Xóta taji Biblu tɔn kúnkplá Axɔ́suɖuto Mawu tɔn. Jehovah na zán Axɔ́suɖuto enɛ bo na bló bɔ linlin e é ɖó nú ayikúngban ɔ ɖò bǐbɛ̌mɛ é na jɛnu. Etɛ ka nyí Axɔ́suɖuto ɔ? Nɛ̌ mǐ ka wà gbɔn bo tuùn ɖɔ é ɖò acɛ kpa wɛ dìn? Etɛ lɛ é ka ko wà? Gɔ́ na ɔ, etɛ lɛ é ka na wà ɖò sɔgudo? Nǔkplɔnkplɔn elɔ kpo we e na bɔ d’ewu lɛ é kpo na na xósin nú nǔkanbyɔ enɛ lɛ.

1. Etɛ ka nyí Axɔ́suɖuto Mawu tɔn? Mɛ̌ ka nyí Axɔ́su tɔn?

Axɔ́suɖuto ɔ, acɛkpikpa ɖé wɛ bɔ Jehovah Mawu ɖó ayǐ. Jezu Klisu e nyí Axɔ́su tɔn é ɖò acɛ kpa wɛ sín jixwé. (Matie 4:17; Jaan 18:36) Biblu ɖɔ dó Jezu wu ɖɔ: “É na ɖu axɔ́su . . . kaka sɔyi.” (Luki 1:32, 33) Ðó Jezu wɛ nyí Axɔ́su nú Axɔ́suɖuto Mawu tɔn wutu ɔ, é na kp’acɛ dó gbɛtɔ́ e ɖò ayikúngban jí lɛ é bǐ jí.

2. Mɛ̌ mɛ̌ e ka ɖò acɛ kpa xá Jezu wɛ?

Jezu ɖò acɛ kpa wɛ éɖokpo ǎ. Mɛ e gosin ‘gbè lɛ bǐ mɛ, togun lɛ bǐ mɛ, kpo tò lɛ bǐ kpo mɛ lɛ é na ɖu axɔ́su dó ayikúngban jí.’ (Nǔɖexlɛ́mɛ 5:9, 10) Mɛ nabi ka na kpa acɛ xá Klisu? Sín hwenu e Jezu wá ayikúngban jí é ɔ, Klisanwun livi mɔ̌kpan wɛ ko huzu ahwanvu tɔn. Amɔ̌, mɛ 144 000 jɛn na yì jixwé ɖò ye mɛ, bo na kpa acɛ xá Jezu. (Xà Nǔɖexlɛ́mɛ 14:1-4.) Klisanwun ɖevo e kpò ɖò ayikúngban jí lɛ é bǐ na huzu toví Axɔ́suɖuto ɔ tɔn.—Ðɛhan 37:29.

3. Nɛ̌ Axɔ́suɖuto Mawu tɔn ka hugǎn acɛkpikpa gbɛtɔ́ tɔn lɛ gbɔn?

Gbɛtɔ́ acɛkpatɔ́ lɛ tlɛ nɔ tɛ́n kpɔ́n bo na wà nǔ ɖagbe lɛ, ye ka ɖó hlɔnhlɔn bo na wà nǔ e nɔ jló ye lɛ é bǐ ǎ. Acɛkpatɔ́ ɖevo lɛ nɔ wá ɖyɔ ye. Nǔ e ba wɛ toví yetɔn lɛ ɖè é sixu nɔ ma ɖu ayi mɛ nú ye lɔmɔ̌. Amɔ̌, mɛ ɖevo ɖebǔ na ɖyɔ Jezu e nyí Axɔ́su nú Axɔ́suɖuto Mawu tɔn é gbeɖé ǎ. Mawu “ɖè axɔ́suɖuto e mɛɖé ma sixu gbà ǎ é ɖokpo tɔ́n.” (Daniyɛli 2:44) Jezu na kpa acɛ dó ayikúngban ɔ bǐ jí, é ka na ɖè mɛɖé ɖó vo ɖò mɛɖé mɛ ǎ. É nɔ yí wǎn nú mɛ, nyɔ́ xomɛ bo nɔ lɛ́ wà nǔ jlɔjlɔ, gɔ́ na ɔ, é na kplɔ́n gbɛtɔ́ lɛ ɖɔ ye ni nɔ wà nǔ xá yeɖée lɛ ɖò ali ɖokpo ɔ nu, é wɛ nyí ɖɔ ye ni nɔ yí wǎn nú mɛ, nyɔ́ xomɛ, bo nɔ lɛ́ wà nǔ jlɔjlɔ.—Xà Ezayíi 11:9.

