Lee È Bló Tuto nú Agun ɔ Bo Nɔ Lɛ́ Xlɛ́ Ali I Gbɔn É

ÐÒ WEMA nukɔntɔn e mɛsɛ́dó Pɔlu wlan sɛ́dó Kɔlɛntinu lɛ é mɛ ɔ, é ɖɔ nǔgbo taji ɖé dó Mawu wu. Pɔlu wlan ɖɔ: “Mawu nyí Mawu nǔ hannyahannya tɔn ǎ, loɔ fífá tɔn wɛ.” Enɛ gudo ɔ, é lɛ́ ɖɔ xó dó kplé agun tɔn lɛ wu bo ɖɔ: “È ni bló nǔ lɛ bǐ lee é jɛxa gbɔn é; è ni bló kpo tito kpo.”—1 Kɔ. 14:33, nwt; 14:40.

² Ðò wema-sɛ́dó-mɛ ɖokpo ɔ sín bǐbɛ̌mɛ ɔ, mɛsɛ́dó ɔ gb’akpá nú agun Kɔlɛnti tɔn, dó gbemanɔkpɔ́ e tíìn ɖò tɛntin yetɔn lɛ é wu. Pɔlu byɔ nɔví e ɖò finɛ lɛ é ɖɔ ye ni “ɖó gbè kpɔ́” lobo “nɔ bǔ ganji, bo ɖó linlin ɖokpo ɔ; ayixa [yetɔn] ni nɔ ɖɔ nǔ ɖokpo ɔ.” (1 Kɔ. 1:10, 11) Enɛ gudo ɔ, é ɖè wě xá ye dó nǔ vovo ɖěɖee ɖò bǔninɔ agun ɔ tɔn hɛn gblé wɛ lɛ é wu. É zán kpɔ́ndéwú agbaza gbɛtɔ́ tɔn tɔn dó xlɛ́ ɖɔ bǔninɔ kpo nǔwaɖókpɔ́ kpo ɖò dandan. É byɔ Klisanwun e ɖò agun ɔ mɛ lɛ é bǐ ɖɔ, enyi azɔ̌ ɖebǔ wɛ ye na bo ɖó ɔ, ye ɖó na nɔ kpé nukún dó yeɖée wu ɖò wanyiyi mɛ. (1 Kɔ. 12:12-26) Nǔwaɖókpɔ́ mɔhun e na nɔ mɛ e ɖò agun ɔ mɛ lɛ é tɛntin é xlɛ́ ɖɔ tito ɖó na nɔ agun ɔ mɛ.

³ Amɔ̌, nɛ̌ è ka na bló tito nú agun Klisanwun tɔn ɔ gbɔn? Mɛ̌ ka na tò nǔ lɛ? Tɛn tɛ mɛ nǔ ɖokpo ɖokpo ka na nɔ? Mɛ̌ mɛ̌ e è ka na sɔ́ bɔ ye na kpé nukún dó nǔ lɛ wu? Biblu kɔ́n sɛ̀ sín xósin nǔkanbyɔ enɛ lɛ tɔn jí nú mǐ.—1 Kɔ. 4:6.

È TÒ NǓ LƐ SƆGBE XÁ ALI MAWU TƆN

⁴ È ɖó agun Klisanwun tɔn ɔ ayǐ ɖò Pantekotu xwè 33 H.M. tɔn sín azǎn gbè. Etɛ agun xwè kanweko nukɔntɔn ɔ tɔn ka sixu kplɔ́n mǐ? È tò nǔ lɛ bo nɔ lɛ́ kpé nukún dó ye wu sɔgbe xá ali Mawu tɔn, enɛ xlɛ́ ɖɔ Mawu (théos ɖò Glɛkigbe mɛ) wɛ kp’acɛ na (kratos ɖò Glɛkigbe mɛ). Xókwín Glɛkigbe tɔn we enɛ lɛ tɔ́n ɖò 1 Piyɛ́ɛ 5:10, 11 mɛ. Nǔ e jɛ ɖò Jeluzalɛmu b’ɛ ko ɖibla yì xwè 2 000 mɔ̌ lɛ é xlɛ́ céɖécéɖé ɖɔ Mawu wɛ ɖó Klisanwun yí ami dó ɖè lɛ sín agun ɔ ayǐ. (Mɛ. 2:1-47) É nyí xɔ tɔn, bo lɛ́ nyí xwédo tɔn. (1 Kɔ. 3:9; 1 Tim. 3:15) Agun Klisanwun tɔn égbé tɔn ɔ nɔ xwedó kpɔ́ndéwú nǔ tito kpo azɔ̌wiwa kpo tɔn e è sɔ́ ɖ’ayǐ ɖò xwè kanweko nukɔntɔn ɔ mɛ é.

