Biblu e a kplɔ́n xá Kúnnuɖetɔ́ Jehovah tɔn lɛ é zɔ́n bɔ a tuùn nǔgbo ɔ. É ɖò wɛn ɖɔ nǔ e a kplɔ́n lɛ é d’alɔ we, bɔ a ɖó kancica ɖagbe ɖé xá Mawu, bo lɛ́ na we gbɛ̀ sɔgudo tɔn sín nukúnɖiɖó kpo nyɔna gegě kpo ɖò palaɖisi ayikúngban jí tɔn ɖé mɛ ɖò Axɔ́suɖuto Mawu tɔn glɔ́. Nǔɖiɖi e a ɖó nú Xó Mawu tɔn é lidǒ, bɔ gbɛ̌didó xá agun Klisanwun tɔn ko hɛn nyɔna gegě wá nú we. A wá mɔ nukúnnú jɛ lee Jehovah ɖò nǔ wà xá togun tɔn gbɔn wɛ ɖò égbé é wu.—Zak. 8:23.

Dìn e a ɖò nǔ sɔ́ nú baptɛm wɛ é ɔ, nǔ e Klisanwun lɛ ɖi nǔ na lɛ é sín vɔ̌gbɔnji e mɛxo agun tɔn lɛ na bló xá we é na hɛn lè wá nú we. (Ebl. 6:1-3) Ðɛ mǐtɔn wɛ nyí ɖɔ Jehovah ni kpó ɖò nyɔna kɔn dó gǎn ɖěɖee dó wɛ a ɖè bo na tuùn i lɛ é jí wɛ, lobo wá na we ajɔ e sín akpá é dó é.—Jaan 17:3.

1. Etɛwu a ka jló na bló baptɛm?

2. Mɛ̌ ka nyí Jehovah?

• ‘Jehovah ɖokpo géé wɛ nyí Mawu ɖò jixwé kpo dodomɛ kpo, Mawu ɖé sɔ́ ɖè zɛ éyɛ wu ǎ.’—Sɛ́n. 4:39.

• “Gbɛtɔ́ lɛ ni tuùn ɖɔ hwɛ mɛ e sín nyikɔ nɔ nyí Jehovah é, hwiɖokponɔ wɛ nyí Ajalɔnlɔn ɖò ayikúngban ɔ bǐ jí.”—Ðɛh. 83:18, nwt.

3. Etɛwu é ka ɖò taji ɖɔ a ni nɔ zán nyikɔ Mawu tɔn?

• “Lee mi ɖó na nɔ xoɖɛ gbɔn ɔ ɖíe: ‘Tɔ́ mǐtɔn e ɖò [jixwé] ɔ, nyikɔ towe ni nyí nǔ sísí.’”—Mat. 6:9.

• ‘Mɛɖebǔ ylɔ́ Jehovah sín nyikɔ ɔ, mɛ ɔ na gán.’—Hlɔ. 10:13.

4. Xókwín tɛ lɛ mɔ̌ è ka zán ɖò Biblu mɛ dó ɖɔ xó dó Jehovah wu?

• ‘Jehovah ɔ, Mawu wɛ é nyí kaka yì mavɔ. É wɛ ɖó ayikúngban ɔ, sín fí e é bɛ́sín ɔ, kaka yì fí e é fó dó ɔ.’—Eza. 40:28.

• “Tɔ́ mǐtɔn e ɖò [jixwé] ɔ.”—Mat. 6:9.

• “Mawu ɔ, wanyiyi wɛ é nyí.”—1 Jaan 4:8.

5. Etɛ a ka sixu na Jehovah Mawu?

• “A na yí wǎn nú Aklunɔ Mawu towe kpodo ayi towe bǐ kpo, kpodo lindɔ̌n towe bǐ kpo, kpodo linlin towe bǐ kpo, kpodo hlɔnhlɔn towe bǐ kpan.”—Mak. 12:30.

• “Aklunɔ Mawu towe wɛ a na ɖekɔ́ na, lobo na sɛn éɖokponɔ géé.”—Luk. 4:8.

6. Etɛwu a ka jló na nɔ gbeji nú Jehovah?

• “Vǐ ce, yǐ nǔnywɛ, bonu xomɛ na hun mì; enɛ ɔ, un hɛn ɔ, un na kɛnu nú mɛ e nɔ ɖò nǔ ce ɖɔ wɛ é.”—Nǔx. 27:11.

7. Mɛ̌ a ka nɔ xoɖɛ sɛ́dó? Mɛ̌ sín nyikɔ mɛ a ka nɔ xoɖɛ gbɔn?

• “Má ɖɔ nǔgbo nú mi: nǔ e mi na byɔ Tɔ́ ɔ, é na na bǐ mi ɖò nyikɔ ce mɛ.”—Jaan 16:23.

8. Nǔ tɛ lɛ mɔ̌ a ka sixu byɔ ɖò ɖɛ towe mɛ?

• “Lee mi ɖó na nɔ xoɖɛ gbɔn ɔ ɖíe: ‘Tɔ́ mǐtɔn e ɖò [jixwé] ɔ, nyikɔ towe ni nyí nǔ sísí. Axɔ́suɖuɖu towe ni wá; jlǒ towe ni nyí wiwa ɖò ayikúngban jí fí, lee é nɔ nyí wiwa ɖò [jixwé] ɔ ɖɔhun. Nǎ nǔɖuɖu égbé tɔn mǐ. Sɔ́ hwɛ mǐtɔn lɛ kɛ mǐ, lee mǐ nɔ sɔ́ kɛ mɛ e nɔ wà nǔ nyi dò nú mǐ lɛ gbɔn é. Ma lɔn nú mǐ ni jɛ tɛnkpɔn mɛ ó, loɔ, hwlɛ̌n mǐ gán ɖò awoví sí.’”—Mat. 6:9-13.

• “Mǐ ɖó ganjɛwu kpíkpé ɖò Mawu nukɔn ɖɔ mǐ byɔ nǔ ɖebǔ nú é sɔgbe xá jlǒ tɔn ɔ, é nɔ ɖótó mǐ.”—1 Jaan 5:14.

9. Etɛ ka sixu zɔ́n bɔ Jehovah na gɔn mɛɖé sín ɖɛ sè?

• ‘Hwenu e mi na súxó ylɔ́ Jehovah ɖɔ ni wá gɔ́ alɔ nú emi ɔ, Jehovah na kɛnu d’emɛ nú mi ǎ; . . . ɖó nǔ nyanya e mi wà ɔ wu.’—Micée 3:4.

• “Aklunɔ sín nukún ɖò mɛ e nɔ wà nǔ jlɔjlɔ lɛ jí, é ɖò gbesisɔmɛ, bo na ɖótó ɖɛ yetɔn. Amɔ̌, é nɔ ɖè kɔ dó nǔnyanyawatɔ́ lɛ.”—1 Pi. 3:12.

10. Mɛ̌ ka nyí Jezu Klisu?

• “Sinmɔ́ɔ Piyɛ́ɛ ka yí gbè n’i ɖɔ: ‘Hwi wɛ nyí Klisu Mawu gbɛɖe ɔ sín Vǐ.’”—Mat. 16:16.

11. Aniwu Jezu ka wá ayikúngban jí?

• “Nyɛ Gbɛtɔ́ví ɔ; è na sɛn mì wu wɛ un wá ǎ; loɔ, mɛ sɛn gbé wɛ un tɔ́n bo wá, bo na sɔ́ gbɛ̀ ce jó dó xɔ gbɛ̀ nú mɛ gegě.”—Mat. 20:28.

• “Axɔ́suɖuɖu Mawu tɔn ɔ, un ɖó na yì jla Wɛnɖagbe tɔn tò ɖě lɛ lɔmɔ̌, ɖó nǔ e wu wɛ è sɛ́ mì dó ɔ nɛ.”—Luk. 4:43.

