji bǐ ɔ wɛ nyí ɖɔ, é nɔ d’alɔ ɛ b’ɛ nɔ sú hudo tɔn gbigbɔ tɔn lɛ sín dò. (Matie 4:4) Ði kpɔ́ndéwú ɔ, é sixu nɔ xoɖɛ bo nɔ lɛ́ xà Biblu ɖó kpɔ́ xá asì tɔn. Nú asú ɖé nɔ kpé nukún dó asì tɔn wu kpo wanyiyi kpo ɔ, é nɔ kpò ɖò kancica ɖagbe ɖé ɖó xá Jehovah wɛ.—Xà 1 Piyɛ́ɛ 3:7.

2. Wě tɛ Biblu ka ɖè xá asì lɛ?

Xó Mawu tɔn ɖɔ ɖɔ asì ɖé ‘ɖó na ɖó sísí e gɔ́ngɔ́n é nú asú tɔn.’ (Efɛzinu lɛ 5:33) Nɛ̌ é ka sixu wà mɔ̌ gbɔn? É sixu nɔ lin tamɛ dó jijɔ ɖagbe e asú tɔn ɖó lɛ é kpo gǎn ɖěɖee é nɔ dó dó kpé nukún dó é kpo vǐ yetɔn lɛ kpo wu é jí. É sixu lɛ́ ɖexlɛ́ ɖɔ emi nɔ ɖó sísí nú asú emitɔn, gbɔn gudo ninɔ nú gbeta e kɔn é nɔ wá lɛ é kpo xó ɖiɖɔ n’i kpo xomɛnyínyɔ́ kpo, gɔ́ nú xó ɖagbe ɖiɖɔ dó wǔ tɔn gblamɛ, enyi asú tɔn ma tlɛ nɔ sɛn Jehovah ǎ ɔ nɛ.

3. Nɛ̌ asú kpo asì kpo ɖé ka sixu hɛn alɔwliwli yetɔn lidǒ gbɔn?

Biblu ɖɔ dó asú kpo asì kpo e wlí alɔ lɛ é wu ɖɔ: “Ye mɛ we lɛ na huzu ɖokpo géé.” (Matie 19:5) Tinmɛ enɛ tɔn wɛ nyí ɖɔ ye ɖó na dó gǎn, bo na nya nǔ ɖebǔ e sixu klán ye é dó zɔ. Ye nɔ wà mɔ̌ gbɔn hwenu zinzán ɖó kpɔ́ xá yeɖée lɛ hwɛhwɛ gblamɛ. Ye nɔ lɛ́ wà mɔ̌ gbɔn linlin yetɔn lɛ kpo lee nǔ nɔ cí nú ye é kpo ɖiɖɔ nú yeɖée lɛ nyí wɛn kpo wanyiyi kpo gblamɛ. Nǔɖe alǒ mɛ ɖě nɔ ɖò taji nú ye sɔ mɛ e ye da é ǎ, afi Jehovah kɛɖɛ. Ye nɔ ɖò acéjí tawun bo nɔ lɔn bo nɔ ɖó kancica masɔgbe ɖé xá mɛ ɖevo ɖebǔ ǎ.

BA DÒ NÚ NǓ D’EJI

4. Asú lɛ è mi: mi nɔ yí wǎn nú asì mitɔn lɛ bo nɔ kpé nukún dó ye wu ganji

VIDEO: Asú lɛ Mi, Mi Yí Wǎn nú Asì Mitɔn lɛ Miɖesunɔ Ðɔhun (9:53)

• Ali tɛ lɛ nu mɔ̌ asú ɖé ka sixu xlɛ́ ɖɔ emi yí wǎn nú asì emitɔn, bo nɔ lɛ́ kpé nukún dó wǔ tɔn ɖè?

Xà Kolosinu lɛ 3:12, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Nɛ̌ asú ɖé ka sixu ɖè jijɔ enɛ lɛ xlɛ́ ɖò alɔwliwli tɔn mɛ gbɔn?

5. Asì lɛ è mi: mi yí wǎn nú asú mitɔn lɛ, bo nɔ ɖó sísí nú ye

Biblu dó wusyɛn lanmɛ nú asì ɖé ɖɔ é ni nɔ ɖó sísí nú asú tɔn, nú asú ɔ na bo nɔ sɛn Jehovah alǒ gbɔ ɔ nɛ. Xà 1 Piyɛ́ɛ 3:1, 2, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:

• Nú asú nǔmaɖitɔ́ ɖé wɛ a ɖó ɔ, é ɖò wɛn ɖɔ a na ba ɖɔ é ni sɛn Jehovah. Etɛ a ka lin ɖɔ é na w’azɔ̌ hugǎn: wɛnɖagbe jijla ɛ hwebǐnu wɛ à, alǒ jijɔ ɖagbe kpo sísí kpo ɖiɖexlɛ́? Etɛwu?

