TOƁƁERE 20

Ko honno moftal almasiiyaaɓe ɓen woniri ?

Édition imprimée

Yahuwah Alla ko waɗoowo piiji no haaniri (1 Korenti 14:33, 40). Ko ɗun waɗi no haani ka jamaa makko on kadi warra piiji no haaniri non. Ko honno moftal almasiiyaaɓe ɓen woniri ? Ko honno mo kala e men wallirta fii no moƴƴira ?

1. Ko hommbo woni hoore moftal ngal ?

Ko « Almasiihu on » woni « hoore moftal ngal » (Efeesi 5:23). Gila ka kammu himo ardaade golle jamaa Yahuwah Alla on e nder aduna on fow. Annabi Iisaa suɓike « jiyaaɗo […] reeniiɗo holniiɗo » on, mojoberehun hellifaaɓe ardotooɓe noddaaɓe « Hikkiiɓe ka fewjoore ɓen » (janngee Matta 24:45-47). Wano sahaabaaɓe e ardotooɓe Yerusalaam ka teeminannde aranere, ko wano non Hikkiiɓe ka fewjoore ɓen ɗowirta moftal ngal e nder aduna on fow (Kuuɗe sahaabaaɓe ɓen 15:2). Kono wonaa kamɓe woni hooreeɓe fedde amen nden. Hiɓe jannga Deftere Alla nden fii anndugol ko Yahuwah Alla faalaa yo ɓe waɗu e hiɓe weltii jokkugol ko annabi Iisaa janni kon.

2. Ko honɗun woni golle ardotooɓe ɓen ?

Ardotooɓe ɓen ko almasiiyaaɓe hellifaaɓe jannooɓe jamaa Yahuwah Alla on Deftere Alla nden e hiɓe aynude ɓe e hoore wallugol ɓe e hoore wakkilingol ɓe. Ɓe yoɓetaake fii golle maɓɓe ɗen. Kono hiɓe waɗirde ɗun « ɓernde laaɓunde, hara [ɓe] waɗiraali ɗun miile, kono hara ko e anniyee moƴƴo » (1 Petruusu 5:1, 2). No woodi worɓe wallitotooɓe ardotooɓe ɓen ka moftal. E nder saa’i, kamɓe kadi ɓe waaway wonude ardotooɓe.

Hikkiiɓe ka fewjoore ɓen no suɓoo ardotooɓe goo fii wonugol aynooɓe mojobere mofte. Ɓe yahay ndaarugol mofte ɗen fii jannugol e wakkilingol musiɓɓe ɓen ka dewal. Aynooɓe mojobere mofte ɓen suɓoto wallitotooɓe e ardotooɓe teddinɓe piiji ɗi Deftere Alla nden holli ɗin (1 Timotee 3:1-10, 12 ; Tiituusa 1:5-9).

3. Ko honɗun kala Seedeejo haani waɗude ?

Mo kala ka moftal ‘mantay innde Yahuwah Alla nden’ e hoore tawegol ka pottite e ka waajagol beru no ɓe waawiri non (janngee Zabuura 148:12, 13).

LUGGINEE

Ndaaree no annabi Iisaa ardorta non, no ardotooɓe ɓen etortoo ɲemmbugol misal makko ngal e no waawirten ɗoftaade annabi Iisaa e gollida e ardotooɓe ɓen.

4. Annabi Iisaa ko hooreejo moƴƴo

Annabi Iisaa noddii en e hoore giggol jaɓugol mo wa hooreejo men. Janngee Matta 11:28-30 e yewton fii ngal lanndal :

Ko honno wa’irten si en jaɓii annabi Iisaa wa hooreejo men ?

Ko honno ardotooɓe ɓen ɲemmbirta misal annabi Iisaa ngal ? Fijinee VIDIO on.

VIDIO : Ardotooɓe ɓen no wallude heɓuɓe masiibo dimmbannde leydi Nepal (4:56)

Deftere Alla nden no jannude ko laaɓi pos no ardotooɓe ɓen haani gollirde.

Janngee Isaaya 32:2 e 1 Petruusu 5:1-3 e yewton fii ɗee lanndaale :

Ko honno wa’irton fii anndugol ardotooɓe ɓen no wakkilinde woɓɓe goo wa annabi Iisaa ?
Ko honno kadi ardotooɓe ɓen ɲemmbirta annabi Iisaa ?

5. Ardotooɓe ɓen no hollude misal

Ko honno annabi Iisaa faalira yo ardotooɓe ɓen miijo fii golle maɓɓe ɗen ? Fijinee VIDIO on.

VIDIO : Ardotooɓe ɓen, hollee misal ! (7:39)

Annabi Iisaa holluno no ardotooɓe ɓen ka moftal gollirta. Janngee Matta 23:8-12 e yewton fii ngal lanndal :

Ko honɗun Deftere Alla nden wi’i fii ardotooɓe ɓen ? Hiɗon miijii hooreeɓe diina ɓen no waɗude ko nde wi’i kon ?

A. Ko notaa : Ardotooɗo no kippi fii huuwondiral makko e Alla e huuwondiral ɓeynguure makko nden e Alla. 1. Himo toraade Alla ado jannde makko Deftere Alla nden. 2. Himo jannude jiwun makko kun e hoore ballal ɓeyngu makko.

B. On ardotooɗo e ɓeyngu mun no ari ndaarugol musiɗɗo maɓɓe ka moftal nawnuɗo ka labutaani.

Ardotooɓe ɓen no tiiɗinde weldigal maɓɓe ngal e Yahuwah Alla e hiɓe wallude ɓeynguureeji maɓɓe kadi waɗugol ɗun.
Ardotooɓe ɓen no dankaade fow ka moftal.
Ardotooɓe ɓen no waajaade soono woo.
Ardotooɓe ɓen, ko jannooɓe. Hiɓe wallitoo kadi ka laɓɓingol e fii golle goo.

6. Meɗen weltii gollidugol e ardotooɓe ɓen

Deftere Alla nden no holli en dalil hittuɗo fii gollidugol e ardotooɓe ɓen. Janngee Yahuudiyankeeɓe 13:17 e yewton fii ɗee lanndaale :

No haani ka Deftere Alla nden wakkilina en ɗoftagol ardotooɓe ɓen, yankinanoo ɓe ? Ko honɗun miijiɗon ? Fii honɗun ?

Janngee Luuka 16:10 e yewton fii ngal lanndal :

Fii honɗun no hitti gollidugol e ardotooɓe ɓen, hay si hiɗon miijii golle ɗen no fanɗi ?

WOƁƁE GOO NO WI’A : « En haanaa mooɓondirde e woɓɓe goo fii rewugol Alla. »

Ko nafa honɗun ontigi heɓata e hoore rewugol Alla ka moftal ?

RAWNOODE

Ko annabi Iisaa woni hooreejo moftal ngal. Meɗen weltii gollidugol e ardotooɓe ɓen wonuɓe ley annabi Iisaa ɓayri hiɓe wakkilina men e hiɓe janna men e hoore hollugol men misal.