Xwe ɖokpó ɖokpó mɛ ɔ, mɛ wínnyáwínnyá e su ɖo xwédo Kúnnuɖetɔ́ Jexóva tɔn lɛ́ tɔn ɖé mɛ lɛ́ é gěgé wɛ nɔ bló batɛ́mu. A ɖo tamɛ lin dó afɔ énɛ́ ɖiɖe jí wɛ wɛ a? Ényí mɔ̌ wɛ ɔ, a ɖó ná tuun tínmɛ e mɛɖée zízé jó nú Mawu kpó batɛ́mu bíbló kpó ɖó é hwɛ̌.

• Étɛ́ ka nyí batɛ́mu?

• Étɛ́ ka nyí mɛɖée zízé jó nú Mawu?

• Étɛ́wú batɛ́mu ka ɖo tají?

• Nǔ e gbɛ̌ towe lɛ́ nɔ ɖɔ é

• Xɛxó lɛ́ kpó nǔgbó lɛ́ kpó

Étɛ́ ka nyí batɛ́mu?

Batɛ́mu e xó Biblu ɖɔ é ɔ, è nɔ nylɔ́ mɛ dó sin mɛ bǐ mlɛ́mlɛ́ wɛ, é nyí è nɔ mi sin dó mɛ wú wɛ ǎ; bɔ batɛ́mu énɛ́ ka nɔ te nú nǔ tají tawun ɖé.

• Sin ɔ glɔ́ yiyi ɖo batɛ́mu ɔ hwenu nɔ xlɛ́ ɖo agbawungba ɖɔ a kún sɔ́ ná nɔ gbɛ bo wa nǔ e nyɔ́ nukún towe mɛ kpowun lɛ́ é ɖě ó.

• Sin ɔ glɔ́ tíntɔ́n sín nɔ xlɛ́ ɖɔ a bɛ́ gbɛzán yɔ̌yɔ́ ɖěvo, é wɛ nyí ɖɔ a ná nɔ wa nǔ e nɔ nyɔ́ Mawu nukúnmɛ lɛ́ é.

Gbɔn batɛ́mu blóbló gblamɛ ɔ, a yí gbe ɖo agbawungba ɖɔ Jexóva ɖó acɛ bo ná ɖɔ nǔ e nyɔ́ é kpó nǔ e nylá é kpó, bɔ a lɛ́ xlɛ́ mɛ bǐ ɖɔ a d’akpá bo ná nɔ wa nǔ e é ba ɖɔ a ní nɔ wa lɛ́ é hwebǐnu.

Lin tamɛ d’é wú: Étɛ́wú a ka jló ná zin alɔ d’akɔ́n ɖo agbawungba ɖɔ émí ná nɔ se tónú nú Jexóva ɖo gbɛzán émítɔn bǐ mɛ? Kpɔ́n 1 Jaan 4:19 kpó Nǔɖexlɛ́mɛ 4:11 kpó.

Étɛ́ ka nyí mɛɖée zízé jó nú Mawu?

Cóbónú a ná bló batɛ́mu ɔ, a ɖó ná zé gbɛzán towe jó nú Jexóva ɖo nǔglɔ́. Gbɔn nɛ̌ é?

Ðo ɖɛ mɛɖésúnɔ tɔn ɖé mɛ ɔ, a ná d’akpá nú Jexóva ɖɔ émí ná sɛn ɛ káká sɔ́yi, bɔ ényí ninɔmɛ ɖěbǔ ná bo wá xwetɔ́n alǒ nú mɛ ɖěvo lɛ́ ná bo ɖo nǔ ɖěbǔ bló wɛ ɔ, émí ná nɔ wa nǔ e é ba lɛ́ é.

Batɛ́mu nɔ xlɛ́ mɛ ɖěvo lɛ́ ɖɔ a ko zé hwiɖée jó nú Mawu ɖo nǔglɔ́. É nɔ ɖe xlɛ́ mɛ ɖěvo lɛ́ ɖɔ a kún sɔ́ nɔ nɔ gbɛ nú hwiɖée ɖě ó, loɔ, a nɔ nɔ gbɛ nú Jexóva.—Matíe 16:24.