12. Nɛ̌ a ka sixu ɖexlɛ́ ɖɔ vɔsisa Jezu tɔn sù nukún towe mɛ gbɔn?

• “É kú dó mɛ bǐ tamɛ, bonu mɛ e ɖò gbɛ̀ lɛ ɔ, ye ma sɔ́ nɔ gbɛ̀ nú yeɖesunɔ ó; loɔ, ye ni nɔ gbɛ̀ nú mɛ e kú dó ye tamɛ, bɔ è lɛ́ fɔ́n ɛ wá gbɛ̀ dó ye tamɛ é.”—2 Kɔ. 5:15.

13. Acɛ tɛ Jezu ka ɖó?

• “Mawu na acɛ e ɖò jinukúnsin, kpodo ee ɖò ayikúngban jí ɔ kpo bǐ mì.”—Mat. 28:18.

• “Mawu sɔ́ ɛ sù, bo sɔ́ ɛ ɖó tɛn e nyí ɖaxó bǐ ɔ mɛ, lobo na ɛ nyikɔ e hugǎn nyikɔ ɖě lɛ bǐ é.”—Fili. 2:9.

14. A ka ɖi ɖɔ Hagbɛ̌ Alixlɛ́mɛtɔ́ Kúnnuɖetɔ́ Jehovah tɔn lɛ tɔn wɛ nyí “deví gbejinɔtɔ́, ayiɖotenanɔ” e Jezu sɔ́ é à?

• “Má ɖɔ mɛ e [deví] gbejinɔtɔ́, ayiɖotenanɔ ɖi ɔ nú mi: é ɖi mɛ e gǎn tɔn ɖò hwɛ na zɛ wɛ, bo sɔ́ ɛ ɖó mɛ e ɖò xwé tɔn gbè lɛ nu, bɔ é na nɔ na nǔɖuɖu ye dó hwetɔnnu é?”—Mat. 24:45.

15. Gbɛtɔ́ wɛ nú gbigbɔ mímɛ́ ɔ à?

• “Wɛnsagun ɔ ka yí gbè n’i ɖɔ: ‘[Gbigbɔ mímɛ́] na wá jǐ towe, bo na ɖè hlɔnhlɔn Mawu tɔn xlɛ́; enɛ ɔ wu wɛ vǐ e a na jì ɔ, è na nɔ ylɔ́ ɛ ɖɔ mɛɖeɖóvo Mawu tɔn, bo na nɔ ylɔ́ ɛ ɖɔ Mawu ví.’”—Luk. 1:35.

• “Midɛɛ lɛ ɔ, lee mi nyí mɛ nyanya sɔ é nɛ, có mi nyɔ́ nǔ ɖagbe na vǐ mitɔn lɛ. Bɔ nɛ̌ Mawu Tɔ́ e ɖò [jixwé] ɔ ma ka na na [gbigbɔ mímɛ́] tɔn mɛ e byɔ ɛ lɛ ǎ gbɔn?”—Luk. 11:13.

16. Nɛ̌ Jehovah ka zán gbigbɔ mímɛ́ tɔn gbɔn?

• ‘Xó wɛ Jehovah dó bló jinukúnsin na; gbè wɛ é ɖè bɔ nǔ tobutobu e nɔ na weziza ɖò jinukúnsin lɛ tíìn.’—Ðɛh. 33:6.

• “Mi na mɔ acɛ yí hwenu e [gbigbɔ mímɛ́] na jɛte wá mi jí é, bɔ mi na nyí kúnnuɖetɔ́ ce . . . kaka yì jɛ fí e gbɛ̀ ɔ kponu ɖó é.”—Mɛ. 1:8.

• “Mɛɖebǔ sixu sɔ́ nǔnywɛ éɖesunɔ tɔn dó tín Mawuxó e è wlan ɔ mɛ na ǎ. Ðó mɛɖebǔ nɔ sɔ́ jlǒ éɖesunɔ tɔn kpowun dó ɖɔ Mawuxó ɔ na kpɔ́n gbeɖé ǎ; loɔ, [gbigbɔ mímɛ́] wɛ nɔ sɔ́ dó ayi mɛ nú gbɛtɔ́ lɛ, bɔ ye nɔ ɖɔ xó e Mawu ɖɔ ye ni ɖɔ é.”—2 Pi. 1:20, 21.

17. Etɛ ka nyí Axɔ́suɖuto Mawu tɔn?

• “Mawu [jixwé] tɔn na ɖè axɔ́suɖuto e mɛɖé ma sixu gbà ǎ é ɖokpo tɔ́n. Acɛkpikpa tɔn na jɛ akɔta ɖevo sí gbeɖé ǎ. Axɔ́suɖuto enɛ ɔ na gbà axɔ́suɖuto e ko ɖò ayǐ lɛ bǐ, bo na hu acɛ nú ye, bɔ ye sɔ́ na tíìn nyǐ ǎ. Loɔ, éyɛ na nɔte kaka sɔyi.”—Dan. 2:44.

18. Lè tɛ lɛ Axɔ́suɖuto Mawu tɔn ka na hɛn wá nú we?

• “È na súnsún ɖasin bǐ sín nukún yetɔn mɛ; kú sɔ́ na tíìn ǎ, aluwɛ sɔ́ na tíìn ǎ, alěnina sɔ́ na tíìn ǎ, wuvɛ̌ mimɔ sɔ́ na tíìn ǎ; nǔ xóxó lɛ ko bú.”—Nǔɖe. 21:4.

19. Nɛ̌ a ka wà gbɔn bo tuùn ɖɔ nyɔna Axɔ́suɖuto ɔ tɔn lɛ na wá zaanɖé?

• “Ahwanvu tɔn lɛ ɖokponɔ yì mɔ ɛ, bo kanbyɔ ɛ ɖɔ: ‘Hwetɛnu wɛ nǔ e a ɖɔ nɛ ɔ na wá jɛ dó? Ani wɛ ka na ɖè hwenu e a na lɛkɔ wá ayikúngban jí fí ɔ, kpodo hwenu e gbɛ̀ elɔ na vɔ dó ɔ kpan xlɛ́ mǐ? Ðɔ nú mǐ na sè.’ Jezu ka yí gbè nú ye ɖɔ: ‘. . . Akɔta ɖě na site dó ɖě jí, bɔ axɔ́suɖuto ɖě na site dó ɖě jí; adɔ na tɔ́n, bɔ ayikúngban na dánwǔ gbɔn fí tɛnmɛ tɛnmɛ. È na jla axɔ́suɖuɖu Mawu tɔn sín Wɛnɖagbe gbɔn gbɛ̀ ɔ bǐ mɛ, bonu é na nyí kúnnuɖiɖe nú gbɛtɔ́ lɛ bǐ. Enɛ ɔ gudo ɔ, gbɛ̀ ɔ na vɔ.’”—Mat. 24:3, 4, 7, 14.

