Nǔgbo Biba

Nú xwè afatɔ́n mɔkpan ɔ, mɛ ɖě tuùn xósin nǔkanbyɔ enɛ tɔn tawun ǎ. Bɔ azɔn baɖabaɖa lɛ kpo jɛmɛji lɛ kpo hu gbɛtɔ́ livi mɔkpan hwe ɔ nu. Gudo mɛ ɔ, nǔnywɛ xwitixwitizɔ́watɔ́ lɛ wá mɔ xósin ɔ. Ye wá mɔ ɖɔ hwɛhwɛ ɔ, azɔnkwín lɛ, ɖi miklɔ́bu lɛ, alǒ wǎnvú lɛ wɛ nɔ dó azɔn mɛ. Nǔgbo enɛ tuùntuùn ko d’alɔ mɛ lɛ bɔ ye gbò kpò nyi ali jí nú azɔn gegě bo lɛ́ kpé nukún dó azɔn enɛ lɛ wu, b’ɛ zɔ́n bɔ gbɛtɔ́ liva mɔkpan dɔ́ji bo lɛ́ nɔ ganji ɖò lanmɛ.

Bɔ nǔkanbyɔ taji ɖevo lɛ ka lo? Ðagbe tɛ a ka lin ɖɔ nǔgbo e kúnkplá nǔkanbyɔ elɔ lɛ é biba sixu wà nú we?

• Mɛ̌ ka nyí Mawu?

• Mɛ̌ ka nyí Jezu Klisu?

• Etɛ ka nyí Axɔ́suɖuto Mawu tɔn?

• Etɛ sɔgudo ka hɛn nu?

Gbɛtɔ́ livi mɔkpan ko mɔ xósin nǔkanbyɔ enɛ lɛ tɔn, bo bló bɔ gbɛzán yetɔn kpɔ́n te? Hwi lɔ sixu ɖu lè xósin lɛ tɔn.

A KA SIXU MƆ NǓGBO Ɔ À?

A sixu kanbyɔ hwiɖée ɖɔ: “É ka nyɔ́ bló bɔ è na tuùn nǔgbo ɔ dó nǔ ɖebǔ wu à?” È na ɖɔ xó jɔ xó ɔ, é cí ɖɔ nǔgbo ɔ tuùntuùn dó nǔ gegě wu fɔ́n bo ɖò wǔ vɛ́ wɛ ɖɔhun? Aniwu?

Mɛ gegě sɔ́ ɖeji dó acɛkpikpa lɛ, ajɔ̌tɔ́ lɛ, alǒ xójlazɔ́watɔ́ lɛ wu ɖɔ ye na ɖɔ nǔgbo nú emi ǎ. É nɔ vɛwǔ nú ye bɔ ye na tuùn nǔgbo ɔ ɖó vo nú linlin e mɛɖé ɖó kpowun lɛ é; nǔgbo adaɖé lɛ kpo adingban e è ɖó tlɔlɔ lɛ é kpo ɔ, è nɔ sɔ́ bǐ xwlé mɛ bɔ ye nɔ cí xó ɖejid’ewu ɖɔhun. Ðò ninɔmɛ enɛ e mɛ jiɖiɖe ma sɔ́ ɖè ǎ, bɔ adingbanxó lɛ lɔ ka sukpɔ́ ɖè é ɔ, mɛ lɛ sɔ́ nɔ yí gbè nú xó e nyí nǔgbo tawun lɛ é ǎ, bo tlɛ nɔ gbɛ́ lè e é na hɛn wá nú ye é lɔ.

Wuvɛ̌ enɛ lɛ ɖò finɛ có, é ka nyɔ́ bló bɔ è na mɔ xósin jɔ xósin lɛ nú nǔkanbyɔ taji hugǎn gbɛmɛ tɔn lɛ. Gbɔn nɛ̌ é? Gbɔn nǔ e a ko nɔ wà gbè bǐ gbè lɛ é ɖé lɛ wiwa gblamɛ.

