NǓKPLƆNKPLƆN 44
Xwè lɛ Bǐ ka Nɔ Nyɔ́ Mawu Nukúnmɛ À?
Jehovah ba ɖɔ mǐ ni ɖu gbɛ̀ sín vivǐ, bo nɔ lɛ́ j’awǎ hweɖelɛnu. Amɔ̌, xwè lɛ bǐ ka nyɔ́ nukún tɔn mɛ à? Nɛ̌ mǐ ka sixu ɖè wǎn e mǐ yí nú Jehovah é xlɛ́ ɖò akpá enɛ xwé gbɔn?
1. Etɛwu xwè gegě ma ka nɔ nyɔ́ Jehovah nukúnmɛ ǎ?
É sixu kpaca we bɔ a na kplɔ́n ɖɔ xwè gegě sɔ́ ta nǔkplɔnmɛ Biblu tɔn lɛ alǒ gosin aca pagáwun tɔn lɛ mɛ. Xwè mɔ̌hun lɛ ɖé lɛ ɖó kancica xá sinsɛn nǔvú, awovínúwiwa alǒ jinjɔn linlin lindɔ̌n jɔmakú tɔn jí. Bɔ ɖevo lɛ jinjɔn xɛxó lɛ alǒ nǔkplɔnmɛ e kúnkplá taɖagbe lɛ é jí. (Ezayíi 65:11) Jehovah gbà akpá nú mɛsɛntɔ́ tɔn lɛ ɖɔ: “Mi . . . klán xá ye; mi ma ɖó alɔ nǔ e nyí suɖunú ɔ ɖě wu ó.”—2 Kɔlɛntinu lɛ 6:17.a
2. Nɛ̌ nǔ ka nɔ cí nú Jehovah dó xwè ɖěɖee nɔ wlí yɛ̌yi masɔgbe nú gbɛtɔ́ lɛ é wu?
Jehovah gb’akpá nú mǐ ɖɔ mǐ ni ma lɔn bo “ɖeji dó gbɛtɔ́ wú” ó. (Xà Jelemíi 17:5.) Xwè ɖé lɛ nɔ wlí yɛ̌yi nú acɛkpatɔ́ lɛ alǒ sɔja lɛ. Ðevo lɛ nɔ sɔ́ wuntun tò tɔn lɛ alǒ mɛɖéesijijɛ ɖó ajo. (1 Jaan 5:21) É ɖò mɔ̌ có, ɖevo lɛ nɔ sɔ́ nǔwiwa toxóɖiɖɔ tɔn lɛ, alǒ nǔwiwa gbɛ̌ta e nɔ jɛhun dó nukɔnyiyi tò tɔn jí lɛ é tɔn ɖó ajo. Nú mǐ nɔ wlí yɛ̌yi masɔgbe nú gbɛtɔ́ ɖé alǒ gbɛ̌ta ɖé, ɖò taji ɔ, ee nɔ flɔ́ zo dó glɔ̌ nú linlin ɖěɖee sɔ́ ta linlin Jehovah tɔn lɛ é ɔ, nɛ̌ nǔ ka na cí n’i?
3. Walɔ tɛ lɛ ka sixu zɔ́n bɔ è ma na yí gbè nú xwè ɖé à?
Biblu gbɛ́ ‘ahannumu, nǔɖuzɛjlɛ̌wu kpo ahannuzɛjlɛ̌wu kpo.’ (1 Piyɛ́ɛ 4:3) Nǔwazɛjlɛ̌wu kpo nǔbliblíwiwa kpo nɔ tɔ́n ɖò xwè ɖé lɛ mɛ. Nú mǐ na kpò ɖò xɔ́ntɔn Jehovah tɔn lɛ nyí wɛ ɔ, mǐ ɖó na ɖó wǔ zɔ nú nǔwalɔ blíblí mɔ̌hun lɛ.
BA DÒ NÚ NǓ D’EJI
Mǐ ni kpɔ́n lee a sixu wá gbeta e nǔnywɛ kpé lɛ é kɔn ɖò xwèɖuɖu kpo nǔwiwa lɛ kpo kpáxwé, bá dó sixu nyɔ́ Jehovah nukúnmɛ gbɔn é
4. Nɔ nyi alɔ nú xwè ɖěɖee ma nɔ wlí yɛ̌yi nú Jehovah ǎ lɛ é
Xà Efɛzinu lɛ 5:10, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
Cobonu mǐ na wá gbeta ɔ kɔn bá ɖu xwè ɖé alǒ gbɔ ɔ, etɛ wu mǐ ka ɖó na mɔ nǔ jɛ hwɛ̌?
Xwè tɛ lɛ ka gbakpé fí e a nɔ nɔ é?
A ka lin ɖɔ xwè enɛ lɛ nɔ nyɔ́ Jehovah nukúnmɛ à?
