Ali Ðěɖee Nu A Sixu Gbló Ada nú Sinsɛnzɔ́ Towe Ðè lɛ É

EE HWE ɔ nu sù bɔ Jezu na sɛ́ ahwanvu tɔn lɛ dó Axɔ́suɖuto ɔ jijla sín azɔ̌ ɔ mɛ é ɔ, é ɖɔ nú ye ɖɔ: “Nǔkún ɖò kpɔ́ gégé ɖò gle mɛ; nǔkún-yatɔ́ lɛ ka nyí kpɛɖé.” Azɔ̌ gegě ɖè bɔ è na wà, enɛ wu ɔ, é ɖɔ gɔ́ na ɖɔ: “Mi bo savo nú jinukúnnɔ ɔ, nú é sɛ́ azɔ̌watɔ́ dó jinukúngbo tɔn mɛ.” (Mat. 9:37, 38) Jezu ɖɔ lee ahwanvu lɛ na wà sinsɛnzɔ́ yetɔn gbɔn é nú ye. Xó tɔn lɛ xlɛ́ ɖɔ azɔ̌ ɔ mya nukún. É ɖɔ: “Mi na ko gbɔn Izlayɛli toxo lɛ bǐ mɛ fó, cobɔ nyɛ Gbɛtɔ́ví ɔ na wá ǎ.”—Mat. 10:23.

² Égbé ɖesu ɔ, nǔ gegě ɖè bɔ è na wà ɖò sinsɛnzɔ́ ɔ mɛ. È ɖó na jla wɛnɖagbe Axɔ́suɖuto ɔ tɔn cobɔ vivɔnu ɔ na wá, bɔ hwenu ka ko ɖò yiyi wɛ! (Mak. 13:10) Ðó gbɛ̀ ɔ wɛ nyí gle ɔ wutu ɔ, mǐ ɖò ninɔmɛ e vlɛ́ ee Jezu kpo ahwanvu tɔn lɛ kpo kpannukɔn é mɛ, amɔ̌, mǐdɛɛ lɛ tɔn gbló ada hugǎn. Enyi è na sɔ́ mǐ jlɛ́ dó gbɛtɔ́ liva mɔkpan e ɖò gbɛ̀ ɔ mɛ lɛ é wu ɔ, mǐ sukpɔ́ ǎ, amɔ̌, mǐ sixu ɖeji ɖɔ Jehovah na d’alɔ mǐ. È na jla wɛnɖagbe Axɔ́suɖuto ɔ tɔn gbɔn ayikúngban ɔ bǐ jí, bɔ enyi hwenu e Jehovah ɖó dó é sù ɔ, gbɛ̀ ɔ na vɔ. Mǐ ka na sɔ́ Axɔ́suɖuto Mawu tɔn ɖó tɛn nukɔntɔn mɛ ɖò gbɛzán mǐtɔn mɛ, bo na mɔ tɛn dó wà sinsɛnzɔ́ mǐtɔn mlɛ́mlɛ́ à? Nǔ yɛhwexɔ́suɖuto ɔ tɔn tɛ lɛ gbé mǐ ka sixu nya bo na mɔ tɛn dó kpéwú?

³ Ee Jezu ɖò xó ɖɔ dó nǔ e Jehovah byɔ ɖò mɛsɛntɔ́ Tɔn e sɔ́ yeɖée jó n’i lɛ é sí é wu wɛ é ɔ, é ɖɔ: “A na yí wǎn nú Aklunɔ Mawu towe kpodo ayi towe bǐ kpo, kpodo lindɔ̌n towe bǐ kpo, kpodo linlin towe bǐ kpo, kpodo hlɔnhlɔn towe bǐ kpan.” (Mak. 12:30) È byɔ mǐ ɖɔ mǐ ni sɛn Mawu kpo lindɔ̌n mǐtɔn bǐ kpo. Tinmɛ tɔn wɛ nyí ɖɔ mǐ nɔ xlɛ́ ɖɔ mǐ zé mǐɖée jó nú Jehovah bǐ mlɛ́mlɛ́ dó nǔjɔnǔ mɛ, gbɔn nǔ e wu mǐ kpé é bǐ wiwa ɖò sinsɛnzɔ́ tɔn mɛ gblamɛ. (2 Tim. 2:15) Sɔgbe xá ninɔmɛ mǐtɔn lɛ kpo nǔwukpíkpé mǐtɔn lɛ kpo ɔ, ali gegě wɛ hun nú ɖokpo ɖokpo mǐtɔn lɛ. Gbějé ali enɛ lɛ e hun é ɖé lɛ kpɔ́n, bo wá gbeta nǔ yɛhwexɔ́suɖuto ɔ tɔn ɖěɖee sín gbě a na nya, bá wà sinsɛnzɔ́ towe lɛ é tɔn kɔn.

