Alɔdlɛ́ndónǔ Kplé gbɛzán kpó sinsɛnzɔ́ kpó tɔn sín azɔ̌wéma tɔn lɛ́

1^er-7 MAI

DƆKUN MAWUXÓ Ɔ TƆN ÐÉ LƐ́ | 2 TAN 17-19

“Nɔ kpɔ́n hwiɖée lěe Jexóva nɔ kpɔ́n we gbɔn é”

w15 15/8 11-12 akpá. 8-9

Nɔ lin tamɛ dó wǎnyíyí Jexóva tɔn e ɖo te tɛgbɛ e jí

Jexóva nɔ ba ɖɔ mǐ ní tuun ɖɔ émí yí wǎn nú mǐ, bo nɔ lɛ́ mɔ nǔ zɛ nǔwanyido mǐtɔn lɛ́ wú. Jijɔ ɖagbe e mǐ ɖó lɛ́ é jí wɛ é nɔ sɔ́ ayi ɖó. (2 Tan 16:9) Ði kpɔ́ndéwú ɔ, é wa nǔ gbɔn mɔ̌ xá axɔ́sú Judáa tɔn Jozafáti. Ðo ninɔmɛ ɖé mɛ ɔ, Jozafáti wa nǔ kpó nǔnywɛ́ kpó ǎ, bo yí gbe bo kplá axɔ́sú Izlayɛ́li tɔn Akábu bɔ yě yi tɔ́n ahwan Silíinu lɛ́ bá yí Hlamɔti toxo ɔ ɖo Galádi yíkúngban jí. Gbeyíɖɔ adingbannɔ 400 ná jiɖe Akábu nǔnyanyawatɔ́ ɔ ɖɔ é ná ɖu ɖo ahwan ɔ jí có, gbeyíɖɔ nǔgbóɖɔtɔ́ Jexóva tɔn Micée ɖɔ ɖ’ayǐ ɖɔ Akábu ná cí ahwan jɛ́n wɛ. Akábu kú ɖo ahwan ɔ hwenu, bɔ cɛ́nnyícɛ́nnyí ɖé wɛ kpo bɔ è ná hu Jozafáti lɔmɔ̌. Ée é lɛ́ kɔ yi Jeluzalɛ́mu é ɔ, è gbɛ́ nǔ n’i ɖó kplá e é kplá Akábu yi ahwan é wú. Nǔ nyí mɔ̌ có, nǔmɔtɔ́ Jehu, Hanáni ví ɔ ɖɔ nú Jozafáti ɖɔ: “A wa nǔ ɖagbe gěgé.”—2 Tan 18:4, 5, 18-22, 33, 34; 19:1-3.

Ée Jozafáti yi axɔ́súzinkpo jí tlóló é ɔ, é sɛ́ azaglɔ́gán tɔn lɛ́, Levíi ví lɛ́, kpó vɔ̌sánúxwlémawutɔ́ lɛ́ kpó dó bɔ yě gbɔn Judáa toxo lɛ́ bǐ mɛ bo kplɔ́n Sɛ́n Jexóva tɔn toví lɛ́. Nǔjlájlá ɔ hɛn le wá sɔmɔ̌ bɔ mɛ e ɖo axɔ́súɖuto e lɛ́ lɛ̌ dó yě lɛ́ é mɛ lɛ́ é jɛ xɛsi ɖi nú Jexóva jí. (2 Tan 17:3-10) Nǔgbó ɔ, Jozafáti wa xlonɔnú, amɔ̌, énɛ́ zɔ́n nú Jexóva wɔn nǔ ɖagbe e é ko wa wá yi lɛ́ é ǎ. Tan Biblu tɔn élɔ́ flín mǐ ɖɔ hwɛhuhu gbaza mǐtɔn nɔ zɔ́n bɔ mǐ nɔ wa nǔ nyi do có, ényí mǐ nɔ ba nǔgbó nǔgbó bá nyɔ́ Jexóva nukúnmɛ ɔ, é ná kpo ɖo wǎn yí nú mǐ wɛ tɛgbɛ.

8-14 MAI

DƆKUN MAWUXÓ Ɔ TƆN ÐÉ LƐ́ | 2 TAN 20-21

“Ðeji dó Jexóva Mawu towe wú”

w14 15/12 23 akpá. 8

Mǐ ní nɔ kpɔ́ bá xo vivɔnu gbɛ nyanya élɔ́ tɔn zlɛ́

Ðo axɔ́sú Jozafáti sín hwenu ɔ, kɛntɔ́ e dó xɛsi lɛ́ é húzú kpan nukɔn mɛ Mawu tɔn lɛ́. “Ahwangɔnu tobutóbú ɖé” wɛ bo gosín fí e lɛ́ dó yě lɛ́ é. (2 Tan 20:1, 2) É nyɔ́ tawun ɖɔ mɛsɛntɔ́ Mawu tɔn lɛ́ kún tɛ́n kpɔ́n bá ɖu ɖo kɛntɔ́ yětɔn lɛ́ jí kpó hlɔ̌nhlɔ́n yěɖésú tɔn kpó ó. É nyɔ́ wa ɔ, yě ba alɔdó Jexóva tɔn. (Xa 2 Tan 20:3, 4.) É ka nyí mɛ ɖokpó ɖokpó wɛ sí te bo wa mɔ̌ lěe é jló è gbɔn é ǎ. Tan Biblu tɔn ɔ ɖɔ nú mǐ ɖɔ: “Judáanu lɛ́ bǐ ɖo te fínɛ́ ɖo Mawu Mavɔmavɔ xwé ɔ nukɔn, yě kpó asi yětɔn lɛ́ kpó vǐ yětɔn lɛ́ kpó.” (2 Tan 20:13) Yě mɛ bǐ, mɛ wínnyáwínnyá kpó mɛxó kpó wɛ nɔ kpɔ́ bo ɖeji lobo xwedó ali e Jexóva xlɛ́ yě é, bɔ Jexóva hwlɛ́n yě sín kɛntɔ́ yětɔn lɛ́ sí. (2 Tan 20:20-27) Lěe mɛ Mawu tɔn lɛ́ sixú ɖí xwi xá wǔvɛ́ gbɛ élɔ́ tɔn lɛ́ ɖo kpɔ́ mɛ gbɔn é sín kpɔ́ndéwú ɖagbe ɖé nɛ́ ǎ cé?