⁵ Ahwanvu 120 mɔ̌ wɛ è dó ɖó agun bǐbɛ̌mɛ tɔn ɔ ayǐ na. Gbigbɔ mímɛ́ gbà kɔn nyi mɛ nukɔntɔn enɛ lɛ jí bɔ nǔ e ɖò Jowɛli 3:1, 2 mɛ é jɛnu. (Mɛ. 2:16-18) Amɔ̌, ɖò gbè enɛ gbè ɖokpo ɔ, è lɛ́ bló baptɛm nú mɛ 3 000 mɔ̌ ɖò sin mɛ, bɔ ye byɔ agun Klisanwun yí ami dó ɖè lɛ tɔn mɛ. Ye wà nǔ sɔgbe xá xó Klisu tɔn lɛ, bo “nɔ ɖókan dó mɛsɛ́dó lɛ sín nǔkplɔnmɛ” wu. Enɛ gudo ɔ, Jehovah “nɔ dɔn mɛ e é na hwlɛngán lɛ wá gɔ́ nú ye” ayihɔngbe ayihɔngbe.—Mɛ. 2:41, 42, 47.

⁶ Mɛ e ɖò agun Jeluzalɛmu tɔn mɛ lɛ é sín kɛ́n ɖò jijɛji wɛ, kaka bɔ vɔsanúxwlémawutɔ́ ɖaxó Jwifu lɛ tɔn jɛ hwɛ, bo ɖɔ ɖɔ nǔkplɔnmɛ ahwanvu lɛ tɔn gbakpé Jeluzalɛmu tò ɔ bǐ mɛ. Vɔsanúxwlémawutɔ́ Jwifu gegě wá gɔ́ nú ahwanvu yɔyɔ̌ e ɖò agun Jeluzalɛmu tɔn mɛ lɛ é.—Mɛ. 5:27, 28; 6:7.

⁷ Jezu ɖɔ: “Mi na mɔ acɛ yí hwenu e [gbigbɔ mímɛ́] na jɛte wá mi jí é, bɔ mi na nyí kúnnuɖetɔ́ ce, ɖò Jeluzalɛmu, gbɔn Judée gbé ɔ bǐ jí, kpodo Samalíi kpan, kaka yì jɛ fí e gbɛ̀ ɔ kponu ɖó é.” (Mɛ. 1:8) Nǔ ka nyí mɔ̌ nǔgbo hwenu e yadonúmɛ ɖaxó ɖé fɔ́n ɖò Jeluzalɛmu ɖò kú Etyɛni tɔn gudo é, bɔ ahwanvu e ɖò finɛ lɛ é gbakpé Judée kpo Samalíi kpo gbéjí. Amɔ̌, fí ɖebǔ e ye yì é ɔ, ye nɔ kpó ɖò wɛnɖagbe ɔ jla wɛ, bo nɔ bló bɔ ahwanvu lɛ nɔ ɖò kpɔ́ sú d’eji wɛ, kaka jɛ Samalíinu ɖé lɛ jí. (Mɛ. 8:1-13) Nukɔnmɛ ɔ, ye kpéwú bo jla wɛnɖagbe ɔ mɛ e ma nyí Jwifu ǎ, bo ma gbò ada ǎ lɛ é. (Mɛ. 10:1-48) Wɛnɖagbejijlazɔ́ enɛ zɔ́n bɔ mɛ gegě huzu ahwanvu, bɔ è lɛ́ ɖó agun yɔyɔ̌ lɛ ayǐ ɖò fí ɖevo lɛ, b’ɛ sɔ́ nyí Jeluzalɛmu kɛɖɛ ǎ.—Mɛ. 11:19-21; 14:21-23.

