Kpan akɔ́n Sadɔ́ki ɖɔhun

1-2. Mɛ̌ ka nyí Sadɔ́ki? (1 Tan 12:23, 27-29)

DǑ NUKÚN ninɔmɛ ɔ mɛ kpɔ́n. Súnnu 340000 jɛjí kplé bá sɔ́ Davídi axɔ́sú ɖó Izlayɛ́li togun ɔ bǐ nu. Yě nɔ sókan e ɖo malínmálín dó Eblɔ́n é mɛ nú azǎn atɔn. Yě ɖo nǔ ko wɛ, ɖo xó ɖɔ wɛ, bo ɖo han ji dó kpa susu nú Jexóva wɛ. (1 Tan 12:40) Mɛ wínnyáwínnyá ɖé ɖo ahwan ɔ mɛ bo nɔ nyí Sadɔ́ki. Mɛ gěgé sixú ko nɔ ma ɖ’ayi wǔ tɔn. Amɔ̌, Jexóva ɖ’ayi wǔ tɔn bo ba ɖɔ mǐ ní tuun ɖɔ é ɖo mɛ lɛ́ mɛ. (Xa 1 Tan 12:23, 27-29.) Mɛ̌ ka nyí Sadɔ́ki?

² Sadɔ́ki ɔ, vɔ̌sánúxwlémawutɔ́ wɛ n’i, bo w’azɔ̌ alɔ ɖo alɔ mɛ xá vɔ̌sánúxwlémawutɔ́ ɖaxó Abiyatáa. Mawu lɛ́ ná nǔnywɛ́ kpó nǔwúkpíkpé kpó Sadɔ́ki tawun b’ɛ nɔ mɔ nǔ jɛ linlin tɔn lɛ́ mɛ. (2 Sam. 15:27, nwt) Ényí mɛ lɛ́ ɖó hudó wěɖexámɛ e nǔnywɛ́ kpé lɛ́ é tɔn ɔ, yě nɔ wá Sadɔ́ki gɔ́n. É lɛ́ nyí mɛɖé bo kpankɔ́n. Ðo xóta élɔ́ mɛ ɔ, mǐ ná kpɔ́n lěe Sadɔ́ki ɖe akɔ́nkpinkpan xlɛ́ gbɔn é.

3. (a) Étɛ́wú é ka byɔ́ ɖɔ mɛsɛntɔ́ Jexóva tɔn lɛ́ ní kpankɔ́n? (b) Étɛ́ jí mǐ ka ná ɖɔ xó dó ɖo xóta élɔ́ mɛ?

³ Ðo azǎn gǔdo gúdo tɔn élɔ́ lɛ́ mɛ ɔ, Satáan ɖo zo flɔ́ dó glɔ̌ nú ya e dó nú togun Mawu tɔn wɛ é ɖe é wɛ. (1 Pi. 5:8) Ée mǐ ná ɖo te kpɔ́n Jexóva nú é ná sú kún dó nú Satáan kpó gbɛ tɔn nyanya ɔ kpó é ɔ, é ná byɔ́ ɖɔ mǐ ní kpankɔ́n. (Ðɛh. 31:25) Mi nú mǐ ní gbéjé ali e nu mǐ sixú xwedó kpɔ́ndéwú akɔ́nkpinkpan tɔn Sadɔ́ki tɔn ɖe é atɔn kpɔ́n.

NƆ GǓDO NÚ AXƆ́SÚÐUTO MAWU TƆN

4. Étɛ́wú togun Jexóva tɔn ka ɖó hudó akɔ́nkpinkpan tɔn bá dó nɔ gǔdo nú Axɔ́súɖuto Mawu tɔn? (Kpɔ́n ɖiɖe ɔ lɔmɔ̌.)

