Mǐ Wá Gbeta ɔ Kɔn Bá Hɛn Gbɛzán Mǐtɔn Bɔkun

Madián kpo Marcela kpo nɔ zán dɔkunnɔ gbɛ̀ ɖò Medellín ɖò Colombie. Azɔ̌ e Madián nɔ wà é kpé kwɛ tawun bɔ enɛ zɔ́n bɔ ye nɔ nɔ xwé ɖɛkpɛɖɛkpɛ ɖé gbè. Amɔ̌, ɖó ye nyí mɛsɛntɔ́ Jehovah Mawu tɔn lɛ wutu ɔ, nǔɖe zɔ́n bɔ ye lin tamɛ dó nǔ e ɖó na ɖò taji nú ye é wu. Ye tinmɛ ɖɔ: “Ðò 2006 ɔ, mǐ yì kpléɖókpɔ́ lɛdo tɔn e xóta tɔn nyí ‘Hẹn Nukun Towe Yin Dopo’ é. Xóɖiɖɔ lɛ gegě dó wusyɛn lanmɛ nú mǐ ɖɔ mǐ ni zán gbɛ̀ e bɔkun é bo sɛn Mawu bǐ mlɛ́mlɛ́. Ee mǐ lɛkɔ sín kpléɖókpɔ́ ɔ é ɔ, mǐ mɔ ɖɔ flíjɛ nǔ e mǐ sè lɛ é tɔn wà wɛ mǐ ɖè kpowun. Mǐ nɔ ɖò nǔ xɔ wɛ magbokɔ, bo lɛ́ ɖu axɔ́ gegě.”

Xóɖiɖɔ ɖěɖee dín ɖò kpléɖókpɔ́ ɔ jí lɛ é zɔ́n bɔ Madián kpo Marcela kpo mɔ ɖɔ emi ɖó na bló huzuhuzu lɛ, enɛ wu ɔ, ye jɛ gbɛzán yetɔn hɛn bɔkun jí. Ye ɖɔ: “Mǐ jɛ akwɛzinzan mǐtɔn lɛ ɖekpo jí. Mǐ yì jɛ xwé kpɛví ɖé gbè, bo sà mɔ̌to mǐtɔn, lobo xɔ zokɛkɛ ɖokpo.” Gɔ́ na ɔ, ye sɔ́ nɔ yì nǔsatɛn ɖěɖee ye yì ɔ, ye na xɔ nǔ jɛn wɛ lɛ é ǎ. Ye jɛ hwenu gegě zán dó ɖɔ xó xá nɔzo yetɔn lɛ dó Biblu jí jí. Ye zun xɔ́ntɔn vívɛ́ xá gbexosin-alijitɔ́ titewungbea e nɔ zán ɖibla nyí hwenu yetɔn bǐ dó kplɔ́n nǔ mɛ ɖevo lɛ dó Jehovah wu lɛ é.

Táan kpɛɖé gudo ɔ, Madián kpo Marcela kpo wá gbeta ɔ kɔn bo na gbló ada nú sinsɛnzɔ́ yetɔn, lobo na sɛ̀ tɛn yì agun kpɛví e ɖó hudo bo ɖò gletoxo ɖé mɛ é mɛ. Nú ye na kpéwú bá sɛ̀ tɛn ɔ, Madián jó azɔ̌ tɔn dó. Gǎn tɔn lin ɖɔ taɖu wɛ é hun bo wá gbeta enɛ kɔn. Enɛ wu ɔ, Madián zɔ́n tamɛ lin i bo kanbyɔ ɛ ɖɔ: “A nɔ ɖu akwɛ gegě kabǐ, a ka ɖó awǎjijɛ à?” É yí gbè ɖɔ emi kún mɔ nu tɔn ó, ɖó é ɖó tagba gegě bo sixu ɖeɖɛ ǎ. Enɛ gudo ɔ, é ɖɔ nú gǎn ɔ ɖɔ: “Enɛ wu ɔ, nǔ e ɖò taji ɖò gbɛ̀ mɛ é wɛ nyí akwɛ nabi e è nɔ ɖu é ǎ. Loɔ, nǔ e nɔ na mɛ awǎjijɛ nǔgbo ɔ é gbé nyinya wɛ ɖò taji. Nǔ kplɔnkplɔn mɛ lɛ dó Mawu wu nɔ na awǎjijɛ nyɛ kpo asì ce kpo, bɔ mǐ jló na lɛ́ ɖó awǎjijɛ d’eji, enɛ wu ɔ, mǐ jló na zán hwenu d’eji dó wà azɔ̌ enɛ.”

Ðó Madián kpo Marcela kpo nɔ nya nǔ gbigbɔ tɔn lɛ gbé wutu ɔ, ye mɔ vivo kpo awǎjijɛ kpo nǔgbo ɖò gbɛ̀ yetɔn mɛ. Ðò xwè 13 e wá yì lɛ é mɛ ɔ, ye wà sinsɛnzɔ́ ɖò agun e mɛ hudo ɖè tawun lɛ é mɛ ɖò totaligbé-gbadahweji Colombie tɔn. Bɔ dìn ɔ, é nɔ víví nú ye ɖɔ è jɔwǔ ye bɔ ye nyí gbexosin-alijitɔ́ titewungbe.