Etɛ Biblu ka Ðɔ Dó Kpɔ́jijɛ Ma Wlí Alɔ Wu?
Xósin e Biblu na é
Biblu ɖɔ ɖɔ Mawu ba ɖɔ gbɛtɔ́ lɛ ni ‘ma lɛ aga ó.’ (1 Tɛsalonikinu lɛ 4:3) Lee è zán xókwín “agalilɛ” ɔ gbɔn ɖò Biblu mɛ é xlɛ́ ɖɔ é nɔ dó gesí afɔdógbě alǒ nyɔnu ɖevo biba, xó ɖiɖó xá mɛ e ɖó mɛ̌ ɖokpo ɔ xá mɛ é, kpo xó ɖiɖó xá mɛ e è ma wlí alɔ xá ǎ é kpo.
Kpɔ́jijɛ ma wlí alɔ, bá kpɔ́n ɖɔ è jɛxa mɛɖée à jí xó ɔ ka lo?
Nɛ̌ asú kpo asì kpo lɛ ka sixu hɛn alɔwliwli yetɔn lidǒ gbɔn?
Etɛwu alɔwliwli xó ɔ ka ɖò taji nú Mawu?
Mawu wɛ nyí dǒwatɔ́ tuto alɔwliwli tɔn tɔn. É ɖó alɔwliwli ayǐ hwenu e é dɔn asú kpo asì kpo nukɔntɔn ɔ cá é. (Bǐbɛ̌mɛ 2:22-24) Linlin tɔn nyí ɖɔ sunnu kpo nyɔnu kpo ni jɛ kpɔ́ ma wlí alɔ ǎ.
Mawu tuùn nǔ e nyɔ́ hugǎn nú gbɛtɔ́ lɛ é. É sɔnǔ nú alɔwliwli bonu é na nyí kancica tɛgbɛ tɔn ɖé ɖò sunnu kpo nyɔnu kpo tɛntin, bo na hɛn lè wá nú xwédo ɔ sín mɛ lɛ bǐ, lobo lɛ́ cyɔn alɔ ye jí. Nǔjlɛdonǔwu klewun ɖé ɖíe. Lee alixlɛ́mɛ e gosin azɔ̌xwé e bló nǔɖe é gɔ́n lɛ é nɔ xlɛ́ lee è na zán nǔ ɔ ganji gbɔn é ɔ, mɔ̌ wɛ alixlɛ́mɛ Mawu tɔn lɛ nɔ ɖɔ lee mǐ na ɖó kancica xwédo tɔn ɖagbe ɖé gbɔn é nɛ. Nǔgbododó Mawu tɔn lɛ nɔ hɛn lè wá nú mɛ e nɔ xwedó ye lɛ é hwebǐnu.—Ezayíi 48:17, 18.
Alixlɛ́mɛ e gosin azɔ̌xwé e bló nǔɖe é gɔ́n lɛ é nɔ xlɛ́ we lee a na zán nǔ ɔ ganji gbɔn é. Alixlɛ́mɛ Mawu tɔn lɛ nɔ ɖɔ lee mǐ na bló bɔ alɔwliwli mǐtɔn na yì ta gbɔn é
Xó ɖiɖó xá mɛ e è ma wlí alɔ xá ǎ é sixu jì nǔ nyanya gegě. Ði kpɔ́ndéwú ɔ, é sixu dɔn xò maɖónukún, glɔ̌zɔn lɛ kpo adohu adohu kpo wá.a
Mawu na nǔwukpíkpé gbɛtɔ́ lɛ bɔ ye na nɔ ɖóxó xá yeɖée dó jì vǐ. Mawu nɔ kpɔ́n gbɛ̀ dó mɔ nǔ mímɛ́, bɔ nǔwukpíkpé vǐjiji tɔn nyí nǔnina xɔ akwɛ ɖé. Mawu jló ɖɔ mǐ ni sɔ́ nǔnina enɛ dó mɔ nǔjɔnǔ gbɔn sísí ɖiɖexlɛ́ tuto alɔwliwli tɔn gblamɛ.—Eblée lɛ 13:4.
Kpɔ́jijɛ ma wlí alɔ, bá kpɔ́n ɖɔ è jɛxa mɛɖée à jí xó ɔ ka lo?
Bonu alɔwliwli ɖé na yì ta ɔ, é ɖò dandan ɖɔ è ni tó jɛ kpɔ́ nú táan ɖé hwɛ̌ ma wlí alɔ ǎ. É nyɔ́ wà ɔ, kancica e ɖò mɛ we tɛntin é nɔ syɛn d’eji hwenu e ye mɛ we lɛ bǐ tɛ́dó akpá e ye dó nú yeɖée é wu, bo nɔ w’azɔ̌ ɖó kpɔ́ dó ɖu ɖò tagba lɛ jí é.b Alɔwliwli nɔ na hlɔnhlɔn akpá enɛ.—Matie 19:6.
Nɛ̌ asú kpo asì kpo lɛ ka sixu hɛn alɔwliwli yetɔn lidǒ gbɔn?
Alɔwliwli e ma ɖó blɔ̌ ǎ é ɖě ɖè ǎ. É ɖò mɔ̌ có, enyi asú kpo asì kpo lɛ nɔ xwedó wěɖexámɛ Biblu tɔn lɛ ɔ, ye sixu bló bɔ alɔwliwli yetɔn na yì ta. Wěɖexámɛ enɛ lɛ ɖé lɛ ɖíe:
Hudo mɛ e a da é tɔn lɛ ni nɔ ɖu ayi mɛ nú we hugǎn hwiɖesunɔ tɔn lɛ.—1 Kɔlɛntinu lɛ 7:3-5; Filipunu lɛ 2:3, 4.
Mi nɔ ɖè wanyiyi kpo sísí kpo xlɛ́ miɖée.—Efɛzinu lɛ 5:25, 33.
Kplɔ́n bo nɔ lin tamɛ kpɔ́n cobo nɔ ɖɔ xó.—Nǔnywɛxó 12:18.
Nɔ ɖó suúlu, bo nɔ yawǔ sɔ́ hwɛ kɛ mɛ.—Kolosinu lɛ 3:13, 14.
b Kpɔ́n xóta “Ayajẹ to Whẹndo mẹ—Nugbonọ-Yinyin.”