⁴ Ðó mǐ nyí togun Jexóva tɔn wútu ɔ, mǐ nɔ nɔ gǔdo nú Axɔ́súɖuto Mawu tɔn kpó ayi mǐtɔn bǐ kpó, amɔ̌ hwɛhwɛ ɔ, é nɔ byɔ́ ɖɔ mǐ ní ɖó akɔ́nkpinkpan cóbá wa mɔ̌. (Mat. 6:33) Ði kpɔ́ndéwú ɔ, ɖo gbɛ nyanya élɔ́ mɛ ɔ, mǐ ɖó ná ɖó akɔ́nkpinkpan hwɛ̌ cóbó zán gbɛ sɔgbe xá nǔgbódodó Jexóva tɔn lɛ́, bo lɛ́ jlá wɛn ɖagbe Axɔ́súɖuto ɔ tɔn. (1 Tɛ. 2:2) Gɔ́ ná ɔ, hwɛhwɛ wɛ é nɔ byɔ́ akɔ́nkpinkpan cóbɔ è ná kpo ɖo wǔ ɖó zɔ wɛ ɖo toxóɖiɖɔ linu ɖo gbɛ élɔ́ e fɔ́n bo ɖo kínklán d’é jí wɛ é mɛ. (Jaan 18:36) Mɛ e ɖo togun Jexóva tɔn mɛ lɛ́ é gěgé nɔ ɖí xwi xá akwɛ́yózo; è nɔ xo yě alǒ wlí yě dó gan mɛ, ɖó yě nɔ gbɛ́ ɖɔ émí kún ná ɖ’alɔ ɖo toxóɖiɖɔ núwiwa lɛ́ mɛ alǒ fun ahwan ó.

5. Étɛ́wú Sadɔ́ki ka ɖó hudó akɔ́nkpinkpan tɔn bá dó nɔ gǔdo nú Davídi?

⁵ Axɔ́sú e Davídi nyí é sín xwe ɖu gbé wɛ Sadɔ́ki yi ɖo Eblɔ́n kpowun ǎ. Ahwannú wɛ é sɔ́ bo yi dɔ̌n, bo ɖo gbesisɔmɛ bo ná fun ahwan. (1 Tan 12:39) É ɖo gbesisɔmɛ bo ná xwedó Davídi yi ahwan lobo hwlɛ́n Izlayɛ́li sín kɛntɔ́ tɔn lɛ́ fɛn mɛ. Sadɔ́ki sixú ko nɔ ma mɔ nǔ káká ɖé kpɔ́n ɖo ahwanfunfun linu, amɔ̌, é kpankɔ́n tawun.

6. Nɛ̌ Davídi ka sɔ́ kpɔ́ndéwú akɔ́nkpinkpan tɔn ɖagbe ɖé ɖ’ayǐ nú Sadɔ́ki gbɔn? (Ðɛhan 138:3)

⁶ Fítɛ́ vɔ̌sánúxwlémawutɔ́ Sadɔ́ki ka kplɔ́n akɔ́nkpinkpan ɖe sɔmɔ̌? Súnnu e ɖó hlɔ̌nhlɔ́n bo lɛ́ kpankɔ́n lɛ́ é tɛ́ntin wɛ é ɖe. É ɖo wɛn ɖɔ, kpɔ́ndéwú yětɔn hɛn le wá n’i. Ði kpɔ́ndéwú ɔ, akɔ́nkpinkpan e Davídi ɖó bo “nɔ kplá ahwanfuntɔ́ Izlayɛ́li tɔn lɛ́ yi ahwangbénu, bo nɔ lɛ́ kplá yě wá xwé” é sísɛ́ Izlayɛ́li ví lɛ́ bǐ bɔ yě nɔ gǔdo n’i kpó ayi bǐ kpó. (1 Tan 11:1, 2) Davídi nɔ gán jɛ Jexóva wú hwebǐnu nú é ná hwlɛ́n ɛ sín kɛntɔ́ tɔn lɛ́ sí. (Ðɛh. 28:7; xa Ðɛhan 138:3.) Sadɔ́ki lɛ́ kplɔ́n nǔ ɖo súnnu akɔ́nkpantɔ́ ɖěvo lɛ́ gɔ́n, ɖi Yexoyáda kpó vǐ súnnu tɔn ahwanfuntɔ́ Benayáhu kpó, gɔ́ nú ahwangán 22 e ɖo tɔ́ tɔn xwégbe bo xo kpóɖó nú Davídi lɛ́ é. (1 Tan 11:22-25; 12:27-29) Súnnu énɛ́ lɛ́ bǐ wɛ kán ɖ’é jí bá sɔ́ Davídi dó ɖó axɔ́sú yětɔn bo lɛ́ nya xɛ ɖo jǐ tɔn.

