Enyi È Ba Nǔɖɔ Vǐ Ce ɔ ka Ló?

Vǐ towe ɖɔ nú we ɖɔ è ɖò nǔɖɔ ba emi wɛ ɖò wemaxɔmɛ. Etɛ a ka sixu wà? A na byɔ wemaxɔmɛ sín gǎn lɛ ɖɔ ye ni dɔn tó nú nǔɖɔbamɛtɔ́ ɔ wɛ à? A na kplɔ́n vǐ towe lee é na nɔ s’axɔ́ ɖó axɔ́ tɛnmɛ gbɔn é wɛ à? Cobonu a na wá gbeta ɖé kɔn hǔn, gbějé nǔ elɔ lɛ e kúnkplá nǔɖɔbamɛ é kpɔ́n.a

• Etɛ un ka ɖó na tuùn dó nǔɖɔbamɛ wu?

• Nɛ̌ un ka sixu d’alɔ gbɔn?

Etɛ un ka ɖó na tuùn dó nǔɖɔbamɛ wu?

Etɛ ka nyí nǔɖɔbamɛ? Nǔɖɔbamɛ sín tinmɛ wɛ nyí yadonúmɛ magbokɔ ɖò agbaza, alǒ lee nǔ nɔ cí nú mɛ e lixo. Enɛ wu ɔ, é nyí mɛzunzun, alǒ kɔgbidínúmɛ lɛ bǐ wɛ nyí nǔɖɔbamɛ ǎ.

Nǔ e wu é ɖò taji ɖɔ è ni tuùn nǔ e nǔɖɔbamɛ nyí tawun é é: Mɛɖé lɛ nɔ zán xókwín “nǔɖɔbamɛ” ɔ dó dó gesí xomɛsin dó xomɛ nú mɛ sín nǔ ɖebǔ, nǔ ɔ na bo tlɛ hwe gbɔn ɖebǔ ɔ nɛ. Amɔ̌, enyi a nɔ sɔ́ nǔ klewun klewun lɛ yì hǎga jí ɔ, a sixu kplɔ́n ví towe ɖɔ é kún kpéwú bo na ɖeɖɛ tagba lɛ ó ɖò manywɛ mɛ; é ka ɖó nǔwukpíkpé enɛ sín hudo dìn, bo na lɛ́ ɖó hwenu e é na nyí mɛxo é.

Nǔgbododó Biblu tɔn: “Ma nɔ yawǔ sin xomɛ ó.”—Nǔnywɛtɔ́xó 7:9.

Nǔ taji ɔ: É na byɔ ɖɔ a ni kɛnu dó ninɔmɛ ɖé lɛ mɛ, amɔ̌, ninɔmɛ ɖevo lɛ na hun ali nú vǐ towe b’ɛ na kplɔ́n lee é na nɔ ɖu ɖò tagba lɛ jí, lobo dóhwɛ gbɔ xá mɛ ɖevo lɛ gbɔn é.—Kolosinu lɛ 3:13.

Amɔ̌, enyi vǐ towe ɖɔ nú we ɖɔ è ɖò kɔ gbidí nú emi wɛ magbokɔ ɔ, etɛ a ka sixu wà?

Nɛ̌ un ka sixu d’alɔ gbɔn?

• Ðǒtó vǐ towe kpo sɔxwixwe kpo. Tɛ́n kpɔ́n, bo tuùn (1) nǔ e ɖò jijɛ wɛ é kpo (2) nǔ e wu è ɖò nǔɖɔ ba ɛ wɛ é kpo. Ðǒ kúnnuɖenú lɛ bǐ hwɛ̌ cobo wá gbeta lɛ kɔn. Kanbyɔ hwiɖée ɖɔ: ‘Gǒflɛ́mɛ xó ɔ tɔn ɖevo lɛ ka lɛ́ kpò wɛ à?’ Nú a na mɔ nukúnnú jɛ nǔ e jɛ é wu hlɛ́nhlɛ́n ɔ, é sixu byɔ ɖɔ a ni kan nǔ byɔ vǐ towe sín mɛ̌si, alǒ mɛjitɔ́ vǐ ɖě ɔ tɔn lɛ.

  Nǔgbododó Biblu tɔn: “Mɛ e ma nɔ kú hǔn bo nɔ sè xó cobo nɔ kɛnu d’ewu ǎ ɔ, é nɔ ɖè xlonɔ e é nyí ɔ xlɛ́, bo nɔ dó winnya éɖée.”—Nǔnywɛxó 18:13.

• Enyi è ɖò nǔɖɔ ba vǐ towe wɛ nǔgbo hǔn, d’alɔ ɛ bonu é ni mɔ ɖɔ lee é na wà nǔ gbɔn é sixu jla nǔ lɛ ɖó, alǒ hɛn nǔ lɛ gblé d’eji. Ði kpɔ́ndéwú ɔ, Biblu ɖɔ: “È sɔ́ gbè fífá dó na xósin mɛ ɔ, xomɛ nɔ fá; è ka kán gbè nú mɛ ɔ, xomɛsin ɔ ɖě nɔ jɛ ɖě jí.” (Nǔnywɛxó 15:1) Nǔgbo ɔ, axɔ́ sú ɖó axɔ́ tɛnmɛ sixu hɛn ninɔmɛ ɔ gblé d’eji, bo na zɔ́n bɔ nǔɖɔbamɛ ɔ sɔ́ na ɖekpo ǎ, é nyɔ́ wà ɔ, é na lɛ́ syɛn d’eji.