Asú lɛ kpo asì lɛ kpo sixu nɔ wá gbeta ɖagbe lɛ kɔn ɖó kpɔ́. É ɖò mɔ̌ có, asì ɖé sixu nɔ ma ɖó linlin ɖokpo ɔ xá asú tɔn hweɖelɛnu. É cí mɔ̌ ɔ, é na ɖɔ linlin tɔn kpo gbè fífá kpo kpo sísí kpo, amɔ̌, é ɖó na tuùn ɖɔ asú emitɔn wɛ Jehovah na acɛ, b’ɛ na wá gbeta nǔ e nyí ɖagbe hugǎn lɛ é tɔn kɔn dó xwédo ɔ tamɛ. É ɖó na wà nǔ e wu é kpé é dó nɔ gudo nú gbeta asú tɔn tɔn. Mɔ̌ mɛ ɔ, é xlɛ́ ɖɔ é ɖò alɔ dó xwédo ɔ blebu wɛ bonu é na nɔ awǎjijɛ mɛ. Xà 1 Piyɛ́ɛ 3:3-5, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Nú asì ɖé nɔ ɖó sísí nú asú tɔn ɔ, nɛ̌ nǔ ka nɔ cí nú Jehovah?

6. Mi sixu ɖu ɖò tagba lɛ jí ɖò alɔwliwli mitɔn mɛ

VIDEO: Lee A Sixu Hɛn Alɔwliwli Towe Lidǒ D’eji Gbɔn É (5:44)

• Ðò video ɔ mɛ ɔ, etɛ lɛ ka xlɛ́ ɖɔ asú kpo asì kpo ɔ sín gbè kún sɔ́ ɖò kpɔ́ ganji ó?

• Afɔ tɛ lɛ ye ka ɖè dó hɛn alɔwliwli yetɔn lidǒ?

Xà 1 Kɔlɛntinu lɛ 10:24 kpo Kolosinu lɛ 3:13 kpo. Mi xà wemafɔ lɛ ɖokpo hǔn, mi nɔ ɖɔ xó ɖó kpɔ́ dó nǔkanbyɔ elɔ jí:

• Nɛ̌ wěɖexámɛ enɛ xwixwedó ka sixu hɛn alɔwliwli ɖé lidǒ gbɔn?

Biblu ɖɔ ɖɔ mǐ ɖó na nɔ wlí yɛ̌yi nú mǐɖée lɛ. Yɛ̌yi wlíwlí nú mɛɖé nɔ byɔ ɖɔ è ni wà nǔ xá mɛ ɔ kpo xomɛnyínyɔ́ kpo kpo sísí kpo. Xà Hlɔmanu lɛ 12:10, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:

• Asú lɛ alǒ asì lɛ ɖó na nɔ nɔte kpɔ́n mɛ e ye da é ɖɔ éyɛ ni tó wlí yɛ̌yi, alǒ ɖó sísí titewungbe nú emi jɛ nukɔn hwɛ̌ wɛ à? Etɛwu?

ETƐ LƐ A KA KPLƆ́N?

Nú asú kpo asì kpo ɖé nɔ yí wǎn nú yeɖée lɛ, nɔ ɖó sísí nú yeɖée lɛ, bo nɔ lɛ́ xwedó nǔgbododó Biblu tɔn lɛ ɔ, ye hɛn ɔ, ye na ɖó awǎjijɛ.

Vɔ̌gbɔnji

• Nɛ̌ asú ɖé ka sixu gɔ́ sò nú awǎjijɛ xwédo tɔn tɔn gbɔn?

• Nɛ̌ asì ɖé ka sixu gɔ́ sò nú awǎjijɛ xwédo tɔn tɔn gbɔn?

• Nú a ko wlí alɔ wɛ nyí ɔ, nǔgbododó Biblu tɔn tɛ ka sixu d’alɔ we bɔ a na hɛn alɔwliwli towe lidǒ?

KÍJÉ

Kpɔ́n wěɖexámɛ tawun tawun ɖěɖee sixu d’alɔ we bɔ a na ɖó xwédo awǎjijɛnɔ ɖé lɛ é.

Xwédo Towe Sixu Nɔ Awǎjijɛ Mɛ (alɔnuwema)

Kpɔ́n nǔxixo sín video e tɛɖɛ̌ nyɔna ɖěɖee wěɖexámɛ Mawu tɔn lɛ xwixwedó, ɖò alɔwliwli towe mɛ, na hɛn wá nú we lɛ é jí é.

Wanyiyi Adodwé (4:26)

Gbějé nǔ e è ni hwíhwɛ́ mɛɖée dó tatɔ́ e asú mɛtɔn nyí é glɔ́ nyí é kpɔ́n.

“Nyɔnu lɛ Mi, Etɛwu Mi ka Ðó Na Hwíhwɛ́ Miɖée Dó Tatɔ́ E Asú Mitɔn lɛ Nyí É Glɔ́?” (Atɔxwɛ [Gungbe], 15 mai 2010)

Nɛ̌ asú kpo asi kpo ɖé ka ɖu ɖò tagba syɛ́nsyɛ́n lɛ, kaka jɛ mɛɖée gbígbɛ́ jí gbɔn?

Kpo Alɔdó Jehovah Tɔn kpo ɔ, Mǐ Bló bɔ Alɔwlíwlí Mǐtɔn Lidǒ (5:14)