Hwetɛnu Gbɛ̀ ɔ ka Na Vɔ?

Xósin e Biblu na é

Bo na dó tuùn hwenu e gbɛ̀ ɔ na vɔ dó é ɔ, é byɔ ɖɔ mǐ ni mɔ nǔ jɛ lee Biblu nɔ zán xókwín “gbɛ̀” ɔ gbɔn é wu. Xókwín Glɛkigbe tɔn kosmos e è nɔ lilɛ dó “gbɛ̀” hwɛhwɛ é nɔ yawǔ dó gesí gbɛtɔ́ e ɖò gbɛ̀ ɔ mɛ lɛ é, ɖò taji ɔ, gbɛtɔ́ ɖěɖee jɛ zɔ nú Mawu bo ma nɔ wà jlǒ tɔn ǎ lɛ é. (Jaan 15:18, 19; 2 Piyɛ́ɛ 2:5) Hweɖelɛnu ɔ, kosmos nɔ dó gesí tuto gbɛtɔ́ lɛ tɔn.—1 Kɔlɛntinu lɛ 7:31; 1 Jaan 2:15, 16.a

Etɛ ka nyí “gbɛvivɔ ɔ”?

È sixu lɛ́ lilɛ xógbe “gbɛvivɔ ɔ” e tɔ́n ɖò lilɛdógbeɖevomɛ Biblu tɔn gegě mɛ é dó “hwenu e gbɛ̀ elɔ na vɔ dó ɔ.” (Matie 24:3) É nyí kún súsú dó nú ayikúngban ɔ, alǒ gbɛtɔ́ lɛ bǐ wɛ é nɔ dó gesí ǎ, loɔ, vivɔnu tuto gbɛtɔ́ lɛ tɔn tɔn wɛ é nɔ dó gesí.—1 Jaan 2:17.

Biblu kplɔ́n mɛ ɖɔ “è na sú mɛdídá lɛ kún dó,” bonu mɛ ɖagbe lɛ na sixu ɖu gbɛ̀ víví ɖò ayikúngban jí. (Ðɛhan 37:9-11) Kún súsú dó nú mɛ enɛ na bɛ́ ɖò “adǎn e na wá gbò gbɛtɔ́ lɛ” é, alǒ ya ɖaxó ɔ e na hun nǔ sín ahwan Haamagedɔni tɔn nu e hwenu.—Matie 24:21, 22; Nǔɖexlɛ́mɛ 16:14, 16.

Hwetɛnu gbɛ̀ ɔ ka na vɔ?

Jezu ɖɔ: “Mɛɖé tuùn azǎn ɔ ǎ; mɛɖé ka tuùn gan ɔ mɛ ǎ; wɛnsagun Mawu tɔn lɛ tuùn ǎ; nyɛ Mawu ví ɔ ɖesu tuùn ǎ; Tɔ́ ɔ ɖokponɔ géé wɛ tuùn.” (Matie 24:36, 42) É ɖɔ gɔ́ na ɖɔ vivɔnu ɔ na fyán mɛ, “hwenu e [è] ma na ɖó nukún . . . dó ǎ é.”—Matie 24:44.

Mǐ sixu tuùn azǎn ɔ kpo gan ɔ mɛ kpo pɛ́pɛ́pɛ́ ǎ có, Jezu na wuntun, alǒ ɖɔ nǔ ɖěɖee na jɛ bo na dɔn mǐ yì gbɛ̀ ɔ sín vivɔnu lɛ é. (Matie 24:3, 7-14) Biblu ylɔ́ hwe enɛ nu ɖɔ “nǔ lɛ bǐ sín fifó hwenu,” kpo “azǎn gudogudo tɔn lɛ” kpo.—Daniyɛli 12:4; 2 Timɔtée 3:1-5.

É ka na kpò nǔɖe ɖò gbɛvivɔ ɔ gudo à?

Ganji. Ayikúngban ɔ na kpò ɖò fí, ɖó Biblu ɖɔ ɖɔ “é [kún] na sɛ̀ dò [ó] kaka nú hwenu maxamaxa lɛ, alǒ kaka sɔyi.” (Ðɛhan 104:5, nwt) Gbɛtɔ́ lɛ na gɔ́ ayikúngban ɔ jí, lee Biblu dó akpá tɔn gbɔn é, é ɖɔ: “[Ayikúngban] ɔ na nyí hwɛjijɔnɔ lɛ tɔn, bɔ ye na nɔ [jí] kaka sɔyi.” (Ðɛhan 37:29) Mawu na bló bɔ ninɔmɛ ɖěɖee sín linlin é ɖó sín dò lɛ é na jɛnu:

• Palaɖisi.—Ezayíi 35:1; Luki 23:43, nwt.

• Ayijayǐ kpo vivo kpo.—Micée 4:4.

• Azɔ̌ e ɖó nu bo jɛmɛ nú mɛ é nú mɛ bǐ.—Ezayíi 65:21-23.

• Azɔn kpo kpikpo kpo sɔ́ na ɖè ǎ.—Jɔbu 33:25; Ezayíi 33:24.