Lin tamɛ d’é wú: Ényí a nyí Jexóva tɔn ɔ, étɛ́wú gbɛ towe ka ná nyɔ́ hú gǎn? Kpɔ́n Ezayíi 48:17, 18 kpó Eblée lɛ́ 11:6 kpó.

Étɛ́wú batɛ́mu ka ɖo tají?

Jezu ɖɔ ɖɔ cóbónú mɛɖé ná nyí ahwanvú émítɔn ɔ, mɛ ɔ ɖó ná bló batɛ́mu hwɛ̌. (Matíe 28:19, 20) Énɛ́ wú ɔ, batɛ́mu kpo ɖo nǔ e è byɔ́ ɖo klisánwun lɛ́ sí é ɖé nyí wɛ. Nǔgbó ɔ, Biblu ɖɔ ɖɔ batɛ́mu ɖo dandan cóbɔ è ná gán.—1 Piyɛ́ɛ 3:21.

É ɖo mɔ̌ có, wǎn yí nú Jexóva kpó lě do kancícá e ɖo hwi kpó Jexóva kpó tɛ́ntin é xɔ akwɛ́ nú we sɔ é kpó wɛ ɖó ná sísɛ́ we bɔ a ná bló batɛ́mu. A ɖó ná ɖó linlin ɖokpó ɔ ɖɛhanwlántɔ́ ɔ ɖɔhun, é wlán ɖɔ: “Nǔ e [Jexóva] wa nú mì lɛ́ ɔ, étɛ́ un ka sixú wa dó sú i axɔ́ tɔn? . . . Un ná nɔ xomlá [Jexóva] nyíkɔ. Akpá e un dó nú [Jexóva] lɛ́ ɔ, un ná ɖe yě.”—Ðɛhan 116:12-14.

Lin tamɛ d’é wú: Nǔ ɖagbe tɛ́ lɛ́ Jexóva ka ko wa nú we? Nɛ̌ a ka sixú sú i axɔ́ tɔn gbɔn? Kpɔ́n Sɛ́nflínmɛ 10:12, 13 kpó Hlɔ̌manu lɛ́ 12:1.

Ényí a ɖo gbɛ zán wɛ sɔgbe kpó nǔgbódodó Biblu tɔn lɛ́ kpó, bo lɛ́ ɖo xɔ́ntɔn zun xá Mawu wɛ ɔ, a ná ko ɖo tamɛ lin dó batɛ́mu blóbló jí wɛ. Nɛ̌ a ka sixú wa gbɔn bo tuun ɖɔ émí ko ɖo gbesisɔmɛ bo ná ɖe afɔ énɛ́?a

Ðo xóta élɔ́ mɛ ɔ, mǐ ná ɖɔ xó dó nǔ élɔ́ lɛ́ jí:

• Un ɖó ná tuun nǔ e ɖo Biblu mɛ lɛ́ é bǐ wɛ a?

• Étɛ́ lɛ́ wa wɛ un ka ɖó ná ko ɖe?

• Nǔ e gbɛ̌ towe lɛ́ nɔ ɖɔ é

Un ɖó ná tuun nǔ e ɖo Biblu mɛ lɛ́ é bǐ wɛ a?

Nǔsísɔ́ nú batɛ́mu byɔ́ ɖɔ a ní hɛn nǔ bǐ dó tamɛ, cí nǔ ɖɔ tɛ́nkpɔ́n ɖé ná yi wɛ a ɖe ɖɔhun ǎ. É ɖo mɔ̌ có, a ɖó ná zán “nǔwúkpíkpé tamɛ linlin tɔn” towe dó bló bɔ kú e a kú d’é jí ɖɔ nǔ e Biblu kplɔ́n mɛ lɛ́ é nyí nǔgbó é ná lí dǒ. (Hlɔ̌manu lɛ́ 12:1) Ði kpɔ́ndéwú ɔ:

• A ka kú d’é jí ɖɔ Mawu tíin, bɔ é jɛxá ɖɔ a ní sɛn ɛ a?

