Jozɛfu nyí ɖokpo ɖò vǐ sunnu Jakɔbu tɔn gudogudo tɔn lɛ mɛ. Fofó tɔn lɛ mɔ ɖɔ é wɛ tɔ́ yetɔn yí wǎn na hugǎn. Nɛ̌ a ka lin ɖɔ enɛ na ko cí nú ye? Ye nɔ hwanwǔ Jozɛfu bo gbɛ́ wǎn n’i. Ee Jozɛfu kú dlɔ̌ e è ma nɔ kú gbɔn mɔ̌ ǎ é ɖé lɛ é ɔ, é ɖɔ nú fofó tɔn lɛ. Ye lin ɖɔ dlɔ̌ enɛ lɛ xlɛ́ ɖɔ gbè ɖokpo na wá sù bɔ ye na ɖèkɔ́ n’i. Dìn ɔ, ye lɛ́ gbɛ́ wǎn n’i d’eji tawun!

Gbè ɖokpo ɔ, Jozɛfu sín nɔví lɛ ɖò lɛngbɔ̌ nyì wɛ ɖò malin-malin dó toxo Sikɛmu tɔn. Jakɔbu sɛ́ Jozɛfu dó ɖɔ é ni yì kpɔ́n lee ye ɖè gbɔn é. Ee ye mɔ Jozɛfu sɛ́dó b’ɛ ja é ɔ, ye ɖɔ ɖò yeɖée tɛntin ɖɔ: ‘Dlɔ̌kútɔ́ ɔ nɛ ja nɛ. Mi nú mǐ ni hu i!’ Ye wlí i bo sɔ́ ɛ dó dòtɔ́ e yì dò é ɖé mɛ. Amɔ̌, Judáa e nyí ɖokpo ɖò nɔví tɔn lɛ mɛ é ɖɔ: ‘Mǐ na hu i ǎ! Loɔ, mǐ na sà kannumɔ tɔn.’ Enɛ wu ɔ, ye sà Jozɛfu yí gankwɛ 20 nú ajɔ̌tɔ́ Madiáaninu ɖěɖee xwè Ejipu lɛ é.

Enɛ gudo ɔ, Jozɛfu sín fofó lɛ sɔ́ awu tɔn nylɔ́ dó gbagbǎ ɖé sín hun mɛ, bo wá sɛ́ awu ɔ dó tɔ́ yetɔn bo ɖɔ: ‘É má nyí vǐ sunnu towe sín awu ɖíe vlafo nɛ?’ Enɛ wu ɔ, Jakɔbu lin ɖɔ gběkanlin ɖé ko hu Jozɛfu. É byɔ aluwɛ mɛ bǐ. Mɛɖebǔ sixu dó gbɔ n’i ǎ.

Ðò Ejipu ɔ, è sà kannumɔ Jozɛfu tɔn nú axɔsuzɔwatɔ́ nukúnɖeji e nɔ nyí Potifáa é. Amɔ̌, Jehovah ɖò kpɔ́ xá Jozɛfu. Potifáa mɔ ɖɔ Jozɛfu nɔ wà azɔ̌ ganji, bɔ emi sixu ɖeji dó wutu tɔn. Tlolo jɛn é sɔ́ Jozɛfu ɖó nǔ e é ɖó lɛ é bǐ nu.

Potifáa sín asì ɖó ayi wu ɖɔ Jozɛfu nyɔ́ ɖɛkpɛ bo lɛ́ ɖó hlɔnhlɔn. Gbè bǐ gbè ɔ, é nɔ ɖɔ nú Jozɛfu ɖɔ é ni wá mlɔ́ ayǐ xá emi. Etɛ Jozɛfu ka na wà? É gbɛ́ bo ɖɔ: ‘Eǒ! Nǔ enɛ sɔgbe ǎ. Gǎn ce ɖeji dó wutu ce, asì tɔn wɛ hwɛ ka nyí. Enyi un mlɔ́ ayǐ xá we ɔ, un na hu hwɛ dó Mawu!’

Gbè ɖokpo ɔ, Potifáa sín asì tɛnkpɔn bo na hɛn Jozɛfu gannugánnú b’ɛ na mlɔ́ ayǐ xá ɛ. É hɛn awu Jozɛfu tɔn, amɔ̌, é hɔn ɖido. Ee Potifáa wá xwégbe é ɔ, asì tɔn ɖɔ n’i ɖɔ Jozɛfu tɔ́ dó emi wu. Adingban ɖó wɛ é ka ɖè. Xomɛ sìn Potifáa kaka bɔ é wlí Jozɛfu dó gankpa mɛ. Amɔ̌, Jehovah wɔn Jozɛfu ǎ.

Hwenu e Jozɛfu ɖò gankpa mɛ é ɔ, Falawɔ́ɔn axɔsu Ejipu tɔn ɔ kú dlɔ̌ ɖé lɛ bɔ mɛ ɖě sixu tinmɛ ǎ. Mɛsɛntɔ́ Falawɔ́ɔn tɔn lɛ ɖokpo ɖɔ n’i ɖɔ Jozɛfu sixu ɖɔ tinmɛ dlɔ̌ tɔn lɛ tɔn n’i. Falawɔ́ɔn sɛ́ mɛ dó tlolo ɖɔ è ni kplá Jozɛfu wá.