Nǔ xɔ akwɛ́ Biblu tɔn lɛ́ biba

it-2 1190 akpá. 5-6

Yexolámu

Ðo ali ɖé nu ɔ, Yexolámu wa nǔ jlɔ́jlɔ́ tɔ́ tɔn Jozafáti ɖɔhun ǎ, ɖó kpɔ́ndéwú nyanya asi tɔn Atalíi tɔn wútu. (2Ax 8:18) Ényí nɔví tɔn súnnu ayizɛ́n lɛ́ kpó axɔ́ví Judáa tɔn ɖé lɛ́ kpó kɛ́ɖɛ́ wɛ é hu ǎ, loɔ, é lɛ́ bló bɔ toví tɔn lɛ́ lɛ́ kɔ sín Jexóva gúdo bo nɔ sɛn vodún lɛ́. (2Ta 21:1-6, 11-14) Ðo acɛkpikpa tɔn bǐ hwenu ɔ, hunnyahunnya jɛ́n nɔ ɖo to tɔn mɛ bɔ to ɖěvo lɛ́ nɔ ɖo tagba jɛ xá ɛ wɛ. Jɛ nukɔn hwɛ̌ ɔ, Edɔ́mu wɛ fɔ́n gǔ, bɔ énɛ́ gúdo ɔ, Livuna lɔ fɔ́n gǔ dó Judáa jí. (2Ax 8:20-22) Gbeyíɖɔ Elíi wlán nǔ sɛ́dó Yexolámu bo gb’akpá n’i ɖɔ: “Mawu Mavɔmavɔ ná sɛ́ awě ɖaxó ɖokpó dó togun towe, bo ná sɛ́ dó vǐ towe lɛ́ kpó asi towe lɛ́ kpó; mɔ̌ ɖokpó ɔ, é ná hɛn dɔkun towe lɛ́ bǐ gblé.” Gɔ́ ná ɔ, hwiɖésú axɔ́sú Yexolámu ɔ, “é ná sɛ́ azɔn tɛnmɛ tɛnmɛ dó we, xomɛzɔn ɖé ná bɛ́ nú we bo fɔ́n ɔ, é ná nɔ ɖo syɛ́nsyɛ́n d’é jí wɛ káká bɔ adɔ e ɖo xo towe mɛ lɛ́ ná tɔ́n jɛ wěxo.”—2Ta 21:12-15.

Nǔ lɛ́ bǐ jɛ gbɔn mɔ̌. Jexóva jó Alabíinu lɛ́ kpó Filisitɛ́ɛn lɛ́ kpó dó bɔ yě tɔ́n ahwan to ɔ bo bɛ́ Yexolámu sín asi lɛ́ kpó vǐ tɔn lɛ́ kpó yi kannumɔgbénu. Vǐ súnnu Yexolámu tɔn kpɛví bǐ ɔ, Yoakázi (éé è nɔ lɛ́ ylɔ́ ɖɔ Akaziasi é) jɛ́n Mawu hwlɛ́n gán ɖó Axɔ́súɖuto sín akɔ e é jɛ xá Davídi é wú. “Ée nǔ énɛ́ lɛ́ bǐ jɛ wá yi ɔ, Mawu Mavɔmavɔ sɛ́ xomɛzɔn e ma ná gbɔ gbeɖé ǎ ɔ dó Yexolámu.” Ðo xwe we gúdo ɔ, “adɔ tɔn lɛ́ tɔ́n jɛ wěxo,” bɔ azɔ̌ ɔ ɖo syɛ́nsyɛ́n wɛ mɔ̌ káká bɔ é kú. Mɔ̌ wɛ mɛ nyanya énɛ́ zán wá kú gbɔn; “kú tɔn vɛ́ nú mɛɖé ǎ.” È ɖi i ɖó Davídi Toxo mɛ. “Amɔ̌, è sɔ́ ɛ yi ɖó yɔdo e mɛ è nɔ ɖi axɔ́sú lɛ́ dó ɔ mɛ ǎ.” Vǐ tɔn Akaziasi ɖu axɔ́sú ɖó tɛn tɔn mɛ.—2Ta 21:7, 16-20; 22:1; 1Ta 3:10, 11.

15-21 MAI

DƆKUN MAWUXÓ Ɔ TƆN ÐÉ LƐ́ | 2 TAN 22-24

“Jexóva nɔ dó nú nǔ e è wa kpó akɔ́nkpinkpan kpó lɛ́ é”

w09 1/4 24 akpá. 1-2

Gbɛ̌ nyanya lɛ́ dídó zɔ́n bɔ Joási jó Jexóva dó

HWENU baɖabaɖa ɖé wɛ hwe énɛ́ nu nyí ɖo Jeluzalɛ́mu, toxo e mɛ tɛ́npli Mawu tɔn ɖe é. Hu wɛ è hu axɔ́sú Akaziasi kɛ́ɖɛ́ nɛ́. Nǔ e Akaziasi sín nɔ Atalíi dó sin ɖo énɛ́ gúdo é nyɔ́ se ǎ. É zɔ́n bɔ è hu Akaziasi sín vǐ súnnu lɛ́, vǐvú éɖésúnɔ tɔn lɛ́! A tuun nǔ e wú é wa mɔ̌ é a? É wa mɔ̌ bónú yě mɛ ɖě ní má wá nyí axɔ́sú bónú axɔ́súɖuɖu gló è ó.

É ɖo mɔ̌ có, è hwlɛ́n vǐvú Atalíi tɔn Joási gán, bɔ Atalíi tlɛ tuun ǎ. A ba ná tuun lěe nǔ nyi mɔ̌ gbɔn é a? Vǐ ɔ ɖó tánti ɖokpó bɔ è nɔ ylɔ́ ɛ ɖɔ Yexocɛ́va, é wɛ sɔ́ vǐ ɔ hwlá ɖó tɛ́npli Mawu tɔn mɛ. É kpé wú bo wa mɔ̌ ɖó asú tɔn, Yexoyáda, wɛ nyí vɔ̌sánúxwlémawutɔ́ ɖaxó wútu. Énɛ́ ɔ, yě nɔ kpɔ́ bo kpé nukún dó Joási wú.

w09 1/4 24 akpá. 3-5

Gbɛ̌ nyanya lɛ́ dídó zɔ́n bɔ Joási jó Jexóva dó

Joási nɔ hwlǎhwlá ɖo tɛ́npli ɔ mɛ nú xwe ayizɛ́n. È kplɔ́n nǔ i dó Jexóva Mawu kpó sɛ́n tɔn lɛ́ kpó wú ɖo fínɛ́. Wǎgbɔ tɔn ɔ, éé Joási ɖó xwe tɛ́nwe é ɔ, Yexoyáda wa nǔ kpó akɔ́nkpinkpan kpó bo sɔ́ Joási axɔ́sú. A ba ná tuun lěe Yexoyáda wa mɔ̌ gbɔn é, kpó nǔ e wá jɛ dó Joási sín gan’máa, axɔ́si nyanya Atalíi wú é kpó a?

Yexoyáda gbɔn gǔdo bo xo sɔ́jakanwekogán éé nɔ nya xɛ axɔ́sú lɛ́ jí ɖo Jeluzalɛ́mu hwenɛ́nu lɛ́ é kplé. É ɖɔ lěe é kpó asi tɔn kpó hwlɛ́n vǐ súnnu axɔ́sú Akaziasi tɔn gbɔn é nú yě. Énɛ́ gúdo ɔ, Yexoyáda xlɛ́ Joási sɔ́jakanwekogán énɛ́ lɛ́ bɔ yě mɔ ɖɔ é wɛ ɖó acɛ bo ná nyí axɔ́sú. Énɛ́ ɔ, yě bló tuto ɖé.