• “Hwenu vɛwǔ lɛ na tíìn ɖò azǎn gudogudo tɔn lɛ mɛ. Hwe enɛ nu ɔ, gbɛtɔ́ lɛ na nɔ ba ɖɔ emitɔn jɛn na nyɔ́; ye na nɔ yí wǎn nú akwɛ; ye na nɔ mɔ yeɖée; ye na nɔ yí gò; ye na nɔ nyla nu dó Mawu wu; ye na nɔ vɛtoli nú mɛjitɔ́ yetɔn lɛ; ye na nɔ dó alɔgudokpɛ́ nú mɛ; ye na nɔ ɖó sísí nú nǔ e nyí Mawu tɔn lɛ ɖě ǎ. Ye na ɖó wanyiyi ɖebǔ ǎ; ye na nɔ kú nǔblawu nú mɛ ǎ; ye na nɔ ɖɔ mɛ nú; ye na nɔ sixu ɖu ɖò yeɖée jí ǎ, bo na nɔ nylahun; ye na nɔ gbɛ́ wǎn nú ɖagbewiwa. Ye na nɔ sà mɛ ɖu; ye na nɔ lin tamɛ kpɔ́n cobo na nɔ wà nǔ ǎ; ye na nɔ yí gò zɛ xwé wu; ye na nɔ yí wǎn nú gbɛɖuɖu hú ye na yí wǎn nú Mawu. Ye na nyí Mawu sɛntɔ́ ɖò nukúnta, bo ka na gbɛ́ nǔ e nyí hlɔnhlɔn titewungbe nú sinsɛn ɔ é.”—2 Tim. 3:1-5.

20. Nɛ̌ a ka nɔ xlɛ́ ɖɔ Axɔ́suɖuto ɔ ɖò taji nú we gbɔn?

• “Axɔ́suɖuɖu Mawu tɔn kpodo jlǒ tɔn wiwa kpo ni nɔ mya nukún nú mi jɛ nukɔn.”—Mat. 6:33.

• “Jezu ka ɖɔ nú ahwanvu tɔn lɛ ɖɔ jí: ‘Enyi mɛɖé jló na xwedó mì hǔn, ni jó tito éɖesunɔ tɔn lɛ dó, bo ɖíɖá [yatín] tɔn, bo xwedó mì.’”—Mat. 16:24.

21. Mɛ̌ mɛ̌ e ka nyí Satáan kpo awoví lɛ kpo?

• “Awoví wɛ nyí tɔ́ mitɔn . . . Mɛhutɔ́ wɛ é ko nyí sín dò.”—Jaan 8:44.

• “È zé Dlagɔ́ɔn ɖaxó ɔ nyi dó ayikúngban jí; é wɛ nyí dan xóxó e è nɔ ylɔ́ ɖɔ awoví abǐ Satáan é; é wɛ flú gbɛ̀ ɔ bǐ. È zé è nyi dó ayikúngban jí, é kpodo wɛnsagun tɔn lɛ kpo.”—Nǔɖe. 12:9.

22. Etɛ sín hwɛ Satáan ka dó Jehovah kpo mɛ ɖěɖee ɖò Jehovah sɛn wɛ lɛ é kpo?

• “Nyɔnu ɔ yí gbè n’i ɖɔ: ‘Mǐ hɛn ɔ, mǐ na ɖu atín sínsɛ́n e ɖò jikpá ɔ mɛ lɛ, amɔ̌, atín e ɖò jikpá ɔ tɛntin ɔ, Mawu ɖɔ nú mǐ ɖɔ mǐ ni ma ɖu sínsɛ́n tɔn ó, mǐ ni ma ɖ’alɔ wu lɔ vɔ́vɔ́ ó, mǐ taa kú.’ Dan lɛ́ yí xó bo ɖɔ: ‘Gbeɖé kpɔ́n, mi na kú ɖě ǎ, loɔ, Mawu tuùn ɖɔ gbè e gbè mi na ɖu ɔ, mi na mɔ nukúnnú jɛ lee nǔ lɛ ɖè gbɔn ɔ wu, éɖesunɔ Mawu ɔ ɖɔhun, bo na tuùn nǔ ɖagbe kpodo nǔ nyanya kpo.’”—Bǐb. 3:2-5.

• “Hwɛdómɛtɔ́ ɔ ka lɛ́ yí xó bo ɖɔ: ‘Lɛ̌ ba ayixa ɖevo; gbɛtɔ́ nɔ jó nǔ e é ɖó ɔ bǐ bo nɔ dó hwlɛn gbɛ̀ éɖée tɔn gán.’”—Jɔb. 2:4.

23. Nɛ̌ a ka sixu ɖexlɛ́ ɖɔ hwɛdómɛ Satáan tɔn lɛ nyí adingban gbɔn?

• ‘Sɛn [Mawu] ɖokponɔ géé, kpodo ayi towe bǐ kpo.’—1 Tan 28:9.

• “Kaka nú funfún ce na xwɛ ɔ, un na jó gbejininɔ ce dó ǎ!”—Jɔb. 27:5, nwt.

24. Etɛwu gbɛtɔ́ lɛ ka nɔ kú?

• “Hwɛhuhu ɔ, gbɛtɔ́ ɖokpo géé jí wɛ é gbɔn bo wá gbɛ̀ ɔ mɛ; mɛ enɛ wɛ nyí Adamu; hwɛhuhu ɔ ka dɔn kú wá. Enɛ ɔ, gbɛtɔ́ lɛ bǐ nɔ kú, ɖó mɛ bǐ wɛ hu hwɛ.”—Hlɔ. 5:12.

25. Etɛ ka nyí ninɔmɛ mɛkúkú lɛ tɔn?

• “Mɛ e ɖò gbɛ̀ lɛ ma tuùn ɖɔ emi na kú vɔ́vɔ́ à? Loɔ, mɛ e ko kú lɛ sɔ́ tuùn nǔɖe ǎ.”—Nǔt. 9:5.

26. Nukúnɖiɖó tɛ ka ɖè nú mɛkúkú lɛ?

• “Mawu na wá fɔ́n mɛ ɖagbe lɛ, kpodo mɛ nyanya lɛ kpo sín kú.”—Mɛ. 24:15.

27. Mɛ nabi ka na yì kp’acɛ xá Jezu ɖò jixwé?

• “Un kpɔ́n bo mɔ Lɛngbɔ̌ví ɔ ɖò te ɖò Sinyɔ́ɔ sín só ɔ jí. Gbɛtɔ́ adɔ̌kpo tɛnwe děgba (144 000) e sín nukɔn è wlan nyikɔ tɔn kpo [Tɔ́] tɔn sín nyikɔ kpan ɖó lɛ ɖò finɛ xá ɛ.”—Nǔɖe. 14:1.

Biblu kplɔnkplɔn towe ko d’alɔ we bɔ a tuùn nǔ ɖěɖee Jehovah byɔ ɖò así towe lɛ é, kpo lee a na xwedó nǔgbododó jlɔjlɔ tɔn lɛ gbɔn é kpo. Gbeyiyi nú nǔ e a kplɔ́n lɛ é sixu ko zɔ́n bɔ a bló huzuhuzu ɖé lɛ ɖò walɔ hwiɖesunɔ tɔn kpo linlin e a nɔ ɖó dó gbɛ̀ wu é kpo mɛ. Dìn e a kánɖeji bo na zán gbɛ̀ sɔgbe xá nǔgbododó jlɔjlɔ Jehovah tɔn lɛ é ɔ, a hɛn ɔ a na nyí devízɔ́watɔ́ wɛnɖagbe ɔ tɔn ɖé.

Nǔkanbyɔ e bɔ d’ewu lɛ é jí vívɔ́ gbɔn na d’alɔ we bɔ a na hɛn nǔ jlɔjlɔ ɖěɖee Jehovah byɔ mǐ lɛ é ayi mɛ, bo na lɛ́ flín we ɖé lɛ ɖò nǔ ɖěɖee a sixu wà bá nyí ɖokpo ɖò mɛsɛntɔ́ tɔn ɖěɖee sín nǔ nɔ nyɔ́ nukún tɔn mɛ lɛ é mɛ. Mɔjɛmɛ enɛ na zɔ́n bɔ a na mɔ ɖɔ é ɖò taji tawun ɖɔ emi ni nɔ wà nǔ bǐ kpo ayixa mímɛ́ ɖé kpo, bo lɛ́ kpa susu nú Jehovah.—2 Kɔ. 1:12; 1 Tim. 1:19; 1 Pi. 3:16, 21.