7. (a) Kpɔ́ndéwú akɔ́nkpinkpan tɔn égbé tɔn tɛ́ lɛ́ ka sixú kplɔ́n nǔ mǐ? (b) Lěe è xlɛ́ gbɔn ɖo video ɔ mɛ é ɔ, étɛ́ kpɔ́ndéwú nɔví súnnu Nsilu tɔn ka kplɔ́n we?

⁷ Ényí mǐ gbéjé mɛ ɖěɖěe nɔ gǔdo nú axɔ́súɖuɖu Jexóva tɔn kpó akɔ́nkpinkpan kpó lɛ́ é sín kpɔ́ndéwú kpɔ́n ɔ, mǐ nɔ mɔ hlɔ̌nhlɔ́n kpó akɔ́nkpinkpan kpó. Axɔ́sú mǐtɔn Jezu Klísu gbí dɔn bǐ mlɛ́mlɛ́ ɖo kɔ e è gbídí n’i bónú é ná ɖ’alɔ ɖo gbɛ Satáan tɔn sín toxóɖiɖɔ mɛ é nukɔn. (Mat. 4:8-11; Jaan 6:14, 15) É nɔ gán jɛ Jexóva wú hwebǐnu bá mɔ hlɔ̌nhlɔ́n. Mǐ lɛ́ ɖó mɛ wínnyáwínnyá ɖěɖěe gbɛ́ ɖɔ émí kún ná fun ahwan alǒ ɖ’alɔ ɖo toxóɖiɖɔ núwiwa lɛ́ mɛ ó lɛ́ é gěgé sín kpɔ́ndéwú ɖo égbé. Étɛ́wú a ma ka ná xa nǔ dó nǔ e jɛ dó yě jí lɛ́ é ɖé lɛ́ wú ɖo jw.org jí ǎ?a

D’ALƆ NƆVÍ TOWE LƐ́

8. Hwetɛ́nu mɛxó agun tɔn lɛ́ ka sixú ɖó hudó akɔ́nkpinkpan tɔn bá dó d’alɔ nɔví yětɔn lɛ́ ɖo ali tawun tawun lɛ́ nu?

⁸ Mɛ e ɖo togun Jexóva tɔn mɛ lɛ́ é yí wǎn nú alɔ dídó yěɖée lɛ́. (2 Kɔ. 8:4) É ɖo mɔ̌ có, hweɖélɛ́nu ɔ, mɔ̌ wiwa nɔ byɔ́ akɔ́nkpinkpan. Ði kpɔ́ndéwú ɔ, ényí ahwan tɔ́n ɖo xá ɖé mɛ ɔ, mɛxó agun tɔn e ɖo xá ɔ mɛ lɛ́ é nɔ mɔ ɖɔ nǔ e sín hudó nɔví émítɔn lɛ́ ɖó é wɛ nyí ɖɔ è ní dó wǔsyɛ́n lanmɛ nú yě bo lɛ́ nɔ gǔdo nú yě; yě sixú lɛ́ mɔ nǔ e hudó yě ɖo gbigbɔ kpó agbaza kpó lixo lɛ́ é nú yě. Wǎnyíyí e mɛxó agun tɔn lɛ́ ɖó nú lɛ̌ngbɔ́ lɛ́ é nɔ zɔ́n bɔ yě nɔ sɔ́ gbɛ yěɖésúnɔ tɔn ɖó axɔ́ nu bo ná dó ná nǔ e sín hudó yě ɖó lɛ́ é yě. (Jaan 15:12, 13) Ényí yě ɖo mɔ̌ wa wɛ hǔn, kpɔ́ndéwú akɔ́nkpinkpan tɔn Sadɔ́ki tɔn xwedó wɛ yě ɖe nɛ́.