Yexoyáda ɖe Joási tɔ́n bo sɔ́ axɔ́súgbákún ɖó ta n’i. Ée yě wa mɔ̌ é ɔ, togun ɔ “jɛ alɔ xo n’i jí, bo nɔ ɖɔ: ‘Susu nú axɔ́sú ɔ!’” Sɔ́jakanwekogán lɛ́ lɛ́ dó Joási bo nya xɛ ɖo jí tɔn. Ée Atalíi se bɔ mɛ lɛ́ ɖo awǎ jɛ wɛ é ɔ, é kan wezun wá bo ɖɔ nǔ kún sixú nyí mɔ̌ ó. Amɔ̌ Yexoyáda ɖe gbe nú sɔ́jakanwekogán lɛ́ bɔ yě hu Atalíi.—2 Axɔ́sú lɛ́ 11:1-16.

it-1 776 akpá. 8

Cyɔɖiɖi, fí e è nɔ ɖi cyɔ ɖó lɛ́ é

È jɔ wǔ vɔ̌sánúxwlémawutɔ́ ɖaxó ɖagbe Yexoyáda bɔ è ɖi i ɖó “yɔdo e mɛ è nɔ ɖi axɔ́sú lɛ́ dó ɔ mɛ, ɖo Davídi Toxo mɛ.” Éɖokpónɔ wɛ nyí mɛ e ma jɔ ɖo axɔ́sú kún mɛ ǎ bɔ è jɔ wǔ mɔ̌hun é.—2Ta 24:15, 16.

Nǔ xɔ akwɛ́ Biblu tɔn lɛ́ biba

it-2 1231 akpá. 10

Zekaliya

12. Vɔ̌sánúxwlémawutɔ́ ɖaxó Yexoyáda sín vǐ súnnu. Ðo kú Yexoyáda tɔn gúdo ɔ, axɔ́sú Joási jó mawusinsɛn nǔgbó ɔ dó, é ɖótó wěɖexámɛ nyanya lɛ́ bo sɔ́ ɖótó gbeyíɖɔ Mawu tɔn lɛ́ ǎ. Zekaliya, éé nyí Joási sín dǎa’nyɔ̌nu vǐ é (2Ta 22:11), gb’akpá nú togun ɔ syɛ́nsyɛ́n, yě ka lɛ́ kɔ sín hwɛ yětɔn lɛ́ gúdo ǎ, é nyɔ́ wa ɔ, yě nyi awǐnnya gló dó hu i ɖo tɛ́npli ɔ sín nukɔn. Xó gǔdo tɔn e Zekaliya ɖɔ bo bɔ nu lɛ́ é ɖíe: “Mawu Mavɔmavɔ mɔ nǔ e wa wɛ a ɖe é, é ná byɔ́ axɔ́ tɔn we.” Mawu se nǔ énɛ́ e Zekaliya byɔ́ b’ɛ nyí nǔɖɔɖayǐ ɖé é. Ényí nǔ kɛ́ɖɛ́ wɛ Silíinu lɛ́ hɛn gblé dó Judáa wú vantankánnyá tɔn ǎ, mɛsɛntɔ́ Joási tɔn we lɛ́ xísí d’è bo hu i “dó ba vɔ̌sánúxwlémawutɔ́ Yexoyáda sín vǐ e é hu é sín hlɔn.” Septante Glɛ̌kigbe tɔn kpó Vulgate Latɛ́ɛngbe tɔn kpó ɖɔ ɖɔ è hu Joási dó ba hlɔn Yexoyáda sín “vǐ súnnu” tɔn. É ɖo mɔ̌ có, ɖo nǔwlánwlán Massorète tɔn kpó Peshitta kpó mɛ ɔ, è ɖɔ “vǐ súnnu lɛ́,” bɔ é sixú ko nyí ɖɔ è gɔ́ “lɛ́” ná bo dó ɖo xlɛ́xlɛ́ wɛ ɖɔ Zekaliya, Yexoyáda ví súnnu ɔ, éé nyí gbeyíɖɔ kpó vɔ̌sánúxwlémawutɔ́ kpó é nyí gbɛtɔ́ téwúngbéjú bo xɔ akwɛ́ nú Jexóva.—2Ta 24:17-22, 25.

ZĚ HWIÐÉE BǏ JÓ NÚ MAWUXÓÐIÐƆZƆ́ Ɔ

w10 15/2 6-8 akpá. 6-10

Mǐ nɔ ɖɔ Xó Mawu tɔn kpó adɔgbígbó kpó

Ali e nu è sixú yá wú mɔ gbigbɔ mímɛ́ Mawu tɔn ɖe é wɛ nyí è ná byɔ́ ɛ. Jezu ɖɔ nú tóɖóetɔ́ lɛ́ ɖɔ: “Ényí midɛɛ lɛ́ mɛ e nyí hwɛhutɔ́ lɛ́ é tuun lěe mi ná ná nǔníná ɖagbe lɛ́ vǐ mitɔn lɛ́ gbɔn é ɔ, Tɔ́ e ɖo jǐxwé é tɔn zun kwínkwín má kwín!” (Luk. 11:13) Nǔgbó ɔ, mǐ ɖó ná nɔ xo ɖɛ bo byɔ́ gbigbɔ mímɛ́ hwebǐnu. Ényí akpáxwé sinsɛnzɔ́ ɔ tɔn ɖé lɛ́ ɖi, kúnnuɖiɖe ɖo ali lɛ́ jí, kúnnuɖiɖe má nyí aca tɔn, alǒ ɖo ajɔ̌watɛn lɛ́ nɔ dó xɛsi we ɔ, a sixú xo ɖɛ bo byɔ́ Jexóva ɖɔ ní ná gbigbɔ mímɛ́ tɔn émí nú émí ná kpan akɔ́n.—1 Tɛ. 5:17.

Nǔ e nɔví nyɔ̌nu e nɔ nyí Rosa é wa é nɛ́. Rosa ɖo azɔ̌mɛ gbe ɖokpó bɔ mɛ̌si e é nɔ wa azɔ̌ xá é ɖé ɖo gbeɖíɖó wěmaxɔmɛ ɖěvo tɔn dó dǎkaxixo vǐ lɛ́ wú jí xa wɛ. Nǔ e é xa é byɔ́ lanmɛ n’i sɔmɔ̌ bɔ é sú xó bo ɖɔ: “Fítɛ́ gbɛ ɔ ka xwe?” Rosa sixú lɔn nú ali énɛ́ e hun n’i b’ɛ ná ɖe kúnnu é gbɔ wǔ tɔn ǎ. Étɛ́ ka d’alɔ ɛ b’ɛ kpankɔ́n lobo ɖɔ xó? Rosa ɖɔ: “Un xo ɖɛ sɛ́dó Jexóva ɖɔ ní ná gbigbɔ mímɛ́ tɔn nú é ná d’alɔ mì.” É kpé wú bo ɖe kúnnu n’i ganjí bo bló bɔ è bló mɛbakpɔ́n n’i. Lɛ̌ lin tamɛ dó kpɔ́ndéwú Milane tɔn jí, xwe atɔ́ɔ́n wɛ é ɖó bo nɔ nɔ toxo New York tɔn mɛ. Milane ɖɔ: “Nyi kpó Mamáa ce kpó nɔ xo ɖɛ hwebǐnu cóbɔ un nɔ yi wěmaxɔmɛ.” Étɛ́ takúnmɛ yě ka nɔ xo ɖɛ dó? Yě nɔ byɔ́ akɔ́nkpinkpan nú Milane nú é ná jɛ hun dó Mawu tɔn jí lobo lɛ́ ɖɔ xó dó wǔ tɔn. Mamáa tɔn ɖɔ: “Énɛ́ d’alɔ Milane bɔ é jɛ hun dó nǔɖiɖi tɔn jí nú nǔ e kan jijizán kpó xwe ɖěvo lɛ́ kpó ɖuɖu é, bɔ é nɔ xo kpóɖó nú yě ɖo nǔwiwa mɔ̌hun lɛ́ hwenu ǎ.” Kpɔ́ndéwú énɛ́ lɛ́ xlɛ́ ɖɔ nú é byɔ́ ɖɔ è ní kpankɔ́n ɔ, ɖɛxixo nɔ d’alɔ ǎ cé?