  Biblu ɖɔ: “Mɛ e sɛkpɔ́ Mawu ɔ ɖó ná ɖi nǔ ɖɔ Mawu tíin, bo nɔ ná ajɔ mɛ e ɖo biba ɛ wɛ lɛ́.”—Eblée lɛ́ 11:6.

  Kanbyɔ́ hwiɖée ɖɔ: ‘Étɛ́wú un ka ɖi nǔ nú Mawu?’ (Eblée lɛ́ 3:4) ‘Étɛ́wú un ka ɖó ná sɛn ɛ?’—Nǔɖexlɛ́mɛ 4:11.

  A ɖó hudó alɔdó tɔn wɛ a? Kpɔ́n “Création ou évolution ? (1^re partie) : Pourquoi croire en Dieu ?”

• A ka kú d’é jí ɖɔ Mawu gɔ́n wɛ wɛn e ɖo Biblu mɛ é gosín a?

  Biblu ɖɔ: “Mawu wɛ sɔ́ Nǔwlánwlán mímɛ́ lɛ́ bǐ dó ayi mɛ nú mɛ e wlán lɛ́ é; é nyɔ́ bónú è ná sɔ́ dó kplɔ́n nǔ mɛ, dó gbɛ́ nǔ nú mɛ, dó jlá nǔ lɛ́ ɖó, dó kplɔ́n lěe è ná nɔ wa nǔ e sɔgbe é gbɔn é mɛ.”—2 Timɔtée 3:16.

  Kanbyɔ́ hwiɖée ɖɔ: ‘Étɛ́wú un ka ɖi nǔ ɖɔ Biblu kún nyí wěma e mɛ linlin gbɛtɔ́ lɛ́ tɔn ɖe é ó?’—Ezayíi 46:10; 1 Tɛsaloníkinu lɛ́ 2:13.

  A ɖó hudó alɔdó tɔn wɛ a? Kpɔ́n “Nɛ̌ Biblu ka sixú d’alɔ mì gbɔn?: Akpáxwé 1: Nɔ kíjé Biblu towe.”

• A ka kú d’é jí ɖɔ Jexóva nɔ zán agun klisánwun tɔn dó wa jlǒ tɔn a?

  Biblu ɖɔ: “Susu ní nyí [Mawu tɔn] gbɔn agun ɔ kpó Klísu Jezu kpó gblamɛ, ɖo jijimɛ lɛ́ bǐ mɛ káká sɔ́yi mavɔmavɔ.”—Efɛ́zinu lɛ́ 3:21.

  Kanbyɔ́ hwiɖée ɖɔ: ‘Nǔ e un nɔ kplɔ́n ɖo Biblu mɛ ɖo kplé klisánwun tɔn lɛ́ jí lɛ́ é ɔ, un nɔ lin ɖɔ gbɛtɔ́ gɔ́n wɛ yě gosín wɛ a, alǒ Jexóva gɔ́n?’ (Matíe 24:45) ‘Ényí mɛjitɔ́ ce lɛ́ ma sixú yi kplé lɛ́ ǎ ɔ, un ka nɔ yi a (nú yě ná gbe tɔn mì ɔ)?’—Eblée lɛ́ 10:24, 25.

  A ɖó hudó alɔdó tɔn wɛ a? Kpɔ́n “Étɛ́wú è ka nɔ yi kplé lɛ́ ɖo kpléxɔ Axɔ́súɖuto ɔ tɔn mɛ?”

Étɛ́ lɛ́ wa wɛ un ka ɖó ná ko ɖe?