É ɖò wɛn ɖɔ fí e a jɛ dìn ɖò nǔkplɔnkplɔn towe mɛ é zɔ́n bɔ akpakpa nɔ sɔ́ we, bɔ a na hwíhwɛ́ hwiɖée dó acɛkpikpa Jehovah tɔn glɔ́, bo na nɔ tutoblonunu tɔn mɛ. Nǔkanbyɔ kpo wemafɔ kpo elɔ lɛ e bɔ d’ewu é na d’alɔ we, bɔ a na gbéjé nukúnnúmɔjɛnǔmɛ e a ɖó dó mɛɖée hwíhwɛ́ hwíhwɛ́ dó tuto Jehovah tɔn glɔ́ wu é kpɔ́n, é sixu nyí ɖò agun ɔ mɛ, ɖò xwédo mɛ, alǒ ɖò toxóɖiɖɔ gbɛ̀ elɔ tɔn sín nǔ lɛ linu. É ɖò wɛn ɖɔ lee tuto ɖěɖee Jehovah bló bo nɔ kplɔ́n nǔ togun tɔn, lobo nɔ d’alɔ ɛ b’ɛ nɔ lidǒ ɖò gbigbɔ lixo é sù nukún towe mɛ gbɔn é na lɛ́ gɔ́ngɔ́n d’eji. Kplé agun tɔn ɖěɖee a na jló bá yì, lobo ɖ’alɔ ɖò ye mɛ lee ninɔmɛ towe yí gbè na gbɔn é ɖò tuto enɛ lɛ mɛ.

Gɔ́ na ɔ, akpáxwé elɔ na tɛɖɛ̌ lee alɔɖiɖó ɖò Axɔ́suɖuto jijla sín azɔ̌ ɔ mɛ hwɛhwɛ ɖò taji gbɔn é, kpo lee alɔ didó mɛ ɖevo lɛ bonu ye na wá tuùn Jehovah kpo nǔ e wà wɛ é ɖè nú gbɛtɔ́ lɛ é kpo lɔmɔ̌ ɖò taji gbɔn é kpo jí. (Mat. 24:14; 28:19, 20) Gudo mɛ ɔ, é na d’alɔ we bɔ a na hɛn dó ayi mɛ ɖɔ hwiɖée zízé jó nú Jehovah Mawu kpo baptɛm towe kpo nyí nǔ titewungbe ɖé. A sixu kánɖeji ɖɔ gbè e a yí nú fɛ́nú Jehovah tɔn e é na we é dó nǔjɔnǔ mɛ é sù nukún tɔn mɛ.

1. Nǔgbododó Klisanwun tɔn tɛ ka kúnkplá alɔwliwli? Hwɛjijɔ jinjɔn Biblu jí ɖokpo géé tɛ wu è ka sixu zɔ́n dó bo gbɛ́ mɛ e è da é?

• “Mi mɔ Mawuxó elɔ xà à cé? ‘Ðò bǐbɛ̌mɛ ɔ, Mawu Gbɛɖotɔ́ ɔ bló sunnu kpo nyɔnu kpo, bo ɖɔ jí, enɛ wutu wɛ sunnu na jó tɔ́ tɔn kpodo nɔ tɔn kpo dó, bo na jɛ kpɔ́ xá asì tɔn, bɔ ye mɛ we lɛ na huzu ɖokpo géé.’ Enɛ ɔ, ye sɔ́ ɖò mɛ we nyí wɛ ǎ, loɔ, ye huzu mɛ ɖokpo géé. Enyi mɔ̌ hǔn, gbɛtɔ́ ni bo ma klán nǔ e Mawu dɔn cá ɔ ó. . . . Enyi nyɔnu ɖé ma dó afɔ gbě ǎ, bonu asú tɔn nya ɛ, bo da nyɔnu ɖevo ɔ, aga wɛ sunnu enɛ ɔ lɛ̀.”—Mat. 19:4-6, 9.

2. Etɛwu sunnu kpo nyɔnu kpo e ɖò kpɔ́ asú kpo asì kpo ɖɔhun é ɖé ka ɖó na wlí alɔ sɔgbe xá sɛ́n? Enyi a ko da asú alǒ asì wɛ ɔ, alɔwliwli towe ka sɔgbe xá sɛ́n bɔ acɛkpikpa tuùn dóo à?

• “Flín mɛ lɛ bǐ ɖɔ ye ɖó na nɔ hwíhwɛ́ yeɖée dó gǎn lɛ kpodo acɛkpikpa lɛ kpan glɔ́.”—Ti. 3:1.

• “Asidida abǐ asúdida ni nyí nǔ sísí; asú kpo asì kpo ni nɔ gbeji nú yeɖée. Mawu na ɖó hwɛ nú mɛ e nɔ ɖò nǔbliblí wà wɛ lɛ kpodo mɛ e nɔ ɖò aga lɛ̀ wɛ lɛ kpo.”—Ebl. 13:4.

3. Azɔ̌ tɛ ka nyí towe ɖò xwédo ɔ mɛ?

• “Vǐ ce, ɖǒtó te bo yí kplɔ́n e na we wɛ tɔ́ towe ɖè lɛ; ma hɔn nǔ e nɔ towe nɔ kplɔ́n we lɛ nyi gbě ó.”—Nǔx. 1:8.

• “Asú wɛ nɔ kpa acɛ nú asì tɔn, lee Klisu kpa acɛ nú agun tɔn gbɔn é. . . . Sunnu lɛ mi, mi yí wǎn nú asì mitɔn lɛ, lee Klisu yí wǎn nú agun ɔ gbɔn kaka bo sɔ́ éɖée jó dó ta tɔn mɛ é.”—Efɛ. 5:23, 25.

• “Vǐtɔ́ lɛ mi, mi ma nɔ wà nǔ, bo na dó dó xomɛsin nú vǐ mitɔn lɛ ó; amɔ̌ mi hɛn ye, bo gbɛ́ nǔ nú ye, bo na kplɔ́n ye lee Aklunɔ jló gbɔn é.”—Efɛ. 6:4.

• “Vǐ lɛ mi, mi setónú nú mɛjitɔ́ mitɔn lɛ ɖò nǔ bǐ mɛ, ɖó nǔ e nɔ nyɔ́ Aklunɔ nukúnmɛ é nɛ.”—Kolo. 3:20.

• “Nyɔnu lɛ mi, . . . mi hwíhwɛ́ miɖée dó asú mitɔn lɛ glɔ́.”—1 Pi. 3:1.

4. Etɛwu mǐ ka ɖó na nɔ ɖó sísí nú gbɛ̀?

• “[Mawu] wɛ nɔ na gbɛ̀, bo nɔ na funfún kpodo nǔ bǐ kpo gbɛtɔ́ lɛ. . . . É wɛ zɔ́n bɔ mǐ ɖò gbɛ̀; é wɛ zɔ́n bɔ mǐ ɖò wǔ dán wɛ; é wɛ zɔ́n bɔ mǐ tíìn.”—Mɛ. 17:25, 28.

5. Etɛwu mǐ ma ka ɖó na hu mɛ ǎ, kaka jɛ vǐ e ɖò xomɛ é jí?

• “Enyi ɖɔ mɛɖé lɛ ɖò jlɛ ɖɔ wɛ, bo xò za nú nyɔnu xoxónɔ ɖé, . . . nú nǔ nyanya ɖé wà nyɔnu ɔ, è na dɔn tó nú mɛ e dó nǔ ɔ sin ɔ, . . . a hu mɛ ɔ, è na hu we.”—Tín. 21:22, 23.

