TOƁƁERE 23
Lootegol maande kisiyee : ko faandaare nafaynde !
Annabi Iisaa jannuno wonndema taalibaaɓe makko ɓen no haani looteede maande kisiyee (janngee Matta 28:19, 20). Kono ko honɗun woni lootegol maande kisiyee ? E ko honɗun goɗɗo haani waɗude fii laatingol nden faandaare ?
1. Ko honɗun woni lootegol maande kisiyee ?
« Lootegol maande kisiyee » no iwri e konngol gereeki ko firi « yollugol » e nder ndiyan. Ko annabi Iisaa lootaa, o mutinano ka maayo Yurdayniwol, ɓawto ɗun ‘o ƴawuno ka ndiyan’ (Markuusa 1:9, 10). Wa annabi Iisaa, almasiiyaaɓe goongaaɓe ɓen lootete e hoore mutinegol maa yollegol ko timmi e nder ndiyan.
2. Ko honɗun lootegol maande kisiyee hollata ?
Lootegol maande kisiyee no holla ontigi okkii ngurndan mun ɗan Yahuwah Alla. Ko honno goɗɗo okkirta Alla ngurndan mun ɗan ? Ado yo ontigi looteede maande kisiyee, kanko tun e nder toraare, o haalanay Yahuwah Alla himo faalaa mo rewude haa poomaa. O foda Yahuwah Alla ko kanko tun o rewata e waɗugol faale Alla on ko huunde ɓurnde hittude e nder ngurndan makko ɗan. O suɓoo ‘hayfintinagol e jokkugol’ janndeeji e misal annabi Iisaa ngal (Matta 16:24). Si goɗɗo okkii Alla ngurndan mun ɗan e o lootaama maande kisiyee, weldigal hakkunde makko e Alla ɓurtay tiiɗude e o ɓurtay ɓadaade rewooɓe Alla ɓen.
3. Ko honɗun goɗɗo haani waɗude ado o looteede maande kisiyee ?
Ado on looteede maande kisiyee, hiɗon haani janngude anndon Yahuwah Alla e gomɗinon mo ko tiiɗi (janngee Yahuudiyankeeɓe 11:6). Ko no ganndal mon ngal ɓeydorta e no gomɗinal mon ngal tiiɗirta woo, ko non giggol mon ngol kadi fii Yahuwah Alla tiiɗirta. Pellet on faalete waajagol e wuuron e hoore jokkugol laawi makko ɗin (2 Timotee 4:2 ; 1 Yuuhanna 5:3). Si on waɗii « fii no wuuriron noone no hawrirani [Yahuwah] Joomiraaɗo on, e no welira mo », haray on faalete okkugol mo ngurndan mon ɗan e looteɗon maande kisiyeea (Koloosi 1:9, 10).
LUGGINEE
Ndaaree ko lootegol annabi Iisaa jannata en e ko honno goɗɗo hebilorta fii lootegol maande kisiyee.
4. Ko honɗun lootegol annabi Iisaa jannata en ?
Janngee Matta 3:13-17 fii yi’ugol no annabi Iisaa lootiranoo non e yewton fii ɗee lanndaale :
Annabi Iisaa mutinano e nder ndiyan ko o woni boobo ?
Ko honno o lootiranoo ? Ko ndiyan tun juuranoo ka hoore makko ?
Ko annabi Iisaa lootaa, o fuɗɗii waɗugol golle hertiiɗe ɗe Alla halfinno mo ɗen. Janngee Luuka 3:21-23 e Yuuhanna 6:38 e yewton fii ngal lanndal :
Ko annabi Iisaa lootaa, ko golle honɗe o waɗi ko adii ka ngurndan makko ?
5. Lootegol maande kisiyee ko faandaare nde waawoton heɓude
Miijo fii okkugol ngurndan mon ɗan Alla e lootegol maande kisiyee, haray no hulɓinanii on ka fuɗɗoode. Kono on waaway jokkude fii mun seeɗa seeɗa haa heɓon cuucal waɗugol ndee fewjoore hittunde. Fii anndugol no woɓɓe goo ƴettiri ndee fewjoore hittunde, fijinee VIDIO on.
Janngee Yuuhanna 17:3 e Yaaquuba 1:5 e yewton fii ngal lanndal :
Ko honɗun wallata goɗɗo hebilagol fii lootegol maande kisiyee ?
Fii okkugol ngurndan men ɗan Yahuwah Alla, ko haalangol mo e toraare hiɗen faalaa mo rewude haa poomaa.
Ka lootegol maande kisiyee, en hollay fow en okkii Alla ngurndan men ɗan.
6. Lootegol maande kisiyee tawnay en e ɓeynguure Yahuwah Alla nden
Si en lootaama maande kisiyee, en tawete e ɓeynguure joggondirnde e nder aduna on fow. Fii kala wonaa men leɲol gootol, meɗen hoolii huunde wootere e meɗen teddini sariyaaji gooti. Janngee Yaaquuba 2:23 e 1 Petruusu 2:17 e yewton fii ngal lanndal :
Ko honno lootegol maande kisiyee battinirta huuwondiral hakkunde goɗɗo e Yahuwah Alla e rewooɓe mo ɓen ?
WOƁƁE GOO NO WI’A : « Mi hebilaaki lootegol maande kisiyee. »
Si ko nii miijorɗon, hiɗon sikki lootegol maande kisiyee ko faandaare nafaynde ?
RAWNOODE
Annabi Iisaa jannuno wonndema almasiiyaaɓe ɓen no haani looteede maande kisiyee. Fii laatingol nden faandaare, ontigi no haani gomɗinde Yahuwah Alla fota, wuurugol e hoore jokkugol laawi makko ɗin e okkugol mo ngurndan mun ɗan.
Ndartannde
Ko honɗun woni lootegol maande kisiyee e fii honɗun ɗun no hitti ?
Ko honno okkitirgol Alla ngurndan mun ɗan e lootegol maande kisiyee yaadiri ?
Ko honɗun goɗɗo haani waɗude ado o okkude Alla ngurndan makko ɗan e o looteede maande kisiyee ?
TASKEE
Anndee ko woni lootegol maande kisiyee e ko wonaa lootegol maande kisiyee.
« Ko honɗun woni lootegol maande kisiyee ? » (Winndannde ka jw.org)
Waajuuji selluɗi wallayɗi on haa looteɗon maande kisiyee.
Janngee no gorko goo fewjiri lootegol maande kisiyee hara wonaa e hoore jiɲere tun.
« Ɓe faalano yo mi anndan hoore an goonga on » (Suudu Aynirdu ndun, 1 feeburuyee 2013)
Ndaaree fii honɗun lootegol maande kisiyee ko faandaare moƴƴunde e honno hebilortoɗon fii mun.
a Si goɗɗo lootaama maande kisiyee e nder diina goo, haray himo haani looteede kadi. Fii honɗun ? Ɓay kan diina jannataa goonga wonɗo on ka nder Deftere Alla (ndaaree Kuuɗe sahaabaaɓe ɓen 19:1-5 e toɓɓere 13).