É byɔ́ ɖɔ a ní nyí mɛ maɖóblɔ̌ cóbó ná bló batɛ́mu ǎ. É ɖo mɔ̌ có, a ɖó ná nɔ xlɛ́ ɖɔ a jló nǔgbó nǔgbó bo ná “hɔn nú nǔnyanyawiwa” bo ná “nɔ wa nǔ ɖagbe.” (Ðɛhan 34:15) Ði kpɔ́ndéwú ɔ:

• A ka nɔ zán gbɛ sɔgbe xá nǔgbódodó Jexóva tɔn lɛ́ a?

  Biblu ɖɔ: “Mi ní ɖó ayixa mímɛ́.”—1 Piyɛ́ɛ 3:16.

  Kanbyɔ́ hwiɖée ɖɔ: ‘Nɛ̌ un ka ko xlɛ́ ɖɔ è “kplɔ́n nǔwúkpíkpé [nukúnnúmɔjɛnǔmɛ tɔn ce], bónú é ná nɔ tuun nǔ ɖagbe ɖó vo nú nǔ nyanya” gbɔn?’ (Eblée lɛ́ 5:14) ‘Ninɔmɛ tawun tawun tɛ́ lɛ́ mɛ mɔ̌ un ka ɖu ɖo kɔgbídínúmɛ hǎgbɛ́ lɛ́ tɔn bá wa nǔ nyanya jí ɖe? Xɔ́ntɔn ce lɛ́ ka nɔ dó wǔsyɛ́n lanmɛ nú mì bónú má wa nǔ ɖagbe a?’—Nǔnywɛ́xó 13:20.

  A ɖó hudó alɔdó tɔn wɛ a? Kpɔ́n “Nɛ̌ un ka sixú kplɔ́n ayixa ce gbɔn?”

• A ka nɔ yí gbe ɖɔ ta towe wɛ nǔ e a nɔ wa lɛ́ é sín agban ɖe a?

  Biblu ɖɔ: “Mǐ mɛ ɖokpó ɖokpó wɛ ná ɖó gbe nǔ e mǐ wa lɛ́ é tɔn nú Mawu.”—Hlɔ̌manu lɛ́ 14:12.

  Kanbyɔ́ hwiɖée ɖɔ: ‘Un ka nɔ ɖɔ nǔgbó nú nyiɖée kpó mɛ ɖěvo lɛ́ kpó a?’ (Eblée lɛ́ 13:18) ‘Un ka nɔ yí hwɛ ce lɛ́ sín gbe a, alǒ un nɔ ba ná sɔ́ hwlá alǒ ɖíɖá agban tɔn mɛ ɖěvo lɛ́?’—Nǔnywɛ́xó 28:13.

  A ɖó hudó alɔdó tɔn wɛ a? Kpɔ́n “Nawẹ N’Sọgan Yinuwa Gando Nuṣiwa Ṣie lẹ Go Gbọn?”

• A ka ɖo xɔ́ntɔn zun xá Jexóva wɛ a?

  Biblu ɖɔ: “Mi sɛkpɔ́ Mawu, énɛ́ ɔ, é ná sɛkpɔ́ mi.”—Jaki 4:8.

  Kanbyɔ́ hwiɖée ɖɔ: ‘Étɛ́ lɛ́ wa wɛ un ka ɖe bo ná sɛkpɔ́ Jexóva?’ Ði kpɔ́ndéwú ɔ, ‘Un ka nɔ xa Biblu hwɛhwɛ a?’ (Ðɛhan 1:1, 2) ‘Un ka nɔ xo ɖɛ hwɛhwɛ a?’ (1 Tɛsaloníkinu lɛ́ 5:17) ‘Ðɛ ce lɛ́ ka nɔ ɖo tlɔlɔ a? Xɔ́ntɔn ce lɛ́ ka nyí xɔ́ntɔn Jexóva tɔn lɛ́ a?’—Ðɛhan 15:1, 4.

  A ɖó hudó alɔdó tɔn wɛ a? Kpɔ́n “Nɛ̌ Biblu ka sixú d’alɔ mì gbɔn?: Akpáxwé 2: Ðu Biblu xixa sín vǐví” kpó “Étɛ́wú un ka ɖó ná nɔ xo ɖɛ?” kpó.