Ði kpɔ́ndéwú ɔ, a ko kan nǔ e Mawu nɔ lin dó jijizánxwe lɛ wu é byɔ hwiɖée kpɔ́n à? Biblu ɖɔ mɛsɛntɔ́ Jehovah tɔn ɖě xó gbeɖé b’ɛ ɖu jijizánxwe ǎ, amɔ̌, é ɖɔ jijizánxwe we sín xó bɔ mɛ ɖěɖee ma nɔ sɛn Jehovah ǎ lɛ é wɛ ɖu. Xà Bǐbɛ̌mɛ 40:20-22 kpo Matie 14:6-10 kpo. Enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
Etɛ jijizánxwe we lɛ bǐ ka ɖó ɖò bǔ?
Sɔgbe kpo tan Biblu tɔn enɛ lɛ kpo ɔ, nɛ̌ nǔ ka nɔ cí nú Jehovah dó jijizánxwe lɛ wu bɔ a lin?
Amɔ̌, a sixu ɖò kinkanbyɔ hwiɖée wɛ ɖɔ: ‘Ðò Jehovah nukúnmɛ ɔ, é ka nyla dóo ɖɔ má ɖ’alɔ ɖò jijizánxwe ɖé, alǒ xwè ɖevo e sɔ́ ta Biblu é mɛ à?’ Xà Tíntɔ́n 32:1-8. Enɛ gudo hǔn, xò VIDEO ɔ bonu mi ɖɔ xó ɖó kpɔ́ dó nǔkanbyɔ e bɔ d’ewu lɛ é jí.
Etɛwu mǐ ka ɖó na nɔ tɛ́n kpɔ́n bo na nɔ tuùn nǔ e nɔ nyɔ́ Jehovah nukúnmɛ é?
Nɛ̌ mǐ ka sixu wà mɔ̌ gbɔn?
Nú xwè ɖé nyla Mawu nukúnmɛ ɔ, lee è na tuùn gbɔn é
É ka junjɔn nǔkplɔnmɛ ɖěɖee sɔ́ ta Biblu lɛ é jí wɛ à? Nú a na tuùn hǔn, ba dò nú fí e é jɔ sín lɛ é.
É nɔ wlí yɛ̌yi masɔgbe nú gbɛtɔ́ lɛ, gbɛ̌ta lɛ, alǒ wuntun tò tɔn lɛ wɛ à? Mǐ nɔ wlí yɛ̌yi nú Jehovah hú nǔ bǐ, bo nɔ lɛ́ ɖeji dó wǔ tɔn ɖɔ é na ɖeɖɛ tagba gbɛ̀ ɔ tɔn lɛ.
Aca tɔn lɛ kpo nǔwalɔ e kúnkplá ɛ lɛ é kpo ka sɔ́ ta nǔgbododó Biblu tɔn lɛ wɛ à? Mǐ ɖó na nɔ mimɛ̌ jí ɖò walɔ lixo.
5. D’alɔ mɛ ɖevo lɛ bonu ye ni ɖó sísí nú nǔ e a ɖi nǔ na lɛ é
Nú mɛ ɖevo lɛ ɖò cɔcɔ dó nú we wɛ, bonu a na ɖ’alɔ ɖò xwè ɖěɖee ma nyɔ́ Jehovah nukúnmɛ ǎ lɛ é mɛ ɔ, é sixu vɛwǔ nú we tawun bɔ a na ɖɔ eǒ. Yì agbɔ̌n jí bo tinmɛ gbeta towe lɛ kpo azɔ̌tuùntuùn kpo. Nú a na mɔ lee a na wà mɔ̌ gbɔn é sín kpɔ́ndéwú ɖé hǔn, xò VIDEO ɔ.
Xà Matie 7:12, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
Sɔgbe kpo wemafɔ enɛ kpo ɔ, a ɖó na ɖɔ nú nǔmaɖitɔ́ e ɖò xwédo towe mɛ lɛ é ɖɔ ye kún ɖó na ɖu xwè lě lě ó wɛ à?
Nɛ̌ a ka sixu na jiɖe mɛ e ɖò xwédo towe mɛ lɛ é ɖɔ nú emi na bo ma tlɛ sɔ́ nɔ ɖu xwè xá ye ǎ ɔ, emi ka yí wǎn nú ye, bɔ nǔ yetɔn nɔ lɛ́ ɖu ayi mɛ nú emi gbɔn?
6. Jehovah ba ɖɔ mǐ ni ɖó awǎjijɛ
Jehovah ba ɖɔ mǐ ni nɔ ɖu hwenu ɖagbe lɛ sín vivǐ xá xwédo mǐtɔn kpo xɔ́ntɔn mǐtɔn lɛ kpo. Xà Nǔnywɛtɔ́xó 8:15, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Nɛ̌ wemafɔ enɛ ka xlɛ́ ɖɔ Jehovah ba ɖɔ mǐ ni ɖó awǎjijɛ gbɔn?