WƐNJLATƆ́ NYÍNYÍ

⁴ È jɔwǔ mɛ e zunfan nǔgbo ɔ lɛ é bǐ bɔ ye na jla wɛnɖagbe ɔ. Azɔ̌ taji e Jezu zɔ́n ahwanvu tɔn lɛ ɖɔ ye ni wà é nɛ. (Mat. 24:14; 28:19, 20) Hwɛhwɛ ɔ, enyi ahwanvu Jezu Klisu tɔn lɛ sè wɛnɖagbe ɔ sín xó lě tlolo ɔ, ye nɔ jɛ ɖiɖɔ nú mɛ ɖevo lɛ jí. Nǔ e Andle, Filipu, Kɔnɛyi, kpo mɛ ɖevo lɛ kpo wà é nɛ. (Jaan 1:40, 41, 43-45; Mɛ. 10:1, 2, 24; 16:14, 15, 25-34) Xlɛ́xlɛ́ wɛ enɛ ka ɖè ɖɔ mɛ e ma tlɛ ko bló baptɛm ǎ é ɖé sixu jɛ wɛnɖagbe ɔ jla jí à? Ɛɛn! Enyi mɛɖé jɛxa bo nyí wɛnjlatɔ́ e ma ko bló baptɛm ǎ é ɖé ɖò agun ɔ mɛ ɔ, ali hun n’i b’ɛ na nɔ ɖ’alɔ ɖò kúnnuɖiɖe xwé ɖé gbè jɛ xwé ɖé gbè tɔn mɛ. Gɔ́ na ɔ, é sixu lɛ́ ɖ’alɔ ɖò sinsɛnzɔ́ ɔ sín akpáxwé ɖevo lɛ mɛ, sɔgbe xá nǔwukpíkpé tɔn kpo ninɔmɛ tɔn lɛ kpo.

⁵ Enyi wɛnjlatɔ́ ɖé bló baptɛm gudo ɔ, é ɖò wɛn ɖɔ é na jló na wà nǔ e wu é kpé é bǐ, bá d’alɔ mɛ ɖevo lɛ bɔ ye na sè wɛnɖagbe ɔ. Sunnu kpo nyɔnu kpo bǐ wɛ è jɔwǔ bɔ ye na ɖ’alɔ ɖò Mawuxóɖiɖɔzɔ́ ɔ mɛ. Enyi mǐ na bo tlɛ wà nǔ kpɛɖé dó Axɔ́suɖuto Mawu tɔn sín nukɔnyiyi tamɛ ɔ, é nɔ dó nú mǐ. Nǔgbo ɔ, mɛɖebǔ e na gbló ada nú sinsɛnzɔ́ tɔn bo ɖ’alɔ ɖò akpáxwé tɔn vovo mɛ lɛ é na ɖó awǎjijɛ.

SINSƐNZƆ́WIWA ÐÒ FÍ E HUDO SUKPƆ́ ÐÈ É

⁶ Boya è nɔ w’azɔ̌ hwɛhwɛ ɖò fí e agun towe nɔ ɖɔ Mawuxó gbɔn lɛ é, bo nɔ ɖekúnnu nú mɛ lɛ ganji. Enyi mɔ̌ wɛ ɔ, a sixu mɔ ɖɔ emi na sɛ̀ tɛn yì xá e mɛ hudo sukpɔ́ ɖè hugǎn é ɖé, bá mɔ tɛn dó gbló ada nú sinsɛnzɔ́ emitɔn. (Mɛ. 16:9) Enyi mɛxo agun tɔn alǒ devízɔ́watɔ́ sinsɛnzɔ́wiwa tɔn ɖé wɛ a nyí dìn ɔ, agun ɖevo sixu ɖè bɔ alɔdó towe na sù nukún tɔn mɛ tawun. Nukúnkpénuwutɔ́ lɛdo tɔn towe sixu na mɔjɛmɛ ɖé lɛ we dó lee a sixu d’alɔ agun ɖevo ɖò lɛdo ɔ mɛ gbɔn é jí. Enyi a jló na wà sinsɛnzɔ́ ɖò tò ɔ sín xá ɖevo mɛ ɔ, alaxɔ sixu na mɔjɛmɛ e na d’alɔ we lɛ é we.

⁷ A jló na wà sinsɛnzɔ́ ɖò tò ɖevo mɛ wɛ à? Enyi mɔ̌ wɛ ɔ, a ɖó na gbéjé tɛnsisɛ mɔhun kpɔ́n tɛnwin lɛnwin. A sixu ɖɔ xó d’eji xá mɛxo agun tɔn towe lɛ. É ɖò wɛn ɖɔ tɛnsisɛ mɔhun na kúnkplá hwi kpo mɛɖebǔ e na xwedó we é kpo. (Luk. 14:28) É ɖò mɔ̌ có, enyi a ma lin na nɔ fí ɔ nú táan gegě ǎ ɔ, é sixu nyɔ́ hugǎn ɖɔ a ni wà sinsɛnzɔ́ ɖò tò towe sín xá ɖevo mɛ.