WĚÐEXÁMƐ: Bo ná dó sɔ́ nǔ nú batɛ́mu hǔn, xa wěmata 37​gɔ́ wěma Les jeunes s’interrogent. Réponses pratiques (volume 2) tɔn. Tají ɔ, gbějé azɔ̌wéma e ɖo wěxwɛ 308 kpó 309 kpó jí é kpɔ́n.

Hwiɖée zízé jó nú Jexóva bo bló batɛ́mu nɔ dó xɛsi we wɛ a? Ényí mɔ̌ wɛ ɔ, xóta élɔ́ ná d’alɔ we bɔ a ná ɖu ɖo xɛsi towe lɛ́ jí.

Ðo xóta élɔ́ mɛ ɔ, mǐ ná ɖɔ xó dó nǔ élɔ́ lɛ́ jí:

• Ényí un hu hwɛ syɛ́nsyɛ́n ɖé ɖo batɛ́mu gúdo ɔ ka ló?

• Ényí un nɔ ɖi xɛsi nú azɔ̌ e batɛ́mu nɔ byɔ́ lɛ́ é ɔ ka ló?

• Ényí un nɔ mɔ ɖɔ un kún jɛxá bo ná sɛn Jexóva ó ɔ ka ló?

• Nǔ e gbɛ̌ towe lɛ́ nɔ ɖɔ é

Ényí un hu hwɛ syɛ́nsyɛ́n ɖé ɖo batɛ́mu gúdo ɔ ka ló?

Nǔ e wú ado nɔ hu we é: Bóyá a tuun mɛɖé bɔ é hu hwɛ syɛ́nsyɛ́n ɖé, bɔ è ɖe è sín agun mɛ. (1 Kɔlɛ́ntinu lɛ́ 5:11-13) Ado sixú nɔ hu we ɖɔ nǔ mɔ̌hun táá jɛ dó hwi lɔ wú.

“Ée un jɛ tamɛ lin dó batɛ́mu blóbló jí é ɔ, xɛsi ɖi mì ɖɔ un táá wá hu hwɛ syɛ́nsyɛ́n ɖé ɖo batɛ́mu ɔ gúdo. Un lin tamɛ dó nǔ e é ná hɛn gblé dó mɛjitɔ́ ce lɛ́ wú lɛ́ é jí.”—Rebekah.

Wěmafɔ tají: “Mɛdídá lɛ́ ní jó walɔ nyanya dó . . . Yě bǐ ní wá Mawu mǐtɔn gɔ́n, ɖó Mawu mǐtɔn ɔ, hwɛsɔ́kɛmɛ nɔ ci kɔ n’i ǎ.”—Ezayíi 55:7.

Lin tamɛ dó nǔ élɔ́ jí: È nɔ ɖe nǔwanyidotɔ́ ɖěɖěe hwɛ yětɔn ma vɛ́ nú yě ǎ lɛ́ é sín agun ɔ mɛ có, Jexóva nɔ kú nǔbláwǔ nú mɛ ɖěɖěe nɔ sɔ́ yěɖée hwe bɔ hwɛ yětɔn lɛ́ nɔ vɛ́ nú yě lobɔ yě nɔ yí gbe nú nǔgbɛ́númɛ lɛ́ é.—Ðɛhan 103:13, 14; 2 Kɔlɛ́ntinu lɛ́ 7:11.

Gɔ́ ná ɔ, ma wɔn nǔ élɔ́ ó: A nyí gbɛtɔ́ hwɛhutɔ́ có, a sixú ɖu ɖo mɛtɛ́nkpɔ́n lɛ́ jí, kpó alɔdó Jexóva tɔn kpó. (1 Kɔlɛ́ntinu lɛ́ 10:13) È ná ɖɔ lɔ ɔ, mɛ̌ ka ná wa gbeta lěe a ná wa nǔ gbɔn é tɔn kɔn? Hwɛ wɛ a? Alǒ mɛ ɖěvo?