9. Sɔgbe xá 2 Samuwɛ́li 15:27-29 ɔ, étɛ́ Davídi ka zɔ́n Sadɔ́ki ɖɔ é ní wa? (Kpɔ́n ɖiɖe ɔ lɔmɔ̌.)

⁹ Gbɛ Davídi tɔn ɖo axɔ́ nu. Davídi sín vǐ Abusalɔ́mu kán ɖ’é jí bá hu i bá húzú axɔ́sú. (2 Sam. 15:12, 13) Davídi ɖó ná gosín Jeluzalɛ́mu afɔjíafɔjí! É ylɔ́ mɛsɛntɔ́ tɔn lɛ́ bo ɖɔ: “Mi sɔ́ nǔ nú mǐ ná hɔn yi ɖó mǐ sɔ́ sixú wa nǔɖé bo gló Abusalɔ́mu ǎ!” (2 Sam. 15:14) Ée mɛsɛntɔ́ lɛ́ ɖo yiyi wɛ é ɔ, Davídi ɖó ayi wú ɖɔ mɛɖé ɖó ná nɔ ayǐ bo ná nɔ ɖo wě e ɖe wɛ Abusalɔ́mu ɖe lɛ́ é ɖɔ sɛ́dó émí wɛ. Énɛ́ wú ɔ, é lɛ́ kɔ nú Sadɔ́ki kpó vɔ̌sánúxwlémawutɔ́ ɖěvo lɛ́ kpó sɛ́dó toxo ɔ mɛ bónú yě ná nɔ ɖɔ lěe yi gbɔn wɛ nǔ lɛ́ ɖe é sɛ́dó è. (Xa 2 Samuwɛ́li 15:27-29.) Yě ka ɖó ná wa nǔ kpó ayiɖote kpó. Awǒvinú wɛ nǔ e Davídi ɖɔ nú vɔ̌sánúxwlémawutɔ́ énɛ́ lɛ́ ɖɔ yě ní wa é nyí, bo tlɛ sɔ́ gbɛ yětɔn ɖó axɔ́ nu. Abusalɔ́mu nyí dǎkaxotɔ́ cejɛ́nnábínɔ, bo flú tɔ́ éɖésúnɔ tɔn. Hwenu e é ná mɔ ɖɔ amɛ̌ Davídi tɔn lɛ́ wɛ Sadɔ́ki kpó vɔ̌sánúxwlémawutɔ́ ɖě lɛ́ kpó nyí bo ɖo xɛ nya ɖo Davídi jí wɛ é ɔ, dǒ nukún nǔ e é ná wa nú yě é mɛ kpɔ́n!

10. Nɛ̌ Sadɔ́ki kpó mɛ e kpó é kpó ɖo kpɔ́ lɛ́ é kpó ka nya xɛ ɖo Davídi jí gbɔn?

¹⁰ Davídi dó aji ɖé xá Sadɔ́ki kpó Hucáyi e nyí xɔ́ntɔn tɔn gbejínɔtɔ́ ɖěvo é kpó. (2 Sam. 15:32-37) Hucáyi wa nǔ sɔgbe xá aji ɔ, bɔ énɛ́ zɔ́n bɔ Abusalɔ́mu ɖeji dó wǔ tɔn bɔ é ɖe wě xá ɛ dó wlɛnwín ahwanfunfun tɔn éé ná ná hwenu Davídi b’ɛ ná sɔ́ ahwannú é ɖé wú. Énɛ́ gúdo ɔ, Hucáyi ɖɔ wě e é ɖe xá Abusalɔ́mu é xó nú Sadɔ́ki kpó Abiyatáa kpó. (2 Sam. 17:8-16) Nya we lɛ́ hɛn din ɔ, yě ná sɛ́ wɛn dó Davídi. (2 Sam. 17:17) Kpó alɔdó Jexóva tɔn kpó ɔ, Sadɔ́ki kpó vɔ̌sánúxwlémawutɔ́ gbɛ̌ tɔn lɛ́ kpó wa nǔ tají ɖé dó nya xɛ ɖo gbɛ Davídi tɔn jí.—2 Sam. 17:21, 22.