⁸ Tuto tɛ lɛ è ka bló bonu agun yɔyɔ̌ e è ɖ’ayǐ lɛ é ɖokpo ɖokpo na nɔ tito jí, bɔ è na lɛ́ kpé nukún dó ye wu sɔgbe xá ali Mawu tɔn? Gbɔn gbigbɔ mímɛ́ Mawu tɔn gblamɛ ɔ, è sɔnǔ nú lɛngbɔ̌nyitɔ́ kpɛví lɛ bonu ye na kpé nukún dó lɛngbɔ̌kpó ɔ wu. Ðò tomɛ nukɔntɔn e Pɔlu kpo Baanabasi kpo yì bo yì ba agun lɛ kpɔ́n é hwenu ɔ, ye sɔ́ mɛxo agun tɔn lɛ. (Mɛ. 14:23) Luki e wlan Biblu ɔ sín akpáxwé ɖé é ɖɔ nǔ gegě dó kplé e Pɔlu bló xá mɛxo agun tɔn Efɛzi tɔn lɛ é wu. Pɔlu ɖɔ nú ye ɖɔ: “Mi hɛn ayi dó miɖée wu, bo hɛn ayi dó agun Mawu tɔn e nu [gbigbɔ] sɔ́ mi ɖó é wu, bonu mi na xlɛ́ ali agunví lɛ; agunví enɛ lɛ e Mawu xɔ gbɔn Vǐ éɖesunɔ tɔn sín kú [alǒ ‘hun,’ nwt] gblamɛ é.” (Mɛ. 20:17, 28) Ye jɛxa bo na nyí mɛxo agun tɔn, ɖó ye sɔgbe xá nǔ e Mawuxówema ɔ byɔ lɛ é wutu. (1 Tim. 3:1-7) È na gbè azɔ̌gbɛ́ Pɔlu tɔn Titu bɔ é sɔ́ mɛxo agun tɔn lɛ ɖò Klɛti.—Ti. 1:5.

⁹ Ee è ɖò agun gegě ɖó ayǐ wɛ é ɔ, mɛsɛ́dó lɛ kpo mɛxo agun tɔn e ɖò Jeluzalɛmu lɛ é kpo kpó ɖò nukúnkpénuwutɔ́ taji lɛ nyí wɛ nú agun Klisanwun tɔn xwè kanweko nukɔntɔn ɔ tɔn, ee ɖò kan vun wɛ gbɔn gbɛ̀ ɔ bǐ mɛ é. Ye nyí hagbɛ̌ alixlɛ́mɛtɔ́ nú agun lɛ.

¹⁰ Ðò wema e mɛsɛ́dó Pɔlu wlan sɛ́dó agun Efɛzi tɔn é mɛ ɔ, é tinmɛ ɖɔ nú agun Klisanwun tɔn ɔ wà nǔ sɔgbe xá gbigbɔ Mawu tɔn ɔ, é sixu kpó ɖò bǔ, gbɔn gbeyiyi nú tatɔ́ e Jezu Klisu nyí é gblamɛ. Mɛsɛ́dó ɔ byɔ Klisanwun e ɖò finɛ lɛ é ɖɔ ye ni tɛ́n kpɔ́n bo nɔ sɔ́ yeɖée hwe, lobo kpò ɖò ‘bǔteninɔ e gbigbɔ na’ ye é hɛn ɖó te wɛ, bo nɔ dó gbɛ̌ xá mɛ e ɖò agun ɔ mɛ lɛ é bǐ ɖò fífá mɛ. (Efɛ. 4:1-6) Enɛ gudo ɔ, é ɖè xó sín Ðɛhan 68:19 mɛ, bo dó xlɛ́ ɖɔ Jehovah sɔnǔ nú sunnu ɖé lɛ bɔ ye jɛxa bo na kpé nukún dó hudo agun ɔ tɔn lɛ wu ɖò gbigbɔ lixo, bo na nyí mɛsɛ́dó lɛ, gbeyiɖɔ lɛ, Mawuxójlatɔ́ lɛ, nukɔntɔ́ lɛ, kpo nǔkplɔnmɛtɔ́ lɛ kpo. Sunnu enɛ lɛ nyí nǔnina e gosin Jehovah gɔ́n lɛ é, bo na d’alɔ agun ɔ bǐ bɔ é na sù ɖò gbigbɔ lixo bo na nyɔ́ Mawu nukúnmɛ.—Efɛ. 4:7-16.