“Xɛsi ɖi mì ɖɔ un táá hu hwɛ syɛ́nsyɛ́n ɖé ɖo batɛ́mu gúdo, amɔ̌, un wá mɔ ɖɔ ényí un ma ko bló batɛ́mu wɛ ǎ ɔ, nǔ wɛ é nyí bɔ un ná ko wa nyi do. Un wá mɔ ɖɔ un kún ɖó ná lɔn bónú xɛsi ɖiɖi nú nǔ e sixú wá jɛ ɖo sɔgúdo é gbo kpo nyi ali jí nú mì dó nǔ e un ɖó ná wa égbé é wiwa wú ó.”—Karen.

Tasúná: Nú a ba ɔ, a sixú nyi alɔ nú hwɛ syɛ́nsyɛ́n lɛ́ huhu, lěe é nyí gbɔn nú Jexóva sɛntɔ́ gěgé é.—Filípunu lɛ́ 2:12.

A ɖó hudó alɔdó tɔn wɛ a? Kpɔ́n “Nɛ̌ un ka sixú ɖu ɖo mɛtɛ́nkpɔ́n jí gbɔn?”

Ényí un nɔ ɖi xɛsi nú azɔ̌ e batɛ́mu nɔ byɔ́ lɛ́ é ɔ ka ló?

Nǔ e wú ado nɔ hu we é: Ði kpɔ́ndéwú ɔ, a sixú tuun mɛ wínnyáwínnyá ɖé lɛ́ bɔ yě sɛ tɛn yi fí e lín tawun dó mɛjitɔ́ yětɔn lɛ́ kpó xɔ́ntɔn yětɔn lɛ́ kpó é, bo ná mɔ tɛn dó gbló ada nú Jexóva sinsɛn yětɔn. Ado sixú nɔ hu we ɖɔ mɛ ɖěvo lɛ́ ná ɖó nukún ɖɔ hwi lɔ ní wa mɔ̌.

“Klisánwun e bló batɛ́mu é ɖé jɛxá bo ná wa nǔ gěgé ɖo sinsɛnzɔ́ Jexóva tɔn mɛ, amɔ̌, mɛɖé lɛ́ nɔ ɖo gbesisɔmɛ bo ná zé yěɖée jó ǎ, alǒ ninɔmɛ yětɔn lɛ́ nɔ lɔn bónú yě ná wa mɔ̌ ǎ.”—Marie.

Wěmafɔ tají: “Mi nú mɛ ɖokpó ɖokpó ní nɔ gbéjé nǔwiwa éɖésúnɔ tɔn lɛ́ kpɔ́n. Énɛ́ ɔ, é ná j’awǎ ɖó nǔ e kan éɖésúnɔ lɛ́ é wútu, é ná nyí ɖó é jlɛ́ éɖée dó mɛ ɖěvo lɛ́ wú wútu ǎ.”—Galátinu lɛ́ 6:4.

Lin tamɛ dó nǔ élɔ́ jí: Ma jlɛ́ hwiɖée dó mɛ ɖěvo lɛ́ wú ó, é nyɔ́ wa ɔ, sɔ́ ayi towe bǐ ɖó xó e Maki 12:30 ɖɔ lɛ́ é jí: “A ɖó ná yí wǎn nú Jexóva Mawu towe kpó ayi towe bǐ kpó.”

Ð’ayi wú ɖɔ a ɖó ná sɛn Jexóva kpó ayi towe bǐ kpó, ényí kpó ayi mɛ ɖěvo tɔn kpó ǎ. Nú a yí wǎn nú Jexóva nǔgbó nǔgbó ɔ, a ná mɔ ali ɖěɖěe nu a ná sɛn ɛ ɖe kpó nǔwúkpíkpé towe bǐ kpó lɛ́ é.