11. Nɛ̌ mǐ ka sixú kpankɔ́n Sadɔ́ki ɖɔhun hwenu e mǐ ɖo alɔ dó nɔví mǐtɔn lɛ́ wɛ é gbɔn?

¹¹ Ényí è byɔ́ mǐ ɖɔ mǐ ní d’alɔ nɔví mǐtɔn lɛ́ ɖo ninɔmɛ e sɔ́ gbɛ ɖó axɔ́ nu lɛ́ é mɛ ɔ, nɛ̌ mǐ ka sixú kpankɔ́n Sadɔ́ki ɖɔhun gbɔn? (1) Se tónú nú wěɖexámɛ lɛ́. Ðo ninɔmɛ mɔ̌hun lɛ́ mɛ ɔ, é ɖo tají ɖɔ mǐ ní kpo ɖo bǔ. Se tónú nú wě e alaxɔ xá towe mɛ tɔn ɖe xá we lɛ́ é. (Ebl. 13:17) Mɛxó agun tɔn lɛ́ ɖó ná nɔ vɔ́ wě e è ɖe xá yě dó lěe è ná sɔ́ nǔ ɖ’ayǐ nú adla j’ayǐ lɛ́ gbɔn é kpó nǔ e è ná wa hwenu e adla ɖé j’ayǐ é kpó gbéjé kpɔ́n hwɛhwɛ. (1 Kɔ. 14:33, 40) (2) Kpankɔ́n bo ka ɖó ayi te. (Nǔx. 22:3) Nɔ lin tamɛ cóbó nɔ wa nǔ. Nú é ma byɔ́ ɖó mɔ̌ ǎ hǔn, ma sɔ́ gbɛ towe ɖó axɔ́ nu ó. (3) Gǎn jɛ Jexóva wú. Flín ɖɔ ganjíninɔ hwi kpó nɔví towe lɛ́ kpó bǐ tɔn nɔ ɖu ayi mɛ nú Jexóva titewungbe tɔn. É hɛn ɔ, é ná d’alɔ we bɔ a ná nɔ gǔdo nú nɔví towe lɛ́ ɖo ayijayǐ mɛ.

12-13. Étɛ́ kpɔ́ndéwú Viktor kpó Vitalii kpó tɔn ka kplɔ́n we? (Kpɔ́n ɖiɖe ɔ lɔmɔ̌.)

¹² Mǐ ní gbéjé Viktor kpó Vitalii kpó éé nyí mɛxó agun tɔn é sín kpɔ́ndéwú kpɔ́n. Yě má nǔɖuɖu kpó sin kpó nú nǔɖitɔ́ hǎtɔ́ yětɔn lɛ́ ɖo Ukraine. Viktor ɖɔ: “Mǐ nɔ ba nǔɖuɖu gbɔn fí bǐ. Hwɛhwɛ ɔ, è nɔ ɖo tú da wɛ ɖo malínmálín dó fí e mǐ ɖe é. Nɔví ɖé kpɔ́n nǔɖuɖu e é sɛ xwe lɛ́ é mɛ bo ná hǎbǔ. Nǔ énɛ́ e é ná é zɔ́n bɔ wɛnjlátɔ́ gěgé mɔ nǔ e sín hudó yě ɖó bá nɔ gbɛ é nú táan ɖé. Ée mǐ ɖo nǔ lɛ́ bɛ́ dó mɔ̌to mǐtɔn mɛ wɛ é ɔ, bɔ̌nbu ɖé wú ɖo mɛ̌tlu 20 mɔ̌ dó mǐ. Ðo kéze ɔ bǐ mɛ ɔ, un xo ɖɛ sɛ́dó Jexóva ɖɔ é ní ná mì akɔ́nkpinkpan e sín hudó un ɖó bá kpo ɖo alɔ dó wɛnjlátɔ́ lɛ́ wɛ é.”