  Nǔgbododó Biblu tɔn: “Mi ma zé nyanya dó sú nyanya xɔ́ na ó, abǐ mi ma zé zun dó sú zun xɔ́ na ó.”—1 Piyɛ́ɛ 3:9.

• Tinmɛ nú vǐ towe ɖɔ nǔxɔ́súmayí kún xlɛ́ ɖɔ é nyí nǔvɔnɔ ó. É nyɔ́ wà ɔ, xlɛ̌ ɖé wɛ enɛ nyí ɖɔ é ɖó hlɔnhlɔn, ɖó é lɔn bonu nǔɖɔbamɛtɔ́ ɔ kp’acɛ n’i ǎ. Ðò ali ɖé nu ɔ, é cí asɔ nú nǔɖɔbamɛ ɔ, bɔ éɖesu ka ba nǔɖɔ mɛ ǎ.

  É ɖò taji tawun ɖɔ vǐ towe ni hɛn enɛ ayi mɛ hwenu e è ba nǔɖɔ ɛ ɖò ɛntɛnɛti jí é. Gbekánnúmɛ ɖò ɛntɛnɛti jí nɔ wà nǔɖe zɛ ali hunhun nú nǔɖɔbamɛtɔ́ ɔ bonu é na ɖókan d’ewu wu ǎ, lobɔ é sixu lɛ́ zɔ́n bɔ è dóhwɛ vǐ towe ɖɔ é lɔmɔ̌ nyí nǔɖɔbamɛtɔ́ ɖé. Enɛ wu ɔ, é sɔgbe ɖɔ è ni nɔ bɔnu dó aɖǔ hweɖelɛnu, enɛ wɛ nyí ɖɔ enyi ɖɔ vǐ ɔ ma kɛnu ǎ ɔ, nǔɖɔbamɛtɔ́ ɔ na mɔ ɖɔ wlɛnwín e emi zán é kún w’azɔ̌ ó, bo na ɖibla ɖó nǔɖɔbamɛ ɔ te.

  Nǔgbododó Biblu tɔn: “Nakí vɔ ɖò ado mɛ ɔ, myɔ nɔ cí.”—Nǔnywɛxó 26:20.

• Ðò ninɔmɛ ɖé lɛ mɛ ɔ, vǐ towe sixu ɖó wǔ zɔ nú mɛ ɖěɖee nɔ ba nǔɖɔ mɛ lɛ é, bo lɛ́ hɔn nú fí ɖěɖee è nɔ ba nǔɖɔ mɛ ɖè lɛ é. Ði kpɔ́ndéwú ɔ, enyi é tuùn fí e mɛ mɔhun ɖé lɛ nɔ nɔ é ɔ, é sixu nɔ gbɔn fí ɖevo, bá dó nyi alɔ nú tagba.

  Nǔgbododó Biblu tɔn: “Gbɛtɔ́ e ayi tɔn ɖò te ɔ mɔ nǔ nyanya ja ɔ, é nɔ hɔn bɛ; xlonɔ ka nɔ zɔn mɔ̌ bo nɔ yì zɔ́n mɛ.”—Nǔnywɛxó 22:3.

TƐ́N NǓ ELƆ KPƆ́N: D’alɔ vǐ towe bonu é ni lin tamɛ dó nǔ e nǔ vovo e é sixu wà lɛ é sixu jì lɛ é jí. Ði kpɔ́ndéwú ɔ:

• Enyi é dóvɛ̌ nú nǔɖɔbamɛtɔ́ ɔ kpowun ɔ, etɛ ka sixu jɛ?

• Enyi é gbó adɔ, bo ɖɔ nú nǔɖɔbamɛtɔ́ ɔ ɖɔ é ni ma sɔ́ bló mɔ̌ ɖě ó ɔ, etɛ ka sixu jɛ?

• Enyi é yì jɛ hwɛ ɖò wemaxɔmɛ ɔ, etɛ ka sixu jɛ?

• É ka sixu dɔn nǔɖɔbamɛtɔ́ ɔ dó wǔ, alǒ ɖɔ xó hwínhwɛ́n ɖé dó xwè nu tɔn dó xɔ à?

Ninɔmɛ ɖokpo ɖokpo nɔ gbɔn vo, é na bo nyí fí ɖebǔ wɛ è ba nǔɖɔ ɔ mɛ ɖè ɔ nɛ. Enɛ wu ɔ, nɔ kpɔ́ xá vǐ towe bonu mi mɔ wlɛnwín e na nyɔ́ zán é ɖé. Nǎ ɛ ganjɛwu ɖɔ emi ɖò gudo tɔn hwebǐnu.

Nǔgbododó Biblu tɔn: “Xɔ́ntɔn nǔgbo nɔ ɖè wanyiyi xlɛ́ hwebǐnu, bo nyí nɔví sunnu e wu è sixu ɖeji dó ɖò wuvɛ̌ lɛ hwenu é.”—Nǔnywɛxó 17:17, nwt.