4. Acɛkpikpa agbɔ̌nnɔ ɖé na kpa acɛ dó ayikúngban ɔ bǐ jí

Jezu Klisu ɖó hlɔnhlɔn tawun hú mɛ ɖěɖee kpa acɛ sín hwexónu lɛ é ɖebǔ. Xà Matie 28:18, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Nɛ̌ acɛ e Jezu ɖó é ka d’agba hú ee acɛkpatɔ́ ɖevo ɖebǔ ɖó é gbɔn?

Acɛkpikpa gbɛtɔ́ tɔn lɛ nɔ ɖyɔ hwɛhwɛ, bɔ fí e ye mɛ ɖokpo ɖokpo nɔ kpa acɛ dó ɖò ayikúngban ɔ jí é ɖó dogbó. Bɔ Axɔ́suɖuto Mawu tɔn ka lo? Xà Daniyɛli 7:14, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:

• Etɛwu é ka nyɔ́ ɖɔ è kún “na . . . gbà” Axɔ́suɖuto Mawu tɔn ó?

• Etɛwu é ka nyɔ́ ɖɔ é na kpa acɛ dó ayikúngban ɔ bǐ jí?

5. È ɖó na ɖyɔ acɛkpikpa gbɛtɔ́ tɔn Lɛ

Etɛwu Axɔ́suɖuto Mawu tɔn ka ɖó na ɖyɔ acɛkpikpa gbɛtɔ́ tɔn lɛ? Xò VIDEO ɔ, enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu é jí.

VIDEO: Etɛ ka Nyí Axɔ́suɖuto Mawu Tɔn?: Kpɛví Ɔ (1:41)

• Etɛ lɛ mɛ acɛkpikpa gbɛtɔ́ tɔn lɛ ka tɔ́n kɔ dó?

Xà Nǔnywɛtɔ́xó 8:9, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:

• A ka mɔ ɖɔ Axɔ́suɖuto Mawu tɔn ɖó na ɖyɔ acɛkpikpa gbɛtɔ́ tɔn lɛ à? Etɛwu?

6. Axɔ́suɖuto Mawu tɔn ɖó acɛkpatɔ́ ɖěɖee mɔ nukúnnú jɛ mǐ wu lɛ é

Ðó Axɔ́su mǐtɔn Jezu ko nyí gbɛtɔ́ kpɔ́n wutu ɔ, é sixu “jiya xá mǐ ɖò gǎnmaɖó mǐtɔn lɛ mɛ.” (Eblée lɛ 4:15) ‘Gbè lɛ bǐ mɛ, togun lɛ bǐ mɛ, kpo tò lɛ bǐ kpo mɛ’ wɛ Jehovah cyan sunnu kpo nyɔnu kpo gbejinɔtɔ́ 144 000 ɖěɖee na kpa acɛ xá Jezu lɛ é sín.—Nǔɖexlɛ́mɛ 5:9.

• A ka mɔ ɖɔ é dó gbɔ nú mɛ ɖɔ Jezu kpo mɛ e na kpa acɛ xá ɛ lɛ é kpo tuùn lee gbɛzán gbɛtɔ́ tɔn cí é à? Etɛwu?

7. Axɔ́suɖuto Mawu tɔn ɖó sɛ́n ɖagbe hugǎn Lɛ

Acɛkpikpa lɛ nɔ dó sɛ́n ɖěɖee ye lin ɖɔ ye sixu hɛn lè wá nú toví yetɔn lɛ bo lɛ́ cyɔn alɔ ye jí lɛ é. Axɔ́suɖuto Mawu tɔn lɔ ɖó sɛ́n ɖěɖee toví tɔn lɛ ɖó na xwedó lɛ é. Xà 1 Kɔlɛntinu lɛ 6:9-11, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:

• Nú mɛ bǐ xwedó sɛ́n Mawu tɔn lɛ ɔ, nɛ̌ gbɛ̀ ɔ ka na cí bɔ a lin?a

• Hwɛ ka lin ɖɔ é sɔgbe ɖɔ Jehovah ni ɖó nukún ɖɔ toví Axɔ́suɖuto ɔ tɔn lɛ ni nɔ setónú nú sɛ́n enɛ lɛ à? Etɛwu?