¹³ Vitalii ɖɔ: “É byɔ́ akɔ́nkpinkpan tawun. Tomɛyiyi nukɔntɔn ɔ ɖu ganxixo 12. Un xo ɖɛ sɛ́dó Jexóva ɖo ali ɔ bǐ jí.” Vitalii kpankɔ́n, amɔ̌, é lɛ́ ɖó ayi te. É ɖɔ gɔ́ ná ɖɔ: “Un nɔ ɖo nǔnywɛ́ kpó jlɛ̌jíninɔ kpó byɔ́ Jexóva wɛ. Ali ɖěɖěe acɛkpikpa ɔ ná gbe tɔn lɛ́ é kɛ́ɖɛ́ jí wɛ un nɔ kun hǔn gbɔn. Ée un mɔ lěe nɔví súnnu kpó nɔví nyɔ̌nu kpó lɛ́ ɖo azɔ̌ wa ɖó kpɔ́ gbɔn wɛ é ɔ, é ná hlɔ̌nhlɔ́n nǔɖiɖi ce. Yě ɖe nǔ e è bɛ́ kɔn nyi ali ɔ jí lɛ́ é síin, xo nǔɖuɖu, avɔ kpó nǔ tají ɖěvo lɛ́ kpó kplé, bo bɛ́ yě dó mɔ̌to ɔ mɛ. Yě ná nǔɖuɖu nyi kpó Viktor kpó, bo lɛ́ mɔ fí ɖěɖěe mǐ ná gbɔjɛ ɖe ɖo ali ɔ jí lɛ́ é nú mǐ.”

KPO ÐO GBEJÍ NÚ JEXÓVA

14. Ényí mɛ e mǐ yí wǎn ná é ɖé ma sɔ́ wá ɖo gbejí nú Jexóva ǎ ɔ, nɛ̌ é ka sixú wa nǔ dó mǐ wú gbɔn?

¹⁴ Wǔvɛ́ ɖaxó hú gǎn e mǐ sixú mɔ lɛ́ é ɖokpó wɛ nyí hwenu e mɛ e ɖo xwédo mǐtɔn mɛ é ɖé alǒ xɔ́ntɔn mǐtɔn ɖé jó Jexóva dó é. (Ðɛh. 78:40; Nǔx. 24:10) Lě do mǐ vɛ́ kpó mɛ ɔ kpó sɔ é ɔ, mɔ̌ do wɛ é sixú vɛ́ wǔ nú mǐ bɔ mǐ ná yí gbe nú ninɔmɛ ɔ sɔ. Nú a ko ɖí xwi xá ninɔmɛ mɔ̌hun e nɔ ɖó wǔvɛ́ nú mɛ é kpɔ́n ɔ, kpɔ́ndéwú gbejíninɔ tɔn Sadɔ́ki tɔn sixú ná hlɔ̌nhlɔ́n we.