⁸ Ðò tò ɖé lɛ mɛ ɔ, nɔví sunnu e nyí agbanɖotananɔ lɛ é nɔ nyí mɛ yɔyɔ̌ ɖò nǔgbo ɔ mɛ. Nɔví sunnu mɛɖéesɔ́hwetɔ́ e ɖò xá enɛ lɛ mɛ lɛ é nɔ ɖò gbesisɔmɛ, bo nɔ jó mɛxo agun tɔn e ko mɔ nǔ kpɔ́n bo sɛ̀ tɛn wá agun ɔ mɛ lɛ é dó, bɔ ye nɔ kpé nukún dó nǔ lɛ wu. Enyi mɛxo agun tɔn ɖé wɛ nú we, bɔ a ɖò linlin wɛ bo na sɛ̀ tɛn yì tò mɔhun lɛ ɖě mɛ hǔn, hɛn d’ayi mɛ ɖɔ é kún nyí a na yì w’azɔ̌ ɖó nɔví sunnu xá ɔ mɛ tɔn lɛ sín tɛnmɛ wɛ ó. É nyɔ́ wà ɔ, w’azɔ̌ xá ye. Dǒ wusyɛn lanmɛ nú ye bonu ye ni ba bo na w’azɔ̌ d’eji ɖò agun ɔ mɛ. (1 Tim. 3:1) Enyi nǔɖe lɛ tíìn bonu mɛ lɛ ma nɔ bló lee é nɔ nyí gbɔn ɖò tò towe mɛ é ɖɔhun ǎ hǔn, ɖǒ suúlu. Zǎn nǔ ɖěɖee a ko mɔ kpɔ́n ɖi mɛxo agun tɔn ɖé é dó nyí alɔdó jɔ alɔdó ɖé nú nɔví lɛ. Enɛ ɔ, enyi é wá byɔ ɖɔ a na lɛkɔ wá yì tò towe mɛ ɔ, mɛxo agun tɔn xá ɔ mɛ tɔn lɛ na kpéwú bo na kpé nukún dó agun ɔ wu.

⁹ Cobonu alaxɔ na ɖɔ agun ɖěɖee mɛ a sixu d’alɔ ɖè lɛ é sín nyikɔ nú we ɔ, Wěɖegbɛ́ Sinsɛnzɔ́ tɔn agun towe tɔn ɖó na sɛ́ wema ɖé dó hwɛ̌ ɖɔ emi yí gbè. Wema-sɛ́dó-mɛ enɛ ɖò dandan, enyi a nyí mɛxo agun tɔn, devízɔ́watɔ́ sinsɛnzɔ́wiwa tɔn, gbexosin-alijitɔ́, alǒ wɛnjlatɔ́ ɖé ɔ nɛ. Wěɖegbɛ́ sinsɛnzɔ́ tɔn ɔ na sɛ́ wema enɛ kpo nǔbyɔbyɔ towe kpo dó alaxɔ e nɔ kpé nukún dó tò e mɛ a jló na wà sinsɛnzɔ́ ɖè é wu é tlɔlɔ.

WƐNÐAGBE Ɔ JIJLA DÓ GBÈ ÐEVO MƐ

¹⁰ Bo na dó vlɔ́nkan nú sinsɛnzɔ́ towe ɔ, a sixu jló bo na kplɔ́n gbè ɖevo, kaka jɛ tokunɔgbe ɖé jí. Enyi a jló na kplɔ́n gbè ɖevo bo na nɔ jla wɛn ɔ d’emɛ ɔ, etɛwu a ma ka na ɖɔ xó tɔn nú mɛxo agun tɔn lɛ kpo nukúnkpénuwutɔ́ lɛdo tɔn kpo ǎ? Ye sixu ɖè wě xá we d’ewu lobo dó wusyɛn e jɛxa é lanmɛ nú we. Ðò alixlɛ́mɛ alaxɔ tɔn glɔ́ ɔ, lɛdo ɖé lɛ ko bló tuto klási gbè kpinkplɔn tɔn lɛ tɔn, bo na mɔ tɛn dó kplɔ́n azɔ̌ wɛnjlatɔ́ kpo gbexosin-alijitɔ́ kpo ɖěɖee kpé nǔ wu lɛ é, bonu ye na jla wɛn ɔ dó gbè ɖevo mɛ.

SINSƐNZƆ́ GBEXOSIN-ALIJITƆ́ TƆN

¹¹ Wɛnjlatɔ́ lɛ bǐ ɖó na tuùn nǔ e è byɔ ɖò gbexosin-alijitɔ́ alɔgɔtɔ́, hwebǐnu tɔn, kpo titewungbe lɛ kpo sí lɛ é, gɔ́ nú nǔ e sinsɛnzɔ́ hwebǐnu tɔn ɖevo lɛ wiwa byɔ lɛ é. Gbexosin-alijitɔ́ ɖé ɖó na nyí Klisanwun e ko bló baptɛm bo ɖó kpɔ́ndéwú ɖagbe é ɖé, bɔ ninɔmɛ tɔn ka na lɔn nǔ n’i bɔ é na nɔ zán ganxixo nabi e è ɖɔ é ɖò wɛnɖagbejijlazɔ́ ɔ mɛ. Wěɖegbɛ́ Sinsɛnzɔ́ tɔn wɛ nɔ yí gbè bɔ è nɔ nyí gbexosin-alijitɔ́ alɔgɔtɔ́ kpo hwebǐnu tɔn kpo, amɔ̌, alaxɔ wɛ nɔ sɔ́ gbexosin-alijitɔ́ titewungbe lɛ.

