Nú mɛ ɖěvo lɛ́ nɔ ɖo xó ce ɖɔ wɛ ɔ, étɛ́ un ka sixú wa?

Nǔ e wú é nɔ vɛ́ nú mɛ é

Mɛnúɖiɖɔ ɖé lɛ́ nɔ hɛn mɛ gblé, ɖi kpɔ́ndéwú ɔ, è tuun bo ɖó adingban dó wǔ we dó hɛn nyǐkɔ towe gblé. Ényí adingban ɔ ná bo ma tlɛ nyí ɖaxó ǎ ɔ, é nɔ vɛ́ nú mɛ, ɖo tají ɔ, ényí mɛ e è lin ɖɔ é nyí mɛ vǐvɛ́ mɛtɔn é ɖé wɛ ɖó ɔ nɛ́!—Ðɛhan 55:13-15.

“Un se ɖɔ xɔ́ntɔn ce ɖé nɔ ɖɔ xó ce dó gúdo ce, bo nɔ ɖɔ un kún nɔ ké ya nú mɛ ɖěvo lɛ́ ó. É vɛ́ nú mì tawun! Un mɔ nǔ jɛ nǔ e wú é ɖɔ nǔ mɔ̌hun dó wǔ ce é mɛ ǎ.”—Ashley.

Nǔgbó: Ényí mɛ e ɖo xó mɛtɔn ɖɔ wɛ é ná bo nyí xɔ́ntɔn vívɛ́ mɛtɔn alǒ gbɔ ɔ, é nɔ hwɛ́n gbeɖé ɖɔ è ní se ɖɔ mɛ ɖěvo lɛ́ ɖo nǔ nyanya lɛ́ ɖɔ dó mɛ wú wɛ ǎ.

Wɛn nyanya ɔ: A sixú gbo kpo nyi ali jí ná ǎ

Hwɛjijɔ gěgé wú wɛ mɛ lɛ́ nɔ ɖɔ xó mɛtɔn, ɖé lɛ́ ɖíe:

Nǔ mɛtɔn nɔ ɖu ayi mɛ nú yě dó nǔjɔnǔ mɛ. Mɛ mɛ wɛ gbɛtɔ́ nɔ ba ná nɔ. Énɛ́ wú ɔ, jɔwámɔnú wɛ é nyí ɖɔ mǐ ní nɔ ɖɔ xó xá mɛ ɖěvo lɛ́ bo nɔ lɛ́ ɖɔ xó dó yě wú. È ná ɖɔ ɔ, Biblu dó wǔsyɛ́n lanmɛ nú mǐ ɖɔ mǐ ní nɔ “ba ɖagbe” mɛ ɖěvo lɛ́ tɔn.—Filípunu lɛ́ 2:4.

“Xó ɖiɖɔ dó mɛ ɖěvo lɛ́ wú nɔ víví kpɔ́n!”—Bianca.

“Un ɖó ná yí gbe ɖɔ un nɔ ba ná tuun nǔ e ɖo jijɛ wɛ ɖo gbɛzán mɛ ɖěvo lɛ́ tɔn mɛ é, bo ná dó ɖɔ xó d’é wú nú mɛ ɖěvo lɛ́. Un tuun nǔ e zɔ́n é ǎ, amɔ̌, un yí wǎn ná.”—Katie.

Nǔɖé ma mɔ wa. Ðo Biblu sín táan mɛ ɔ, mɛ ɖé lɛ́ nɔ “zán gbɔjɛhwenu yětɔn nú nǔ ɖěvo zɛ xó ɖiɖɔ, alǒ xó sise dó nǔ yɔ̌yɔ́ lɛ́ wú wú ǎ.” (Mɛ 17:21) Nǔ ɖokpó ɔ wɛ é nyí égbé!

“Hweɖélɛ́nu ɔ, nú nǔ e wú mɛ lɛ́ ná ɖɔ xó dó é ma ɖe ǎ ɔ, yě nɔ tɛ́n kpɔ́n bɔ nǔɖé nɔ jɛ bónú yě ná dó sixú ɖɔ xó d’é wú.”—Joanna.