• Etɛ ka xlɛ́ ɖɔ mɛ ɖěɖee ma nɔ setónú nú sɛ́n enɛ lɛ ǎ é sixu wá ɖyɔ?—Kpɔ́n wemafɔ 11.

ETƐ LƐ A KA KPLƆ́N?

Axɔ́suɖuto Mawu tɔn ɔ, acɛkpikpa ɖé wɛ bo tíìn nǔgbo ɖò jixwé lobo na kpa acɛ dó ayikúngban ɔ bǐ jí.

Vɔ̌gbɔnji

• Mɛ̌ mɛ̌ e ka nyí acɛkpatɔ́ Axɔ́suɖuto Mawu tɔn tɔn lɛ?

• Nɛ̌ Axɔ́suɖuto Mawu tɔn ka hugǎn acɛkpikpa gbɛtɔ́ tɔn lɛ ɖebǔ gbɔn?

• Nǔ ɖětɛ lɛ mɔ̌ Jehovah ka nɔ ɖó nukún ɖò toví Axɔ́suɖuto ɔ tɔn lɛ sí?

KÍJÉ

Gbějé nǔ e Jezu kplɔ́n mɛ dó fí e Axɔ́suɖuto ɔ ɖè é wu é kpɔ́n.

“Axɔ́suɖuto Mawu Tɔn ɔ, Ayi Towe Mɛ Wɛ É ka Ðè À?” (Xóta Ɛntɛnɛti jí tɔn)

Etɛwu Kúnnuɖetɔ́ Jehovah tɔn lɛ ka wá gbeta ɔ kɔn bo nɔ nɔ gbeji nú Axɔ́suɖuto Mawu tɔn hú acɛkpikpa gbɛtɔ́ tɔn?

Ye Sɔ́ Yeɖée Jó nú Axɔ́suɖuto Mawu Tɔn (1:43)

Gběje nǔ e Biblu ɖexlɛ́ dó gbɛtɔ́ 144 000 ɖěɖee Jehovah cyan, bɔ ye na kpa acɛ xá Jezu lɛ é wu é kpɔ́n.

“Mɛ̌ Mɛ̌ E ka Xwè Jixwé?” (Xóta Ɛntɛnɛti jí tɔn)

Etɛ ka zɔ́n bɔ nawe e ɖò gankpá mɛ é ɖé kúdeji ɖɔ Mawu kɛɖɛ jɛn sixu bló bɔ gbɛ̀ e mɛ nǔjlɔjlɔwiwa ɖè é ɖé na tíìn?

“Un Wá Mɔ Nǔ Jɛ Lee È Na Ðeɖɛ Nǔagɔwiwa Gbɔn É Wu” (Réveillez-vous! novembre 2011)

Axɔ́suɖuto Mawu tɔn ko jɛ acɛ kpa jí ɖò jixwé sín 1914. Xwè enɛ xwè ɖokpo ɔ wɛ azǎn gudogudo tɔn acɛkpikpa gbɛtɔ́ lɛ tɔn lɔ bɛ́. Nɛ̌ mǐ ka wà gbɔn bo tuùn mɔ̌? Mǐ na gbéjé nǔ e Biblu ɖɔ ɖ’ayǐ é, nǔ ɖěɖee ɖò jijɛ wɛ ɖò gbɛ̀ ɔ mɛ lɛ é, kpo lee gbɛtɔ́ lɛ nɔ wà nǔ gbɔn é kpo sín 1914 é kpɔ́n.

1. Etɛ Biblu ka ɖɔ ɖ’ayǐ?

Wema Biblu tɔn Daniyɛli ɖexlɛ́ ɖɔ Axɔ́suɖuto Mawu tɔn na jɛ acɛ kpa jí ɖò vivɔnu hwenu e è ylɔ́ ɖɔ “xwè tɛnwe” é tɔn. (Daniyɛli 4:13, 14) Xwè kanweko mɔ̌kpan gudo ɔ, Jezu ylɔ́ hwenu ɖokpo enɛ ɔ ɖɔ “hwenu e ganmɛ [akɔta lɛ] tɔn na vɔ dó é,” bo kplɔ́n mɛ ɖɔ é kún ko wá vivɔnu ó. (Luki 21:24) Lee mǐ na wá mɔ gbɔn é ɔ, xwè tɛnwe lɛ wá vivɔnu ɖò 1914.