• “Nukún towe lɛ tlɛ mɔ mì hwenu e kɛ́n ce jɛ nɔ ce wu é; akpáxwé tɔn lɛ bǐ ɖò wlanwlán ɖò wema towe mɛ, bɔ ye sɔgbe xá azǎn nabi e è sɔnǔ nú ye xɔ, hwɛ̌ có ye ɖě dó tíìn é.”—Ðɛh. 139:16, nwt.

• ‘Jehovah gbɛ́ wǎn nú xomɛvɔnɔ huhu.’—Nǔx. 6:16-19.

6. Sɛ́n tɛ Mawu ka dó dó hun wu?

• “Mi ma ɖu hun ó; mi ma ɖu kanlin e è glɔ́n agbɔ̌n na bo hu lɛ ɖě sín lan ó.”—Mɛ. 15:29.

7. Etɛwu mǐ ka ɖó na yí wǎn nú nɔví sunnu kpo nɔví nyɔnu kpo mǐtɔn lɛ?

• “Un ɖò sɛ́n yɔyɔ̌ ɖokpo na mi wɛ: mi yí wǎn nú miɖée. Mi ɖó na yí wǎn nú miɖée lee un yí wǎn nú mi gbɔn é. Wanyiyi e mi na ɖó nú miɖée ɔ, wɛ na ɖexlɛ́ mɛ lɛ bǐ ɖɔ mi nyí ahwanvu ce nǔgbo.”—Jaan 13:34, 35.

8. Bonu mɛ e ɖò azɔn e mɛ ɖevo sixu sɔ́ é ɖé alǒ azɔn e sixu hu mɛ é ɖé jɛ wɛ é na nyi alɔ nú azɔn mɔhun didó mɛ ɖevo lɛ ɔ, (a) Etɛwu é ma ka ɖó na wà nǔɖe lɛ ɖi así kpíkplá kɔ nú mɛ kpo sikíkí nú mɛ kpo ǎ? (b) Etɛwu é ma ka na sin xomɛ hwenu e mɛɖé lɛ gɔn yiylɔ́ ɛ dó xwé yetɔn gbè é ǎ? (c) Etɛwu mɛ e sixu ko ɖó kancica xá azɔn e mɛ ɖevo sixu sɔ́ é ɖé é ka ɖó na sɔ́ jlǒ dó yì ɖa hun tɔn, hwɛ̌ cobo byɔ xɔ́ntɔn mɛ xá mɛɖé? (d) Etɛwu mɛ e ɖó azɔn e mɛ ɖevo sixu sɔ́ é ɖé é ka ɖó na ɖɔ nú titoblonunutɔ́ kplékplé mɛxo lɛ tɔn tɔn cobo bló baptɛm?

• “Mi ma ɖu axɔ́ dó mɛɖebǔ ó; nǔ ɖokpo géé sín axɔ́ wɛ mi ɖu dó miɖée. . . . ‘Yǐ wǎn nú nɔzo towe hwiɖesunɔ ɖɔhun.’ Mɛ e yí wǎn nú mɛ ɔ nɔ wà nǔ nyanya ɖebǔ dó nɔzo tɔn wu ǎ.”—Hlɔ. 13:8-10.

• “Mɛɖebǔ ma nɔ ba ɖagbe éɖesunɔ tɔn ó; loɔ, mɛ ɖokpo ɖokpo ni nɔ ba ɖagbe mɛ ɖě lɛ tɔn.”—Fili. 2:4.

9. Etɛwu Jehovah ka nɔ ɖó nukún ɖɔ mǐ ni nɔ sɔ́ hwɛ kɛ mɛ?

• “Mi nɔ mɔ miɖée gbɔ; enyi mɛɖé wà nǔ nyi dò nú mɛɖé ɖò mi mɛ hweɖebǔnu hǔn, mi nɔ sɔ́ kɛ miɖée. Mi ɖó na nɔ sɔ́ hwɛ kɛ miɖée lee Aklunɔ sɔ́ kɛ mi é ɖɔhun.”—Kolo. 3:13.

10. Enyi nɔví ɖé dó jì we alǒ hizi we ɔ, etɛ a ka ɖó na wà?

• “Enyi mɛ e nyí nɔví towe ɖò nǔɖiɖi mɛ ɔ ɖě wà nǔ nyi dò nú we hǔn, yì mɔ ɛ, bo ɖɔ nǔ e é wà nyi dò ɔ n’i, bonu hwi kpo é kpo we lɛ ni ɖɔ gbò, ɖò miɖée tɛntin. Nú é sè xó towe hǔn, a ɖè è ɖó ali jí nɛ. Nú é ma ka jló na sè xó towe ǎ hǔn, kplá mɛ ɖokpo abǐ mɛ we dó hwiɖée jí, bonu mi ɖɔ xó ɔ gbò, ɖò kúnnuɖetɔ́ we abǐ atɔn nukɔn, lee sɛ́n ɔ zɔ́n gbɔn é. Nú é ma lɛ́ sè xó yetɔn hwenɛnu ǎ ɔ, ɖɔ nú agun ɔ, bonu ye ni ɖɔ nǔ e é wà nyi dò ɔ n’i; nú é ma lɛ́ sè ye lɔmɔ̌ tɔn ǎ jɛn wɛ hǔn, bo sɔ́ ɛ dó mɔ mɛ e ma nyí Jwifu ǎ é na, bo lɛ́ sɔ́ ɛ dó mɔ tokwɛyitɔ́ na.”—Mat. 18:15-17.

11. Etɛ Jehovah ka nɔ lin dó hwɛ elɔ lɛ wu?

▪ Nǔbliblíwiwa

▪ Ðiɖe lɛ zinzan dó sɛn Mawu

▪ Xó ɖiɖó xá mɛ e kpo mɛ kpo ɖó mɛ̌ ɖokpo ɔ é

▪ Ajojija

▪ Akɔnyinyi

▪ Ahannumu

• “Mi ma blɛ́ miɖée ó: agalɛtɔ́ lɛ, vodunsɛntɔ́ lɛ, mɛsibatɔ́ lɛ, nyɔnu e nɔ dó afɔ gbě lɛ, sunnu e nɔ ɖóxó xá sunnu yetɔn ɖɔhun lɛ, ajotɔ́ lɛ, mɛnújlotɔ́ lɛ, ahannumunɔ lɛ, mɛnúɖɔtɔ́ abǐ ajotɔ́ axánsúxó lɛ ɔ, ye ɖě na mɔ tɛn ɖò axɔ́suɖuɖu Mawu tɔn mɛ ǎ.”—1 Kɔ. 6:9, 10.

12. Etɛ a ka kánɖeji bá wà nú nǔbliblíwiwa alɔkpa lɛ bǐ?

• “Mi hɔn nú agalilɛ.”—1 Kɔ. 6:18.

13. Etɛwu mǐ ka ɖó na nyi alɔ nú amasin e ɖó aɖǐ alǒ nǔ e nɔ hɛn nǔ gblé dó fɔn mɛtɔn wu, bo ma nɔ gbɔ azɔn ǎ lɛ é bǐ?

• “Mi ni sɔ́ miɖesunɔ bǐ jó, vɔsanú gbɛɖe e è sɔ́ ɖ’ayǐ nú Mawu, bɔ é nyɔ́ nukún tɔn mɛ é ɖɔhun. Lee mi na sɛn ɛ gbɔn, bɔ é na nyí sinsɛn titewungbe ɔ é nɛ. Mi ma nɔ wà nǔ lee gbɛ̀ ɔ nɔ wà gbɔn é ó; loɔ, mi jó Mawu dó, nú é huzu mi gbɔn ayi mitɔn sín huzuhuzu gblamɛ. Enɛ ɔ, mi na sixu tuùn jlǒ Mawu tɔn: é wɛ nyí nǔ ɖagbe; nǔ e nɔ nyɔ́ nukún tɔn mɛ é; nǔ e sɔgbe bɔ nǔ bǐ vɔ ɖ’ewu é.”—Hlɔ. 12:1, 2.