Ayimajayǐ. Hwɛjijɔ ɖagbe wú wɛ Biblu gb’akpá nú mǐ ɖɔ mǐ ní nyi alɔ nú sɔ́ e mǐ nɔ sɔ́ mǐɖée jlɛ́ dó mɛ ɖěvo lɛ́ wú é. (Galátinu lɛ́ 6:4) É blá wǔ ɖɔ mɛ ɖé lɛ́ nɔ ɖɔ xó nyanya dó mɛ ɖěvo lɛ́ wú dó ná gǎnjɛwú yěɖée.

“Hwɛhwɛ ɔ, xó nyanya e è ɖɔ dó mɛɖé wú é nɔ ɖe nǔɖé xlɛ́ dó mɛ e ɖɔ é wú. É nɔ ɖe xlɛ́ hwɛhwɛ dó mɛ e ɖo xó ɔ ɖɔ wɛ é wú ɖɔ nǔ mɛ e xó ɖɔ wɛ é ɖe é tɔn nɔ ko ɖo nukún tɔn mɛ su wɛ ɖo ayi gɔngɔn tɔn mɛ. Yě nɔ fúnfún adingbanxó lɛ́ kpé dó ná gǎnjɛwú yěɖée ɖɔ yě kpɔ́n te hú mɛ ɖě lɛ́.”—Phil.

Nǔgbó: A ba kpó a gbɔ kpó ɔ, mɛ ɖěvo lɛ́ ná nɔ ɖɔ xó dó hwi kpó mɛ ɖěvo lɛ́ kpó wú jɛ́n wɛ.

Wɛn ɖagbe ɔ: É ɖó ná zɔ́n bɔ a ná gɔn nukɔn yi ǎ

É ɖo wɛn ɖɔ a kún sixú bló bɔ mɛ lɛ́ ná gɔn xó ɖɔ dó wǔ we bǐ mlɛ́mlɛ́ ó, amɔ̌, a sixú wá gbeta lěe a ná nɔ wa nǔ gbɔn é tɔn kɔn. Ényí a se bɔ mɛ lɛ́ ɖo adingbanxó lɛ́ fúnfún kpé dó wǔ we wɛ ɔ, é hwe bǐ ɔ a sixú wa nǔ we.

NǓ 1TƆN Ɔ: Wɔn ya ná. Hwɛhwɛ ɔ, nǔ ɖagbe hú gǎn e è sixú wa é wɛ nyí ɖɔ è ní wɔn yá nú adingbanxó ɔ kpowun, ɖo tají ɔ, ényí é ma hɛn nǔ káká ɖé gblé ǎ ɔ nɛ́. Zǎn wěɖexámɛ Biblu tɔn élɔ́: “È ma nɔ yá wǔ sin xomɛ ó.”—Nǔnywɛ́tɔ́xó 7:9.

“È fúnfún adingbanxó ɖé dó wǔ ce ɖɔ un ɖo tíntɔ́n xá nyaví ɖé wɛ, un ka mɔ ɛ kpɔ́n lɔ vɔ́vɔ́ ǎ! É hwɛ́n nú mì tawun bɔ un ko nǔ.”—Elise.

“Nyǐkɔ ɖagbe ɖíɖó wɛ nyí alyannú ɖagbe hú gǎn ɔ, bo ná dó hu acɛ nú adingbanxó lɛ́. Ényí è ná bo tlɛ ɖo adingbanxó lɛ́ fúnfún kpé dó wǔ we wɛ bɔ a ka ɖó nyǐkɔ ɖagbe ɖo ta ɔ, mɛ kpɛɖé jɛ́n nɔ ɖi nǔ ná. Ðo kpaa mɛ ɔ, nǔgbó nɔ ɖu ɖ’é jí.”—Allison.

Wěɖexámɛ: Wlǎn (1) nǔ e è ɖɔ dó wǔ we é kpó (2) lěe é bló bɔ nǔ cí nú we é kpó. A yi mlɔ́ ayǐ hǔn, “kɔɖónú [towe] ní ɖɔ xó nú [we],” énɛ́ ɔ, é sixú bɔ wǔ nú we bɔ a ná jó xó dó.—Ðɛhan 4:5.

NǓ 2GƆ́ Ɔ: Yi mɔ mɛ e ɖɔ xó dó wǔ we é. Ðo ninɔmɛ ɖé lɛ́ mɛ ɔ, a sixú mɔ ɖɔ adingbanxó ɔ syɛ́n sɔmɔ̌ b’ɛ byɔ́ ɖɔ a ní ɖɔ xó xá mɛ e ɖɔ é.

