D’AFƆ NÚ JLǑ E MƐ Ɔ ÐÓ É
NǓKPLƆ́NKPLƆ́N 9
Nɔ se wǔvɛ́ xá mɛ
Nǔgbódodó: “Mi ní nɔ j’awǎ xá mɛ e ɖo awǎ jɛ wɛ lɛ́ é; mi ní nɔ y’avǐ xá mɛ e ɖo avǐ ya wɛ lɛ́ é.”—Hlɔ̌. 12:15.
Nǔ e Jezu wa é
1. Kpɔ́n VIDEO ɔ, alǒ xa Maki 6:30-34. Énɛ́ gúdo hǔn, lin tamɛ dó nǔkanbyɔ́ élɔ́ lɛ́ jí:
Étɛ́wú Jezu kpó mɛsɛ́dó tɔn lɛ́ kpó ka ba ná “nɔ yěɖokpó”?
Étɛ́ ka sísɛ́ Jezu bɔ é kplɔ́n nǔ ahwan ɔ?
Étɛ́ kpɔ́ndéwú Jezu tɔn ka sixú kplɔ́n mǐ?
2. Wǔvɛ́sexámɛ nɔ sísɛ́ mǐ bɔ mǐ nɔ ké ya nú mɛ lɛ́, mǐ nɔ sɔ́ ayi ɖó wɛn mǐtɔn kɛ́ɖɛ́ jí ǎ.
Xwedó kpɔ́ndéwú Jezu tɔn
3. Nɔ xwe sɔ bo nɔ ɖótó mɛ. Jǒ mɛ ɔ dó nú é ní ɖɔ linlin tɔn. Ma gbo xó dó nu n’i, alǒ wɔn ya nú lěe nǔ cí n’i é, linkpɔ́n tɔn lɛ́, alǒ nǔ e wú é gbɛ́ xó ɔ é kpowun ó. Nú a xwe sɔ bo ɖótó è ɔ, é ná xlɛ́ ɛ ɖɔ nǔ e lin wɛ é ɖe é ɖu ayi mɛ nú we.
4. Nɔ lin tamɛ dó mɛ e xlɛ́ ɖɔ émí ɖó jlǒ é jí. Zɔn dó xó e mi ɖɔ ɖó kpɔ́ lɛ́ é jí, bo kanbyɔ́ hwiɖée ɖɔ:
‘Étɛ́wú é ka ɖó ná se nǔgbó ɔ sín xó?’
‘Nɛ̌ Biblu kplɔ́nkplɔ́n ka ná bló bɔ gbɛzán tɔn gbe bǐ gbe tɔn kpó sɔgúdo tɔn kpó ná kpɔ́n te hú gǎn gbɔn?’
5. Mǎ nǔ e ná sú hudó tɔn lɛ́ sín do é xá ɛ. Yǎ wǔ xlɛ́ ɛ lěe Biblu kplɔ́nkplɔ́n sixú d’alɔ ɛ b’ɛ ná mɔ nǔkanbyɔ́ tɔn lɛ́ sín xósin gbɔn é kpó lěe é sixú lɛ́ d’alɔ ɛ ɖo ali tawun tawun ɖé lɛ́ nu gbɔn é kpó.