Lɛ̌ lin tamɛ dó nǔ e d’alɔ gbeyíɖɔ Jelemíi b’ɛ kpankɔ́n é jí. Hwenu e Jexóva sɔ́ Jelemíi b’ɛ ná nyí gbeyíɖɔ nú akɔta lɛ́ é ɔ, é ɖɔ: “Un ma nyɔ́ xó ɖɔ nɛ́! Yɔkpɔ́vú wɛ nú mì.” (Jel. 1:4-6) É ka wá yá é ɔ, Jelemíi nɔ ɖɔ mawuxó syɛ́nsyɛ́n kpó kanɖódónǔwú kpó sɔmɔ̌ bɔ mɛ gěgé nɔ mɔ ɛ dó mɔ nǔhɛngblétɔ́. (Jel. 38:4) É dó hwɛɖónúmɛ Jexóva tɔn sín wɛn kpó akɔ́nkpinkpan kpó nú xwe 65 jɛjí. É tuun i ganjí ɖo Izlayɛ́li ɖó wɛn e é nɔ jlá kpó akɔ́nkpinkpan kpó ma ɖi xɛsi é wú bɔ ɖo xwe 600 gúdo, hwenu e Jezu ɖɔ xó kpó akɔ́nkpinkpan kpó é ɔ, mɛɖé lɛ́ ɖɔ ɖɔ Jelemíi wɛ lɛ́ fɔ́n wá gbɛ. (Mat. 16:13, 14) Nɛ̌ Jelemíi éé nyí gbeyíɖɔ e nɔ xo nǔ kpɔ́n dó éɖée wú ɖ’ayǐ é ka wá ɖu ɖo winnyá kúkú jí gbɔn? É ɖɔ: “[Xó Mawu tɔn] nɔ cí ɖɔ myɔ wɛ ɖo xo ce mɛ, bo ɖo jiji wɛ ɖɔhun, bɔ un nɔ tɛ́nkpɔ́n bo ná dɛ ɖ’é nu, un ka nɔ kpé wú ǎ.” (Jel. 20:9) Nǔgbó ɔ, xó Jexóva tɔn ná hlɔ̌nhlɔ́n Jelemíi bo sísɛ́ ɛ bɔ é ɖɔ xó.

Ðo wěma e mɛsɛ́dó Pɔ́lu wlán sɛ́dó Eblée lɛ́ é mɛ ɔ, é ɖɔ: “Ðó Mawuxó ɔ ɖo gbɛ, bo ɖó hlɔ̌nhlɔ́n; é ɖá hú jǐví nuwenɔ bǐ. É nɔ byɔ́ káká fí e lǐndɔ̌n kpó [gbigbɔ] kpó kplé ɖe ɔ, bo nɔ má yě ɖó vovo. É nɔ byɔ́ káká fí e gǒflɛ́mɛ lɛ́ kpódó fɔn lɛ́ kpó kplé ɖe ɔ, bo nɔ má yě ɖó vovo. É nɔ ɖe ɖɛ jlǒ kpódó linlin e ɖo gbɛtɔ́ sín ayi mɛ lɛ́ kpán ɖó vovo.” (Ebl. 4:12) Wɛn alǒ Xó Mawu tɔn sixú ɖó hlɔ̌nhlɔ́n dó mǐ jí lěe é ɖó dó Jelemíi jí gbɔn é. Gbɛtɔ́ lɛ́ wɛ è zán dó wlán Biblu có, flín ɖɔ é kún nyí xo kplé nǔnywɛ́ gbɛtɔ́ tɔn tɔn ɖé ó, ɖó Mawu wɛ sɔ́ d’ayi mɛ nú mɛ lɛ́ bɔ yě wlán. È ɖɔ ɖo 2 Piyɛ́ɛ 1:21 mɛ ɖɔ: “È ɖɔ nǔɖé ɖ’ayǐ gbɔn jlǒ gbɛtɔ́ tɔn gblamɛ kpɔ́n ǎ, loɔ, gbigbɔ mímɛ́ wɛ sísɛ́ gbɛtɔ́ lɛ́ bɔ yě ɖɔ nǔ e gosín Mawu gɔ́n lɛ́ é.” Ényí mǐ nɔ zán hwenu dó kplɔ́n Biblu dó nǔjɔnǔ mɛ mǐɖésúnɔ ɔ, wɛn Mawu tɔn e gbigbɔ mímɛ́ sɔ́ d’ayi mɛ nú gbɛtɔ́ lɛ́ bɔ yě wlán é nɔ gɔ́ ayi mɛ nú mǐ. (Xa 1 Kɔlɛ́ntinu lɛ́ 2:10.) Wɛn énɛ́ sixú cí ‘myɔ e ɖo jiji wɛ’ é ɖɔhun ɖo xo mǐtɔn mɛ, bɔ mǐ ná sixú nɔ jí ǎ.

Cóbónú Biblu kplɔ́nkplɔ́n mɛɖésúnɔ tɔn mǐtɔn ná d’alɔ mǐ ɔ, mǐ ɖó ná kplɔ́n ɖo ali ɖé nu bɔ wɛn Biblu tɔn ɔ ná byɔ́ ayi mǐtɔn mɛ, bo ná w’azɔ̌ ɖo mɛ alɔkpa e mǐ nyí ɖo ayi mɛ é wú. Ði kpɔ́ndéwú ɔ, è byɔ̌ gbeyíɖɔ Ezekiyɛ́li ɖo nǔmimɔ ɖé mɛ ɖɔ é ní ɖu wěma mlámlá ɖé, bɔ ɖo wěma ɔ jí ɔ, è byɔ́ ɖɔ é ní dó wɛn syɛ́nsyɛ́n ɖé togun e ma nɔ yí wɛn ǎ é ɖé. É ɖó ná mɔ nǔ jɛ wɛn ɔ mɛ bǐ mlɛ́mlɛ́ káká jɛ gǒflɛ́mɛ tɔn lɛ́ jí. Mɔ̌ wiwa ná zɔ́n bɔ wɛn ɔ dídó ná bɔ wǔ n’i bo lɛ́ víví nu n’i wǐin ɖɔhun.—Xa Ezekiyɛ́li 2:8–3:4, 7-9.