14. Awovínúwiwa tɛ lɛ mɔ̌ sín sɛ́n Mawu ka dó?

• “Mɛɖebǔ ni ma ɖò mi mɛ, bo . . . bló majiki abǐ é ni kan fá ó, mɛɖebǔ ni ma kan amɔɛ abǐ é ni ɖu azě ó; mɛɖebǔ ni ma ɖó bǒ nú mɛ ó; mɛɖebǔ ni ma yì bònu ó.”—Sɛ́n. 18:10, 11.

15. Enyi mɛɖé hu hwɛ syɛnsyɛn ɖé, bo ka ba na lɛ́ mɔ fɛ́nú Jehovah tɔn ɔ, etɛ é ka ɖó na yawǔ wà?

• ‘Un jɛ agɔ dó Jehovah; un na ɖɔ hwɛ ce lɛ n’i. Un ɖɔ hwɛ e un hu ɔ nú we, nǔ e un wà nyi dò ɔ, un hwlá dó we ǎ.’—Ðɛh. 32:5.

• “Mɛɖé ɖò mi mɛ bo ɖò azɔn jɛ wɛ à? Ni ylɔ́ agunmɛxo lɛ; ye na xoɖɛ n’i, bo na kɔn ami dó ta n’i ɖò Aklunɔ nyikɔ mɛ. Ðɛ enɛ e è xò kpo nǔɖiɖi kpo ɔ na hwlɛn azinzɔnnɔ ɔ gán. Aklunɔ na bló bɔ é na jɛte, bɔ enyi hwɛ ɖé ɖò kɔ tɔn ɔ, Mawu na sɔ́ kɛ ɛ.”—Ja. 5:14, 15.

16. Nú Klisanwun hatɔ́ ɖé hu hwɛ syɛnsyɛn ɖé bonu a tuùn ɔ, etɛ a ka ɖó na wà?

• “Enyi nǔɖe jɛ bɔ mɛɖé ɖò tɛn tɔn mɛ, abǐ é sè, bonu hwɛɖɔtɔ́ lɛ ylɔ́ ɛ ɖɔ é ni wá ɖɔ lee nǔ ɔ jɛ gbɔn ɔ, bonu é ma ɖɔ nǔ e é mɔ ɔ, abǐ nǔ e é sè ɔ ǎ ɔ, hwɛ wɛ é hu, bɔ é jì nǔɖe ɔ, é na kpan.”—Lev. 5:1.

17. Nú è ɖɔ ɖɔ mɛɖé kún sɔ́ nyí Kúnnuɖetɔ́ Jehovah tɔn ó ɔ, nɛ̌ mǐ ka ɖó na wà nǔ xá ɛ gbɔn?

• “Mi ni ma kpé nǔ ɖebǔ xá mɛ e ɖɔ emi nyí [Klisanwun], bo ka nɔ ɖò aga lɛ̀ wɛ, abǐ mɛ nú jló wɛ, abǐ vodun sɛn wɛ, abǐ nǔyá ɖɔ nú mɛ wɛ, ahan nu mú wɛ, abǐ ajo ja wɛ é ó. Mi ɖó na ɖu nǔ xá mɛ mɔhunkɔtɔn lɔ vɔ́vɔ́ ǎ.”—1 Kɔ. 5:11.

• “Enyi mɛɖé wá gɔ̌n mitɔn, bo ma hɛn nǔkplɔnmɛ enɛ wá nú mi ǎ hǔn, mi ma yí i dó xwé mitɔn gbè ó; mi ma ka dó gbè è lɔ vɔ́vɔ́ ó.”—2 Jaan 10.

18. Etɛwu xɔ́ntɔn vívɛ́ towe lɛ ka ɖó na nyí mɛ ɖěɖee yí wǎn nú Jehovah lɛ é?

• “A dó nǔnywɛtɔ́ há ɔ, a na huzu nǔnywɛtɔ́; a ka dó xlonɔ há ɔ, a na wà nǔ dó hwiɖée wu.”—Nǔx. 13:20.

• “Mi ma blɛ́ miɖée ó: ‘Gbɛ̌ nyanya lɛ ɔ, walɔ ɖagbe e è ɖó ɔ wɛ ye nɔ hɛn gblé.’”—1 Kɔ. 15:33.

19. Etɛwu Kúnnuɖetɔ́ Jehovah tɔn lɛ ka nɔ ɖó wǔ zɔ nú toxóɖiɖɔ?

• “Ye nyí gbɛ̀ ɔ tɔn ǎ, lee nyɛ [Jezu] lɔ ma nyí gbɛ̀ ɔ tɔn ǎ é ɖɔhun.”—Jaan 17:16.

20. Etɛwu a ka ɖó na nɔ setónú nú acɛkpikpa lɛ?

• “Gbɛtɔ́ lɛ bǐ ɖó na setónú nú acɛkpikpa e ɖò tò ɔ nu lɛ, ɖó acɛkpikpa ɖé tíìn, bɔ Mawu ma na gbè tɔn ǎ; acɛkpikpa e tíìn lɛ ɔ, Mawu wɛ ɖó ye ayǐ.”—Hlɔ. 13:1.

21. Nú sɛ́n e gbɛtɔ́ dó lɛ é sɔ́ ta sɛ́n e Mawu dó lɛ é ɔ, nɛ̌ a ka na wà nǔ gbɔn?

• “È ɖó na setónú nú Mawu; é nyɔ́ hú è setónú nú gbɛtɔ́.”—Mɛ. 5:29.

22. Wemafɔ Biblu tɔn tɛ lɛ ka sixu d’alɔ we bɔ a na ɖó wǔ zɔ nú gbɛ̀ ɔ hwenu e a ɖò azɔ̌ ba wɛ é?

• “Akɔta ɖě sɔ́ na tɔ́n ahwan ɖě ǎ; ye ka tlɛ sɔ́ ɖò ahwanfunfun na kplɔ́n wɛ ǎ.”—Micée 4:3.

• “Togun ce, mi tɔ́n sín tɛntin [Babilɔnu Ðaxó ɔ] tɔn, bo ma hu hwɛ e hu wɛ é ɖè lɛ xá ɛ ó, mi ma ɖó mimǎ ɖò awě e na xò è lɛ mɛ ó.”—Nǔɖe. 18:4.

23. Ayiɖeɖayǐ hǔnmɛ tɛ lɛ a ka na cyan? Ðětɛ a ka na nyi alɔ na?

• ‘Jehovah . . . gbɛ́ wǎn nú mɛ e yí wǎn nú alǎnnúwiwa é.’—Ðɛh. 11:5.

• “Mi gbɛ́ wǎn nú nǔnyanyawiwa. Mi nɔ ɖókan dó nǔɖagbewiwa wu.”—Hlɔ. 12:9.

• “Nǔ e nyí nǔgbo ɔ bǐ, nǔ e è na ɖó sísí na é, nǔ e sɔgbe é, nǔ e mɛ́ é, nǔ e nɔ nyɔ́ mɛ nukúnmɛ é kpodo nǔ e wlí yɛ̌yi ɔ kpan; ayixa mitɔn ni nɔ nǔ enɛ lɛ jí.”—Fili. 4:8.

24. Etɛwu Kúnnuɖetɔ́ Jehovah tɔn lɛ ma ka nɔ lɛ́ yì sinsɛn ɖevo ǎ?

• “Mi sixu ɖu Aklunɔ sín nǔɖuɖu, bo lɛ́ ɖu yɛ nyanya lɛ sín nǔɖuɖu ǎ.”—1 Kɔ. 10:21.