“Batɛ́mu blóbló nyí afɔ tají ɖé ɖiɖe có, é nyí agban kpinkpɛn ǎ. Ényí a zun xɔ́ntɔn ɖagbe lɛ́ ɔ, yě ná d’alɔ we. A ná mɔ ɖɔ nú a nɔ yí gbe nú azɔ̌ d’é jí kpɛɖé kpɛɖé ɔ, a ná ɖó awǎjijɛ. Nú a ma bló batɛ́mu ǎ ɔ, nǔ wɛ é nyí bɔ a ná wa dó hwiɖée wú.”—Julia.

Tasúná: Wǎn e Jexóva yí nú we é ní su nukún towe mɛ. Énɛ́ ná sísɛ́ we bɔ a ná wa nǔ e wú a kpé é bǐ n’i.—1 Jaan 4:19.

A ɖó hudó alɔdó tɔn wɛ a? Kpɔ́n “Est-​ce que je suis quelqu’un de responsable ?”

Ényí un nɔ mɔ ɖɔ un kún jɛxá bo ná sɛn Jexóva ó ɔ ka ló?

Nǔ e wú ado nɔ hu we é: Jexóva wɛ nyí Nǔbǐwúkpétɔ́ wɛ̌kɛ́ ɔ tɔn; gbɛtɔ́ lɛ́ nyí nǔtí ɖo akpá tɔn ǎ! A sixú nɔ kanbyɔ́ hwiɖée ɖɔ Jexóva ka tlɛ tuun ɖɔ a tíin a a jí.

“Ðó mɛjitɔ́ ce lɛ́ nyí Kúnnuɖetɔ́ Jexóva tɔn wútu ɔ, ado nɔ hu mì ɖɔ xɔ́ntɔn e un zun xá Jexóva é ɔ, ‘gǔ wɛ é nyí bɔ un ɖu,’ ɖɔ Jexóva kún dɔn nyiɖésúnɔ tlɔlɔ ó.”—Natalie.

Wěmafɔ tají: “Ényí Tɔ́ e sɛ́ mì dó é ma dɔn mɛɖé ǎ ɔ, mɛ ɔ sixú wá gɔ̌n ce ǎ.”—Jaan 6:44.

Lin tamɛ dó nǔ élɔ́ jí: Tamɛ e lin dó batɛ́mu jí wɛ a ɖe é xlɛ́ ɖɔ Jexóva ɖo dindɔn we wɛ, bo ɖo ylɔ̌ylɔ́ we wɛ ɖɔ a ní vɛ́ kpó émí kpó hú gǎn. A jló ná yí gbe nú mɛylɔ́ylɔ́ énɛ́ a?

Lɛ̌ flín ɖɔ Jexóva wɛ ɖó nǔgbódodó e é ná kpɔ́n dó dɔn mɛ lɛ́ wá gɔ̌n tɔn é ayǐ, é nyí hwɛ ǎ, é ka nyí mɛ ɖěvo ɖěbǔ ǎ. Lobɔ Xó tɔn ná gǎnjɛwú we ɖɔ ényí a ‘sɛkpɔ́ Mawu ɔ, é ná sɛkpɔ́ we.’—Jaki 4:8.

“Tuun e a tuun Jexóva é kpó dɔn e é dɔn we é kpó xlɛ́ ɖɔ é yí wǎn nú we. Énɛ́ wú ɔ, ényí ayi towe ɖɔ nú we ɖɔ a kún jɛxá bo ná sɛn ɛ ó hǔn, flín hwiɖée ɖɔ Jexóva kún yí gbe ó. Bɔ Jexóva sín hwɛ ka nɔ jɔ hwebǐnu.”—Selina.

Tasúná: Ényí a kpé nǔ ɖěɖěe Biblu byɔ́ ɖo mɛ e ná bló batɛ́mu é sí lɛ́ é wú hǔn, a jɛxá bo ná sɛn Jexóva. Hú mɔ̌ ɔ, é jɛxá ɖɔ a ní sɛn ɛ.—Nǔɖexlɛ́mɛ 4:11.

A ɖó hudó alɔdó tɔn wɛ a? Kpɔ́n “Étɛ́wú un ka ɖó ná nɔ xo ɖɛ?”