A ka tuun a?

Aniwú Izlayɛ́li ví lɛ́ ka nɔ ná asigban?

ÐO BIBLU sín táan mɛ ɔ, è nɔ ná asigban nyɔ̌nu e da gbé wɛ è ja é sín mɛ lɛ́, hwenu e xwédo we lɛ́ bǐ yí gbe ɖɔ vǐ émítɔn lɛ́ sixú da yěɖée é. Nǔ xɔ akwɛ́, kanlin, alǒ akwɛ́ sixú ɖo nǔ e è sɔ́ dó ɖo asigban ná ná wɛ lɛ́ é mɛ. Hweɖélɛ́nu ɔ, azɔ̌ wɛ è nɔ wa dó sú axɔ́ énɛ́, lěe é nyí gbɔn ɖo ninɔmɛ Jakɔ́bu tɔn mɛ é; é yí gbe bó ná w’azɔ̌ nú Hlacɛ́li sín tɔ́ nú xwe tɛ́nwe, bó ná dó da Hlacɛ́li. (Bǐb. 29:17, 18, 20) Linlin tɛ́ wú è ka nɔ ná asigban?

Akɔwé Biblu tɔn e nɔ nyí Carol Meyers é ɖɔ: “Asigban ɖé sixú sú azɔ̌ e sín do nyɔ̌nu ɔ kun ɖo xwédo e mɛ é gosín é é; énɛ́ ɖo tají tawun, ényí glezɔ́ wɛ è nɔ wa ɖo xwédo ɔ mɛ ɔ nɛ́.” Asigban ɔ sixú lɛ́ zɔ́n bɔ kancícá e ɖo xwédo we lɛ́ e alɔwlíwlí ɔ dɔn cá é tɛ́ntin é ná lɛ́ lí dǒ d’é jí. Mɛ ɖěɖěe ɖo xwédo we lɛ́ mɛ lɛ́ é sixú d’alɔ yěɖée ɖo hwenu vɛ́ wǔ lɛ́ mɛ. Gɔ́ ná ɔ, asigban ɖé nɔ xlɛ́ ɖɔ nyɔ̌nu ɖé yí gbe ɖɔ émí ná gosín acɛ tɔ́ émítɔn tɔn glɔ́, bó ná byɔ́ acɛ asú émítɔn tɔn glɔ́.

Asigban níná sín tínmɛ wɛ nyí ɖɔ è hɛn ɔ è ná xɔ nyɔ̌nu ɖé alǒ sa ɛ ǎ. Wěma e nɔ nyí Les institutions de l’Ancien Testament é ɖɔ: “É ɖo gaan ɖɔ, ɖɔ e è nɔ ɖɔ ɖɔ dandan ɔ, è ɖó ná sú akwɛ́ ɖé lě, alǒ mɔ̌ ɖɔhun nú nyɔ̌nu ɔ sín mɛ lɛ́ é nɔ zɔ́n bɔ è nɔ mɔ ɖɔ alɔwliwlí ɖo Izlayɛ́li ɔ, nǔxixɔ alǒ nǔsisa ɖɔhun wɛ é cí. Amɔ̌, é cí ɖɔ [asigban ɔ], do ɖé kpowun wɛ é nɔ sú nú nyɔ̌nu ɔ sín mɛ lɛ́, é nyí akwɛ́ ɖé bɔ è nɔ ná dó xɔ nyɔ̌nu ɔ ǎ.”

Égbé ɔ, ɖo to ɖé lɛ́ mɛ ɔ, mɛɖé lɛ́ kpo ɖo asigban níná ɔ sín aca xwedó wɛ. Ényí mɛjitɔ́ Klisánwun lɛ́ ɖo asigban byɔ́ wɛ ɔ, yě nɔ byɔ́ nǔ zɛ xwé wú ǎ, é nyɔ́ wa ɔ, yě nɔ bló bɔ ‘mɛ lɛ́ bǐ nɔ tuun ɖɔ yě nɔ nɔ jlɛ̌ jí.’ (Filí. 4:5, nwt; 1 Kɔ. 10:32, 33) Mɔ̌ mɛ ɔ, yě nɔ xlɛ́ ɖɔ émí kún “yí wǎn nú akwɛ́,” alǒ nyí nukúnkɛnnɔ ó. (2 Tim. 3:2) Gɔ́ ná ɔ, ényí mɛjitɔ́ Klisánwun lɛ́ ma byɔ́ asigban e zɛ xwé wú é ǎ ɔ, asú e da gbé vǐ ɔ ja é sɔ́ ná ɖɔ dandan ɖɔ émí ná sɛ alɔwliwlí ɔ dó nukɔn, káká jɛ hwenu e émí ná mɔ akwɛ́ gěgé dó ná asigban ɔ dó é ǎ. Alǒ, asú ɔ ná mɔ ɖɔ é ɖo dandan ɖɔ émí ní jó gběxosín-alijítɔ́zɔ́ e wa wɛ émí ɖe é dó, ɖó émí ɖó ná wa agbazazɔ́ hwebǐnu bá mɔ tɛn dó mɔ akwɛ́ e é byɔ́ é bá dó ná asigban gɛnnyigɛnnyi ǎ.

Ðo awa gbɛ ɔ tɔn ɖé lɛ́ xwé ɔ, acɛkpikpa ɔ wɛ nɔ ɖɔ asigban e è ná ná é. Fí e nǔ nyí mɔ̌ ɖe lɛ́ é ɔ, mɛjitɔ́ Klisánwun lɛ́ nɔ se tónú nú sɛ́n énɛ́ lɛ́. Aniwú? Xó Mawu tɔn byɔ́ Klisánwun lɛ́ ɖɔ yě ní nɔ “se tónú nú acɛkpikpa e ɖo to ɔ nu lɛ́” é, bó nɔ lɛ́ se tónú nú sɛ́n ɖěɖěe ma t’afɔ Mawu sín sɛ́n lɛ́ jí ǎ lɛ́ é.—Hlɔ̌. 13:1; Mɛ. 5:29.