22-28 MAI

DƆKUN MAWUXÓ Ɔ TƆN ÐÉ LƐ́ | 2 TAN 25-27

“Jexóva hɛn ɔ, é ná ná éé hú mɔ̌ ɔ we”

it-2 1186 akpá. 3

Joási

Axɔ́sú Judáa tɔn da sɔ́ja afatɔ́n afatɔ́n donu kanwe ko ɖo Joási sí bónú yě ná fun ahwan xá Edɔ́munu lɛ́. É ɖo mɔ̌ có, ɖo wěɖexámɛ “ɖɛ̌mɛnu Mawu tɔn” tɔn glɔ́ ɔ, è lɛ́ kɔ nú sɔ́ja lɛ́. È ko sú kpatágankwɛ́ tɔ́nu atɔn mɔ̌ (ɖɔ̌la 660600) sɔ́ja lɛ́ jɛ nukɔn có, xomɛ sin yě ɖɔ è lɛ́ kɔ nú yě sɛ́dó xwé, bóyá nǔ ɖěbǔ e yě ma sɔ́ ná mɔ hɛn sín ahwangbénu wá yi xwé ǎ é wú wɛ é ná ko vɛ́ nú yě. Énɛ́ wú ɔ, ée yě lɛ́ kɔ wá yi totaligbé é ɔ, yě bɛ́ nǔ e ɖo toxo axɔ́súɖuto tofɔligbé tɔn mɛ lɛ́ é, sín Samalíi (bóyá fínɛ́ wɛ yě bɛ́sín) káká yí Bɛti-Holɔ́ni.—2Ta 25:6-10, 13.

Nǔ xɔ akwɛ́ Biblu tɔn lɛ́ biba

w07 15/12 10 akpá. 1-2

A ka ɖó mɛɖé b’ɛ nɔ xlɛ́ ali we ɖo gbigbɔ lixo a?

XWE 16 ɖó wɛ Oziyási ɖe hwenu e é húzú axɔ́sú nú axɔ́súɖuto tofɔligbé tɔn Judáa tɔn é. Xwe 50 jɛjí wɛ é kpa acɛ ná, sín vivɔnu xwe kanwe ko tɛ́nnɛgɔ́ jɛ bǐbɛ́mɛ xwe kanwe ko tántɔngɔ́ J.H.M. tɔn. Oziyási “nɔ wa nǔ e nyɔ́ Mawu mavɔmavɔ nukúnmɛ é” sín wǐnnyáwínnyá mɛ tɔn. Étɛ́ ka d’alɔ ɛ b’ɛ wlí ali jlɔ́jlɔ́? Tan ɔ ɖɔ: “Hwenu e Zekaliyahu ɖo gbɛ, bo nɔ kplɔ́n sísí ɖó nú Mawu Oziyási ɔ, Oziyási nɔ dó gǎn, bo nɔ wa Mawu Mavɔmavɔ sín jlǒ, bɔ Mawu nɔ bló bɔ é wa nǔɖé ɔ, é nɔ mɔ nu tɔn.”—2 Tan 26:1, 4, 5.

È tuun nǔ káká ɖé dó wěɖexámɛtɔ́ axɔ́sú ɔ tɔn Zekaliyahu wú zɛ nǔ è ɖɔ dó wǔ tɔn ɖo tan élɔ́ mɛ lɛ́ é wú ǎ. Ðó Zekaliyahu “nɔ kplɔ́n sísí ɖó nú Mawu” Oziyási wútu ɔ, kpɔ́ndéwú tɔn ɖagbe ɔ zɔ́n bɔ axɔ́sú wínnyáwínnyá énɛ́ wa nǔ e sɔgbe é. Wěma Expositor’s Bible ɖɔ dó Zekaliyahu wú ɖɔ é ɖo wɛn ɖɔ “mɛɖé wɛ é nyí bo tuun nǔ wlánwlán mímɛ́ lɛ́ ganjí, mɔ nǔ kpɔ́n ganjí ɖo gbigbɔ lixo, bo kpé wú bo má nǔ e é tuun lɛ́ é xá mɛ ɖěvo lɛ́.” Akɔwé Biblu tɔn ɖé ɖɔ dó Zekaliyahu wú ɖɔ: “É tuun nǔɖɔɖayǐ lɛ́ ganjí . . . bí, nɔ sɔ́ éɖée bǐ jó nú azɔ̌, nyí mɛ ɖagbe, bɔ é cí ɖɔ kpɔ́ndéwú tɔn wa ɖagbe tawun nú Oziyási.”

29 MAI–4 JUIN

Nǔ xɔ akwɛ́ Biblu tɔn lɛ́ biba

w12 15/2 24-25

Natáan jɛ hun dó sinsɛn mímɛ́ ɔ jí kpó gbejíninɔ kpó

Ðó Jexóva sɛntɔ́ gbejínɔtɔ́ ɖé wɛ Natáan nyí wútu ɔ, hwenu e Davídi ɖɔ émí ná gbá fí ɖé b’ɛ ná nyí mawusinsɛn sín nɔtɛn nukɔntɔn ɔ ɖo ayǐkúngban jí é ɔ, é xo kpóɖó n’i kpó akpakpa sɔ́ mɛ kpó. Amɔ̌, ɖo ninɔmɛ énɛ́ mɛ ɔ, é cí ɖɔ Natáan ɔ, linlin éɖésúnɔ tɔn wɛ é ɖɔ, é ɖɔ xó dó Jexóva nyíkɔ mɛ ǎ. Zǎn énɛ́ mɛ ɔ, Mawu ɖɔ nú gbeyíɖɔ tɔn ɖɔ é ní dó wɛn ɖěvo sésé axɔ́sú ɔ: Davídi wɛ ná gbá tɛ́npli Jexóva tɔn ǎ. Vǐ súnnu tɔn lɛ́ ɖokpó wɛ ná gbá. Amɔ̌ Natáan ɖɔ nú Davídi ɖɔ Mawu ná jɛ akɔ ɖé xá ɛ bɔ axɔ́súzinkpo tɔn ‘ná nɔ ayǐ káká sɔ́yi.’—2 Sam. 7:4-16.

Linlin e Natáan ɖó dó tɛ́npli ɔ gbígbá wú é sɔgbe xá jlǒ Mawu tɔn ǎ. É ɖo mɔ̌ có, gbeyíɖɔ énɛ́ e nɔ sɔ́ éɖée hwe é húnhún nǔ ɖɔ ǎ, loɔ, é yí gbe nú linlin Jexóva tɔn lobo wa nǔ sɔgbe xá. Kpɔ́ndéwú ɖagbe ɖé wɛ é nyí bɔ mǐ sixú xwedó hwenu e é ná wá byɔ́ ɖɔ Mawu ní gbɛ́ nǔ nú mǐ ɖo ali ɖé nu é! Gbeyíɖɔzɔ́ e Natáan kpo ɖo wiwa wɛ ɖo énɛ́ gúdo é xlɛ́ ɖɔ nǔ tɔn kpo ɖo Mawu nukúnmɛ nyɔ́ wɛ. Nǔgbó ɔ, é cí ɖɔ Jexóva sɔ́ d’ayi mɛ nú Natáan kpó Gadi nǔmɔtɔ́ ɔ kpó bɔ yě ɖe wě xá Davídi bɔ é bló tito nú hanjitɔ́ 4000 bɔ yě nɔ wa sinsɛnzɔ́ ɖo tɛ́npli mɛ.—1 Tan 23:1-5; 2 Tan 29:25.