2. Nǔ tɛ lɛ ka ɖò jijɛ wɛ sín 1914? Nɛ̌ gbɛtɔ́ lɛ ka ɖò nǔ wà gbɔn wɛ sín hwenɛnu?

Ahwanvu Jezu tɔn lɛ kanbyɔ ɛ ɖɔ: “Ani wɛ ka na ɖè hwenu e a na lɛkɔ wá ayikúngban jí fí ɔ, kpodo hwenu e gbɛ̀ elɔ na vɔ dó ɔ kpan xlɛ́ mǐ?” (Matie 24:3) Bo na dó na xósin ye ɔ, Jezu ɖɔ nǔ gegě ɖ’ayǐ bɔ ye na jɛ, hwenu e é na huzu Axɔ́su Axɔ́suɖuto Mawu tɔn tɔn, bo na jɛ acɛ kpa jí ɖò jixwé gudo é. Nǔ lɛ ɖě wɛ nyí ahwan, adɔ kpo ayikúngban dánwǔ kpo. (Xà Matie 24:7.) Biblu lɛ́ ɖɔ ɖ’ayǐ ɖɔ ɖò “azǎn gudogudo lɛ” mɛ ɔ, walɔ gbɛtɔ́ lɛ tɔn na zɔ́n bɔ gbɛ̀ na “vɛwǔ.” (2 Timɔtée 3:1-5) Ninɔmɛ enɛ lɛ kpo walɔ enɛ lɛ kpo ko jɛ wě tawun sín 1914.

3. Etɛwu ninɔmɛ gbɛ̀ ɔ tɔn lɛ ka wá nyla sɔmɔ̌ sín hwenu e Axɔ́suɖuto Mawu tɔn jɛ acɛ kpa jí é?

Jezu huzu Axɔ́su Axɔ́suɖuto Mawu tɔn tɔn b’ɛ na nɔ zaan gudo é ɔ, é tɔ́n ahwan Satáan kpo awoví lɛ kpo. Satáan cí ahwan. Biblu ɖɔ ɖɔ “è zé è nyi dó ayikúngban jí, é kpodo wɛnsagun tɔn lɛ kpo.” (Nǔɖexlɛ́mɛ 12:9, 10, 12) Xomɛ sin Satáan ɖesu, ɖó é tuùn ɖɔ è na sú kún emitɔn dó. Enɛ wu ɔ, é zɔ́n bɔ wuvɛ̌ kpo yajiji kpo gɔ́ ayikúngban ɔ bǐ jí. Enɛ d’alɔ mǐ bɔ mǐ mɔ nukúnnú jɛ nǔ e wu ninɔmɛ gbɛ̀ ɔ tɔn lɛ nyla sɔmɔ̌ é mɛ! Axɔ́suɖuto Mawu tɔn na ɖeɖɛ tagba enɛ lɛ bǐ.

BA DÒ NÚ NǓ D’EJI

4. Azǎnlinlɛn Biblu tɔn dlɛ́n alɔ dó 1914

VIDEO: Axɔ́suɖuto Mawu Tɔn Jɛ Acɛ Kpa Jí Ðò 1914 (5:02)

Mawu bló bɔ Babilɔnu hwexónu tɔn sín Axɔ́su Nabukodonɔzɔ́ɔ kú dlɔ̌ nǔɖɔɖ’ayǐ tɔn ɖé. Dlɔ̌ enɛ kpo tinmɛ tɔn e Daniyɛli na é kpo xlɛ́ ɖɔ é kúnkplá acɛkpikpa Nabukodonɔzɔ́ɔ tɔn kpo Axɔ́suɖuto Mawu tɔn kpo.—Xà Daniyɛli 4:14.a

Xà Daniyɛli 4:17-23, enɛ gudo hǔn, mi zán gbǎví ɔ dó na xósin nú nǔkanbyɔ e bɔ d’ewu lɛ é

• (A) Etɛ Nabukodonɔzɔ́ɔ ka mɔ ɖò dlɔ̌ tɔn mɛ?—Kpɔ́n wemafɔ 17 kpo 18 kpo.

• (B) Etɛ ka na jɛ dó atín ɔ wu?—Kpɔ́n wemafɔ 20.

• (C) Etɛ ka na jɛ ɖò vivɔnu “xwè tɛnwe” lɛ tɔn?—Kpɔ́n wemafɔ 23.

