KLISÁNWUN GBƐ ZÍNZÁN
Ðeji dó Jexóva wú hwenu e è ba nǔɖɔ we é
Nǔɖɔbamɛtɔ́ lɛ́ sixú zɔ́n bɔ mǐ ná se wǔvɛ́ ɖo agbaza kpó lěe nǔ nɔ cí nú mǐ é kpó linu. Yě tlɛ sixú wa nǔ dó mǐ wú ɖo gbigbɔ lixo, ényí mǐ ɖi xɛsi hwenu e yě klán gbe xá mǐ é ɔ nɛ́. Nɛ̌ a ka sixú cyɔ́n alɔ hwiɖée jí sín nǔɖɔbamɛtɔ́ ɖé sí gbɔn?
Mɛsɛntɔ́ Jexóva tɔn gěgé ko kpé wú bo ɖí xwi xá nǔɖɔbamɛ gbɔn Jexóva wú gíngánjɛ gblamɛ b’ɛ kpa yě. (Ðɛ 18:18) Ði kpɔ́ndéwú ɔ, Ɛsitɛ́ɛ ɖɔ xó bo ɖe tuto e Hamáa, éé nyí nǔɖɔbamɛtɔ́ baɖabaɖa ɖé é bló lɛ́ é gba. (Ɛst 7:1-6) Cóbɔ é ná wa mɔ̌ ɔ, é blá nu dó ɖe xlɛ́ ɖɔ émí gán jɛ Jexóva wú. (Ɛst 4:14-16) Jexóva dó nú nǔ e é wa lɛ́ é bo cyɔ́n alɔ é kpó togun Tɔn kpó jí.
Mɛ wínnyáwínnyá lɛ́ è mi, ényí è ba nǔɖɔ mi hǔn, mi nɔ byɔ́ Jexóva ɖɔ é ní d’alɔ mi, mi nɔ ɖɔ xó dó tagba ɔ wú xá mɛxó e zin é ɖé, é sixú nyí xá mɛjitɔ́ mitɔn lɛ́. Mi sixú ɖeji ɖɔ Jexóva ná d’alɔ mi lěe é d’alɔ Ɛsitɛ́ɛ gbɔn é ɖɔhun. Nǔ ɖěvo tɛ́ mi ka sixú wa dó ɖu ɖo nǔɖɔbamɛ jí?
KPƆ́N VIDEO WǏNNYÁWÍNNYÁ MƐ CE: NƐ̌ UN KA SIXÚ ÐÍ XWI XÁ NǓÐƆBAMƐ GBƆN? Ɔ, ÉNƐ́ GÚDO HǓN, NǍ XÓSIN NÚ NǓKANBYƆ́ ÉLƆ́ LƐ́:
Étɛ́ kpɔ́ndéwú Charlie kpó Ferin kpó tɔn ka sixú kplɔ́n mɛ wínnyáwínnyá lɛ́?
Étɛ́ nǔ e Charlie kpó Ferin kpó ɖɔ lɛ́ é ka sixú kplɔ́n mɛjitɔ́ lɛ́ dó lěe yě sixú d’alɔ vǐ yětɔn lɛ́ bɔ yě ná ɖí xwi xá nǔɖɔbamɛ gbɔn é wú?