“Ényí a yi mɔ mɛ e ɖó adingban dó wǔ we lɛ́ é ɔ, énɛ́ sixú zɔ́n bɔ yě ná mɔ ɖɔ nǔ e è ɖɔ dó mɛɖé wú é nɔ wá yi jɛ tó tɔn mɛ jɛ́n wɛ. Gɔ́ ná ɔ, mi ná sixú ɖɔ xó dó tagba ɔ jí, bɔ é nyɔ́ bló ɔ, mi ná ɖe ɖɛ.”—Elise.

Cóbɔ a ná yi mɔ mɛ e ɖó adingban dó wǔ we é ɖé ɔ, lin tamɛ dó nǔgbódodó Biblu tɔn élɔ́ lɛ́ jí bo kan nǔ e bɔ d’é wú lɛ́ é byɔ́ hwiɖée.

• “Mɛ e ma nɔ kú hǔn bo nɔ se xó cóbó nɔ kɛ nu d’é wú ǎ ɔ, é nɔ ɖe xlonɔ e é nyí ɔ xlɛ́.” (Nǔnywɛ́xó 18:13) ‘Un ka tuun nǔ e jɛ lɛ́ é bǐ dóó a? Mɛ e ɖɔ xó nú mì dó adingbanxó ɔ wú é ka sixú ko mɔ nǔ jɛ nǔ e é se é mɛ nyi do wɛ a?’

• “Ðo gbesisɔmɛ bo ná nɔ ɖótó mɛ, bo ná nɔ yá wǔ ɖɔ xó ǎ, lobo ná nɔ yá wǔ sin xomɛ ǎ.” (Jaki 1:19) ‘Hwenu ɖagbe hú gǎn ɔ ka ɖíe bɔ un ná yi mɔ mɛ e ɖɔ xó ɔ é a? Un ka kú d’é jí ɖɔ un kún ɖó linlin agɔ ó a? É ka ná nyɔ́ hú ɖɔ má yi agbɔ̌n jí hwɛ̌, bónú lěe nǔ cí nú mì é ní to hwíhwɛ́ wɛ a?’

• “Nǔ ɖěbǔ e mi ba ɖɔ gbɛtɔ́ lɛ́ ní wa nú mi é ɔ, mi lɔ ɖó ná wa nú yě lɔ.” (Matíe 7:12, Biblu gbɛ yɔ̌yɔ́ ɔ tɔn) ‘Nú nyi wɛ ko ɖo tɛn tɔn mɛ ɔ, nɛ̌ un ka ná ba ɖɔ é ní wa nǔ xá mì gbɔn? Ninɔmɛ tɛ́ mɛ wɛ un ka ná ba ɖɔ é ní ɖɔ xó ɔ xá mì ɖe? Xógbe tɛ́ lɛ́ é ka ná zán b’ɛ ná w’azɔ̌ hú gǎn?’

Wěɖexámɛ: Cóbɔ a ná yi mɔ mɛ e ɖɔ xó dó wǔ we é hǔn, wlǎn nǔ e a ba ná ɖɔ é. Énɛ́ gúdo hǔn, nɔ te nú aklúnɔzángbla ɖokpó abǐ we, vɔ̌ nǔ e a wlǎn lɛ́ é jí gbɔn bo kpɔ́n ɖɔ é byɔ́ ɖɔ a ní bló hǔzúhúzú ɖé a jí. Gɔ́ ná ɔ, ɖɔ xó dó tito e a bló é jí xá mɛjitɔ́ towe alǒ xɔ́ntɔn e zin é ɖé, bo byɔ́ ɛ ɖɔ é ní ɖe wě xá émí d’é wú.

Nǔgbó: Nǔ gěgé ɖɔhun ɖo gbɛ mɛ ɔ, a sixú ɖ’acɛ dó nǔ e mɛ lɛ́ ná ɖɔ dó wǔ we lɛ́ é jí hwebǐnu ǎ. Amɔ̌, énɛ́ xlɛ́ ɖɔ é ná zɔ́n bɔ a ná gɔn nukɔn yi ǎ!