Etɛ lɛ Sín Hudo A ka Ðó Bo Na Dó Mɔ Nukúnnú Jɛ Biblu ɔ Mɛ?

Xósin e Biblu na é

Nǔ e a ɖó na wà bo na mɔ nǔ jɛ Biblu mɛ lɛ é ɔ, Biblu ɖesunɔ tinmɛ. A na bo tlɛ gosin akɔ ɖebǔ mɛ ɔ, wɛn Mawu tɔn e ɖò Biblu mɛ é “hugǎn [we] ǎ; blobló tɔn gló [we] ǎ.”—Sɛ́nflínmɛ 30:11.

Nǔ taji e a na wà bo na mɔ nukúnnú jɛ Biblu mɛ lɛ é

1. Ðǒ linlin ɖagbe. Yǐ gbè ɖɔ Biblu ɔ, Xó Mawu tɔn wɛ. Nɔ sɔ́ hwiɖée hwe, ɖó Mawu nɔ ɖè kɔ dó goyitɔ́ lɛ. (1 Tɛsalonikinu lɛ 2:13; Jaki 4:6) Amɔ̌, ma nɔ yí gbè nú nǔ e a xà alǒ sè lɛ é kpowun kúnnuɖenú lɛ mɛvo ó, ɖó Mawu ba ɖɔ a ni nɔ zán “hlɔnhlɔn nǔlinkpɔ́n tɔn” towe.—Hlɔmanu lɛ 12:1, 2, nwt.

2. Xoɖɛ bo byɔ nǔnywɛ. Biblu ɖɔ ɖò Nǔnywɛxó 3:5 mɛ ɖɔ: “Ma ganjɛ nǔnywɛ hwiɖesunɔ tɔn wu ó.” É nyɔ́ wà hǔn, nɔ “byɔ [nǔnywɛ] Mawu,” bá dó mɔ nukúnnú jɛ Biblu mɛ.—Jaki 1:5.

3. Nɔ kplɔ́n nǔ ɖò gbesisɔmɛ. Nú a nɔ kplɔ́n Biblu ɖò gbesisɔmɛ b’ɛ ma nyí vlafonú ǎ ɔ, a na ɖu Biblu kplɔnkplɔn towe sín lè tawun.—Jozuwée 1:8.

4. Nɔ kplɔ́n nǔ sɔgbe xá xóta lɛ. Nǔkplɔnkplɔn sɔgbe xá xóta lɛ, ee hwenu a nɔ gbéjé nǔ e Biblu ɖɔ dó xóta taji ɖé wu é ɖè é wɛ nyí ali ɖagbe e nu a na kplɔ́n nǔ e Biblu kplɔ́n mɛ lɛ é ɖè é ɖé. Bɛ̌ kpo “nǔkplɔnmɛ nukɔn nukɔntɔn . . . lɛ” kpo, enɛ gudo hǔn, “jɛ nǔ e è nɔ kplɔ́n mɛ e ko sù ɖò nǔɖiɖi mɛ lɛ ɔ kplɔ́n jí.” (Eblée lɛ 6:1, 2) A sixu jlɛ́ nǔ e wemafɔ ɖé ɖɔ é dó ɖevo wu, mɔ̌ mɛ ɔ, a na mɔ ɖɔ akpáxwé vovo Biblu ɔ tɔn lɛ nɔ tinmɛ yeɖée lɛ, kaka jɛ akpáxwé e “nukúnnú mɔ jɛ mɛ tɔn nɔ vɛwǔ” lɛ é jí.—2 Piyɛ́ɛ 3:16.

5. Nɔ ba alɔdó mɛ ɖevo lɛ tɔn. Biblu dó wusyɛn lanmɛ nú mǐ ɖɔ mǐ ni nɔ yí gbè nú alɔdó mɛ ɖevo e mɔ nukúnnú jɛ Biblu mɛ lɛ é tɔn. (Mɛsɛ́dó 8:30, 31) Kúnnuɖetɔ́ Jehovah tɔn lɛ nɔ kplɔ́n Biblu xá mɛ vɔ̌nu. Klisanwun nukɔntɔn lɛ ɖɔhun ɔ, ye nɔ zán wemafɔ Mawuxówema ɔ tɔn lɛ dó d’alɔ mɛ ɖevo lɛ, bɔ ye nɔ mɔ nukúnnú jɛ nǔ e Biblu kplɔ́n mɛ tawun lɛ é mɛ.—Mɛsɛ́dó 17:2, 3.

Nǔ e sín hudo a ma ɖó ǎ lɛ é

1. Wema sise ɖaxó. Mɛɖé lɛ mɔ ɖɔ mɛsɛ́dó Jezu tɔn 12 lɛ ɔ, “gbɛtɔ́ yayǎ ɖé kpowun wɛ ye nyí; ye kún sè wema ɖé ó” có, ye ka mɔ nukúnnú jɛ Mawuxówema ɔ mɛ bo kplɔ́n mɛ ɖevo lɛ.—Mɛsɛ́dó 4:13.

2. Akwɛ. A sixu kplɔ́n nǔ e Biblu kplɔ́n mɛ lɛ é vɔ̌nu. Jezu ɖɔ nú ahwanvu tɔn lɛ ɖɔ: “Lee un na acɛ mi vɔ̌nu ɔ, mi lɔmɔ̌ mi bo wà nǔ lɛ bǐ vɔ̌nu.”—Matie 10:8.