5-11 JUIN

DƆKUN MAWUXÓ Ɔ TƆN ÐÉ LƐ́ | 2 TAN 30-31

“Kplékplé ɖó kpɔ́ nɔ wa ɖagbe nú mǐ”

it-1 1132 akpá. 4

Ezekiyási

Akpakpa sɔ́ ɛ dó sinsɛn mímɛ́ ɔ wú. Tlóló e Ezekiyási yi axɔ́súzinkpo jí hwenu e é ɖó xwe 25 é jɛ́n é ɖe akpakpa e nɔ sɔ́ ɛ dó Jexóva sinsɛn wú é xlɛ́. Nǔ nukɔntɔn e é wa é wɛ nyí ɖɔ é vɔ́ tɛ́npli ɔ sín hɔn lɛ́ hun lobo vɔ́ tɛ́npli ɔ jlá ɖó. Énɛ́ gúdo ɔ, é xo vɔ̌sánúxwlémawutɔ́ lɛ́ kpó Levíi ví lɛ́ kpó kplé bo ɖɔ nú yě ɖɔ: “Un jló ná jɛ akɔ xá Mawu Mavɔmavɔ, Mawu Izlayɛ́li tɔn ɔ.” Gbejíninɔ sín akɔjijɛ ɖé wɛ, cí nǔ ɖɔ è vɔ́ akɔjijɛ Sɛ́n ɔ, éé kpo ɖo ayǐ bɔ yě dó vɛ̌ ná é ɖó ayǐ ɖo Judáa ɖɔhun. Kpó kanɖódónǔwú kpó ɔ, é bló tuto nú Levíi ví lɛ́ ɖo sinsɛnzɔ́ yětɔn mɛ, bo vɔ́ tuto e è bló nú nǔxixo kpó han susu kpikpa tɔn lɛ́ kpó lɛ́ é ɖó ayǐ. Sun Nisáan tɔn, hwenu e è ɖó ná ɖu Dǐndínwáyixwe ɔ é wɛ, amɔ̌, tɛ́npli ɔ, vɔ̌sánúxwlémawutɔ́ lɛ́, kpó Levíi ví lɛ́ kpó ɖo mǐmɛ́ jí ǎ. Nisáan 16gɔ́ sín azǎn jí ɔ, è slá wǔ nú tɛ́npli ɔ bo lɛ́ lɛ́ kɔ nú nǔ e è nɔ zán ɖ’é mɛ lɛ́ é. Énɛ́ gúdo ɔ, è ɖó ná sá hwɛsɔ́kɛmɛvɔ́ bǔnɔ ɖé dó Izlayɛ́li togun ɔ bǐ tamɛ. Jɛ nukɔn hwɛ̌ ɔ, axɔ́ví lɛ́ hɛn vɔ̌sísá lɛ́ kpó hwɛsɔ́kɛmɛvɔ́ lɛ́ kpó wá dó axɔ́súɖuto ɔ, vɔ̌sákpe ɔ, goxɔ ɔ, kpó togun ɔ, kpó tamɛ.—2Ta 29:1-36.

it-1 1132 akpá. 5

Ezekiyási

Ðó mɛ blíblí e togun nyí é zɔ́n bɔ yě ma sixú ɖu Dǐndínwáyixwe ɔ ɖo sun e mɛ yě ɖó ná ɖu ɖe é ǎ wútu ɔ, Ezekiyási gbɔn daxwi sɛ́n e ná gbe ɖɔ mɛ blíblí lɛ́ sixú wá ɖu Dǐndínwáyixwe ɔ ɖo sun ɖokpó gúdo é tɔn mɛ. É sɛ́ mɛ dó Judáanu lɛ́ kpó Izlayɛ́li ví lɛ́ kpó bǐ, bo sɔ́ wěma d’así nú wezunkántɔ́ lɛ́ bɔ yě gbɔn to ɔ bǐ mɛ, sín Bɛ̌-Ceva káká yi Dan. Mɛ gěgé ko wezunkántɔ́ lɛ́, amɔ̌, mɛɖé lɛ́, ɖo tají ɔ, mɛ e ɖo akɔta Acɛ́ɛ, Manasée kpó Zabulɔ́ɔn kpó tɔn mɛ é ɖé lɛ́ sɔ́ yěɖée hwe bo wá. Gɔ́ ná ɔ, mɛ e ɖo akɔta Eflayímu kpó Isakáa kpó tɔn mɛ é ɖé lɛ́ lɔ yi. Jexóva sɛntɔ́ e ma nyí Izlayɛ́linu ǎ lɛ́ é gěgé lɛ́ wá tɛn tɔn mɛ. É cí ɖɔ fínɛ́ wíwá vɛ́ wǔ nú mɛ ɖěɖěe ɖo axɔ́súɖuto totaligbé tɔn mɛ bo nɔ jɛ hun dó sinsɛn nǔgbó ɔ jí lɛ́ é ɖɔhun. Wɛndótɔ́ lɛ́ ɖɔhun ɔ, è ná ko klán gbe xá yě bo lɛ́ ko yě lɔ, ɖó axɔ́súɖuto énɛ́ e mɛ akɔta wǒ ɖe é ɖo ninɔmɛ nyanya ɖé mɛ; vodúnsinsɛn gbá kpé bɔ Asilíinu lɛ́ lɛ́ ɖo adǎn gblɔ́n nú yě wɛ.—2Ta 30:1-20; Kɛ́ 9:10-13.

it-1 1132 akpá. 6-7

Ezekiyási

Ðo Dǐndínwáyixwe ɔ gúdo ɔ, è ɖu wɔ̌xúxú e mɛ è ma dó tɔ́n ǎ é sín xwe kpó awǎjijɛ ɖaxó ɖé kpó nú azǎn tɛ́nwe. Awǎjijɛ ɔ syɛ́n sɔmɔ̌ bɔ yě mɛ e wá lɛ́ é bǐ lɛ́ dó ga nú xwe ɔ nú azǎn tɛ́nwe ɖěvo. Ninɔmɛ syɛ́nsyɛ́n lɛ́ ɖo fínɛ́ có, Jexóva kɔn nyɔ̌ná dó yě jí káká bɔ yě “j’awǎ ɖésú ɖo Jeluzalɛ́mu. Sín axɔ́sú Izlayɛ́li tɔn Salomɔ́ɔ Davídi ví ɔ hwenu ɔ, mɛɖé sɔ́ j’awǎ mɔ̌hunkɔtɔn kpɔ́n gbeɖé ɖo Jeluzalɛ́mu ǎ.”—2Ta 30:21-27.

