Honɗun woni oo kibaaru moƴƴo fii laawol Allah ngol ?

1. Laawi ɗin fow no moƴƴi ?

Yimɓe moƴƴuɓe no e nder diinaaji ɗin fow. Allah no sutii ɓe e himo kippi fii maɓɓe. Kono, buy no huutorde diina fii waɗugol ko boni (2 Korenti 4:3, 4 ; 11:13-15). Wano hollira ka tele e no yewtira ka radiooji, woɓɓe e maɓɓe no tawaa e fii waɗugol masiibo, gere hakkunde leƴƴi, kurkugol maa waalodagol e paykoy. Sifa ɗii piiji fow weltintaa ɓee ɗoftiiɓe Allah. — Janngee Matta 24:3-5, 11, 12.

Tawa feewuɓe ɓen no mawninde Allah, ɓoyliiɓe ɓen alaa mo weltinde. Ɓe janna piiji ɗi alaa ka Deftere Allah, wano piiji ɗi wonaa goonga e hoore Allah e fii mayɓe. Kono Yahuwah no faalaa yo jamaa on anndu goonga on. — Janngee Hazqi’iila 18:4, TMN ; 1 Timotee 2:3-5.

2. Honɗun woni oo kibaaru moƴƴo fii laawol Allah ngol ?

Hiɗen welti ɓayri ɓee ɓe jokkaa laawol Allah ngol waawataa mo ɗaynude. Kono jikku maɓɓe ngun no holli ɓe yiɗaa Allah, ko Seytaane e oo aduna ɓe yiɗi (Yaaquuba 4:4, TMN). Deftere Allah nden no holli, diinaaji ɗi wonaa e laawol makko no nodda “ Baabiila mawnde nden ”. Baabiila hari ko saare ka diinaaji ɗi jokkaa laawol Allah ngol fuɗɗi ɓawto saa’i annabi Nuuhu on. Neeɓataa, Allah muloyay ɓee wonuɓe janfaade, ɗayna e tampina jamaa on. — Janngee Feɲɲinannde 17:1, 2, 5, 16, 17 ; 18:8.

No woodi kadi piiji moƴƴuɗi e nder oo kibaaru. Yahuwah yejitaali yimɓe moƴƴuɓe wonuɓe e nder ɗii diinaaji ɗi jokkaa laawol Allah ngol. Himo wallude ɓe no ɓe anndira laawol makko ngol. — Janngee Yuuhanna 6:45.

3. Honɗun yimɓe moƴƴuɓe haani waɗude ?

Yahuwah no kippi fii yimɓe yiɗuɓe goonga e ko moƴƴi. Himo waajaade ɓe fii no ɓe iwra ɓaawo diinaaji ɗi jokkaa laawol Allah ngol. Yiɗuɓe Allah ɓen no faalaa waɗugol ko weltinta mo. — Janngee Feɲɲinannde 18:4.

Ko annabi Iisaa maayi, yimɓe moƴƴuɓe heɗino waaju sahaabaaɓe makko ɓen, ɓe welti. Ɓe jannguno piiji buy ko iwri ka Yahuwah, fii ngurndan weluɗan e fii moƴƴere janngo. Ko ɓe waɗunoo kon, no holli en ko haanuɗen waɗude hannde. — Janngee 1 Tesalonii 1:8, 9 ; 2:13.

Yahuwah no jaɓande yimɓe wonuɓe iwude ɓaawo ɓee ɓe jokkaa laawol makko ngol. Si en jaɓanii Yahuwah, en wonay jiyaaɓe makko, wonden e yimɓe makko ɓen, heɓoyen ngurndan poomayankejan. — Janngee Markuusa 10:29, 30 ; 2 Korenti 6:17, 18.

4. Honno Allah okkiroyta en welo welo ?

Ko diinaaji ɗi jokkaa laawol Allah ngol muloytee kon, ko kibaaru moƴƴo. Ɗun walloyay jamaa on hetto. Ɓoyliiɓe waawoytaa ɗaynude maa senndude jamaa on. Fow wonoyay gooto rewugol Allah. — Janngee Feɲɲinannde 18:20, 21 ; 21:3, 4.