Jehovah ɖɔ nú Mɔyizi ɖɔ: ‘Sɛ̀ wá akpá ce ɖò só ɔ jí. Un na wlan sɛ́n ce lɛ dó awinnyatɛ jí bo na bɛ́ nú we.’ Mɔyizi yì só ɔ jí bo nɔ finɛ nú kéze 40, zǎn 40. Hwenu e é ɖò finɛ é ɔ, Jehovah wlan Sɛ́n Wǒ Lɛ dó awinnyatɛ wè jí bo fɔ ye n’i.

Táan ɖé gudo ɔ, Izlayɛli-ví lɛ lin ɖɔ Mɔyizi ko jó emi dó. Ye ɖɔ nú Aalɔ́ɔn ɖɔ: ‘Mǐ jló ɖɔ mɛɖé ni nɔ nukɔn nú mǐ. Blǒ vodun ɖokpo nú mǐ!’ Aalɔ́ɔn ɖɔ nú ye ɖɔ: ‘Mi bɛ́ siká mitɔn lɛ wá nú mì.’ É sínsín siká lɛ bo dó bló nyibuví ɖé na. Togun ɔ ɖɔ: ‘Nyibuví elɔ wɛ nyí Mawu mǐtɔn e kplá mǐ sín Ejipu é!’ Ye jɛ siká nyibuví ɔ sɛ̀n jí bo ɖu xwè ɖaxó ɖé. Nǔ enɛ ka nyla wɛ à? Ɛɛn, ɖó togun ɔ ko d’akpá ɖɔ Jehovah kɛɖɛ wɛ emi na sɛ̀n. Amɔ̌ dìn ɔ, ye sɔ́ ɖè akpá enɛ ǎ.

Jehovah mɔ nǔ e ɖò jijɛ wɛ é bo ɖɔ nú Mɔyizi ɖɔ: ‘Jɛte yì togun ɔ gɔ́n. Ye tlitó nú mì bo ɖò vodun sɛ̀n wɛ.’ Mɔyizi jɛte sín só ɔ jí bo hɛn awinnyatɛ wè lɛ alɔ mɛ.

Ee Mɔyizi ɖò sisɛkpɔ fí e ye ɖó gɔnu ɖó é wɛ é ɔ, é sè bɔ togun ɔ ɖò han jì wɛ. É lɛ́ mɔ bɔ ye ɖò wè ɖú wɛ bo ɖò kɔ ɖè nú nyibuví ɔ wɛ. Mɔyizi sìn xomɛ tawun. É nyì awinnyatɛ wè lɛ dó kɔ́mɛ bɔ ye gbà hánnyá. É gbà bocyɔ ɔ tlolo. Enɛ gudo ɔ, é kanbyɔ Aalɔ́ɔn ɖɔ: ‘Nɛ̌ togun ɔ ka dó cɔcɔ nú we sɔ, bɔ a wà nǔ baɖabaɖa elɔ?’ Aalɔ́ɔn ɖɔ: ‘Ma sìn xomɛ ó. A tuùn lee togun elɔ cí é. Vodun ɖokpo ba wɛ ye ɖè, enɛ wu ɔ, un bɛ́ siká yetɔn lɛ dó myɔ mɛ bo bló nyibuví elɔ na!’ Aalɔ́ɔn ɖó na ko bló mɔ̌ ǎ. Mɔyizi lɛkɔ yì só ɔ jí bo savo nú Jehovah ɖɔ é ni sɔ́ hwɛ kɛ togun ɔ.

Jehovah nɔ sɔ́ hwɛ kɛ mɛ ɖěɖee nɔ setónú n’i kpo jlǒ kpo lɛ é. A ka mɔ lee é nyí nùjɔnǔ nú Izlayɛli-ví lɛ sɔ, ɖɔ ye ni xwedó alixlɛ́mɛ Mɔyizi tɔn é à?

Hwenu e Mɔyizi ɖò Sinayíi Só ɔ jí é ɔ, Jehovah ɖɔ n’i ɖɔ é ni bló Goxɔ bunɔ ɖé bonu Izlayɛli-ví lɛ na nɔ sɛ̀n emi ɖò finɛ. Ye na bló ɖó alɔkpa ɖé bo hɛn ɔ ye na nɔ sɛ̀ tɛn na.