AGUN ÉGBÉ TƆN LƐ NƆ XWEDÓ KPƆ́NDÉWÚ MƐSƐ́DÓ LƐ TƆN

¹¹ Égbé ɔ, è nɔ xwedó kpɔ́ndéwú nǔ tito tɔn ɖokpo ɔ ɖò Kúnnuɖetɔ́ Jehovah tɔn lɛ sín agun lɛ bǐ mɛ. Ðò agun enɛ lɛ e ɖò bǔ gbɔn gbɛ̀ ɔ bǐ mɛ lɛ é mɛ ɔ, lɛngbɔ̌ ɖevo lɛ nɔ nɔ kpɔ́ bo nɔ d’alɔ nɔví sunnu kpo nɔví nyɔnu kpo yí ami dó ɖè lɛ. (Zak. 8:23) Jezu Klisu wɛ bló bɔ nǔ sixu nyí mɔ̌. É nɔ gbeji nú akpá e é dó é, bo ɖò kpɔ́ xá ahwanvu tɔn yí ami dó ɖè lɛ, “bɛ́sín dìn kaka yì jɛ gbè e gbè gbɛ̀ ɔ na vɔ dó é.” Mɛ ɖěɖee ɖò agun e fɔ́n bo ɖò jijɛji wɛ é mɛ wá wɛ lɛ é nɔ yí wɛnɖagbe Mawu tɔn ɔ, bo nɔ sɔ́ yeɖée jó nú Jehovah bǐ mlɛ́mlɛ́, lobo nɔ huzu ahwanvu Jezu tɔn gbɔn baptɛm blobló gblamɛ. (Mat. 28:19, 20; Mak. 1:14; Mɛ. 2:41) Ye nɔ tuùn ɖɔ Jezu Klisu “lɛngbɔ̌nyitɔ́ ɖagbe ɔ” wɛ nyí Gǎn nú lɛngbɔ̌kpó e mɛ Klisanwun yí ami dó ɖè lɛ kpo “lɛngbɔ̌ ɖevo lɛ” kpo bǐ ɖè é. (Jaan 10:14-16; Efɛ. 1:22, 23) Tuùn e ‘lɛngbɔ̌hwan ɖokpo’ enɛ nɔ tuùn kpo gbejininɔ kpo ɖɔ Klisu wɛ nyí gǎn ɔ é, kpo hwihwɛ́ e é nɔ hwíhwɛ́ éɖée ɖò “[deví] gbejinɔtɔ́, ayiɖotenanɔ” e Klisu sɔ́ é glɔ́ é kpo nɔ zɔ́n bɔ é nɔ kpó ɖò bǔ. Mi nú mǐ ni kpó ɖò jiɖe ɖó dó ali ɖokpo enɛ e nu è nɔ na nǔɖuɖu mǐ ɖè ɖò égbé é wu wɛ bǐ mlɛ́mlɛ́.—Mat. 24:45.