Lee Atín E È Mɔ Ðò Dlɔ̌ ɔ Mɛ É Kúnkplá Axɔ́suɖuto Mawu Tɔn Gbɔn É

NǓÐƆÐ’AYI Ɔ (Daniyɛli 4:17-33)

Acɛkpikpa

(A) Atín ɖaxó ɖé

È ɖó acɛkpikpa ɔ te

(B) “Mi gbò atín ɔ,” bo jó dó nyi mɔ̌ nú “xwè tɛnwe” ni wá yì

Acɛkpikpa ɔ lɛ́ jɛ tɛn tɔn mɛ

(C) “Mɛ na lɛ́ wá ɖu axɔ́su”

Jijɛnu tɔn nukɔntɔn:

• (D) Mɛ̌ atín ɔ ka nɔte na?—Kpɔ́n wemafɔ 19.

• (E) Nɛ̌ è ka ɖó acɛkpikpa tɔn te gbɔn? —Xà Daniyɛli 4:26-30.

• (F) Etɛ ka jɛ dó Nabukodonɔzɔ́ɔ wu ɖò vivɔnu “xwè tɛnwe” lɛ tɔn?—Xà Daniyɛli 4:31-33.

JIJƐNU TƆN NUKƆNTƆN

Acɛkpikpa

(D) Nabukodonɔzɔ́ɔ, Axɔ́su Babilɔnu tɔn

È ɖó acɛkpikpa ɔ te

(E) Ðò 606 J.H.M. tɔn gudo ɔ, Nabukodonɔzɔ́ɔ sín taglomɛ zun aji bɔ é sɔ kpéwú bo kpa acɛ ǎ nú xwè tɛnwe tlɔlɔ

Acɛkpikpa ɔ lɛ́ jɛ tɛn tɔn mɛ

(F) Taglomɛ Nabukodonɔzɔ́ɔ tɔn lɛ́ wá jɛ ganji bɔ é lɛ́vɔ jɛ acɛ kpa jí

Jijɛnu tɔn wegɔ́:

• (G) Mɛ̌ atín ɔ ka nɔte na?—Xà 1 Tan 29:23.

• (H) Nɛ̌ è ka ɖó acɛkpikpa tɔn te gbɔn? Nɛ̌ mǐ ka wà gbɔn bo tuùn ɖɔ è ɖó te, b’ɛ kpò ɖò mɔ̌ kaka jɛ hwenu e Jezu ɖò ayikúngban jí é?—Xà Luki 21:24.

• (I) Hwetɛnu acɛkpikpa enɛ ka lɛ́ jɛ tɛn tɔn mɛ? Ðò fitɛ?

JIJƐNU TƆN WEGƆ́

Acɛkpikpa

(G) Axɔ́su Izlayɛli tɔn ɖěɖee sɔ́ acɛkpikpa Mawu tɔn sín afɔ ɖó te lɛ é

È ɖó acɛkpikpa ɔ te

(H) È sú kún dó nú Jeluzalɛmu, bɔ axɔ́su kúnkan Izlayɛli tɔn nɔte nú xwè 2520

Acɛkpikpa ɔ lɛ́ jɛ tɛn tɔn mɛ

(I) Jezu nyí Axɔ́su nú Axɔ́suɖuto Mawu tɔn bo jɛ acɛ kpa jí ɖò jixwé

5. Gbɛ̀ ɔ huzu sín 1914

Xò VIDEO ɔ.

VIDEO: Gbɛ̀ ɔ Huzu Sín 1914 (1:10)

Jezu ko ɖɔ lee ninɔmɛ gbɛ̀ ɔ tɔn lɛ na cí hwenu e é na huzu Axɔ́su gudo é ɖ’ayǐ. Xà Luki 21:9-11, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Ninɔmɛ enɛ lɛ ɖětɛ wu a ka ɖ’ayi, alǒ sè xó dó?

Mɛsɛ́dó Pɔlu ko tinmɛ lee gbɛtɔ́ lɛ na nɔ wà nǔ gbɔn ɖò acɛkpikpa gbɛtɔ́ tɔn sín azǎn gudogudo tɔn lɛ mɛ é. Xà 2 Timɔtée 3:1-5, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Walɔ enɛ lɛ ɖětɛ wu a ka ɖ’ayi ɖò gbɛtɔ́ lɛ sí ɖò égbé?

6. Axɔ́suɖuto Mawu tɔn sín acɛkpikpa ɖó na sɔ́ akpakpa mǐ

Xà Matie 24:3, 14, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:

• Azɔ̌ taji tɛ ka xlɛ́ ɖɔ Axɔ́suɖuto Mawu tɔn ɖò acɛ kpa wɛ dìn?