15. Étɛ́wú Sadɔ́ki ka ɖó hudó akɔ́nkpinkpan tɔn bá dó kpo ɖo gbejí nɔ nú Jexóva wɛ? (1 Axɔ́sú lɛ́ 1:5-8)

¹⁵ Hwenu e xɔ́ntɔn alɔmayimɛ Sadɔ́ki tɔn Abiyatáa wá gbeta ɔ kɔn bá gɔn gbejí nɔ nú Jexóva é ɔ, Sadɔ́ki nɔ gbejí nú Jexóva. Acɛkpikpa Davídi tɔn sín vivɔnu wɛ nǔ énɛ́ jɛ. Hwenu e Davídi ɖo kúzan jí é ɔ, vǐ súnnu tɔn Adoniyási tɛ́n kpɔ́n bá xo axɔ́súzinkpo e Jexóva ko dó akpá tɔn nú Salomɔ́ɔ é yí. (1 Tan 22:9, 10) Abiyatáa wá gbeta ɔ kɔn bá nɔ gǔdo nú Adoniyási. (Xa 1 Axɔ́sú lɛ́ 1:5-8.) Mɔ̌ e Abiyatáa wa é zɔ́n bɔ é sɔ́ nyí Davídi kɛ́ɖɛ́ wɛ é gɔn gbejí nɔ ná ǎ, loɔ, é lɛ́ gɔn gbejí nɔ nú Jexóva. Kpɔ́n lěe énɛ́ ná ko zɔ́n bɔ wǔ ná kú Sadɔ́ki bɔ awakanmɛ ná lɛ́ kú i sɔ é! É kpó Abiyatáa kpó nyí vɔ̌sánúxwlémawutɔ́ bo ko wa azɔ̌ alɔ ɖo alɔ mɛ nú xwe 40 jɛjí. (2 Sam. 8:17) Yě ko “ɖíɖá akɔjijɛgbá” Mawu nǔgbó ɔ tɔn ɖó kpɔ́ kpɔ́n. (2 Sam. 15:29) Ðo bǐbɛ́mɛ ɔ, súnnu we énɛ́ lɛ́ bǐ nɔ gǔdo nú acɛkpikpa Davídi tɔn, bo lɛ́ wa nǔ gěgé ɖěvo lɛ́ ɖó kpɔ́ ɖo sinsɛnzɔ́ Jexóva tɔn mɛ.—2 Sam. 19:12-15.

16. Étɛ́ ka sixú ko d’alɔ Sadɔ́ki bɔ é kpo ɖo gbejí?

¹⁶ Abiyatáa wá gbeta ɔ kɔn bá gɔn gbejí nɔ có, Sadɔ́ki ka kpo ɖo gbejí nɔ nú Jexóva wɛ. Davídi xo nǔ kpɔ́n dó gbejíninɔ Sadɔ́ki tɔn wú kpɔ́n ǎ. Hwenu e wě e ɖe wɛ Adoniyási ɖe é gba é ɔ, Davídi sɔ́ Sadɔ́ki, Natáan kpó Benayáhu kpó ɖɔ yě ní yi kɔn ami dó ta nú Salomɔ́ɔ dó sɔ́ ɛ axɔ́sú. (1 Axɔ́. 1:32-34) Kpɔ́ e Sadɔ́ki nɔ xá Jexóva sɛntɔ́ gbejínɔtɔ́ lɛ́, ɖi Natáan kpó mɛ ɖěvo e nɔ gǔdo nú axɔ́sú Davídi lɛ́ é kpó é ɖó ná ko ná hlɔ̌nhlɔ́n kpó akɔ́nkpinkpan kpó è. (1 Axɔ́. 1:38, 39) Ée Salomɔ́ɔ húzú axɔ́sú é ɔ, é “sɔ́ vɔ̌sánúxwlémawutɔ́ Sadɔ́ki dó Abiyatáa tɛnmɛ.”—1 Axɔ́. 2:35.

17. Ényí mɛ e kpó hwi kpó vɛ́ tawun é ɖé ma sɔ́ wá ɖo gbejí nú Jexóva ǎ ɔ, nɛ̌ a ka sixú wa nǔ Sadɔ́ki ɖɔhun gbɔn?

