TOƁERE 4
Hommbo woni annabi Iisaa ?
1. Honno ngurndan annabi Iisaa ɗan fuɗɗori ?
Fii honɗun annabi Iisaa yiɗiranoo ? — MATTA 11:29 ; MARKUUSA 10:13, 16.
Annabi Iisaa wa’aa wa yimɓe luttuɓe ɓen, hari ko o malaa’ikaajo ado yo o arude e oo aduna (Yuuhanna 8:23). Ko kanko wonuno tagoore Allah aranere nden e o wonuno fee Allah ko Allah tagayno piiji luttuɗi ɗin fow (Yuuhanna 1:14). Ko annabi Iisaa wonuno nantinoowo daaluyee Allah on, ko sabu ɗun o noddira “ Daaluyee ”. — Janngee Tindi 8:22, 23, 30 TMN ; Koloosi 1:15, 16.
2. Ko fii honɗun annabi Iisaa arani e oo aduna ?
Allah feƴƴinno wonkii annabi Iisaa kin ka nder reedu jiwo inneteeɗo Mariama. Annabi Iisaa alaano baaba (Luuka 1:30-35). Allah adduno annabi Iisaa e hoore ndii leydi fii piiji tati : (1) jannugol jamaa on goonga fii Allah, (2) fii hollugol no waɗiren faale Allah on hay si hiɗen tampi, (3) “ okkitira ngurndan ” makko ɗan fii men. — Janngee Matta 20:28.
3. Fii honɗun faalaɗen sotteede ?
Sottugol ko fii yoɓugol njoddi no goɗɗo hettora (Eggudu ndun 21:29, 30). Allah faalanooka yo en nawyu maa maayen. Ko honno anndirɗen ɗun ? Allah daalanno baaba Aadama, si o yeddii mo o maayay. Si baaba Aadama yeddaano Allah o maayataano (Fuɗɗoode nden 2:16, 17 ; 5:5). Deftere Allah nden wi’i, ko sabu baaba Aadama mayde naatiri e oo aduna. Baaba Aadama raaɓinii ɓiɓɓe makko ɓen fow junuubu e mayde. Hiɗen faalaa sotteede e ɗii junuubaaji e mayde ko baaba Aadama raaɓini en kon. — Janngee Roomu 5:12 ; 6:23.
Ko hommbo waawata en sottugol e ndee mayde ? Hay gooto e men waawataa yoɓugol fii junuubaaji goɗɗo goo. Ko sabu junuubaaji men ɗin maayanten. — Janngee Zabuura 49:7-9, TMN.
4. Fii honɗun annabi Iisaa maayani ?
Annabi Iisaa no serti e men, o alaano junuubu. Sabu ɗun, o haanaano maayude ɓayri o waɗaali junuubu. Ko fii junuubaaji men ɗin o maayani. Allah holli giggol makko ko o acci annabi Iisaa maayi fii men. Annabi Iisaa kadi holluno en giggol fii ko o jaɓi maayugol sabu men. — Janngee Yuuhanna 3:16 ; Roomu 5:18, 19.
Ndaaree vidio on Fii honɗun annabi Iisaa maayani ?
5. Honɗun annabi Iisaa woni e waɗude hannde ?
Fewndo annabi Iisaa wonunoo e oo aduna, o ɲawduno nawnuɓe, o immintinno mayɓe e o walluno tampuɓe. Ɗun no holli ko o waɗoyta fii banii-Aadama ɗoftiiɓe Allah ɓen (Matta 15:30, 31 ; Yuuhanna 5:28). Allah immintinno annabi Iisaa watti mo malaa’ikaajo dolnuɗo (1 Petruusu 3:18). Yahuwah innuno mo yo o jooɗo ka junngo makko ɲaamo o habbo haa o jonna mo laamu ngun (Yahuudiyankeeɓe 10:12, 13). Hannde annabi Iisaa no laamii ka kammu, e taalibaaɓe makko ɓen no waajaade fii oo kibaaru moƴƴo e oo adunna. — Janngee Feɲɲinannde 11:15 ; Markuusa 13:10.
Neeɓataa annabi Iisaa e laamu makko ngun, ittoyay tampere e kala ko addata tampere. Gomɗinɓe e ɗoftiiɓe annabi Iisaa ɓen heɓoyay ngurndan luttayɗan ka aljanna. — Janngee Zabuura 37:9-11, TMN.