Ko honno tugaale Deftere Allah nden nafirta en ?

1. Fii honɗun tagaaɗo no haani ɗoweede ?

Taguɗo en on no ɓuri en faamu. Wa baaba wonduɗo e giggol, Allah no dankii en. O tagiraa en fii yo en wonan hoore men (Yeremiiya 10:23, TMN). Wano paykun haani ɗowireede mawɓe mun ɓen, ko non Allah ɗowirta en (Isaaya 48:17, 18, TMN). Tugaale Deftere Allah nden no holli en laawol moƴƴungol. — Janngee 2 Timotee 3:16.

Sariyaaji e tugaale Yahuwah ɗen no jannude en ko ɓuri en moƴƴande e no holli en honno heɓirten moƴƴere janngo. Hiɗen haani jokkude sariyaaji e tugaale Allah ɗen ɓayri ko kanko tagi en. — Janngee Zabuura 19:7, 11, TMN ; Feɲɲinannde 4:11.

2. Honɗun woni tugaale Allah ɗen ?

Tugaale Allah ɗen ko haqiiqa. Hiɗe serti e sariyaaji (Kuuɗe sahaabaaɓe ɓen 15:29). Hiɗen haani faamude honno huutortoɗen tugaale Allah ɗen e saa’iiji ɗin fow (Tindi 2:10-12, TMN). Wano ko Deftere Allah nden wi’i kon, ngurndan ko dokkal Allah. Ngal tugalal ɗoway en ka golle, ka suudu e ka yaadu. Ɗun wallay en fii no dankoroɗen hoore men. — Janngee Kuuɗe sahaabaaɓe ɓen 17:28.

3. Ko tugaale honɗe ɓuri hittude ?

Annabi Iisaa holluno tugaale ɗiɗi ɓurɗe hittude. Tugalal aranan ngal no holli fanndaare fii ngurndan tagaaɗo — fii anndugol Allah, yiɗugol mo e rewugol mo no laaɓiri. Ngal tugalal no haani en ɗowude e ko waɗeten kon fow (Tindi 3:6, TMN). Ɓee wonuɓe huutoraade ngal tugalal, heɓoyay moƴƴere e ngurndan poomayankejan. — Janngee Matta 22:36-38.

Tugalal ɗimmal ngal wallay en no weldiren e fow e nder ɓuttu (1 Korenti 13:4-7). Huutorgol ngal tugalal ɗimmal, wallay en jogaade yimɓe no Allah jogorii ɓe non. — Janngee Matta 7:12 ; 22:39.

4. Honno tugaale Allah ɗen nafirta en ?

Tugaale Allah ɗen no wallude ɓeynguureeji no ɓe yiɗindira e no ɓe fottira (Koloosi 3:12-14). Deftere Allah nden no jannude en tugalal goo fii dewgal — ko fii dewgal ko haa poomaa. — Janngee Fuɗɗooɗe nden 2:24.

Si en jokki ko Deftere Allah nden janni en kon, en waaway danndugol dewgal men. Wano si hiɗen gollande goɗɗo e nder peewal e wakkilaare, mo wonuɗen gollande on weltanto en (Tindi 10:4, 26, TMN ; Yahuudiyankeeɓe 13:18). Deftere Allah nden no janni en kadi weltoragol ko maruɗen e yiɗen Allah ɓuri fow. — Janngee Matta 6:24, 25, 33 ; 1 Timotee 6:8-10.

Jokkugol sariyaaji Allah ɗin dannday en hay fii cellal men (Tindi 14:30 ; 22:24, 25, TMN). Wano si en ɗoftike ko Allah daalani en kon fii beere, ɗun dannday en fii ɲabbeeli e albala’u (Tindi 23:20, TMN). Yahuwah toŋaa yarugol beere, kono hinaa yo en manndilu (Zabuura 104:15, TMN ; 1 Korenti 6:10). Sariyaaji Allah ɗin nafay en ɓayri no holli en ko haanuɗen waɗude e miijaade (Zabuura 119:97-100, TMN). Hinaa fii sariyaaji Allah ɗin no nafi en ɗoftortoɗen mo, kono ko fii teddingol mo wonuɗen ɗoftoraade mo. — Janngee Matta 5:14-16.