• Nɛ̌ a ka sixu ɖ’alɔ ɖò azɔ̌ enɛ mɛ gbɔn?

Axɔ́suɖuto Mawu tɔn ɖò acɛ kpa wɛ dìn, bɔ gbè e gbè é na kpa acɛ dó ayikúngban ɔ bǐ jí é ko ɖò kɛnnɛkɛnnɛ. Xà Eblée lɛ 10:24, 25, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Etɛ mǐ mɛ ɖokpo ɖokpo ka ɖó na wà dìn e “azǎn ɔ . . . ɖò sisɛkpɔ́ wɛ” é?

ETƐ LƐ A KA KPLƆ́N?

Nǔɖɔɖ’ayǐ Biblu tɔn, azǎnlinlɛn tɔn, kpo ninɔmɛ gbɛ̀ ɔ tɔn lɛ kpo xlɛ́ ɖɔ Axɔ́suɖuto Mawu tɔn ɖò acɛ kpa wɛ dìn. Mǐ nɔ xlɛ́ ɖɔ mǐ ɖi nǔ nú Axɔ́suɖuto enɛ gbɔn wɛnɖagbe ɔ jijla d’ewu kpo kplé agun tɔn lɛ yiyi kpo gblamɛ.

Vɔ̌gbɔnji

• Etɛ ka jɛ ɖò vivɔnu xwè tɛnwe e xó è ɖɔ ɖ’ayǐ ɖò wema Biblu tɔn Daniyɛli mɛ é tɔn?

• Etɛ ka zɔ́n bɔ hwɛ ka kúdeji ɖɔ Axɔ́suɖuto Mawu tɔn jɛ acɛ kpa jí ɖò 1914?

• Nɛ̌ a ka sixu xlɛ́ ɖɔ a ɖi nǔ ɖɔ Axɔ́suɖuto ɔ ɖò acɛ akpa wɛ dìn gbɔn?

KÍJÉ

Gbějé nǔ e hwenuxó-wlantɔ́ lɛ kpo mɛ ɖevo lɛ kpo ɖɔ dó huzuhuzu e tíìn ɖò gbɛ̀ ɔ mɛ sín 1914 é wu é kpɔ́n.

“Hwetɛnu Walɔ Ðagbe Gbɛtɔ́ lɛ Tɔn ka Huzu Ajijimɛ?” (Réveillez-vous! avril 2007)

Xà lee nǔɖɔɖ’ayǐ e ɖò Matie 24:14 mɛ é wà ɖagbe nú nya ɖé gbɔn é.

“Un Yí Wǎn nú Baseball Hú Nǔ Bǐ!” (Atɔxwɛ No. 3 2017)

Nɛ̌ mǐ ka wà gbɔn bo tuùn ɖɔ nǔɖɔɖ’ayǐ e ɖò Daniyɛli wemata 4gɔ́ ɔ mɛ é kúnkplá Axɔ́suɖuto Mawu tɔn?

“Hwetɛnu Axɔ́suɖuto Mawu Tɔn ka Jɛ Acɛ Kpa Jí? (Akpáxwé 1)” (Atɔxwɛ [Flansegbe] 1^er octobre 2014)

Etɛ ka xlɛ́ ɖɔ “xwè tɛnwe” e xó è ɖɔ ɖò Daniyɛli wemata 4gɔ́ ɔ mɛ é wá vivɔnu ɖò 1914?

“Hwetɛnu Axɔ́suɖuto Mawu Tɔn ka Jɛ Acɛ Kpa Jí? (Akpáxwé 2)” (Atɔxwɛ [Flansegbe] 1^er novembre 2014)

Axɔ́suɖuto Mawu tɔn ko ɖò acɛ kpa wɛ. Zaanɖé dìn ɔ, é na bló huzuhuzu ɖaxó lɛ ɖò ayikúngban jí. Mǐ ni gbéjé nǔ ɖagbe ɖěɖee a sixu ɖó nukún ɖò acɛkpikpa Axɔ́suɖuto ɔ tɔn glɔ́ é ɖé lɛ kpɔ́n.