¹² Gbexosin-alijitɔ́ alɔgɔtɔ́ lɛ ɔ, è nɔ yí gbè bɔ ye nɔ w’azɔ̌ nú, é hwe bǐ ɔ, sun ɖokpo, sun ɖebɔdoɖewu nabi ɖé, alǒ kaka jɛ hwenu e ye jló na ɖó te dó é, sɔgbe xá ninɔmɛ yetɔn lɛ. Wɛnjlatɔ́ Axɔ́suɖuto ɔ tɔn gegě nɔ ɖu vivǐ gbexosin-alijitɔ́ alɔgɔtɔ́ sín azɔ̌ wiwa tɔn ɖò hwe bǔnɔ lɛ nu, ɖi táan Flǐn tɔn mɛ alǒ ɖò sun e mɛ nukúnkpénuwutɔ́ lɛdo tɔn wá ba ye kpɔ́n é. Mɛɖé lɛ nɔ zán gbɔjɛyiyi sín sun yetɔn lɛ. Wemaxɔmɛví e nyí wɛnjlatɔ́ bo ko bló baptɛm lɛ é sixu nyí gbexosin-alijitɔ́ alɔgɔtɔ́ hwenu e ye yí azǎn ɖò wemaxɔmɛ é. Wɛnjlatɔ́ lɛ sixu nyí gbexosin-alijitɔ́ alɔgɔtɔ́ bo na nya ganmɛ e è ɖekpo é gbé ɖò sun mars kpo avril kpo tɔn ɖebǔ mɛ, kpodo sun e mɛ nukúnkpénuwutɔ́ lɛdo tɔn wá ba ye kpɔ́n é kpo. Ðebǔ wɛ ninɔmɛ towe na bo nyí ɔ, enyi a ɖó walɔ ɖagbe bo ɖó zinzan ɖagbe, lobo sixu bló tuto bá mɔ ganxixo e è byɔ é, bo ka lɛ́ mɔ ɖɔ emi sixu nyí gbexosin-alijitɔ́ alɔgɔtɔ́ nú sun ɖokpo alǒ hú mɔ̌ ɔ, kpodo xomɛhunhun kpo wɛ mɛxo agun tɔn lɛ na gbéjé wǔjɔmɛ sinsɛnzɔ́ tɔn enɛ e a na byɔ é kpɔ́n.

¹³ Bo na dó jɛxa bá nyí gbexosin-alijitɔ́ hwebǐnu tɔn ɔ, a ɖó na kpé nǔ wu bá mɔ ganxixo nabi e è byɔ xwewu xwewu é. Ði gbexosin-alijitɔ́ hwebǐnu tɔn ɖé ɔ, a na jló na w’azɔ̌ ɖó kpɔ́ xá agun ɔ. Gbexosin-alijitɔ́ kanɖodónǔwutɔ́ lɛ nɔ nyí nyɔna ɖé nú agun yetɔn, bo nɔ sɔ́ Mawuxóɖiɖɔ sín akpakpa dó lanmɛ nú agun ɔ, lobo tlɛ nɔ dó wusyɛn lanmɛ nú mɛ ɖevo lɛ bɔ ye lɔ nɔ nyí gbexosin-alijitɔ́. Amɔ̌, cobonu a na byɔ bá nyí gbexosin-alijitɔ́ hwebǐnu tɔn ɔ, a ɖó na nyí wɛnjlatɔ́ e ɖó kpɔ́ndéwú ɖagbe bo ko bló baptɛm bɔ é hwe bǐ ɔ, sun ayizɛ́n ko wá yì é ɖé.

¹⁴ Hwɛhwɛ ɔ, è nɔ sɔ́ gbexosin-alijitɔ́ titewungbe lɛ ɖò gbexosin-alijitɔ́ hwebǐnu tɔn ɖěɖee sinsɛnzɔ́ yetɔn nɔ kpa ganji lɛ é mɛ. Ye ɖó na ɖò gbesisɔmɛ bo na wà sinsɛnzɔ́ ɖò fí ɖebǔ e alaxɔ na sɛ́ ye dó é. Hwɛhwɛ ɔ, fí enɛ lɛ nɔ jɛ gblolo bɔ è sixu mɔ mɛ e ɖó jlǒ lɛ é, bo ɖó agun yɔyɔ̌ lɛ ayǐ. Hweɖelɛnu ɔ, è nɔ sɛ́ gbexosin-alijitɔ́ titewungbe lɛ dó agun ɖěɖee ma nɔ kpéwú bo nɔ gbɔn fí e è ɖè nú ye lɛ é bǐ ǎ é mɛ. È nɔ lɛ́ sɛ́ gbexosin-alijitɔ́ titewungbe e nyí mɛxo agun tɔn é ɖé lɛ dó, bonu ye na d’alɔ agun kpɛví kpɛví lɛ, enyi è na bo ma tlɛ ɖó hudo azɔ̌watɔ́ tɔn d’eji ɖò sinsɛnzɔ́ ɔ mɛ ǎ ɔ nɛ. Gbexosin-alijitɔ́ titewungbe lɛ nɔ yí akpomɛkwɛ xlohún ɖé dó kpé nukún dó akwɛzinzan yetɔn lɛ wu. È nɔ sɔ́ gbexosin-alijitɔ́ titewungbe ɖé lɛ nú táan klewun ɖé.