Awǎjijɛ énɛ́ ɔ, mawusinsɛn nǔgbó ɔ e è vɔ́ ɖó ayǐ é wú wɛ é sín, é nyí lěe nǔ cí nú togun ɔ b’ɛ ná nyí nú hwenu kléwún ɖé kpowun é wú wɛ ǎ; nǔ e yě wa bɔ d’é wú é ɖe énɛ́ xlɛ́. Cóbónú mɛ e wá nǔwiwa ɔ domɛ lɛ́ é ná lɛ́ kɔ yi xwé ɔ, yě tɔ́n bo yi gba awǐnnya e è tun te bo nɔ sɛn lɛ́ é hánnyá, gba vodúnxwé e ɖo só jí lɛ́ kpó vɔ̌sákpe lɛ́ kpó, bo ɖe vodún Acela e gbɔn Judáa kpó Bɛnjamɛ́ɛ kpó lɛ́ é sín, káká yi Eflayímu kpó Manasée kpó. (2Ta 31:1) Ezekiyási sɔ́ kpɔ́ndéwú ɔ ɖ’ayǐ bo gba dan e Mɔyízi sɔ́ ganvɔ dó bló ná é hánnyá, ɖó togun ɔ sɔ́ dó ɖó vodún, bo nɔ dó zǎlínkpɔ́n zo ná. (2Ax 18:4) Ðo xwe ɖaxó e yě ɖu é gúdo ɔ, Ezekiyási kan ɖ’é jí ɖɔ togun ɔ ná kpo ɖo Mawu sɛn wɛ ɖo ali e sɔgbe é nu: é bló tuto nú vɔ̌sánúxwlémawutɔ́ gbɛ́ta lɛ́, bló tuto bɔ è ná kpé nukún dó mɛ e nɔ wa sinsɛnzɔ́ ɖo tɛ́npli ɔ mɛ lɛ́ é wú; é dó wǔsyɛ́n lanmɛ nú mɛ lɛ́ ɖɔ yě ní se tónú nú Sɛ́n e ɖɔ ɖɔ è ní hɛn mǎɖówǒ jinukún nukɔn nukɔntɔn lɛ́ wá nú Levíi ví lɛ́ kpó vɔ̌sánúxwlémawutɔ́ lɛ́ kpó é, bɔ togun ɔ yí gbe ná kpó akpakpa sɔ́ mɛ kpó.—2Ta 31:2-12.

12-18 JUIN

DƆKUN MAWUXÓ Ɔ TƆN ÐÉ LƐ́ | 2 TAN 32-33

“Nɔ dó wǔsyɛ́n lanmɛ nú nɔví towe lɛ́ ɖo wǔvɛ́ lɛ́ hwenu”

it-1 212 akpa. 6

Asilíi

Senakelíbu. Hwenu e Ezekiyási ɖo xwe 14 bló wɛ ɖo axɔ́súzinkpo jí é ɔ, Senakelíbu, vǐ súnnu Saagɔ́ɔn IIgɔ́ tɔn, wá tɔ́n ahwan axɔ́súɖuto Judáa tɔn (732 J.H.M. tɔn). (2Ax 18:13; Eza 36:1) Ezekiyási fɔ́n gǔ dó Asilíinu lɛ́ jí, ɖó agban kpinkpɛn e tɔ́ tɔn Akázi yí gbe bɔ Asilíinu lɛ́ ɖó kɔ jí nú yě é wútu. (2Ax 18:7) Énɛ́ wútu ɔ, Senakelíbu gba nǔ gbɔn Judáa, bɔ è ɖɔ ɖɔ é yí toxo 46 (kpɔ́n Eza 36:1, 2). Bɔ énɛ́ gúdo ɔ, é nɔ Lakíci, fí e ahwankpá tɔn ɖó gɔnu ɖó é, bo ɖɔ sɛ́ dó Ezekiyási ɖɔ é ɖó ná ná nǔjɔ: é ná ná siká kilóo 900 (ɖɔ̌la 11560000 mɔ̌) kpó kpatágan kilóo 9000 kpó (ɖɔ̌la 1982000 mɔ̌). (2Ax 18:14-16; 2Ta 32:1; kpɔ́n Eza 8:5-8.) È sú axɔ́ énɛ́ có, Senakelíbu sɛ́ ɖɛ̌mɛnu tɔn lɛ́ dó bo ɖɔ ɖěwagbɛn kún ɖe ó, lé Jeluzalɛ́mu ɖó ná jó ta. (2Ax 18:17–19:34; 2Ta 32:2-20) Énɛ́ wú ɔ, Jexóva hu mɛ 185000 ɖo ahwankpá tɔn mɛ ɖo zǎn ɖokpó mɛ, bɔ énɛ́ zɔ́n bɔ Asilíinu nuflétɔ́ ɔ jó gbe bo lɛ́ kɔ yi Ninívu. (2Ax 19:35, 36) Fínɛ́ wɛ vǐ súnnu tɔn we wá hu i ɖe, bɔ vǐ súnnu tɔn ɖěvo e nɔ nyí Asaaxadɔ́ɔn é ɖu axɔ́sú ɖó tɛn tɔn mɛ. (2Ax 19:37; 2Ta 32:21, 22; Eza 37:36-38) È lɛ́ wlán nǔ énɛ́ lɛ́ bǐ dó awǐnnya kpikpa Senakelíbu tɔn ɖokpó kpó Asaaxadɔ́ɔn tɔn ɖokpó kpó jí, ahwankpá Asilíinu lɛ́ tɔn sín kún è vívá é jɛ́n ma ɖ’é mɛ ǎ.

w13 15/11 19 akpá. 12

Mɛ̌ mɛ̌ e lɛ́ wɛ ka nyí lɛ̌ngbɔ́nyitɔ́ tɛ́nwe lɛ́ kpó axɔ́ví tántɔn lɛ́ kpó ɖo égbé?

Jexóva nɔ ɖo gbesisɔmɛ hwebǐnu ba wa nǔ e mǐɖésúnɔ ma sixú wa ǎ é nú mǐ, amɔ̌, é nɔ ɖó nukún ɖɔ mǐ lɔ ní wa nǔ e wú mǐ kpé é. Ezekiyási yi mɔ “azaglɔ́gán tɔn lɛ́ kpó ahwanfuntɔ́ syɛ́nsyɛ́n lɛ́ kpó,” bɔ yě nɔ kpɔ́ bo wá gbeta ɔ kɔn bá “sú tɔjɔtɛn e ma ɖo toxo ɔ mɛ ǎ lɛ́ . . . Ezekiyási ná glǎglá éɖée; fí e ahohó lɛ́ mu gbɔn ɔ, é vɔ́ blóɖó; é mɛ kpe e jí è nɔ nɔ bo nɔ cɔ́ toxo ɔ lɛ́ d’é nu; énɛ́ ɔ gúdo ɔ, é mɛ ahohó ɖěvo gbɔn toxo ɔ gúdo; . . . É tun ahwanfunnú kpó gǎglónú kpó kɔn nyi kpɔ́.” (2 Tan 32:3-5) Bónú Jexóva ná dó nya xɛ ɖo togun tɔn jí bo lɛ́ kpé nukún dó yě wú ɖo hwenɛ́nu ɔ, é zán súnnu nǔwúkpétɔ́ ɖé lɛ́: Ezekiyási, axɔ́ví tɔn lɛ́, kpó gbeyíɖɔ tɔn ɖěɖěe syɛ́n ɖo gbigbɔ lixo lɛ́ é kpó.

w13 15/11 19 akpá. 13

Mɛ̌ mɛ̌ e lɛ́ wɛ ka nyí lɛ̌ngbɔ́nyitɔ́ tɛ́nwe lɛ́ kpó axɔ́ví tántɔn lɛ́ kpó ɖo égbé?