Falawɔ́ɔn kanbyɔ ɛ ɖɔ: ‘A ka sixu tín dlɔ̌ ce lɛ mɛ à?’ Jozɛfu ɖɔ nú Falawɔ́ɔn ɖɔ: ‘Ejipu na ɖó nùɖuɖu gègě nú xwè tɛnwe, bɔ xwè tɛnwe e na bɔ d’ewu lɛ é mɛ ɔ, adɔ na tɔ́n ɖò tò ɔ mɛ. Sɔ́ nùnywɛtɔ́ ɖokpo bonu é na xò nùɖuɖu kplé, enɛ ɔ, togun towe na kú adɔ ǎ.’ Falawɔ́ɔn yí gbè ɖɔ: ‘Hwi wɛ un sɔ́! A na nyí mɛ nukúnɖeji wegɔ ɔ ɖò Ejipu!’ Nɛ̌ Jozɛfu ka wà gbɔn bo tuùn tinmɛ Falawɔ́ɔn sín dlɔ̌ lɛ tɔn? Jehovah wɛ d’alɔ ɛ.

Ðò xwè tɛnwe nukɔntɔn lɛ mɛ ɔ, Jozɛfu xò nùɖuɖu kplé. Enɛ gudo ɔ, adɔ wá tɔ́n ɖò ayikúngban ɔ bǐ jí, lee Jozɛfu ko ɖɔ gbɔn é. Gbɛtɔ́ lɛ nɔ gosin fí lɛ bǐ bo nɔ wá xɔ nùɖuɖu ɖò Jozɛfu gɔ́n. Tɔ́ tɔn Jakɔbu sè ɖɔ nùɖuɖu ɖò Ejipu, enɛ wu ɔ, é sɛ́ vǐ tɔn lɛ wǒ dó ɖɔ ye ni yì xɔ nùɖuɖu kpɛɖé wá.

Jakɔbu sín vǐ lɛ yì Jozɛfu gɔ́n. Tlolo jɛn é tuùn ye. Amɔ̌, nɔví Jozɛfu tɔn lɛ ka tuùn ɖɔ é wɛ ǎ. Ye ɖèkɔ́ n’i lee é ko kú dlɔ̌ tɔn gbɔn hwenu e é ɖò winnyawinnya mɛ é é. Jozɛfu ba na tuùn nú nɔví tɔn lɛ kpó ɖò wǎn gbɛ́ nú mɛ wɛ à jí. Enɛ wu ɔ, é ɖɔ nú ye ɖɔ: ‘Nǔdobatɔ́ wɛ mi nyí. Fí e tò mǐtɔn vɔ́da ɖè lɛ é kpɔ́n gbé wɛ mi tɔ́n.’ Ye ɖɔ: ‘Eǒ! Nɔví nɔví 12 wɛ nú mǐ bɔ mǐ nɔ nɔ Kanáa. Nɔví mǐtɔn ɖokpo ko kú, bɔ kpodé ɔ ɖò tɔ́ mǐtɔn gɔ́n.’ Enɛ gudo ɔ, Jozɛfu ɖɔ: ‘Mi kplá nɔví mitɔn kpodé ɔ wá nú mì, enɛ ɔ, un na ɖi xó e ɖɔ wɛ mi ɖè é.’ Enɛ wu ɔ, ye lɛkɔ yì xwé tɔ́ yetɔn gɔ́n.

Ee nùɖuɖu lɛ́ vɔ dó xwédo ɔ é ɔ, Jakɔbu lɛ́ sɛ́ vǐ tɔn lɛ dó Ejipu. Ee ye xweyigbe dìn tɔn ɔ é ɔ, ye kplá nɔví yetɔn kpodé ee nɔ nyí Bɛnjamɛ́ɛ é. Jozɛfu jló na tɛ́n nɔví tɔn lɛ kpɔ́n bo zé kɔfu tɔn e è sɔ́ kpatagan dó bló é dó Bɛnjamɛ́ɛ sín ati mɛ, bɔ enɛ gudo ɔ, é dóhwɛ nɔví tɔn lɛ ɖɔ fin wɛ ye fin. Hwenu e mɛsɛntɔ́ Jozɛfu tɔn lɛ mɔ kɔfu ɔ ɖò Bɛnjamɛ́ɛ sín ati mɛ é ɔ, é cí kliwun nú Jozɛfu sín nɔví lɛ. Ye savo nú Jozɛfu ɖɔ é ni dɔn tó nú emi ɖó Bɛnjamɛ́ɛ sín tɛnmɛ.

Dìn ɔ, Jozɛfu tuùn ɖɔ nɔví emitɔn lɛ ko huzu jijɔ. É sɔ́ sixu hwla lee nǔ cí n’i é ɖě ǎ. É wlí avǐ bo ɖɔ: ‘Nyɛ Jozɛfu nɔví mitɔn wɛ. Tɔ́ ce ka kpó ɖò gbɛ̀ à?’ É kpaca nɔví tɔn lɛ tawun. É ɖɔ nú ye ɖɔ: ‘Nǔ e mi wà nú mì é ni ma vɛ́ nú mi ó. Mawu wɛ sɛ́ mì dó fí bo na dó hwlɛn gbɛ̀ mitɔn. Dìn ɔ, mi yawu yì kplá tɔ́ ce wá fí.’

Ye lɛkɔ yì xwé bo dó wɛnɖagbe ɔ nú tɔ́ yetɔn bo kplá ɛ wá Ejipu. Ðò xwè tobutobu enɛ lɛ gudo ɔ, Jozɛfu kpo tɔ́ tɔn kpo lɛ́vɔ wá nɔ kpɔ́.