1. Nɛ̌ Axɔ́suɖuto Mawu tɔn ka na bló bɔ fífá kpo nǔjlɔjlɔwiwa kpo na lɛ́ tíìn ɖò ayikúngban ɔ jí gbɔn?

Jezu e nyí Axɔ́su Axɔ́suɖuto Mawu tɔn tɔn é na sú kún dó nú mɛ nyanya lɛ kpo acɛkpikpa lɛ kpo ɖò ahwan Haamagedɔni tɔn hwenu. (Nǔɖexlɛ́mɛ 16:14, 16) Ðò hwe enɛ nu ɔ, akpá Biblu tɔn elɔ na jɛnu bǐ mlɛ́mlɛ́: “Zaanɖé dìn ɔ, mɛdídá sɔ́ na ɖè ǎ.” (Ðɛhan 37:10) Gbɔn Axɔ́suɖuto ɔ gblamɛ ɔ, Jezu na bló bɔ fífá kpo nǔjlɔjlɔwiwa kpo na kpé ayikúngban ɔ bǐ jí.—Xà Ezayíi 11:4.

2. Nɛ̌ gbɛ̀ ka na cí hwenu e jlǒ Mawu tɔn na nyí wiwa ɖò ayikúngban jí é?

Ðò acɛkpikpa Axɔ́suɖuto Mawu tɔn tɔn glɔ́ ɔ, “[ayikúngban] ɔ na nyí hwɛjijɔnɔ lɛ tɔn, bɔ ye na nɔ [jí] kaka sɔyi.” (Ðɛhan 37:29) Dǒ nukúnmɛ kpɔ́n ɖɔ a ɖò gbɛ̀ ɖé mɛ, bɔ nǔjlɔjlɔwatɔ́ e yí wǎn nú Jehovah kpo yeɖée lɛ kpo é kɛɖɛ wɛ gɔ́ mɛ! Mɛ ɖě sɔ́ na jɛ azɔn ǎ, bɔ mɛ bǐ na nɔ gbɛ̀ kaka sɔyi.

3. Nú è sú kún dó nú mɛ nyanya lɛ gudo ɔ, etɛ Axɔ́suɖuto Mawu tɔn ka na wà?

Nú è sú kún dó nú mɛ nyanya lɛ gudo ɔ, Jezu e nyí Axɔ́su ɔ é na kpa acɛ nú xwè 1 000. Ðò táan enɛ mɛ ɔ, Jezu kpo mɛ 144 000 e na kpa acɛ xá ɛ lɛ é kpo na d’alɔ gbɛtɔ́ lɛ bɔ ye na nyí mɛ maɖóblɔ̌. Ðò vivɔnu xwè 1 000 ɔ tɔn ɔ, gbɛtɔ́ lɛ bǐ na ɖó awǎjijɛ, ɖó ye na ɖò tónú sè nú sɛ́n Jehovah tɔn lɛ wɛ. Enɛ gudo ɔ, Jezu na zé acɛkpikpa ɔ jó nú Tɔ́ tɔn Jehovah. Jehovah sín ‘nyikɔ na nyí nǔ sísí,’ lee é ma ko nyí gbɔn kpɔ́n ǎ é. (Matie 6:9, 10) É na xlɛ́ ɖɔ Jehovah wɛ nyí Acɛkpatɔ́ ɖagbe e nɔ kpé nukún dó toví tɔn lɛ wu é. Enɛ gudo ɔ, Jehovah na sú kún dó nú Satáan, awoví lɛ, kpo mɛ ɖevo ɖebǔ e na wá gbeta ɔ kɔn bo na fɔ́n gǔ dó acɛkpikpa Tɔn jí é kpo. (Nǔɖexlɛ́mɛ 20:7-10) Ninɔmɛ ɖagbe ɖěɖee Axɔ́suɖuto Mawu tɔn na hɛn wá lɛ é na nɔ ayǐ kaka sɔyi.

BA DÒ NÚ NǓ D’EJI

4. Axɔ́suɖuto Mawu tɔn na ɖó nǔ acɛkpikpa gbɛtɔ́ tɔn lɛ nu

“Gbɛtɔ́ ɖě nɔ kpa acɛ gannaganna nú nɔzo tɔn, bo nɔ wà nǔ dó wǔ tɔn.” (Nǔnywɛtɔ́xó 8:9) Jehovah na zán Axɔ́suɖuto tɔn dó ɖó nǔ nǔagɔwiwa enɛ nu.

Xà Daniyɛli 2:44 kpo 2 Tɛsalonikinu lɛ 1:6-8 kpo, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:

• Etɛ Jehovah kpo Vǐ tɔn Jezu kpo ka na wà nú acɛkpikpa gbɛtɔ́ tɔn lɛ, kpo mɛ ɖěɖee nɔ nɔ gudo nú acɛkpikpa enɛ lɛ é kpo?