MƐSƐ́DÓ E È SƐ́DÓ GLE Ɔ MƐ LƐ É

¹⁵ Wěɖegbɛ́ Sinsɛnzɔ́ tɔn Hagbɛ̌ Alixlɛ́mɛtɔ́ ɔ tɔn wɛ nɔ sɔ́ mɛsɛ́dó lɛ, bɔ Wěɖegbɛ́ Alaxɔ tɔn tò e mɛ è sɛ́ ye dó é tɔn nɔ wá sɛ́ ye dó xá ɖěɖee mɛ gbɛtɔ́ sukpɔ́ ɖè lɛ é. Ye nɔ w’azɔ̌ ɖagbe gegě bo nɔ bló bɔ wɛnɖagbejijlazɔ́ ɔ kpo azɔ̌ agun ɔ tɔn lɛ kpo nɔ xwetɛ́ bo nɔ lɛ́ lidǒ. Hwɛhwɛ ɔ, mɛsɛ́dó e è sɛ́dó gle ɔ mɛ lɛ é ɔ, è nɔ kplɔ́n azɔ̌ ye ɖò Wemaxɔmɛ nú Wɛnɖagbejlatɔ́ Axɔ́suɖuto ɔ tɔn lɛ. È nɔ ba xɔ nú ye bɔ ye nɔ lɛ́ yí akpomɛkwɛ xlohún ɖé dó kpé nukún dó akwɛzinzan yetɔn lɛ wu.

NUKÚNKPÉNUWUTƆ́ LƐDO TƆN SÍN AZƆ̌

¹⁶ Hagbɛ̌ Alixlɛ́mɛtɔ́ ɔ wɛ nɔ sɔ́ nukúnkpénuwutɔ́ lɛdo tɔn lɛ, lobɔ è nɔ tò kplɔ́n azɔ̌ ye bɔ ye nɔ ko nyí nukúnkpénuwutɔ́ lɛdo tɔn tɛnmɛkpɔ́nnumɛtɔ́ jɛ nukɔn hwɛ̌. Sunnu enɛ lɛ nɔ yí wǎn nú sinsɛnzɔ́ ɔ bo nɔ lɛ́ yí wǎn nú nɔví lɛ. Gbexosin-alijitɔ́ kanɖodónǔwutɔ́ lɛ wɛ nú ye, bɔ ye nɔ kplɔ́n Biblu ɔ ganji, lobo lɛ́ nyí xóɖɔtɔ́ kpo nǔkplɔnmɛtɔ́ kpo alɔsekpɛ́nnanɔ lɛ. Ye nɔ nyí mɛ nukúnɖeji ɖò sínsɛ́n gbigbɔ tɔn ɖiɖexlɛ́ sín ali nu, bo nɔ wà nǔ ɖó jlɛ̌ jí, ɖó linlin e sɔgbe é, kpo nukúnnúmɔjɛnǔmɛ kpo. Enyi nukúnkpénuwutɔ́ lɛdo tɔn ɖé wlí alɔ ɔ, asì tɔn nɔ nyí gbexosin-alijitɔ́ ɖé bo nɔ nyí kpɔ́ndéwú ɖagbe ɖò nǔwalɔ tɔn kpo lee é nɔ wà nǔ xá mɛ ɖevo lɛ gbɔn é kpo mɛ. É lɔ nɔ nyí wɛnɖagbejlatɔ́ alɔsekpɛ́nnanɔ ɖé. É nɔ lɛ́ mɔ nǔ jɛ azɔ̌ tɔn wu ɖɔ emi ɖó na nyí Klisanwun e nɔ hwíhwɛ́ emiɖée dó asú emitɔn glɔ́ é ɖé, bo na nɔ ɖɔ xó dó nu nú asú emitɔn alǒ hú gbè è ǎ. Nukúnkpénuwutɔ́ lɛdo tɔn lɛ kpo asì yetɔn lɛ kpo nɔ ján tawun, enɛ wu ɔ, mɛ ɖěɖee ɖò sinsɛnzɔ́ enɛ ba wɛ lɛ é sín lanmɛ ɖó na ɖò ganji. Gbexosin-alijitɔ́ lɛ nɔ d’alɔ wema mɛ bo na nyí nukúnkpénuwutɔ́ lɛdo tɔn ǎ. É nyɔ́ wà ɔ, ye nɔ ɖɔ jlǒ enɛ e ye ɖó é nú nukúnkpénuwutɔ́ lɛdo tɔn yetɔn, bɔ éyɛ nɔ ɖè wě xá ye d’ewu.