Jehovah ɖɔ: ‘Ðɔ nú togun ɔ nú ye ni na nǔ e sixu d’alɔ bɔ è na gbá Goxɔ ɔ lɛ é.’ Izlayɛli-ví lɛ na siká, kpatagan, ganvɔ, awinnya ɖagbeɖagbe lɛ kpo jɛ̌ xɔ akwɛ lɛ kpo. Ye lɛ́ na kanlinfúnvɔ lɛ, lɛ̌ɛnkanvɔ lɛ, kanlinnyú lɛ kpo nǔ gègě ɖevo lɛ kpo. Ye hun alɔ bo na nǔ kaka bɔ Mɔyizi ɖɔ nú ye ɖɔ: ‘É ko kpé! Mi ma sɔ́ hɛn nǔ ɖě wá ó.’

Sunnu kpo nyɔnu kpo ɖěɖee tuùn azɔ̌ ganji lɛ é gègě d’alɔ bonu è na gbá Goxɔ ɔ. Jehovah na nùnywɛ ye bɔ ye na dó wà azɔ̌ ɔ. Mɛɖé lɛ nɔ lɔn avɔ, nɔ tɔ̀ avɔ, alǒ kó nǔ. Mɛ ɖevo lɛ nɔ kpa awinnya, kɔn siká alǒ nɔ kpa atín bo nɔ ɖè nǔ d’emɛ.

Mɛ lɛ bló Goxɔ ɔ lee Jehovah ɖɔ nú ye gbɔn é pɛ́pɛ́pɛ́. Ye gbò Goxɔ ɔ mɛ ɖó wè kpo xɔmɛgbovɔ ɖagbeɖagbe ɖé kpo, akpáxwé ɖokpo nyí Fí Mímɛ́ ɔ, bɔ ɖevo nyí Fí Mímɛ́ Bǐ ɔ. Akɔjijɛgba e è sɔ́ akasyatín kpo siká kpo dó bló na é ɖò Fí Mímɛ́ Bǐ ɔ mɛ. Zogbɛ́nhɛnnú e è sɔ́ siká dó bló é ɖokpo, tavo ɖokpo kpo vɔsakpe e jí è na nɔ dó zalinkpɔ́n zo ɖè é ɖokpo kpo ɖò Fí Mímɛ́ ɔ mɛ. Ðò Goxɔ ɔ sín kɔxota ɔ, ganvɔzɛ́n ɖé kpo vɔsakpe ɖaxó ɖé kpo ɖò finɛ. Akɔjijɛgba ɔ nɔ flín akpá e Izlayɛli-ví lɛ dó bo na setónú nú Jehovah é ye. A ka tuùn nǔ e akɔjijɛ ɖé nyí é à? Akpá bunɔ ɖé wɛ.

Jehovah sɔ́ Aalɔ́ɔn kpo vǐ sunnu tɔn lɛ kpo bɔ ye na wà vɔsanúxwlémawutɔ́zɔ́ ɖò Goxɔ ɔ mɛ. Ye ɖó na wlíbò nú Goxɔ ɔ bo na nɔ xwlé vɔsanú lɛ Jehovah ɖò finɛ. Aalɔ́ɔn e nyí vɔsanúxwlémawutɔ́ ɖaxó ɔ é kɛɖɛ wɛ è na gbè bɔ é na nɔ byɔ Fí Mímɛ́ Bǐ ɔ. É nɔ bló mɔ̌ ɖokpo ɖò xwè ɖokpo mɛ bo nɔ savɔ̌ ɖé dó hwɛhuhu éɖesunɔ tɔn lɛ, hwɛhuhu xwédo tɔn tɔn lɛ kpo hwɛhuhu akɔta Izlayɛli tɔn ɔ bǐ kpo tamɛ.

Izlayɛli-ví lɛ gosin Ejipu bɔ é bló xwè ɖokpo gudo é ɔ, ye fó Goxɔgbigbázɔ́ ɔ. Dìn ɔ, ye ɖó nɔtɛn ɖé bo na nɔ sɛ̀n Jehovah ɖ’emɛ.

Jehovah bló bɔ susu tɔn gɔ́ Goxɔ ɔ mɛ, bɔ akpɔ́kpɔ́ ɖé cyɔn Goxɔ ɔ. Hweɖebǔnu e akpɔ́kpɔ́ ɔ ɖò Goxɔ ɔ ta é ɔ, Izlayɛli-ví lɛ nɔ cí fí e ye ɖè é. Amɔ̌, nú akpɔ́kpɔ́ ɔ gosin ɔ, ye nɔ tuùn ɖɔ hwenu sù bɔ emi na sɛ̀ tɛn. Ye nɔ tún Goxɔ ɔ bo nɔ xwedó akpɔ́kpɔ́ ɔ.