• “Aklunɔ ɖɔ: ‘Mi . . . klán xá ye; mi ma ɖó alɔ nǔ e nyí suɖunú ɔ ɖě wu ó, enɛ ɔ, nyɛ na yí mi.’”—2 Kɔ. 6:17.

25. Nǔgbododó Biblu tɔn tɛ lɛ ka na d’alɔ we bɔ a na ɖ’alɔ ɖò nǔwiwa ɖé mɛ alǒ gbɔ?

• “Ye dó xɔ́ntɔn akɔta enɛ lɛ, ye jɛ walɔ yetɔn lɛ xwedó jí. Ye jɛ vodun yetɔn lɛ sɛn jí, bɔ enɛ ɔ nyí mɔ bɔ ye jɛ mɛ.”—Ðɛh. 106:35, 36.

• “Mɛ e ko kú lɛ sɔ́ tuùn nǔɖe ǎ.”—Nǔt. 9:5.

• “Ye nyí gbɛ̀ ɔ tɔn ǎ, lee nyɛ lɔ ma nyí gbɛ̀ ɔ tɔn ǎ é ɖɔhun.”—Jaan 17:16.

• “Ð’ayǐ xóxó ɔ, gbɛ̀ zinzan e mɛ e ma ɖi nǔ nú Mawu ǎ lɛ nɔ yí wǎn na ɔ wɛ mi ko zán ɖ’ayǐ kaka, amɔ̌ dìn ɔ, é kpé. Mi ko zán gbɛ̀ mitɔn ɖò hwɛhuhu mɛ, ɖò jlǒ nyanya lɛ mɛ, ɖò ahannumu mɛ, ɖò nǔɖuzɛjlɛ̌wu mɛ, ɖò ahannuzɛjlɛ̌wu kpodo nǔ baɖabaɖa sinsɛn lɛ kpan mɛ.”—1 Pi. 4:3.

26. Nɛ̌ kpɔ́ndéwú Biblu tɔn lɛ ka na d’alɔ we bɔ a na ɖu jijizán sín xwè alǒ gbɔ gbɔn?

• “Azǎn atɔngɔ́ ɔ gbè nǔgbo ɔ, axɔ́su ɔ ɖò jijizán tɔn sín xwè ɖu wɛ, bo ylɔ́ agɔ̌ ɖaxó ɖokpo, bo kplé azɔ̌watɔ́ tɔn lɛ bǐ. Axɔ́su ɔ ka zé mɛ e nɔ hɛn sinnuká n’i lɛ sín gǎn ɔ kpo mɛ e nɔ ɖa wɔxúxú n’i lɛ sín gǎn ɔ kpo ɖó tɛn ɖaxó ɖaxó ɖé mɛ, ɖò azɔ̌watɔ́ tɔn lɛ bǐ nukúnmɛ. É lɛ́ yí mɛ e nɔ hɛn sinnuká n’i lɛ sín gǎn ɔ, ɖó tɛn e mɛ é ko ɖè ɖ’ayǐ é . . . Loɔ, é dó kan kɔ nú mɛ e nɔ ɖa wɔxúxú n’i lɛ sín gǎn ɔ dó atín wu.”—Bǐb. 40:20-22.

• “Gbè ɖokpo ka wá sù, bɔ Elodu ɖò jijizán tɔn sín xwè ɖu wɛ; Elodiadi sín vǐ ɖyɔvǐ ɔ ka wá ɖúwe ɖò jonɔ lɛ nukɔn. We tɔn nyɔ́ Elodu nukúnmɛ, bɔ é dó akpá nú vǐ ɖyɔvǐ ɔ, bo xwlé nǔ d’eji ɖɔ é byɔ nǔ ɖebǔ ɔ, emi na na ɛ. Vǐ ɔ sín nɔ ka kplɔ́n nǔ i bɔ é ɖɔ: ‘Nǎ Jaan [Baptɛmublonumɛtɔ́] ɔ sín ta mì dó gannugbɛ́jɛ́ mɛ ɖò fí dìn tlolo.’ . . . É na gbè ɖɔ è ni yì gbò Jaan sín ta ɖò gankpá mɛ wá n’i.”—Mat. 14:6-10.

27. Etɛwu a ka jló na nɔ xwedó alixlɛ́mɛ mɛxo agun tɔn lɛ tɔn?

• “Mi setónú nú agunnukɔntɔ́ mitɔn lɛ, bo hwíhwɛ́ miɖée ɖò glɔ̌ yetɔn; ye nɔ ɖò nukún kpé dó mi wu wɛ hwebǐnu, ɖó ye ɖó na ɖó azɔ̌ e ye wà ɔ sín gbè nú Mawu. Enyi mi setónú nú ye ɔ, ye na wà azɔ̌ yetɔn kpodo xomɛhunhun kpo; enyi mi ma ka setónú nú ye ǎ ɔ, ye na wà azɔ̌ yetɔn wǔɖéwúɖé; enɛ ɔ, mi ka sɔ́ na mɔ lè ɖebǔ ɖ’emɛ ǎ.”—Ebl. 13:17.

28. Etɛwu é ka ɖò taji ɖɔ hwi kpo xwédo towe kpo ni ba hwenu bo nɔ kplɔ́n Biblu ɖò gbesisɔmɛ?

• ‘Nǔ e é nɔ yí wǎn na ɔ wɛ nyí kplɔ́n Jehovah tɔn, bo nɔ ɖò tamɛ lin d’ewu wɛ zǎn kéze. Mɛ mɔhunkɔtɔn cí atín e è tun nyi tɔ̀ tó ɔ ɖɔhun: hwetɔnnu sù ɔ, é nɔ sɛ́n, ama tɔn lɛ nɔ ɖò zinzɔ́n jí tɛgbɛ. Nǔ e é nɔ wà ɔ bǐ nɔ nyɔ́ n’i.’—Ðɛh. 1:2, 3.

29. Etɛwu a ka yí wǎn nú kplé lɛ yiyi kpo alɔɖiɖó ɖò kplé lɛ mɛ kpo?

• “Un na jla nǔ e a wà lɛ nú nɔví ce lɛ; un na kpa susu nú we ɖò togun mɛ.”—Ðɛh. 22:23.

• “Mi nú mǐ na kpé nukún dó mǐɖée wu, bo na flɔ́ wanyiyi sín zo dó lanmɛ nú mǐɖée, . . . bo na nɔ flɔ́ ɖagbewiwa sín zo dó lanmɛ nú mǐɖée . . . Mǐ ma jó agun e mɛ mǐ nɔ yì é dó, mɛ e ko nɔ bló mɔ̌, bɔ é ko má ye lɛ ɖɔhun ó. Loɔ, mǐ ni nɔ na kanmɛsyɛn mǐɖée, ɖó Aklunɔ sín azǎn ɔ ko ɖò sisɛkpɔ́ wɛ lee mɔ gbɔn wɛ mi ɖè dìn é.”—Ebl. 10:24, 25.

30. Azɔ̌ tɛ ka ɖò taji hugǎn bɔ Jezu zɔ́n mǐ?

• “Hǔn, mi yì bo kplɔ́n nǔ akɔta lɛ bǐ, bonu ye ni huzu ahwanvu ce. . . . Mi kplɔ́n nǔ ye, bonu ye ni setónú nú nǔ e un kplɔ́n mi lɛ bǐ.”—Mat. 28:19, 20.

31. Nú mǐ ɖò nǔ na dó azɔ̌ Axɔ́suɖuto ɔ tɔn lɛ takúnmɛ wɛ, alǒ ɖò alɔ dó nɔví lɛ wɛ ɔ, jijɔ tɛ ka nɔ nyɔ́ Jehovah nukúnmɛ?