NǓGBO BIBA

Ðó bǎ ɖé mɛ ɔ, a nɔ ba nǔgbo ɔ gbè bǐ gbè. Mǐ ni kpɔ́n ninɔmɛ Jessica tɔn. É ɖɔ: “Azǐn gbɛ́ vǐ nyɔnu ce sɔmɔ̌ bɔ kpɛví ɖé vɔ́vɔ́ tlɛ ko kpé b’ɛ na kú.” Cobonu Jessica na xɔ nǔɖuɖu nú vǐ tɔn ɔ, é nɔ byɔ ɖɔ é ni kanbyɔ ɖɔ azǐn ɖ’emɛ à jí hwɛ̌. “Nǔ nukɔntɔn e un nɔ wà é wɛ nyí ɖɔ un nɔ xà wema e zɔn nǔɖuɖu ɔ jí é ganji hwɛ̌, bo nɔ kpɔ́n ajɔxanú e ɖ’emɛ lɛ é. Enɛ gudo ɔ, un nɔ ba dò nú nǔ yì nukɔn bo tlɛ nɔ ylɔ́ azɔ̌xwé e ɖetɔ́n é bo nɔ kanbyɔ ɖɔ è dó azǐn kpɛɖé mɛ wɛ à jí. Un nɔ lɛ́ ba dò nú wema ɖejid’ewu ɖevo e sixu na mì ganjɛwu ɖɔ azɔ̌xwé ɔ nɔ xwedó ayijayǐ sín sɛ́n lɛ dó ɖa nǔɖuɖu yetɔn lɛ é.”

Lee a nɔ ba nǔgbo ɔ gbɔn gbè bǐ gbè é sixu nɔ ma syɛn sɔ Jessica tɔn, amɔ̌ éɖɔhun ɔ, a sixu zán wlɛnwín elɔ lɛ dó ba xósin nú nǔkanbyɔ towe lɛ:

• Ba kúnnuɖenú lɛ.

• Ba nǔdo gɔ́ na.

• Mɔ nǔ jɛ wu ɖɔ fí e a ba nǔdo ɔ ɖè lɛ é ɖó jiɖe.

Wlɛnwín enɛ lɛ ɖokpo ɔ sixu d’alɔ we bɔ a na mɔ xósin jɔ xósin nú nǔkanbyɔ taji gbɛmɛ tɔn lɛ. Gbɔn nɛ̌ é?

WEMA ÐOKPO E MƐ NǓGBO Ɔ ÐÈ É

Nú Jessica ɖò nǔgbo Biblu tɔn lɛ ba wɛ ɔ, é nɔ zán wlɛnwín ɖokpo ɔ e é nɔ zán dó xɔ nǔɖuɖu nú vǐ tɔn é. É ɖɔ: “Nǔxixa kpo sɔxwixwe kpo kpodo nǔdobiba ganji kpo d’alɔ mì bɔ un mɔ nǔgbo e ɖò Biblu mɛ é.” Jessica ɖɔhun ɔ, gbɛtɔ́ livi mɔkpan ko kplɔ́n nǔ dó nǔ e Biblu ɖɔ dó nǔkanbyɔ elɔ lɛ jí lɛ é:

• Etɛwu mǐ ka ɖò gbɛ̀ ɔ mɛ?

• Etɛ ka nɔ jɛ ɖò kú gudo?

• Etɛwu wuvɛ̌ mimɔ ka tíìn?

• Etɛ wà wɛ Mawu ka ɖè bo na ɖó nǔ wuvɛ̌ mimɔ lɛ bǐ nu?

• Nɛ̌ mǐ ka sixu wà gbɔn bɔ xwédo mǐtɔn na ɖó awǎjijɛ?

A sixu mɔ xósin jɔ xósin nú nǔkanbyɔ enɛ lɛ kpo ɖevo lɛ kpo, gbɔn Biblu xixa kpo nǔdo biba ɖò www.pr418.com jí kpo gblamɛ.