Nǔ e Ezekiyási wa bɔ d’é wú é tlɛ lɛ́ xɔ akwɛ́ hú sin lɛ́ ɖíɖó te alǒ ahohó lɛ́ vívɔ́ blóɖó. Ðó lɛ̌ngbɔ́nyitɔ́ e lɛ̌ngbɔ́ tɔn lɛ́ sín nǔ nɔ ɖu ayi mɛ n’i é wɛ n’i wútu ɔ, é xo togun ɔ kplé bo dó wǔsyɛ́n lanmɛ nú yě ɖo gbigbɔ lixo kpó xó élɔ́ lɛ́ kpó: “Mi ma ɖi xɛsi ó, ado ní ma hu mi ɖo axɔ́sú Asilíi tɔn ɔ . . . nukɔn ó. Ðó mɛ e zɔn xá mǐ lɛ́ sukpɔ́ hú mɛ e zɔn xá ɛ lɛ́. Mɛ e kpó éyɛ́ kpó zɔn lɛ́ ɔ, gbɛtɔ́ lɛ́ wɛ. Loɔ, Mawu Mavɔmavɔ wɛ nyí mɛ e kpó mǐdɛɛ lɛ́ kpó zɔn é, é wɛ ná gɔ́ alɔ nú mǐ, bó ná fun ahwan ɔ nú mǐ.” Xó énɛ́ lɛ́ dó wǔsyɛ́n lanmɛ nú mɛ kpɔ́n! Jexóva ɖésúnɔ ná fun ahwan dó togun tɔn tamɛ. “Xó énɛ́ e Judáa xɔ́sú Ezekiyási ɖɔ ɔ dó wǔsyɛ́n lanmɛ nú togun ɔ.” Ðǒ ayi wú ɖɔ ‘xó e Ezekiyási ɖɔ é’ wɛ dó wǔsyɛ́n lanmɛ nú togun ɔ. Lěe Ezekiyási, axɔ́ví tɔn lɛ́, kpó ahwanfuntɔ́ syɛ́nsyɛ́n tɔn lɛ́ kpó, gɔ́ nú gbeyíɖɔ Micée kpó Ezayíi kpó wa nǔ gbɔn é xlɛ́ ɖɔ yě nyí lɛ̌ngbɔ́nyitɔ́ téwúngbéjú lɛ́, lěe Jexóva ɖɔ gbɛn, gbɔn gbeyíɖɔ tɔn jí é.—2 Tan 32:7, 8; xa Micée 5:5, 6, nwt.

19-25 JUIN

DƆKUN MAWUXÓ Ɔ TƆN ÐÉ LƐ́ | 2 TAN 34-36

“A ka ɖo Xó Mawu tɔn sín vǐví ɖu wɛ bǐ mlɛ́mlɛ́ a?”

it-1 1152

Hulida

Hwenu e è xa “sɛ́nwéma” e vɔ̌sánúxwlémawutɔ́ ɖaxó Ilukyahu mɔ hwenu e è ɖo tɛ́npli ɔ vɔ́ jlá ɖó wɛ, bɔ Joziyási se é ɔ, é sɛ́ mɛ dó ɖɔ è ní yi kan nǔ byɔ́ Jexóva. Yě yi Hulida gɔ́n, bɔ é ɖɔ xó e Jexóva ɖɔ lɛ́ é nú yě, bo tínmɛ nú yě ɖɔ awě ɖěɖěe e xó “sɛ́nwéma” ɔ ɖɔ é ná xo togun ɔ ɖó tónúmase tɔn wú lɛ́ é bǐ wɛ ná xo akɔta gǔfɔ́ndómawujítɔ́ ɔ. Hulida lɛ́ ɖɔ gɔ́ ná ɖɔ, ɖó Joziyási sɔ́ éɖée hwe ɖo Jexóva nukɔn wútu ɔ, nukún tɔn kún ná mɔ awě énɛ́ lɛ́ ó, lé è ná yí i ɖó tɔ́gbó tɔn lɛ́ kpá, bɔ é ná yi yɔdo tɔn mɛ kpó fífá kpó.—2Ax 22:8-20; 2Ta 34:14-28.

w09 15/6 10 akpá. 20

Yǐ wǎn ɖaxó nú xwé Jexóva tɔn!

Hwenu e axɔ́sú Joziyási bló tuto bɔ è ɖo tɛ́npli ɔ vɔ́ jlá ɖó wɛ é ɔ, vɔ̌sánúxwlémawutɔ́ ɖaxó Ilukyahu “mɔ sɛ́n e Mawu Mavɔmavɔ dó gbɔn Mɔyízi jí ɔ sín wěma.” É sɔ́ jó nú wěgbójínɔtɔ́ axɔ́sú ɔ tɔn Cafáni, bɔ éyɛ́ yi xa nǔ e ɖ’é mɛ lɛ́ é nú Joziyási. (Xa 2 Tan 34:14-18.) Étɛ́ mɛ é ka tɔ́n kɔ dó? Axɔ́sú ɔ byɔ́ aluwɛ mɛ tlóló bo vún awu dó kɔ nú éɖée, lobo byɔ́ mɛ lɛ́ ɖɔ yě ní yi kan nǔ byɔ́ Jexóva. Mawu gbɔn gbeyíɖɔ nyɔ̌nu Hulida jí bo ɖɔ émí gbɛ́ wǎn nú vodúnsinsɛn e ɖo yiyi wɛ ɖo Judáa é. É ɖo mɔ̌ có, Jexóva ɖ’ayi gǎn ɖagbe e Joziyási dó bo ná ɖe vodúnsinsɛn síin lɛ́ é wú. È ɖɔ ɖ’ayǐ ɖɔ awě ná xo akɔta ɔ bǐ có, nǔ éyɛ́ tɔn ka kpo ɖo Jexóva nukúnmɛ nyɔ́ wɛ. (2 Tan 34:19-28) Étɛ́ énɛ́ ka sixú kplɔ́n mǐ? É ɖo wɛn ɖɔ jlǒ e Joziyási ɖó é wɛ mǐ lɔ ɖó. Mǐ jló ná nɔ yá wǔ wa nǔ sɔgbe xá wěɖexámɛ Jexóva tɔn lɛ́, bo ná nɔ flín nǔ e mɛ gǔfɔ́ndómawují kpó gbejímanɔ kpó cícáká xá mawusinsɛn mǐtɔn sixú tɔ́n kɔ dó lɛ́ é. Mǐ sixú kú d’é jí ɖɔ Jexóva ná ɖ’ayi akpakpa e nɔ sɔ́ mǐ dó sinsɛn mímɛ́ ɔ wú é wú, lěe é nyí gbɔn nú Joziyási é ɖɔhun.

26 JUIN–2 JUILLET

Nǔ xɔ akwɛ́ Biblu tɔn lɛ́ biba

w06 15/1 19 akpá. 1

Nǔ tají ɖěɖěe ɖo wěma Ɛsidlási tɔn mɛ lɛ́ é

1:3-6. Izlayɛ́li ví ɖěɖěe cí Babilɔ́nu é ɖé lɛ́ ɖɔhun ɔ, Kúnnuɖetɔ́ Jexóva tɔn lɛ́ gěgé tíin bo sixú wa sinsɛnzɔ́ hwebǐnu tɔn, alǒ wa sinsɛnzɔ́ ɖo fí e hudó sukpɔ́ ɖé é ǎ. É ɖo mɔ̌ có, yě nɔ nɔ gǔdo nú mɛ e kpé wú bo ɖ’é mɛ lɛ́ é bo nɔ lɛ́ dó wǔsyɛ́n lanmɛ nú yě. Yě nɔ lɛ́ ná nǔníná lɛ́ dó nɔ gǔdo nú wɛnɖagbejíjlázɔ́ ɔ kpó nǔkplɔ́nkplɔ́n mɛ lɛ́ nú yě ní húzú ahwanvú sín azɔ̌ ɔ kpó.