TOƁƁERE 49
Ko honno ɓeynguure mon nden heɓirta weltaare ? (Senngo 1)
Jommbindirɓe ko neeɓaali no tanƴinii weltaare nde ɓe heɓi nden ɲannde ɓe jommbindiri luttay haa poomaa. E hiɓe waawi heɓude ɗun. Almasiiyaaɓe jommbindirɓe ko neeɓi e wakkiliiɓe huutorgol waajuuji Deftere Alla nden no anndi ɗun no waawi wonude.
1. Ko honɗun Deftere Alla nden waajii moodiɓɓe ɓen ?
Ko Yahuwah Alla waɗi moodibbo on wonugol hoore ɓeynguure makko nden (janngee Efeesi 5:23). Yahuwah Alla no habborii moodibbo on fewjugol ko nafata ɓeynguure nden. Deftere Alla nden no waajii moodiɓɓe ɓen « mo kala e mon yo yiɗu sonnaajo mun » (Efeesi 5:25). Ko honɗun ɗun firi ? Moodibbo yiɗuɗo ɓeyngu mun dankorto mo no moƴƴiri ka suudu e ka yaasi. O dannday mo e o wakkiloto waɗangol mo kala ko o hatonjini e ko weltinta mo ɓernde (1 Timotee 5:8). Ko ɓuri hittude kon kadi, o wallay ɓeyngu makko ɓurta badaade Alla (Matta 4:4). E piide misal, o toroto Alla e o janngiday e ɓeyngu makko Deftere Alla nden. Si moodibbo on dankike ɓeyngu mun e hoore giggol, o tiiɗinay weldigal makko ngal e Yahuwah Alla (janngee 1 Petruusu 3:7).
2. Ko honɗun Deftere Alla nden waajii sonnaaɓe ɓen ?
Deftere Alla nden wi’i yo sonnaajo on « teddin moodi mun » (Efeesi 5:33). Ko honno o gerdirta ɗun ? Himo waawi miijaade fii sifaaji moodi makko moƴƴuɗi ɗin e no o wakkilorii dankagol mo kanko e ɓiɓɓe ɓen. Himo waawi kadi teddinde ko o fewjata kon e yewtira mo no moƴƴiri, hay si o wonaa rewoowo Yahuwah Alla.
3. Ko honno jommbindirɓe tiiɗinirta dewgal maɓɓe ngal ?
Deftere Alla nden wi’i fii jommbindirɓe « kamɓe ɗiɗo ɓe wona gooto » (Matta 19:5). Ɗun no firi hiɓe haani wakkilaade moƴƴa selugol kala ko woɗɗindinta ɓe. Ɓe waɗiray ɗun e hoore feƴƴindingol saa’i e ɓe yewtay fii ko ɓe miijii e ko ɓe faalaa e hoore giggol. Ɓe accataa hay huunde maa hay gooto, si wonaa Yahuwah Alla, ɓura moodibbo on maa sonnaajo on hittude. E hiɓe haani wattande yila fii wota ɓe heɓu weldiiɗo hiɓɓuɗo ɓuri moodibbo on maa sonnaajo on.
LUGGINEE
Ndaaree tugaale Deftere Alla nden waawayɗe tiiɗinde dewgal mon ngal.
4. Moodibbo : ƴiɗee sonnaajo mon on e dannkoɗon mo
Deftere Alla nden wi’i yo moodibbo on « yiɗir sonnaajo mun on wa hoore mun » (Efeesi 5:28, 29). Ko honɗun ɗun firi ? Fijinee VIDIO on e yewton fii lanndal jokkitungal ngal.
Ko e ɓaŋŋe honɗe moodibbo on hollata himo yiɗi sonnaajo makko on e himo dankii mo ?
Janngee Koloosi 3:12 e yewton fii ngal lanndal :
Ko honno moodibbo on hollirta ɗii sifaaji ka dewgal makko ?