Jehovah ba ɖɔ mǐ ni nɔ ɖè ayi ɖ’ayǐ, bo nɔ lɛ́ ɖu hwenu ɖagbe lɛ sín vivǐ ɖó kpɔ́. Xò VIDEO ɔ, bo kpɔ́n lee enɛ ko jɛ wě tawun ɖò kpléɖókpɔ́ akɔjɔkplé tɔn mǐtɔn lɛ jí gbɔn é.
Xà Galatinu lɛ 6:10, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
Xwè kpaa lɛ jɛn mǐ na ɖu dandan cobá wà ɖagbe nú mɛ ɖevo lɛ à?
Nǔnamɛ alɔkpa tɛ ka nɔ zɔ́n bɔ mǐ nɔ ɖó awǎjijɛ: Nǔ e mǐ na mɛ, ɖó mǐ ɖó na na nǔ mɛ ɖó xwè wutu é wɛ à, alǒ ee mǐ na mɛ ɖó mǐ ɖó jlǒ tɔn wutu é?
Kúnnuɖetɔ́ gegě nɔ bló tuto hwenu awǎjijɛ tɔn bǔnɔ ɖé lɛ tɔn hweɖelɛnu dó vǐ yetɔn lɛ tamɛ, bo tlɛ nɔ lɛ́ na nǔ ye dó fyán ye. Nú a ɖó vǐ lɛ wɛ nyí ɔ, nǔ bǔnɔ tɛ lɛ mɔ̌ a ka sixu bló nú ye?
MƐÐÉ LƐ ÐƆ: “Fí e xwè ɖé jɔ sín é wɛ nyí xó ɔ ǎ. Nǔ taji ɔ wɛ nyí ɖɔ è ni zán hwenu ɖagbe ɖó kpɔ́ xá xwédo mɛtɔn kpo xɔ́ntɔn mɛtɔn lɛ kpo.”
Etɛ hwɛ ka na ɖɔ nú mɛ mɔ̌hun?
ETƐ LƐ A KA KPLƆ́N?
Jehovah ba ɖɔ mǐ ni nɔ j’awǎ ɖó kpɔ́ xá xwédo mǐtɔn kpo xɔ́ntɔn mǐtɔn lɛ kpo. É ɖò mɔ̌ có, é lɛ́ ba ɖɔ mǐ ni nyi alɔ nú xwè ɖěɖee ma nɔ nyɔ́ nukún tɔn mɛ ǎ lɛ é.
Vɔ̌gbɔnji
Nú xwè ɖé nyla ɖò Jehovah nukúnmɛ kpo é gbɔ kpo ɔ, nǔ tɛ lɛ a ka sixu kanbyɔ bo na dó tuùn?
Nɛ̌ mǐ ka sixu d’alɔ xwédo mǐtɔn kpo xɔ́ntɔn mǐtɔn lɛ kpo, bɔ ye na mɔ nukúnnú jɛ gbeta e kɔn mǐ wá dó xwè lɛ wu é mɛ gbɔn?
Nɛ̌ a ka wà gbɔn bo tuùn ɖɔ Jehovah ba ɖɔ mǐ ni ɖó awǎjijɛ, bo nɔ lɛ́ ɖè ayi ɖ’ayǐ?
KÍJÉ
Kpɔ́n xwè tawun tawun e Klisanwun lɛ ma nɔ ɖu ǎ é ɖé lɛ.
“Etɛwu Kúnnuɖetɔ́ Jehovah Tɔn lɛ Ma ka Nɔ Ðu Xwè ɖé lɛ Ǎ?” (Xóta Ɛntɛnɛti jí tɔn)
Kpɔ́n hwɛjijɔ ɖěɖee wu mǐ ɖi nǔ ɖɔ jijizánxwe lɛ kún nyɔ́ Mawu nukúnmɛ ó é ɛnɛ.
“Etɛwu Kúnnuɖetɔ́ Jehovah Tɔn lɛ Ma ka Nɔ Ðu Jijizán Sín Xwè lɛ Ǎ?” (Xóta Ɛntɛnɛti jí tɔn)
Kpɔ́n lěe yɔkpɔ́vú e yí wǎn nú Jexóva lɛ́ é sixú hɛn xomɛ tɔn hun ɖo xwe lɛ́ hwenu gbɔn é.
Klisanwun livi mɔ̌kpan ko wá gbeta ɔ kɔn bo nɔ ɖu Natáaxwe ǎ. Nɛ̌ nǔ ka cí nú ye dó gbeta yetɔn wu?
“Ye Mɔ Nǔ E Nyɔ́ Hugǎn É” (Atɔxwɛ [Flansegbe], 1er décembre 2012)
a Kpɔ́n Tinmɛ E Ðò Vivɔnu É 5gɔ́ ɔ, bá mɔ nǔ e a na wà ɖò ninɔmɛ ɖé lɛ mɛ, hwenu e mɛ ɖevo lɛ ɖò xwè ɖu wɛ é é.