D’AFƆ NÚ JLǑ E MƐ Ɔ ÐÓ É
NǓKPLƆ́NKPLƆ́N 7
Nɔ ɖó kan dó nǔ wú
Nǔgbódodó: ‘Yě nɔ ɖo nǔ kplɔ́n mɛ wɛ, bo nɔ ɖo wɛn ɖagbe ɔ jlá wɛ magbokɔ.’—Mɛ. 5:42.
Nǔ e Pɔ́lu wa é
1. Kpɔ́n VIDEO ɔ, alǒ xa Mɛsɛ́dó 19:8-10. Énɛ́ gúdo hǔn, lin tamɛ dó nǔkanbyɔ́ élɔ́ lɛ́ jí:
Ée mɛɖé lɛ́ klán gbe xá Pɔ́lu é ɔ, é jó gbe ǎ; nɛ̌ é ka ɖó kan dó nǔ wú bo d’alɔ mɛ ɖěɖěe xlɛ́ ɖɔ émí ɖó jlǒ lɛ́ é gbɔn?
Azɔn nabí Pɔ́lu ka lɛ́ kɔ yi mɛ énɛ́ lɛ́ e ɖó jlǒ é gɔ́n? Táan nabí é ka wa mɔ̌ ná?
Étɛ́ kpɔ́ndéwú Pɔ́lu tɔn ka sixú kplɔ́n mǐ?
2. É nɔ byɔ́ hwenu kpó gǎndídó kpó cóbɔ mǐ ná nɔ ba mɛ lɛ́ kpɔ́n bo ná wá kpé wú bo jɛ Biblu kplɔ́n xá yě jí.
Xwedó kpɔ́ndéwú Pɔ́lu tɔn
3. Hǔzú tuto towe sɔgbe xá mɛ ɔ tɔn. Kanbyɔ́ hwiɖée ɖɔ: ‘Hwetɛ́nu é ka ná ba hú gǎn ɖɔ mǐ ní nɔ ɖɔ xó ɖó kpɔ́? Ðo fítɛ́?’ Ényí hwenu e é ɖɔ é ná bo ma tlɛ nyɔ́ nú hwɛ ǎ hǔn, ɖo gbesisɔmɛ bá d’afɔ nú jlǒ e é ɖó é.
4. Nɔ kan hwenu e mi ná lɛ́ ɖɔ xó ɖó kpɔ́ é byɔ́. Ðo xóɖɔɖókpɔ́ ɖokpó ɖokpó sín vivɔnu hǔn, nɔ tɛ́n kpɔ́n bo nɔ tuun hwenu e a ná lɛ́ ɖɔ xó xá mɛ ɔ é. Tɛ́n kpɔ́n bo ma gɔn ó.
5. Nɔ ɖó nukúnɖíɖó. Ma nɔ yá wǔ ɖɔ ɖɔ mɛ e ɖokpó ɖé vlafo wɛ è nɔ mɔ ɛ ɖo xwégbe, alǒ alɔnu tɔn nɔ ján hwɛhwɛ é kún ɖó jlǒ ó ó. (1 Kɔ. 13:4, 7) Kpo ɖo tíntɛ́nkpɔ́n wɛ bá nɔ yi ba ɛ kpɔ́n, amɔ̌, nɔ zán hwenu towe kpó nǔnywɛ́ kpó.—1 Kɔ. 9:26.