¹⁷ Nɛ̌ a ka sixú xwedó kpɔ́ndéwú Sadɔ́ki tɔn gbɔn? Ényí mɛ e a vɛ́ xá é ɖé wá gbeta ɔ kɔn bo jó Jexóva dó hǔn, nǔ gbeta e kɔn a wá é ní za wě. (Joz. 24:15) Jexóva ná ná hlɔ̌nhlɔ́n kpó akɔ́nkpinkpan kpó e sín hudó a ɖó é we. Gǎn jɛ wǔ tɔn gbɔn ɖɛxixo kpó mawusɛntɔ́ gbejínɔtɔ́ hǎtɔ́ towe lɛ́ kpó wú títɛ́dó gblamɛ. Gbejíninɔ towe xɔ akwɛ́ nú Jexóva tawun, bɔ é ná dó ajɔ tɔn we.—2 Sam. 22:26.

18. Étɛ́ nǔ e gbo Marco kpó Sidse kpó é ka kplɔ́n we?

¹⁸ Mǐ ní kpɔ́n kpɔ́ndéwú Marco kpó asi tɔn Sidse kpó, ée vǐ nyɔ̌nu we e yě ɖó lɛ́ é bǐ jó nǔgbó ɔ dó é tɔn. Marco ɖɔ: “Sín gbe e gbe è ji vǐ mɛtɔn lɛ́ é wɛ è nɔ ko ɖo wǎn yí nú yě wɛ tawun. È nɔ wa nǔ e wú è kpé é bǐ dó nya xɛ ɖo yě jí. Énɛ́ wú ɔ, ényí yě wá gbeta ɔ kɔn bo jó Jexóva dó ɔ, è nɔ ɖibla wɛ́n hǔn.” É gbɛ kan d’é nu bo ɖɔ: “Amɔ̌ Jexóva jó mǐ dó ǎ. É bló bɔ ényí awakanmɛ kú mì ɔ, agbɔ̌n nɔ ɖo asi è wú, ényí awakanmɛ ka kú asi è ɔ, agbɔ̌n nɔ ɖo nyɛ wú.” Sidse ɖɔ gɔ́ ná ɖɔ: “Ényí Jexóva ma ko ná hlɔ̌nhlɔ́n e sín hudó mǐ ɖó é mǐ wɛ ǎ ɔ, mǐ ná kpé wú bo dɛ ǎ. Un nɔ ɖí xwi xá linlin ɔ ɖɔ hwɛ ce wɛ, énɛ́ wú ɔ, un ɖɔ lěe nǔ cí nú mì é nú Jexóva. Hwenu kpɛɖé gúdo ɔ, nɔví nyɔ̌nu e un ma sɔ́ mɔ ǎ sín xwe mɔ̌kpán ɖíe é ɖé wá gɔ̌n ce, sɔ́ alɔ ɖó abɔ̌ ce ta, bo kpɔ́n nukún ce mɛ lobo ɖɔ: ‘Flín, Sidse, hwɛ towe wɛ ǎ!’ Kpó alɔdó Jexóva tɔn kpó ɔ, un kpé wú bo kpo ɖo sinsɛn ɛ wɛ kpó awǎjijɛ kpó.”

19. Étɛ́ a ka kán ɖ’é jí bo ná wa?

¹⁹ Jexóva ba ɖɔ mɛsɛntɔ́ émítɔn lɛ́ bǐ ní nɔ kpankɔ́n Sadɔ́ki ɖɔhun. (2 Tim. 1:7) É ɖo mɔ̌ có, É ba ɖɔ mǐ ní nɔ gán jɛ hlɔ̌nhlɔ́n mǐɖésúnɔ tɔn wú ǎ. É ba ɖɔ mǐ ní gán jɛ émí wú. Énɛ́ wú ɔ, ényí a wá mɔ hwiɖée ɖo ninɔmɛ ɖé mɛ bɔ é byɔ́ ɖɔ a ní ɖó akɔ́nkpinkpan hǔn, byɔ̌ Jexóva. A sixú kú d’é jí ɖɔ é ná bló bɔ a ná kpankɔ́n Sadɔ́ki ɖɔhun!—1 Pi. 5:10.