Fii honɗun Allah woni mooɓindirde jamaa makko on ?

1. Fii honɗun Allah mooɓanno Banii-Israʼiila ?

Allah mooɓindirno geyngol annabi Ibraahiima e o jonni ɓe sariyaaji makko ɗin. O nodduno ɓe Isra’iila, o waɗi ɓe jiyaaɓe makko e o yamiri ɓe yo ɓe ɗofto mo (Zabuura 147:19, 20, TMN). Hara, leƴƴi aduna on fow barkinteno sabu Isra’iila. — Janngee Fuɗɗooɗe nden 22:18.

Allah suɓino Banii-Isra’iila fii yo ɓe wonu seedeeɓe makko. Taariikaaji maɓɓe ɗin no holli en ɗoftagol Allah no wondi e nafa (Yaɲɲannde sariyaaji ɗin 4:6, TMN). Sabu Banii-Isra’iila, yimɓe heddiiɓe ɓen anndayno Allah. — Janngee Isaaya 43:10, 12, TMN.

2. Fii honɗun rewooɓe Allah ɓen no haani mooɓondirde ?

Banii-Isra’iila faɗuno yeɗoore Yahuwah nden ɓayri ɓe ɗoftanooki mo. Sabu ɗun Allah wattitiriɓe e moftal Almasiiyaaɓe ɓen (Matta 21:43 ; 23:37, 38). Ko ɗun waɗi, hannde ko rewooɓe Allah ɓen no haaniri non woni seedeeɓe makko. — Janngee Kuuɗe sahaabaaɓe ɓen 15:14, 17.

Annabi Iisaa yamirno taalibaaɓe makko ɓen yo ɓe waajo, ɓe waɗa leƴƴi ɗin fow taalibaaɓe (Matta 10:7, 11 ; 24:14 ; 28:19, 20). Hannde ɗee golle no e fii lannugol. Gila ka fuɗɗoode, ko e oo saa’i ɗoo Yahuwah mooɓindiri yimɓe leƴƴi ɗin fow fii yo ɓe rewu mo (Feɲɲinannde 7:9 10). Rewooɓe Allah ɓen no mooɓondirde fii jokkugol enɗan e wallindirgol. E nder aduna on fow, ko huunde wootere ɓe woni janngude ka fottirde maɓɓe. — Janngee Yahuudiyankeeɓe 10:24, 25.

3. Ko saa’i hommbo Seedeeɓe Yahuwah ɓen fuɗɗi mooɓondirde ?

Ndee hitaande 1870, mojobere’hun janngooɓe Deftere Allah nden fuɗɗino felsugol goonga daaluyee Allah on. Ɓe faamuno yamiroore annabi Iisaa nden fii waajagol kibaaru moƴƴo Laamu Allah ngun e nder aduna on fow. Ko sabu ɗun ɓe fuɗɗi waajaade oo kibaaru moƴƴo. E ndee hitaande 1931 ɓe nodda Seedeeɓe Yahuwah. — Janngee Kuuɗe sahaabaaɓe ɓen 1:8 ; 2:1, 4 ; 5:42.

4. Ko honno Seedeeɓe Yahuwah ɓen woniri ?

Ka teeminannde aranere, moftal Almasiiyaaɓe ɓen saakitino e nder aduna on fow e ɓe nafitori ganndal ɓee hikkiiɓe ka fewjoore. Ɓe annduno ko annbi Iisaa woni hooreejo moftal ngal (Kuuɗe sahaabaaɓe ɓen 16:4, 5). Ko wano non hannde, Seedeeɓe Yahuwah ɓen no nafitorde ganndal ɓee hikkiiɓe ka fewjoore. Ɓee hikkiiɓe ka fewjoore no aynude mojobere kippunde fii golle waajotooɓe, waylooɓe e sennditooɓe defte cewɗe e nder haalaaji ko ɓuri 600. Hikkiiɓe ka fewjoore ɓen no wallitaade ɓe, wi’a yo ɓe ɓeydu wakkilaare fii ɗowugol rewooɓe Allah ɓen wonuɓe e mofte ko ɓuri 100 000 e nder aduna on fow. Moftal kala no mari yeesooɓe. Ɓen yeesooɓe no kippi fii moftal Allah ngal e hoore giggol. — Janngee 1 Petruusu 5:2, 3.

Seedeeɓe Yahuwah ɓen no waajaade oo kibaaru moƴƴo fii Laamu Allah ngun. Wano sahaabaaɓe ɓen, hiɓe waajaade suudu e suudu (Kuuɗe sahaabaaɓe ɓen 20:20). Ɓe jannude yimɓe no ɓe faamira Deftere Allah nden. Seedeeɓe Yahuwah ɓen no wa’i wa ɓeynguure, nde nene gooto e baaba gooto. Hiɓe dankondiri, hiɓe yurmondiri (2 Tesalonii 1:3). Seedeeɓe Yahuwah ɓen no wondi e welo welo ɓayri hiɓe waɗude faale Allah on fii wallitagol yimɓe. — Janngee 1 Petruusu 2:9 ; Kuuɗe sahaabaaɓe ɓen 20:35.