TUTOBLONUNU SINSƐN TƆN LƐ ZINZAN

¹² Bonu nǔɖuɖu gbigbɔ tɔn ɔ na dó sixu wá dó ganmɛ, bɔ è na lɛ́ jla wɛnɖagbe Axɔ́suɖuto ɔ tɔn cobɔ vivɔnu ɔ na wá ɔ, è ɖó tutoblonunu ɖé lɛ ayǐ. Sɛ́n tuùn tutoblonunu enɛ lɛ ɖò tò gegě mɛ, bɔ ye nɔ lɛ́ w’azɔ̌ xá yeɖée lɛ. Ye nɔ zɔ́n bɔ wɛnɖagbe ɔ jijla gbɔn gbɛ̀ ɔ bǐ mɛ nɔ bɔwǔ.

LEE È BLÓ TUTO NÚ ALAXƆ LƐ GBƆN É

¹³ Fí ɖebǔ e è ɖó alaxɔ ɖé ayǐ ɖè é ɔ, è nɔ sɔnǔ nú Wěɖegbɛ́ Alaxɔ tɔn e mɛ mɛxo agun tɔn atɔn alǒ hú mɔ̌ nɔ ɖè é ɖé, bɔ é nɔ kpé nukún dó azɔ̌ lɛ wu ɖò tò ɔ alǒ tò ɖěɖee ɖò acɛ alaxɔ enɛ tɔn mɛ lɛ é mɛ. Mɛ e ɖò wěɖegbɛ́ ɔ mɛ lɛ é ɖokpo nɔ nyí Wěɖegbɛ́ Alaxɔ tɔn ɔ sín titoblonunutɔ́.

¹⁴ È nɔ má agun e ɖò alaxɔ ɖokpo ɖokpo sín acɛ mɛ lɛ é dó lɛdo vovo lɛ mɛ. Lee lɛdo lɛ kló gbɔn é nɔ gbɔn vo nú yeɖée lɛ, sɔgbe xá ninɔmɛ tò ɔ tɔn, gbè e è nɔ dó ɖò xá ɔ mɛ é, kpo agun nabi e ɖò fí e è ɖè nú alaxɔ ɔ lɛ é kpo. È nɔ sɔ́ nukúnkpénuwutɔ́ lɛdo tɔn ɖé, b’ɛ nɔ d’alɔ agun ɖěɖee ɖò lɛdo ɖokpo ɖokpo mɛ lɛ é. Alaxɔ nɔ na alixlɛ́mɛ lɛ nukúnkpénuwutɔ́ lɛdo tɔn ɔ dó lee é na w’azɔ̌ tɔn gbɔn é wu.

¹⁵ Agun lɛ nɔ yí gbè nú tuto ɖěɖee tutoblonunu ɔ bló bɔ mɛ lɛ bǐ nɔ ɖu lè tɔn lɛ é. Ye nɔ yí gbè nú mɛxo agun tɔn ɖěɖee è sɔ́ bɔ ye nɔ kpé nukún dó azɔ̌ lɛ wu ɖò alaxɔ lɛ, lɛdo lɛ, kpo agun lɛ kpo mɛ lɛ é. Ye nɔ ɖó nukún ɖɔ deví gbejinɔtɔ́ ayiɖotenanɔ ɔ na na nǔɖuɖu gbigbɔ tɔn emi dó hwetɔnnu. Deví gbejinɔtɔ́ égbé tɔn ɔ nɔ setónú nú tatɔ́ e Klisu nyí é mlɛ́mlɛ́, bo nɔ zunfan nǔgbododó Biblu tɔn lɛ, lobo nɔ lɛ́ yí gbè nú alixlɛ́mɛ gbigbɔ mímɛ́ ɔ tɔn. Enyi mǐ bǐ nɔ bǔ bo nɔ wà azɔ̌ ɖó kpɔ́ ɔ, mǐ lɔ nɔ mɔ nyɔna ɖěɖee sín vivǐ Klisanwun xwè kanweko nukɔntɔn ɔ tɔn lɛ ɖu é, é wɛ nyí ɖɔ: “Agun nǔɖitɔ́ lɛ tɔn lɛ nɔ ɖò dǒ lí wɛ ɖò nǔɖiɖi mɛ, bo nɔ ɖò jijɛji wɛ ayihɔngbe ayihɔngbe.”—Mɛ. 16:5.