• ‘Sɔ́ dɔkun towe lɛ dó sɔ́ Jehovah sù.’—Nǔx. 3:9.

• “Mɛ ɖokpo ɖokpo ɖó na na nǔ mɛ lee é lin gbɔn ɖò ayi tɔn mɛ é; ni ma na nǔ mɛ, bonu é lɛ́ vɛ́ n’i, abǐ ni nyí dandan sín nǔ n’i ó. Ðó Mawu yí wǎn nú mɛ e nɔ na nǔ mɛ kpodo xomɛhunhun kpo é.”—2 Kɔ. 9:7.

32. Wuvɛ̌ tɛ lɛ Klisanwun lɛ ka nɔ ɖó nukún?

• “Nǔ nyɔ́ nú mɛ e dóya na wɛ è ɖè, ɖó ye ɖò nǔ jlɔjlɔ wà wɛ wu lɛ, ɖó yetɔn wɛ nyí axɔ́suɖuto [jixwé] tɔn. Nǔ nyɔ́ nú mi, hwenu e è wá ɖò mi zun wɛ, bo ɖò mi ɖedó wɛ, bo ɖò nǔvú bǐ ɖó dó mi nu wɛ, ɖó nyɛ wutu é. Mi j’awǎ, bo hun xomɛ, ɖó ajɔ ɖaxó ɖò te kpɔ́n mi ɖò [jixwé]. Ðó, mɔ̌ wɛ è ko dóya nú gbeyiɖɔ Mawu tɔn e jɛ nukɔn nú mi lɛ gbɔn ɔ nɛ.”—Mat. 5:10-12.

33. Etɛwu é ka nyí wǔjɔmɛ bǔnɔ ɖé ɖɔ è ni bló baptɛm bo huzu ɖokpo ɖò Kúnnuɖetɔ́ Jehovah tɔn lɛ mɛ?

• ‘Xó towe nɔ dó xomɛhunhun nú mì, bo nɔ na awǎjijɛ mì. Jehovah, Mawu Nǔbǐwukpétɔ́, nyikɔ towe wɛ ɖò wǔ ce.’—Jel. 15:16.

Hwɛhwɛ ɔ, kpléɖókpɔ́ lɛdo tɔn kpo kpléɖókpɔ́ ɖaxó kpo ɖěɖee Kúnnuɖetɔ́ Jehovah tɔn lɛ nɔ bló lɛ é jí wɛ è nɔ bló baptɛm ɖè. Ðò xóɖiɖɔ baptɛm tɔn ɔ sín vivɔnu ɔ, xóɖɔtɔ́ ɔ na byɔ mɛ e jló na bló baptɛm lɛ é ɖɔ ye ni site, bo zé gbè dó jǐ dó na xósin nú nǔkanbyɔ we elɔ lɛ:

1. A ka ko lɛkɔ sín hwɛ towe lɛ gudo, bo zé hwiɖée jó nú Jehovah, lobo yí gbè nú hwlɛngán sín ali e é hun gbɔn Jezu Klisu jí é à?

2. A ka mɔ nukúnnú jɛ wu ɖɔ baptɛm towe na xlɛ́ ɖɔ a nyí ɖokpo ɖò Kúnnuɖetɔ́ Jehovah tɔn lɛ mɛ ɖò kɔnɖókpɔ́ mɛ kpo tutoblonunu Jehovah tɔn kpo à?

Xósin “ɛɛn” e mɛ e jló na bló baptɛm lɛ é na na nú nǔkanbyɔ enɛ lɛ é na xlɛ́ ɖɔ ye “sɔ́ nu [yetɔn] dó ɖɔ na ɖò mɛ bǐ nukɔn” ɖɔ emi ɖi nǔ nú gbɛxixɔ ɔ, lobo sɔ́ emiɖée jó nú Jehovah bǐ mlɛ́mlɛ́. (Hlɔ. 10:9, 10) É na nyɔ́ ɖɔ mɛ e jló na bló baptɛm lɛ é ni xoɖɛ, bo lin tamɛ dó nǔkanbyɔ enɛ lɛ jí jɛ nukɔn, enɛ ɔ, ye na sixu na xósin ɔ sɔgbe xá nǔ e jí yeɖesunɔ kú dó lɛ é.

A ka ko zé hwiɖée jó nú Jehovah ɖò ɖɛ mɛ, bo d’akpá n’i ɖɔ emi na sɛn éɖokponɔ géé, bo lɛ́ sɔ́ jlǒ tɔn wiwa dó ɖó nǔ taji hugǎn ɖò gbɛzán emitɔn mɛ à?

A ka kúdeji bǐ mlɛ́mlɛ́ ɖɔ emi ɖó na bló baptɛm dìn e ali tɔn ɖò hunhun nú we wɛ é à?

Etɛ é ka jɛxa ɖɔ è ni dó bá dó bló baptɛm? (1 Tim. 2:9, 10; Jaan 15:19; Fili. 1:10)

Mǐ ɖó na nɔ sɔnǔ “ɖò yɛ̌yi mɛ, ɖò jlɛ̌ jí” dó xlɛ́ ɖɔ mǐ “nɔ sí Mawu.” Enɛ wu ɔ, mɛ e jló na bló baptɛm lɛ é ɖó na dó tɔlɛwu e na ɖè mɛ̌ xlɛ́ lɛ é, alǒ nǔ e wu è wlan acagbe lɛ alǒ xógbe ɖevo lɛ dó é ǎ. Nǔsisɔ yetɔn ɖó na mɛ́, cí kluyɔɔ ǎ, zɛkpá ǎ, lobo ka jɛxa ninɔmɛ ɔ.

Nɛ̌ mɛɖé ka ɖó na wà nǔ gbɔn hwenu e é ɖò baptɛm bló wɛ é? (Luk. 3:21, 22)

Baptɛm Jezu tɔn nyí kpɔ́ndéwú ɖé nú Klisanwun lɛ ɖò baptɛm biblo linu égbé. É mɔ nǔ jɛ wu ɖɔ baptɛm biblo nyí afɔ taji ɖé bɔ è nɔ ɖé, lobɔ enɛ tɔ́n ɖò linlin tɔn kpo nǔwiwa tɔn lɛ kpo mɛ. Enɛ wu ɔ, fí e è nɔ bló baptɛm ɖè é ɖó na nyí ayihundatɛn ɖé, fí e è na lɛ̀ tɔ̀ ɖè é, alǒ fí e walɔ ɖevo ɖěɖee na ɖè yɛ̌yi sín nǔwiwa ɔ wu lɛ é na tɔ́n ɖè é ɖé ǎ; Klisanwun yɔyɔ̌ ɖé ka na wà nǔ cí nǔ ɖɔ ɖuɖeji ɖaxó ɖé wɛ é ɖó ɖɔhun ǎ. Awǎjijɛ sín hwenu ɖé wɛ baptɛm nyí có, è ɖó na j’awǎ ɔ b’ɛ na nɔ yɛ̌yi mɛ.

Nɛ̌ kplé lɛ yiyi ɖò gbesisɔmɛ kpo gbɛ̌didó xá agun ɔ kpo ka na d’alɔ we bɔ hwiɖée e a zé jó nú Jehovah é na kpa we gbɔn?

Enyi a bló baptɛm gudo ɔ, etɛwu é ka ɖò taji ɖɔ a ni kpó ɖò nǔkplɔnkplɔn mɛɖesunɔ tɔn kpo alɔɖiɖó ɖò sinsɛnzɔ́ ɔ mɛ hwɛhwɛ kpo sín tuto ɖagbe ɖé xwedó wɛ?