WEMAXƆMƐ YƐHWEXƆ́SUÐUTO Ɔ TƆN LƐ

¹⁷ Wemaxɔmɛ nú Wɛnɖagbejlatɔ́ Axɔ́suɖuto ɔ Tɔn Lɛ: È ɖó hudo wɛnɖagbejlatɔ́ Axɔ́suɖuto ɔ tɔn lɛ tɔn d’eji, bonu ye na w’azɔ̌ ɖò fí e è ma nɔ w’azɔ̌ ɖè mɔ̌ ǎ lɛ é, lobo na lɛ́ d’alɔ agun lɛ ɖò gbigbɔ lixo. Enɛ wu ɔ, nɔví sunnu tlɛnnɔ lɛ, nɔví nyɔnu tlɛnnɔ lɛ, gɔ́ nú asú kpo asì kpo lɛ sixu d’alɔ wema mɛ, bonu è na kplɔ́n azɔ̌ bǔnɔ ɖé ye ɖò Wemaxɔmɛ nú Wɛnɖagbejlatɔ́ Axɔ́suɖuto ɔ Tɔn Lɛ. È nɔ sɛ́ mɛ e yì wemaxɔmɛ enɛ bo yí kúnnuɖewema lɛ é dó fí e hudo sukpɔ́ ɖè ɖò tò yetɔn mɛ é, bɔ ye nɔ nyí gbexosin-alijitɔ́ hwebǐnu tɔn. É ɖò mɔ̌ có, è sixu ɖè azɔ̌ ɖevo nú mɛ ɖěɖee sixu zé yeɖée jó lɛ é ɖò tò yetɔn mɛ alǒ tò ɖevo mɛ. È sixu sɛ́ mɛ kpɛɖé dó bɔ ye na nyí gbexosin-alijitɔ́ titewungbe táan klewun ɖé tɔn alǒ hwebǐnu tɔn. Gbexosin-alijitɔ́ ɖěɖee jló na yì wemaxɔmɛ enɛ lɛ é sixu tuùn nǔ e é byɔ lɛ é ɖò kplé e è nɔ bló dó enɛ tamɛ ɖò kpléɖókpɔ́ ɖaxó jí é tɛnmɛ.

¹⁸ Wemaxɔmɛ Biblu Kpinkplɔn Watchtower Galadi Tɔn: Nɔví sunnu tlɛnnɔ, nɔví nyɔnu tlɛnnɔ, gɔ́ nú asú kpo asì kpo ɖěɖee è nɔ sɔ́ bɔ ye nɔ yì wemaxɔmɛ enɛ lɛ é nɔ dó Glɛnsigbe, bo nɔ ɖò sinsɛnzɔ́ hwebǐnu tɔn bǔnɔ ɖé mɛ. Ye ɖó nǔwukpíkpé ɔ bo na bló bɔ lee nǔ lɛ nɔ yì gbɔn ɖò sinsɛnzɔ́ ɔ mɛ alǒ ɖò alaxɔ mɛ é na lidǒ lobo xwetɛ́. Ye nɔ ko xlɛ́ jɛ nukɔn ɖɔ sinsɛnzɔ́wiwa nú nɔví lɛ nɔ víví nú emi, lobɔ emi sixu d’alɔ mɛ ɖevo lɛ ɖò ali e dɔn mɛ é ɖé nu, bonu ye na kplɔ́n alixlɛ́mɛ Mawuxówema ɔ kpo yɛhwexɔ́suɖuto ɔ kpo tɔn lɛ, lobo xwedó. Wěɖegbɛ́ Alaxɔ tɔn nɔ byɔ mɛ e jɛxa lɛ é ɖɔ ye ni d’alɔ wema mɛ. È nɔ sɛ́ mɛ e yí kúnnuɖewema wemaxɔmɛ enɛ tɔn lɛ é dó gle ɔ mɛ, alǒ dó alaxɔ tò ɖevo tɔn alǒ tò yeɖesu tɔn tɔn mɛ.

SINSƐNZƆ́ BETƐLI TƆN

¹⁹ Wǔjɔmɛ bǔnɔ ɖé wɛ é nyí ɖɔ è ni wà sinsɛnzɔ́ ɖò Betɛli. Tinmɛ nyikɔ Betɛli ɔ tɔn wɛ nyí “Xwé Mawu tɔn,” bɔ nyikɔ enɛ ka sɔgbe tawun xá azɔ̌ yɛhwexɔ́suɖuto ɔ tɔn sín hɔ̌nkan enɛ lɛ. Nɔví sunnu kpo nɔví nyɔnu kpo ɖěɖee ɖò sinsɛnzɔ́ wà wɛ ɖò Betɛli lɛ é nɔ w’azɔ̌ taji ɖé ɖò wema junjɔn Biblu jí lɛ ɖiɖetɔ́n, lilɛdógbeɖevomɛ yetɔn, kpo mimǎ yetɔn kpo linu. Sinsɛnzɔ́ yetɔn xɔ akwɛ tawun nú Hagbɛ̌ Alixlɛ́mɛtɔ́ ɔ, éyɛ wɛ nɔ kpé nukún dó agun lɛ wu gbɔn gbɛ̀ ɔ bǐ mɛ, bo nɔ lɛ́ xlɛ́ ali ye. Mɛ e nɔ w’azɔ̌ ɖò Betɛli bo nyí lilɛdógbeɖevomɛtɔ́ lɛ é gegě nɔ nɔ xá e ɖò alaxɔ ɔ sín acɛ mɛ bɔ è nɔ dó gbè ɔ ɖè lɛ é mɛ, bo nɔ w’azɔ̌ ɖò finɛ. Enɛ nɔ zɔ́n bɔ ye nɔ sè lee mɛ lɛ nɔ dó gbè ɔ gbɔn é ayihɔngbe ayihɔngbe. Yeɖesunɔ sixu lɛ́ kpɔ́n ɖɔ mɛ lɛ ka nɔ mɔ nukúnnú jɛ lee è nɔ zán gbè ɔ gbɔn ɖò wema lɛ mɛ é wu à jí.

