Izlayɛli-ví lɛ gosin Sinayíi Só ɔ kɔn bo gbɔn gbetótló Palani tɔn mɛ bo yì fí e è nɔ ylɔ ɖɔ Kadɛci é. Jehovah ɖɔ nú Mɔyizi ɖò finɛ ɖɔ: ‘Sɛ́ sunnu 12 dó, mɛ ɖokpo sín akɔta ɖokpo mɛ, bonu ye ni yì ba dò nú Kanáa yikúngban e na na Izlayɛli-ví lɛ wɛ un ɖè é kpɔ́n.’ Enɛ wu ɔ, Mɔyizi cyan sunnu 12 bo ɖɔ nú ye ɖɔ: ‘Mi yì ba dò nú Kanáa yikúngban ɔ bo kpɔ́n ɖɔ é nyí ayikúngban ɖagbe bo na nyɔ́ jinukún à jí. Mi kpɔ́n ɖɔ togun ɔ vɔ́ alǒ ɖó hlɔnhlɔn wɛ à jí, bo kpɔ́n ɖɔ goxɔ mɛ wɛ ye nɔ nɔ à alǒ toxo wɛ ye ɖó à jí.’ Jozuwée kpo Kalɛbu kpo ɖò amɛ̌ 12 lɛ mɛ, bɔ ye ɖido Kanáa.

Azǎn 40 gudo ɔ, amɛ̌ lɛ lɛkɔ wá bo hɛn fígi, glenádi kpo vǐwun sínsɛ́n kpo. Amɛ̌ lɛ ɖó gbè bo ɖɔ: ‘Tò ɖagbe wɛ, loɔ, gbɛtɔ́ lɛ ɖó hlɔnhlɔn bɔ ahohó lɛ lɛlɛ̌ dó toxo ɔ.’ Enɛ gudo ɔ, Kalɛbu ɖɔ: ‘Mǐ hɛn ɔ, mǐ na ɖu ɖò ye jí. Mi nú mǐ ni yì azɔn ɖokpo!’ A ka tuùn nǔ e wu Kalɛbu ɖɔ mɔ̌ é à? Ðó é kpo Jozuwée kpo ɖeji dó Jehovah wu wutu wɛ. Amɔ̌, amɛ̌ wǒ ɖě lɛ ɖɔ: ‘Eǒ! Gbɛtɔ́ e ɖò finɛ lɛ é d’agba, bo cí mɛ jiganjigan lɛ ɖɔhun! Ayǐsízɛn lɛ ɖɔhun wɛ mǐ cí ɖò akpá yetɔn.’

Awakanmɛ kú Izlayɛli-ví lɛ. Ye jɛ nǔ hunhún ɖɔ jí bo jɛ ɖiɖɔ nú yeɖée jí ɖɔ: ‘Mi nú mǐ ni sɔ́ gǎn ɖevo bo lɛkɔ yì Ejipu. Etɛwu mǐ ka na yì fí enɛ bɔ è na hu mǐ?’ Jozuwée kpo Kalɛbu kpo ɖɔ: ‘Mi ma tlitó nú Jehovah ó, mi ma ɖi xɛsi ó. Jehovah na cyɔn alɔ mǐ jí.’ Amɔ̌, Izlayɛli-ví lɛ ka ɖótó ye ǎ. Ye tlɛ ba na hu Jozuwée kpo Kalɛbu kpo!

Etɛ Jehovah ka bló? É ɖɔ nú Mɔyizi ɖɔ: ‘Nǔ tobutobu e un ko bló nú Izlayɛli-ví lɛ é nɛ, có ye kpó ɖò tó tlí nú mì wɛ. Enɛ wu ɔ, ye na nɔ gbetótló mɛ nú xwè 40 bo na kú dó fí. Vǐ yetɔn lɛ, gɔ́ nú Jozuwée kpo Kalɛbu kpo kɛɖɛ wɛ na nɔ ayikúngban e sín akpá un dó nú ye é jí.’

