Hwenu e amɛ̌ Izlayɛli tɔn lɛ yì toxo Jeliko tɔn mɛ é ɔ, ye nɔ nyɔnu e nɔ nyí Hlaxabu é sín xwégbe. Axɔsu Jeliko tɔn sè mɔ̌, bo sɛ́ sɔja lɛ dó xwé Hlaxabu tɔn gbè. Hlaxabu hwla amɛ̌ wè lɛ dó xɔ tɔn ta bo sɛ́ sɔja lɛ dó awa ɖevo xwé. É ɖɔ nú amɛ̌ lɛ ɖɔ: ‘Un na d’alɔ mi ɖó un tuùn ɖɔ Jehovah ɖò kpɔ́ xá mi bɔ mi na ɖu ɖò tò ɔ jí. Mi kɛnklɛn bo d’akpá nú mì ɖɔ emi na hwlɛn xwédo ce.’

Amɛ̌ lɛ ɖɔ nú Hlaxabu ɖɔ: ‘Mǐ d’akpá ɖɔ mǐ kún na hu mɛ e ɖò xwé towe gbè lɛ é ɖebǔ ó.’ Ye ɖɔ: ‘Sìn kàn vɔvɔ ɖokpo dó flɛtɛli towe nu, enɛ ɔ, xwédo towe na gán.’

Hlaxabu sìn kàn ɖé dó flɛtɛli tɔn nu bɔ amɛ̌ lɛ gbɔn finɛ bo jɛte. Ye yì sókan lɛ mɛ bo hwla yeɖée dó finɛ nú azǎn atɔn cobo wá yì Jozuwée gɔ́n. Enɛ gudo ɔ, Izlayɛli-ví lɛ d’asa Judɛɛn Tɔ̀ ɔ bo sɔnǔ bo na yí tò ɔ. Jeliko wɛ nyí toxo nukɔntɔn e jí ye ɖu ɖè é. Jehovah ɖɔ nú ye ɖɔ ye ni ɖi zɔnlin lɛlɛ̌ dó toxo ɔ azɔn ɖokpo ɖò gbè ɖokpo kaka nú azǎn ayizɛ́n. Azǎn tɛnwegɔ ɔ gbè ɔ, ye ɖi zɔnlin lɛlɛ̌ dó toxo ɔ azɔn tɛnwe. Enɛ gudo ɔ, vɔsanúxwlémawutɔ́ lɛ kún kpɛn yetɔn lɛ bɔ ahwanfuntɔ́ lɛ súxó kpo hlɔnhlɔn yetɔn bǐ kpo. Toxo ɔ sín dǒ lɛ mu! Amɔ̌, xwé Hlaxabu tɔn e ɖò dǒ ɔ ta é ka kpó ɖò te. Hlaxabu kpo xwédo tɔn kpo gán ɖó é ɖeji dó Jehovah wu wutu.

Nǔ e jɛ ɖò Jeliko lɛ é sín wɛn gbakpé akɔta ɖevo lɛ mɛ ɖò Kanáa. Axɔsu yetɔn lɛ wá gbeta ɔ kɔn bo na zɔn kpɔ́ bo wá fun ahwan xá Izlayɛli-ví lɛ. Amɔ̌, Gabawɔ́ɔnnu lɛ kàn ayixa ɖevo. Ye dó awu vúnvún lɛ bo wá Jozuwée gɔ́n bo ɖɔ: ‘Tò e lín é ɖé mɛ wɛ mǐ gosin. Mǐ sè xó dó Jehovah kpo nǔ ɖěɖee é bló nú mi ɖò Ejipu kpo Mɔwabu kpo lɛ é bǐ wu. D’akpá ɖɔ emi kún na tɔ́n ahwan mǐ ó, enɛ ɔ, mǐ na huzu mɛsɛntɔ́ towe lɛ.’

Jozuwée ɖi nǔ nú ye bo yí gbè ɖɔ emi kún na tɔ́n ahwan ye ó. Azǎn atɔn gudo ɔ, é wá mɔ ɖɔ ye kún gosin tò línlín ɖé mɛ ó. Kanáa wɛ ye gosin. Jozuwée kanbyɔ Gabawɔ́ɔnnu lɛ ɖɔ: ‘Etɛwu mi ka ɖó adingban nú mǐ?’ Ye yí gbè n’i ɖɔ: ‘Xɛsi wɛ ɖi mǐ! Mǐ tuùn ɖɔ Jehovah Mawu mitɔn ɖò ahwan fun dó ta mitɔn mɛ wɛ. Kɛnklɛn bo ma hu mǐ ó.’ Jozuwée ɖè akpá e é dó é bo jó ye dó nyì gbɛ̀.

É sɔ́ lín ǎ bɔ axɔsu Kanáa tɔn atɔ́ɔ́n kpo ahwangɔnu yetɔn lɛ kpo gblɔ́n adǎn ɖɔ emi na tɔ́n ahwan Gabawɔ́ɔnnu lɛ. Jozuwée kpo ahwangɔnu tɔn kpo ɖi zɔnlin ɖò zǎn ɔ bǐ mɛ bo na yì hwlɛn Gabawɔ́ɔnnu lɛ. Ahwanfunfun ɔ bɛ́ ayihɔngbe tɔn zǎnzǎn tɛɛn. Kanáanu lɛ jɛ hinhɔn gbɔn fí lɛ bǐ jí. Ye hɔn yì fí ɖebǔ ɔ, Jehovah nɔ sɛ́ kɛ́njí kloklo ɖé dó bɔ é nɔ xò ye. Enɛ gudo ɔ, Jozuwée byɔ Jehovah ɖɔ é ni bló bonu hwe ɔ ni nɔte xwii. Hwe ko nɔte mɔ̌ kpɔ́n ɖ’ayǐ ǎ, bɔ etɛwu é ka byɔ Jehovah ɖɔ é ni bló bonu nǔ ni nyí mɔ̌? Ðó é ɖeji dó Jehovah wu wutu wɛ. Hwe ɔ nɔte ɖò azǎn ɔ bǐ jí kaka bɔ Izlayɛli-ví lɛ ɖu ɖò axɔsu Kanáa tɔn lɛ kpo ahwangɔnu yetɔn lɛ kpo jí.