Honno ɓadortoɗen Allah ?

1. Ko toraare hommbo Allah heɗitoto ?

Allah no faalaa yo yimɓe ɓen fow e oo aduna yo toro mo (1 Yuuhanna 5:14). Kono hinaa toraare mo kala o heɗitoto. Wano gorko tampinoowo ɓeyngu mun, Allah heɗotaako toraare makko (1 Petruusu 3:7). Kadi, ko Banii-Isra’iila ɗoftanooki Allah, o heɗitanooki toraare maɓɓe. Hiɗen haani toraade Allah e hoore teddungal fii yo o heɗito en. Hay bonɓe si acci kuuɗe maɓɓe bonɗe, Allah heɗitoto ɓe. — Janngee Isaaya 1:15, TMN ; Kuuɗe sahaabaaɓe ɓen 3:19.

2. Honno torortoɗen Allah ?

Toragol Allah ko rewugol mo. Ko ɗun waɗi, ko Yahuwah taguɗo on tun haanuɗen rewugol (Matta 4:10 ; 6:9). Ɓayri hiɗen wondi e junuubu, si hiɗen toraade Allah, hiɗen haani tororaade mo e innde Iisaa ɓayri o maayuno fii junuubaaji men ɗin (Yuuhanna 14:6). Yahuwah faalaaka yo en hunjo haalaaji winndaaɗi si hiɗen toraade mo. Himo faalaa yo toraare men nden iwru ka ɓerɗe men. — Janngee Matta 6:7 ; Filipii 4:6, 7.

Taguɗo on heɗitoto hay toraare sownditaande (1 Samu’iila 1:12, 13, TMN). Himo faalaa yo en toro mo saa’iiji ɗin fow, bimmbi, kiikiiɗe, si hiɗen ɲaamude maa si hiɗen wondi e anndeeji. — Janngee 1 Petruusu 5:7 ; Matta 15:36.

3. Fii honɗun mooɓondiranten ?

Wonugol fee Allah welaa fii ɓayri hiɗen wondi e yimɓe ɓe ɗoftaaki Allah e ɓe hoolaaki ko Allah fodi en kon fii anndugol ɓuttu e hoore ndii leydi (2 Timotee 3:1, 4 ; 2 Petruusu 3:3, 13). Ko ɗun waɗi, hiɗen haani mooɓondirde fii wakkilagol ka giggol e ka kuuɗe moƴƴe. — Janngee Yahuudiyankeeɓe 10:24, 25.

Jokkugol rewooɓe Allah ɓen wallay en no jokkiren laawol Allah ngol. Mooɓondiral Seedeeɓe Yahuwah ɓen wallay en no ɓeydiren gomɗinde. — Janngee Roomu 1:11, 12.

4. Honno ɓadortoɗen Allah ?

Hiɗen waawi ɓadaade Allah si en annditi ko jannguɗen kon ka nder Deftere makko : golle makko ɗen, waaju makko ngun e ko o fodi en kon. Annditugol mo ngol e toraare men nden, wallay en no anndiren giggol makko e faamu makko. — Janngee Yaasuwa 1:8, TMN ; 1 Timotee 4:15, 16.

Hiɗen waawi ɓadaade Allah si hiɗen hoolii mo e si hiɗen gomɗini mo. Gomɗinal men ngal no wa’i wa leggal tutaangal, yarneteengal. Wano non, hiɗen haani yarnude gomɗinal men ngal ko winndii kon ka Deftere Allah fii no ɲiiɓira. — Janngee Matta 4:4 ; Yahuudiyankeeɓe 11:1, 6.

5. Honno ɓadagol Allah nafirta en ?

Yahuwah no danki kala yiɗuɗo mo. O dannday en fii kala ko bonnata gomɗinal men e tanƴinaare men fii moƴƴere men janngo (Zabuura 91:1, 2, 7-10, TMN). Himo waajii en fii piiji ko bonnata cellal men e weltaare men. Yahuwah no jannude en sariyaaji ko weltinta en ɓernde. — Janngee Zabuura 73:27, 28, TMN ; Yaaquuba 4:4, 8.