Izaki ɖó xwè 40 hwenu e é da Hlebeka é. É yí wǎn n’i tawun. Hwenu ɖò yiyi wɛ é ɔ, ye jì vǐ wè, bɔ ye nyí hoxo sunnu kɛɖɛ.

Mɛxo ɔ nɔ nyí Esawu, bɔ yɔkpɔvu ɔ nɔ nyí Jakɔbu. Esawu yí wǎn nú xwégbe ninɔ ǎ, bo nyɔ́ gbě nya tawun. Amɔ̌, Jakɔbu yí wǎn nú xwégbe ninɔ.

Ðò hwe ɔ nu ɔ, enyi tɔ́ ɖé kú ɔ, è nɔ na ayikúngban tɔn kpo akwɛ tɔn kpo vǐsunnuɖaxó ɔ hú mɛ ɖě lɛ. Enɛ wɛ è nɔ ylɔ ɖɔ gǔ. Ðò Izaki sín xwédo mɛ ɔ, akpá ɖěɖee Jehovah ko dó nú Ablaxamu lɛ é sín akpáxwé ɖé ɖò gǔ ɔ mɛ. Esawu keya kaka ɖé nú akpá enɛ lɛ ǎ, amɔ̌, Jakɔbu tuùn ɖɔ ye ɖò taji tawun.

Gbè ɖokpo wá sù bɔ Esawu lɛkɔ sín gbě bɔ nǔ ko cikɔ n’i tawun ɖó é nɔ gbehan ɔ mɛ tawun. É sè nùɖuɖu ɖagbe e ɖa wɛ Jakɔbu ɖè é sín wǎn bo ɖɔ n’i ɖɔ: ‘Xovɛ sìn mì! Na mì ayikún-núsúnnú towe vɔvɔ elɔ ɖě!’ Jakɔbu ɖɔ: ‘Un na na we, amɔ̌, tò d’akpá nú mì hwɛ̌ ɖɔ un na yí gǔ towe.’ Esawu ɖɔ: ‘Un ɖò nǔ ɖě na dó wà wɛ ǎ! A sixu yí. Nùɖuɖu ɔ ba wɛ un ɖè kpowun.’ A lin ɖɔ nùnywɛnú jɛn Esawu wà à? Gbeɖé kpɔ́n. Esawu sɔ́ nǔ e xɔ akwɛ tawun é ɖé jó, ɖó ayikún-núsúnnú kpowun wutu.

Hwenu e Izaki wá kpò bǐ é ɔ, hwe ɔ nu sù bɔ é na xoɖɛ nú vǐsunnuɖaxó tɔn. Amɔ̌, Hlebeka d’alɔ Jakɔbu e nyí yɔkpɔvu ɔ é bɔ éyɛ yí ɖɛ ɔ. Ee Esawu mɔ mɔ̌ é ɔ, xomɛ sìn i tawun, bɔ é kàn ayixa bo na hu nɔví tɔn. Izaki kpo Hlebeka kpo jló na nya xɛ ɖò Jakɔbu jí, enɛ wu ɔ, ye ɖɔ n’i ɖɔ: ‘Yì nɔ nylɔ towe Labáan gɔ́n, kaka jɛ hwenu e Esawu sín xomɛ na fá dó é.’ Jakɔbu ɖótó mɛjitɔ́ tɔn lɛ sín wěɖexámɛ bo hɔn dó gbɛ̀ tɔn jí.

Jehovah d’akpá nú Jakɔbu ɖɔ emi na nya xɛ ɖò jǐ tɔn lee emi ko bló gbɔn nú Ablaxamu kpo Izaki kpo é ɖɔhun. Jakɔbu sá xwé ɖó fí ɖé, bɔ è nɔ ylɔ ɖɔ Haláani; é da asì ɖò finɛ, bo ɖó xwédo ɖaxó ɖé lobo jɛ dɔkun tawun.

Jehovah wá ɖɔ nú Jakɔbu ɖɔ: ‘Lɛ̌kɔ yì mɛ towe lɛ gɔ́n.’ Enɛ wu ɔ, Jakɔbu kpo xwédo tɔn kpo wlí ali ɖido xwé. Ðò ali ɔ jí ɔ, mɛɖé lɛ wá kpé Jakɔbu bo ɖɔ n’i ɖɔ: ‘Fofó towe Esawu jǎwe, é kpo sunnu 400 kpo!’ Xɛsi ɖi Jakɔbu ɖɔ Esawu na wá hu emi kpo xwédo emitɔn kpo. É xoɖɛ sɛ́dó Jehovah ɖɔ: ‘Kɛnklɛn hwlɛn mì ɖò fofó ce sí.’ Ayihɔngbe tɔn ɔ, Jakɔbu sɛ́ lɛngbɔ̌ gègě, gbagbǎ gègě, nyibu asì gègě, lakunmi gègě kpo tócí gègě kpo dó Esawu.

Zǎn enɛ mɛ hwenu e Jakɔbu ɖò éɖokpo é ɔ, é mɔ wɛnsagun ɖé! Wɛnsagun ɔ jɛ alɔ dó xá ɛ jí. Ye dó alɔ kaka jɛ ayitéhɔnnu. Jakɔbu sín alin sɛ̀ có, é ka jó gbè ǎ. Wɛnsagun ɔ ɖɔ n’i ɖɔ: ‘Jǒ mì dó nú má yì.’ Amɔ̌, Jakɔbu ɖɔ n’i ɖɔ: ‘Eǒ, tò dó nú mì hwɛ̌.’

Wɛnsagun ɔ wá dó nú Jakɔbu. Jakɔbu wá tuùn lo ɖɔ Jehovah kún na jó Esawu dó bɔ é na hu emi ó.

Zǎnzǎn enɛ ɔ, Jakɔbu zé ta bo mɔ Esawu kpo sunnu 400 lɛ kpo sɛ́dó. Jakɔbu jɛ nukɔn nú xwédo tɔn bo ɖèkɔ́ ɖò fofó tɔn nukɔn azɔn tɛnwe. Esawu kanwezun yì kpé Jakɔbu bo zunfan ɛ lobo kplá así kɔ n’i. Nɔví nɔví wè lɛ ya avǐ bo dóhwɛ gbɔ. Nɛ̌ a ka lin ɖɔ lee Jakɔbu ɖeɖɛ ninɔmɛ enɛ gbɔn é na ko cí nú Jehovah?

Esawu wá lɛkɔ yì xwé tɔn gbè, bɔ Jakɔbu lɔmɔ̌ yì xwé elɔ tɔn gbè. Jakɔbu ɖó vǐ sunnu 12. Nyikɔ yetɔn wɛ nyí: Hwlibɛni, Sinmɛnyɔ́ɔ, Levíi, Judáa, Dan, Nɛfutalíi, Gadi, Asɛ́ɛ, Isakáa, Zabulɔ́ɔn, Jozɛfu kpo Bɛnjamɛ́ɛ kpo. Jehovah zán ɖokpo ɖò vǐ sunnu enɛ lɛ mɛ dó hwlɛn togun Tɔn, é wɛ nyí Jozɛfu. A ka tuùn lee é bló mɔ̌ gbɔn é à? Mǐ ni kpɔ́n.