²⁰ Azɔ̌ e è nɔ wà ɖò Betɛli lɛ é gegě nɔ nyí hlɔnhlɔnzɔ́. Hwɛjijɔ enɛ wu wɛ mɛ ɖěɖee è nɔ ylɔ́ wá Betɛli lɛ é gegě nɔ nyí mɛ winnyawinnya e ko zé yeɖée jó, bo bló baptɛm, bɔ lanmɛ yetɔn ɖò ganji, lobɔ agbɔ̌n lɛ́ ɖò ye wu ganji lɛ é. Enyi hudo tíìn ɖò alaxɔ e nɔ kpé nukún dó tò towe wu é mɛ, bɔ a jló na w’azɔ̌ ɖò Betɛli ɔ, a sixu mɔ nǔ jɛ nǔ e é byɔ ɖò así towe lɛ é wu d’eji ɖò mɛxo agun tɔn towe lɛ gɔ́n.

SINSƐNZƆ́ XƆGBIGBÁ TƆN

²¹ Xɔ yɛhwexɔ́suɖuto ɔ tɔn lɛ gbigbá nyí sinsɛnzɔ́ mímɛ́ ɖé, bo cí tɛmpli Salomɔ́ɔ tɔn gbigbá sín azɔ̌ ɔ ɖɔhun. (1 Axɔ́. 8:13-18) Nɔví sunnu kpo nɔví nyɔnu kpo gegě nɔ zán hwenu yetɔn kpo nǔɖokan yetɔn lɛ kpo dó ɖ’alɔ ɖò azɔ̌ enɛ mɛ kpo kanɖodónǔwu ɖaxó ɖé kpo.

²² A ka ɖò gbesisɔmɛ bo na d’alɔ à? Enyi wɛnjlatɔ́ e ko bló baptɛm é ɖé wɛ nú we, bɔ a jló na ɖ’alɔ ɖò azɔ̌ mɔhun mɛ ɔ, alɔdó towe na sù nɔví sunnu ɖěɖee nɔ kpé nukún dó xɔgbigbázɔ́ ɔ wu ɖò xá towe mɛ lɛ é nukúnmɛ, bɔ ye lɛ́ ɖò gbesisɔmɛ bo na kplɔ́n azɔ̌ we, enyi a ma tlɛ tuùn azɔ̌ sɔmɔ̌ ǎ ɔ nɛ. Etɛwu a ma ka na ɖɔ nú mɛxo agun tɔn towe lɛ ɖɔ emi ɖò gbesisɔmɛ bo na d’alɔ ǎ? Wɛnjlatɔ́ e ko bló baptɛm bo jɛxa é ɖé lɛ tlɛ kpéwú bo zé yeɖée jó bo nɔ gbá xɔ yɛhwexɔ́suɖuto ɔ tɔn lɛ ɖò tò ɖevo lɛ mɛ.

²³ Ali gegě wɛ hun bɔ è sixu gbɔn bo ɖ’alɔ ɖò xɔgbigbázɔ́ ɔ mɛ. Wɛnjlatɔ́ ɖěɖee ko bló baptɛm bo nyí kpɔ́ndéwú ɖagbe bo tuùn azɔ̌ ɖó bǎ ɖé mɛ, lobo sixu ɖ’alɔ ɖò tuto xɔgbigbá tɔn e sɛkpɔ́ fí e ye nɔ nɔ é ɖé mɛ lɛ é sixu nyí Azɔ̌xɔsa E Nɔ Bló Tuto Xɔgbigbá Tɔn Ðò Alaxɔ Mɛ É sín mɛɖéezejotɔ́ lɛ. Mɛ ɖevo lɛ kpéwú bo na wà xɔgbigbázɔ́ ɖò fí e ɖò zɔ lɛ é nú táan ɖé, bɔ alaxɔ nɔ sɔ́ ye bɔ ye nɔ nyí mɛɖéezejotɔ́ xɔgbigbá tɔn lɛ nú aklunɔzán gbla we kaka jɛ sun atɔn. Mɛ ɖěɖee è sɔ́ bɔ ye na w’azɔ̌ nú hwenu línlín lɛ é nɔ nyí devízɔ́watɔ́ xɔgbigbá tɔn lɛ. Devízɔ́watɔ́ xɔgbigbá tɔn e è sɛ́dó, b’ɛ na w’azɔ̌ ɖò togudo é ɖé nɔ nyí devízɔ́watɔ́ xɔgbigbá tɔn togudo tɔn. Gbɛ̌ta Xɔgbigbá tɔn e mɛ devízɔ́watɔ́ xɔgbigbá tɔn lɛ kpo mɛɖéezejotɔ́ xɔgbigbá tɔn lɛ kpo nɔ ɖè é ɖé wɛ nɔ kpé nukún dó xɔgbigbázɔ́ ɖokpo ɖokpo wu, bɔ Azɔ̌xɔsa E Nɔ Bló Tuto Xɔgbigbá Tɔn Ðò Alaxɔ Mɛ É sín mɛɖéezejotɔ́ lɛ kpo mɛɖéezejotɔ́ ɖěɖee nɔ gosin agun lɛ mɛ lɛ é kpo nɔ d’alɔ ye. Gbɛ̌ta Xɔgbigbá tɔn lɛ nɔ gosin xɔgbigbázɔ́ ɖé jí yì ɖevo jí ɖò fí e alaxɔ yetɔn ɖó acɛ ɖè lɛ é.