5. Sonnaajo : yiɗee moodibbo mon on e teddinon mo
Deftere Alla nden wi’i yo sonnaajo on teddin moodibbo makko on, hay si tawii hinaa rewoowo Yahuwah Alla. Janngee 1 Petruusu 3:1, 2 e yewton fii ɗee lanndaale :
Si tawii moodibbo mon on wonaa Seedeejo Yahuwah, haray hiɗon faalaa ɲannde goo yo o rewu Yahuwah Alla. E miijo mon, ko honɗun ɓurata mo wallude ? Ko waajagol mo saa’iiji ɗin fow kaa ko hollugol mo jikku moƴƴungu e teddungal ? Fii honɗun ?
Moodibbo e ɓeyngu mun no waawi fottude e ko ɓe fewjata kon. Kono wonnde, sonnaajo on jaɓataa ko moodi makko fewjata kon. Si ko non woniri, o yewtiray mo doy e hoore teddungal ko o miijii kon. Kono himo haani anndude ko moodi makko Yahuwah Alla waɗi hoore ɓeynguure nden fii fewjugol ko moƴƴi. Himo haani wakkilaade moƴƴa fii tawtugol moodi makko e ko o fewjata kon. Si o waɗii ɗun, o wallay ɓeynguure makko nden heɓugol weltaare. Janngee 1 Petruusu 3:3-5 e yewton fii ngal lanndal :
Ko honno Yahuwah Alla miijortoo fii sonnaajo teddinoowo moodi mun ?
6. Ko honno jittirton satteendeeji ka dewgal mon ?
Alaa dewgal ngal aldaa e annde. Ko ɗun waɗi, jommbindirɓe ɓen no haani gollidude moƴƴa fii jittugol satteendeeji maɓɓe ɗin. Fijinee VIDIO on e yewton fii lanndaale jokkituɗe ɗen.
E nder vidio on, ko honɗun holli moodibbo on e sonnaajo mun on no woɗɗondirde ?
Ko honɗun ɓe waɗi fii tiiɗingol dewgal maɓɓe ngal ?
Janngee 1 Korenti 10:24 e Koloosi 3:13. Si on janngii aaya kala, yewtee fii ngal lanndal :
Ko honno huutorgol nguu waaju tiiɗinirta dewgal mon ngal ?
Deftere Alla nden wi’i mo kala no haani teddinde oya. Ko tawaa e teddingol ko jogorgol ontigi no moƴƴiri e hoore teddungal. Janngee Roomu 12:10 e yewton fii lanndaale jokkituɗe ɗen.
No haani ka jommbindirɓe habbo haa ka moodibbo on maa sonnaajo on ado teddinde oya ? Fii honɗun ?
WOƁƁE GOO NO WI’A : « Min e moodi an maa ɓeyngu an, men hiɓɓondiraa wano men woowirnoo non. »
Si goɗɗo haalani on ɗun, ko honno hollirton mo Deftere Alla nden waaway mo wallude ka dewgal makko ?
RAWNOODE
Moodibbo on e sonnaajo on waaway heɓude weltaare si hiɓe yiɗindiri, si hiɓe teddindiri e si ɓe huutorii tugaale Deftere Alla nden.
Ndartannde
Ko honno moodibbo on waɗirta fii no weltaare heɓora ka dewgal makko ?
Ko honno sonnaajo on waɗirta fii no weltaare heɓora ka dewgal makko ?
Si tawii hiɗon jommbi maa hiɗon jommbaa, ko tugalal Deftere Alla honngal wallata on tiiɗingol dewgal mon ngal ?
TASKEE
Anndee piiji ko wallata on heɓugol weltaare ka ɓeynguure mon.
Ndaaree vidio hollayɗo baraaji huutorgol waajuuji Alla ɗin ka dewgal mon.
Anndee ko honɗun firi yankinanagol moodi mon wa hooreejo ɓeynguure nden.
« Rewɓe, fii honɗun yankinantoɗon hooreejo ɓeynguure nden ? » (Suudu Aynirdu ndun, 15 mee 2010)
Ko honno moodibbo e sonnaajo mun jittirnoo satteendeeji tiiɗuɗi (seedigal maɓɓe no tawaa) ?