• Nɛ̌ nǔ ɖěɖee a ko kplɔ́n dó Jehovah kpo Jezu kpo wu lɛ é ka na we ganjɛwu ɖɔ nǔwiwa yetɔn lɛ na sɔgbe bo na lɛ́ ɖò jlɛ̌ jí gbɔn?

5. Jezu wɛ nyí Axɔ́su ɖagbe hugǎn ɔ

Ðó Jezu wɛ nyí Axɔ́su Axɔ́suɖuto Mawu tɔn tɔn wutu ɔ, é na wà nǔ e na hɛn lè wá nú toví tɔn ayikúngban jí tɔn lɛ é gegě. Xò VIDEO ɔ, bo kpɔ́n lee Jezu ko ɖexlɛ́ ɖɔ emi jló na d’alɔ gbɛtɔ́ lɛ, bɔ Mawu na hlɔnhlɔn emi bɔ emi na wà mɔ̌ gbɔn é.

VIDEO: Jezu Ðè Nǔ E Axɔ́suɖuto ɔ Na Wà lɛ É Xlɛ́ (1:13)

Hwenu e Jezu ɖò ayikúngban jí é ɔ, é sɔ́ nǔ e Axɔ́suɖuto ɔ na wà lɛ é sín nu ɖó te. Nyɔna e è slɛ́ ɖò fí lɛ é ɖětɛ ɖó nukún wɛ hwɛ ka ɖè tawun? Xà wemafɔ ɖěɖee zɔn kpɔ́ xá nyɔna enɛ lɛ, bo ɖɔ xó dó ye wu lɛ é.

6. Axɔ́suɖuto Mawu tɔn na hɛn sɔgudo ɖagbeɖagbe ɖé wá

VIDEO: Sɔgudo Ðagbe ɖé Sín Xlɛ̌ Klewun Ðé (4:38)

Xà Ðɛhan 145:16, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Nɛ̌ tuùn e a tuùn ɖɔ Jehovah na “na nǔɖuɖu nǔ e ko sixu ɖò gbɛ̀ é bǐ” é ka cí nú we?

ETƐ LƐ A KA KPLƆ́N?

Axɔ́suɖuto Mawu tɔn na bló nǔ e Mawu jló ɖɔ é ni wà é. É na bló bɔ ayikúngban ɔ bǐ na huzu palaɖisi bɔ mɛ ɖagbe lɛ na gɔ́ jí, bo na sɛn Jehovah kaka sɔyi.

Vɔ̌gbɔnji

• Nɛ̌ Axɔ́suɖuto Mawu tɔn ka na bló bɔ nyikɔ Jehovah tɔn na nyí nǔ mímɛ́ gbɔn?

• Etɛwu mǐ ka sixu kúdeji ɖɔ Axɔ́suɖuto Mawu tɔn na bló bɔ akpá Biblu tɔn lɛ na jɛnu?

• Nǔ ɖěɖee Axɔ́suɖuto ɔ na bló lɛ é ɖětɛ ɖó nukún wɛ hwɛ ka ɖè tawun?

KÍJÉ

Ba dò nú nǔ e Haamagedɔni nyí é.

“Etɛ ka Nyí Ahwan Haamagedɔni Tɔn?” (Xóta Ɛntɛnɛti jí tɔn)

Gbějé nǔ ɖěɖee na jɛ ɖò hwenu e Jezu ylɔ́ ɖɔ “ya ɖaxó ɔ” é hwenu lɛ́ é kpɔ́n.

“Etɛ ka Nyí Ya Ðaxó Ɔ?” (Xóta Ɛntɛnɛti jí tɔn)

Kpɔ́n lee xwédo lɛ sixu nɔ kpɔ́ bo lin tamɛ dó nyɔna sɔgudo tɔn Axɔ́suɖuto ɔ tɔn lɛ jí gbɔn é.

Kpɔ́n Hwiɖée Sɛ́dó Ðò Palaɖisi Mɛ (1:50)

Ðò xóta, “Nǔkanbyɔ Gegě Ðó Akpɔ nú Mì” mɛ ɔ, kpɔ́n lee mɛ e nɔ fɔ́n gǔ ɖò toxóɖiɖɔ linu é ɖé mɔ sinkɔn ɖěɖee ɖó nukún wɛ é ɖè lɛ é gbɔn é.

“Biblu Nɔ Huzu Gbɛzán Mɛtɔn” (Atɔxwɛ [Flansegbe] 1^er janvier 2012)