ETƐ LƐ GBÉ NYA WƐ A KA ÐÈ ÐÒ GBIGBƆ LIXO?

²⁴ Enyi a ko zé gbɛzán towe jó nú Jehovah ɔ, jlǒ towe wɛ nyí ɖɔ a na sɛn ɛ kaka sɔyi. Amɔ̌, etɛ lɛ gbé nya wɛ a ka ɖè ɖò gbigbɔ lixo ɖò ali enɛ nu? Nǔ gbigbɔ tɔn lɛ gbé nyinya na d’alɔ we bɔ a na zán hlɔnhlɔn towe kpo nǔɖokan towe lɛ kpo kpodo nǔnywɛ kpo. (1 Kɔ. 9:26) Nǔ mɔhun lɛ gbé nyinya nɔ zɔ́n bɔ è nɔ sù ɖò gbigbɔ lixo, b’ɛ na d’alɔ we bɔ a na sɔ́ ayi ɖó nǔ e nyí nǔjɔnǔ hugǎn lɛ é jí, hwenu e a na ɖò wǔjɔmɛ sinsɛnzɔ́ tɔn lɛ ba d’eji wɛ é.—Fili. 1:10, nwt; 1 Tim. 4:15, 16.

²⁵ Mɛsɛ́dó Pɔlu zé kpɔ́ndéwú ɖagbe ɖé ɖ’ayǐ nú mǐ bɔ mǐ na xwedó ɖò sinsɛnzɔ́ e wà nú Mawu wɛ mǐ ɖè é mɛ. (1 Kɔ. 11:1) Pɔlu zán éɖée tawun ɖò sinsɛnzɔ́ Jehovah tɔn mɛ. É tuùn ɖɔ Jehovah ko hun ali gegě nú emi. Pɔlu wlan sɛ́dó nɔví e ɖò Kɔlɛnti lɛ é ɖɔ: “Mawu ka hun ali nú mì ɖò finɛ, bɔ un na wà azɔ̌ ɖaxó ɖé.” Nǔ nyí mɔ̌ ɖò ninɔmɛ mǐɖesunɔ tɔn mɛ à cé? Nǔgbo ɔ, ali gegě wɛ hun nú mǐ bɔ mǐ na sɛn Jehovah ɖó kpɔ́ kpo agun ɔ kpo, taji ɔ, ɖò wɛnɖagbe Axɔ́suɖuto ɔ tɔn jijla mɛ. Amɔ̌, ɖò ninɔmɛ Pɔlu tɔn mɛ ɔ, ‘ali e hun n’i’ é nu gbingbɔn nɔ byɔ ɖɔ é ni ɖí xwi xá ‘kɛntɔ́ sukpɔ́.’ (1 Kɔ. 16:9) Pɔlu ɖò gbesisɔmɛ bo na gbɛ́ nǔ nú éɖée. Ðǒ ayi nǔ e é ɖɔ é wu: “Un nɔ dóya nú agbaza ce ɖesu, lobo nɔ hɛn ɛ syɛnsyɛn.” (1 Kɔ. 9:24-27) Mǐɖesu ka nɔ ɖó linlin ɖokpo ɔ à?

²⁶ Mɛ ɖokpo ɖokpo ɖó na nɔ wà azɔ̌ e kúnkplá yɛhwexɔ́suɖuto ɔ lɛ é sɔgbe xá ninɔmɛ tɔn. Égbé ɔ, mɛ gegě byɔ sinsɛnzɔ́ hwebǐnu tɔn ɖé lɛ mɛ, ɖó ye yawǔ nya nǔ yɛhwexɔ́suɖuto ɔ tɔn lɛ gbé ɖò gbɛzán yetɔn mɛ wutu. É tlɛ nyí hwenu e ye ɖò kpɛví é ɔ, mɛjitɔ́ yetɔn lɛ kpo mɛ ɖevo lɛ kpo dó wusyɛn lanmɛ nú ye ɖɔ ye ni wà mɔ̌. Mɔ̌ mɛ ɔ, ye ko ɖu vivǐ gbɛhwenu yetɔn zinzan ɖò sinsɛnzɔ́ Jehovah tɔn mɛ tɔn tawun; b’ɛ ka nɔ vɛ́ nú ye ǎ. (Nǔx. 10:22) Nǔ ɖevo e gbé mǐ sixu nya lɛ é wɛ nyí wɛnɖagbe ɔ jijla ɖò aklunɔzán gbla ɖokpo ɖokpo mɛ, Biblu kplɔnkplɔn ɖé bíbɛ́ kpo nukúnkpíkpé d’ewu kpo, alǒ hwenu sukpɔ́ zinzan dó sɔnǔ nú kplé lɛ. Nǔ taji ɔ wɛ nyí ɖɔ mǐ ni gbí dɔn, lobo wà sinsɛnzɔ́ mǐtɔn bǐ mlɛ́mlɛ́. Enyi mǐ wà mɔ̌ ɔ, mǐ na kpa susu nú Jehovah, lobo kpé nǔ ɖaxó hugǎn e gbé nya wɛ mǐ ɖè é wu, é wɛ nyí ɖɔ mǐ na sɛn ɛ kaka sɔyi.—Luk. 13:24; 1 Tim. 4:7b, 8.