Izlayɛli-ví lɛ ɖò gbetótló mɛ bɔ é ɖó táan ɖé é ɔ, Kolée, Datani, Abilamu kpo mɛ 250 ɖevo lɛ kpo fɔ́n gǔ dó Mɔyizi jí. Ye ɖɔ n’i ɖɔ: ‘Agbɔ̌n towe ko kpé mǐ! Etɛwu a ka na ɖò mǐ nu, bɔ Aalɔ́ɔn ka na nyí vɔsanúxwlémawutɔ́ ɖaxó ɔ? Jehovah ɖò kpɔ́ kpo mǐ mɛ bǐ kpo, é nyí hwi kpo Aalɔ́ɔn kpo kɛɖɛ ǎ.’ Nǔ e ye ɖɔ é nyɔ́ Jehovah nukúnmɛ ǎ. É mɔ ɖɔ emilɛ jí wɛ ye fɔ́n gǔ dó!

Mɔyizi ɖɔ nú Kolée kpo ahwan tɔn lɛ kpo ɖɔ: ‘Mi wá Goxɔ ɔ nukɔn sɔ, bo hɛn zalinkpɔ́nfyɔ́nú bonu zalinkpɔ́n ni ɖ’emɛ. Jehovah na xlɛ́ mɛ e é sɔ́ é mǐ.’

Ayihɔngbe tɔn ɔ, Kolée kpo sunnu 250 lɛ kpo yì gɔ́ nú Mɔyizi ɖò Goxɔ ɔ kɔn. Ye dó zalinkpɔ́n zo vɔsanúxwlémawutɔ́ wɛ nú ye ɖɔhun. Jehovah ɖɔ nú Mɔyizi kpo Aalɔ́ɔn kpo ɖɔ: ‘Mi ɖè miɖée ɖó vo nú Kolée kpo ahwan tɔn lɛ kpo.’

Kolée yì Mɔyizi gɔ́n ɖò Goxɔ ɔ kɔn, amɔ̌, Datani, Abilamu kpo xwédo yetɔn kpo gbɛ́ ɖɔ emi kún na yì ó. Jehovah ɖɔ nú Izlayɛli-ví lɛ ɖɔ ye ni nɔ zɔ nú goxɔ Kolée, Datani kpo Abilamu kpo tɔn. Tlolo jɛn Izlayɛli-ví lɛ sɛ̀ dó zɔ. Datani, Abilamu kpo xwédo yetɔn lɛ kpo nɔte ɖò goxɔ yetɔn lɛ sín ali nu. Ajijimɛ ɔ, ayikúngban kɛnu bo mì ye! Myɔ ɖé jɛte wá Goxɔ ɔ kɔn bo fyɔ Kolée kpo sunnu 250 lɛ kpo.

Jehovah ɖɔ nú Mɔyizi ɖɔ: ‘Yǐ kpò ɖokpo ɖò gǎn akɔta ɖokpo ɖokpo tɔn sí, bo wlan nyikɔ ye mɛ ɖokpo ɖokpo tɔn d’ewu. Amɔ̌, akɔta Levíi tɔn sín kpò ɔ, nyikɔ Aalɔ́ɔn tɔn wɛ a na wlan d’ewu. Bɛ̌ kpò lɛ dó Goxɔ ɔ mɛ, mɛ e sín kpò na tɔ́n kun é wɛ nyí mɛ e un sɔ́ é.’

Ayihɔngbe tɔn ɔ, Mɔyizi bɛ́ kpò lɛ tɔ́n bo xlɛ́ akɔta lɛ sín gǎn lɛ. Aalɔ́ɔn sín kpò tɔ́n kun, gbà sɛ́ bo lɛ́ sɛ́n. Mɔ̌ mɛ ɔ, Jehovah dó zǒ gbè jí ɖɔ Aalɔ́ɔn wɛ emi sɔ́ b’ɛ na nyí vɔsanúxwlémawutɔ́ ɖaxó.